គណបក្ស​ភ្លើង​ទៀន​ថា ការ​បង្ក​ការ​លំបាក នៃ​ការ​ផ្លាស់ប្ដូរ​សមាជិក​ក្រុម​ប្រឹក្សា​ឃុំ-សង្កាត់ ធ្វើ​ឱ្យ​ការ​បោះឆ្នោត​ខាង​មុខ​មិន​សេរី និង​យុត្តិធម៌

ដោយ ខាន់ លក្ខិណា
2024.03.18
គណបក្ស​ភ្លើង​ទៀន​ថា ការ​បង្ក​ការ​លំបាក នៃ​ការ​ផ្លាស់ប្ដូរ​សមាជិក​ក្រុម​ប្រឹក្សា​ឃុំ-សង្កាត់ ធ្វើ​ឱ្យ​ការ​បោះឆ្នោត​ខាង​មុខ​មិន​សេរី និង​យុត្តិធម៌ (រូបពីឆ្នាំទៅឆ្វេងទី៣) លោក លី សុធារ៉ាយុត្តិ ក្នុងសន្និសីទសារព័ត៌មាន នៅទីស្នាក់ការគណបក្ស រួមគ្នាជាមួយគណបក្ស ឆន្ទៈខ្មែរ នៅ​ព្រឹកថ្ងៃទី១៨ ខែមីនា ឆ្នាំ២០២៤ លទ្ធផលនៃការចុះបញ្ជីគណបក្សនយោបាយ និងបេក្ខជន​ឈរឈ្មោះ