គណបក្សភ្លើងទៀនផ្អាកដាក់លិខិតស្ដីពីការធ្វើបាតុកម្មដោយសន្តិវិធីសិន ប៉ុន្តែ គណបក្សនេះនៅតែរក្សាជំហរប្រមូលផ្ដុំកម្លាំងតស៊ូមតិដដែល ដើម្បីទាមទារឱ្យគណបក្សនេះអាចចូលរួមការបោះឆ្នោត ខែកក្កដា ខាងមុខនេះ។ មន្ត្រីបក្សកាន់អំណាច ថា គណបក្សប្រឆាំងមិនអាចរំខានដំណើរការបោះឆ្នោតមិនឱ្យដើរទៅមុខបានទេ។
គម្រោងដែលគណបក្សភ្លើងទៀន ដាក់លិខិតទៅក្រសួងមហាផ្ទៃ និងសាលាក្រុងភ្នំពេញ ធ្វើបាតុកម្មនៅទីលានប្រជាធិបតេយ្យមានដែលមានការប្រមូលផ្ដុំសកម្មជនគណបក្សនេះជាង ១ម៉ឺននាក់ ត្រូវបានគេលើកពេលដោយមិនកំណត់ថ្ងៃ។
លោក រ៉ុង ឈុន អនុប្រធានគណបក្សភ្លើងទៀន ឱ្យវិទ្យុអាស៊ីសេរីដឹងថ្ងៃទី២ ខែមិថុនា ថា មតិភាគច្រើនរបស់ថ្នាក់ដឹកនាំគណបក្សភ្លើងទៀន ស្នើឱ្យលើកពេលនៃការដាក់លិខិតធ្វើបាតុកម្មនេះសិន។ លោកថា ពេលនេះលោកមិនទាន់ដឹងថា គម្រោងដាក់លិខិតនឹងត្រូវធ្វើនៅពេលណានោះទេ។ ទោះបែបនេះ លោក រ៉ុង ឈុន នៅតែយល់ថា ការតស៊ូមតិជាជម្រើសដែលអាចខ្វះបានក្នុងទាមទារឱ្យគណបក្សមានសិទ្ធិចូលរួមការបោះឆ្នោតនាពេលខាងមុខ។
លោក រ៉ុង ឈុន៖ «បើថ្នាក់ដឹកនាំដែលមានសំឡេងភាគច្រើនស្នើលើកពេល ត្រូវតែលើកពេលហើយ ពីព្រោះធម្មតានៅក្នុងរបបប្រជាធិបតេយ្យត្រូវគោរពសំឡេងភាគច្រើន ហើយយើងនឹងជូនដំណឹងបន្តបន្ទាប់ទៀតនៅពេលដាក់លិខិតស្នាមនៅសប្ដាហ៍ក្រោយអី»។
កាលពីថ្ងៃទី២៨ ខែឧសភា គណៈកម្មាធិការនាយកនៃគណបក្សភ្លើងទៀនសម្រេចថា នឹងធ្វើការប្រមូលផ្ដុំសមាជិកបក្សចំនួន ១ម៉ឺន ដើម្បីតវ៉ាទាមទារឱ្យគណៈកម្មាធិការជាតិរៀបចំការបោះឆ្នោត ផ្ដល់សិទ្ធិឱ្យគណបក្សនេះអាចចូលរួមប្រកួតប្រជែងក្នុងការបោះឆ្នោតនៅខែកក្កដាខាងមុខ។ ទោះយ៉ាងណា ក្រោយពីលោកនាយករដ្ឋមន្ត្រី ហ៊ុន សែន ព្រមានវាយខ្នោះមេដឹកនាំគណបក្សភ្លើងទៀន និងអ្នកគាំទ្រគណបក្សនេះ បើហ៊ានធ្វើបាតុកម្ម គណបក្សនេះហាក់ដកឃ្លាវិញសិន។
បើទោះជាមតិភាគច្រើនក្នុងបក្សភ្លើងទៀន សម្រេចចិត្តបែបនេះក្ដី ប៉ុន្តែ លោក រ៉ុង ឈុន នៅតែយល់ថា ក្នុងស្ថានភាពដូចសព្វថ្ងៃនេះ បើគ្មានការប្រមូលផ្ដុំតស៊ូមតិទេ គឺមិនអាចធ្វើឱ្យគណបក្សភ្លើងទៀនអាចចូលរួមការបោះឆ្នោតបានទេ។ ទោះបែបនេះក្ដី លោកថា ការសម្រេចចិត្តរបស់លោកធ្វើការទាមទារអ្វីមួយ គឺត្រូវគោរពការសម្រេចចិត្តរបស់គណបក្សជាមុនសិន។
លោក រ៉ុង ឈុន៖ «មិនធ្វើសោះពិតតែសូន្យមិនមានទទួលបានអ្វីទាំងអស់ ប៉ុន្តែបើសិនជាយើងធ្វើយើងអាចមានជម្រើសពីរ ជម្រើសមួយអត់ ជម្រើសមួយទៀតបានដំណោះស្រាយដូច្នេះយើងមិនអាចនៅស្ងៀមដោយនៅចាំទទួលយកនូវអ្វីដែលគេដាក់ឱ្យយើងលើកពាននោះទេ បើយើងមិនធ្វើសកម្មភាពមិនធ្វើអ្វីសោះ»។
ឆ្លើយតបការលើកឡើងនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន នៅតែចោទប្រកាន់ថា គណបក្សភ្លើងទៀន មិនអាចចូលរួមការបោះឆ្នោតជាតិខាងមុខ បណ្ដាលមកពីកំហុសរបស់គណបក្សនេះ។ អ្នកនាំពាក្យគណបក្សកាន់អំណាចរូបនេះ បន្តថា បើទោះជាគណបក្សភ្លើងទៀន ទាមទារក្នុងរូបភាពបែបណាក្ដី ក៏គ.ជ.ប មិនអាចវិលបកថយក្រោយ មកចុះឈ្មោះឱ្យគណបក្សនេះដែរ ព្រោះពេលនេះនីតិវិធីនៃការរៀបចំការបោះឆ្នោតកាន់តែឆ្ពោះទៅមុខទៅហើយ។
លោក សុខ ឥសាន៖ «ការបោះឆ្នោតដែលមានគណបក្សទាំង១៨នឹងដំណើរការប្រព្រឹត្តទៅដោយរលូន ស្របទៅតាមកម្មវិធីការងារដែលបានកំណត់ ដូច្នេះអត់មានអីបកក្រោយទេ ភ្លើងទៀននិយាយនេះដូចជាឱ្យបកក្រោយហើយរឿងកំហុសខ្លួនឯងចង់យកអ្នកដទៃមកធ្វើកំហុសជាមួយម៉េចកើត»។
បើទោះជាមន្ត្រីបក្សកាន់អំណាចអះអាងបែបនេះក្ដី តែមន្ត្រីសិទ្ធិមនុស្ស និងមន្ត្រីបក្សភ្លើងទៀន លើកឡើងថា នីតិវិធីនៃការបោះឆ្នោតនេះ គឺមនុស្សជាអ្នករៀបចំទេ ដូច្នេះ បើគ.ជ.ប ឬរដ្ឋាភិបាល គិតគូរពីប្រយោជន៍ជាតិវែងឆ្ងាយ គួរមានការជជែកគ្នាឡើងវិញដើម្បីអាចឱ្យគណបក្សភ្លើងទៀនអាចចូលរួមក្នុងការបោះឆ្នោតថ្ងៃទី២៣ ខែកក្កដា។
ប្រធានអង្គការសម្ព័ន្ធភាពការពារសិទ្ធិមនុស្សកម្ពុជា ហៅកាត់ថា ច្រាក់ (CHRAC) លោក រស់ សុដ្ឋា នៅតែជំរុញទៅរដ្ឋាភិបាល និងគ.ជ.ប គួរតែដោះស្រាយបញ្ហាដោយសន្តិវិធី និងដោយគោរពសិទ្ធិមនុស្ស។ មន្ត្រីសិទ្ធិមនុស្ស ចង់ឃើញរដ្ឋាភិបាល គួរស្ដាប់មតិប្រតិកម្មរបស់ពលរដ្ឋ សហគមន៍អន្តរជាតិ និងប្រមុខអង្គការសហប្រជាជាតិដែលរិះគន់ការមិនអនុញ្ញាតឱ្យគណបក្សភ្លើងទៀនចូលរួមការបោះឆ្នោតខាងមុខនេះ។
លោក រស់ សុដ្ឋា៖ «ដោះស្រាយបញ្ហាទៅវិញទៅមកបាទ ព្រោះជាបញ្ហាខ្មែរទាំងអស់គ្នាមិនមែនជាបញ្ហាភ្លើងទៀន ឬក៏មិនមែនរបស់អ្នកណាទេ គឺជាបញ្ហារបស់ខ្មែរយើង យើងអង្គុយទៅយើងដាក់ធុរៈមានន័យថា យើងលះបង់នូវគេហៅថា បញ្ហា ហើយយើងយកដំណោះស្រាយមកវិញ យើងកុំវាយទៅលើគណបក្សយើងវាយទៅលើបញ្ហាជាក់ស្ដែងបញ្ហាកម្ពុជាយើងគឺបញ្ហាអ្វី បញ្ហារបស់កម្ពុជាយើងគឺទំនាស់នយោបាយរវាងខ្មែរ និងខ្មែរយូរឆ្នាំមកហើយ ហើយអ្វីដែលយើងត្រូវការគឺសុខសន្តិភាពយូរអង្វែង និងការអភិវឌ្ឍកេរ្តិ៍ឈ្មោះ»។
គណៈកម្មាធិការជាតិរៀបចំការបោះឆ្នោត (គ.ជ.ប) និងក្រុមប្រឹក្សាធម្មនុញ្ញ សម្រេចមិនអនុញ្ញាតឱ្យគណបក្សភ្លើងទៀន ដែលមានអ្នកគាំទ្រជិត២លាននាក់ មានសិទ្ធិចូលរួមការបោះឆ្នោតថ្ងៃទី២៣ ខែកក្កដា បានទេ ព្រោះគណបក្សនេះបាត់បង់ឯកសារដើមនៃការចុះបញ្ជីគណបក្ស ឬហៅថា សំបុត្រកំណើត បើទោះជាក្រសួងមហាផ្ទៃបញ្ជាក់ថា គណបក្សនេះបានចុះបញ្ជីស្របច្បាប់នៅក្រសួងមហាផ្ទៃរួចរាល់ហើយក្ដី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។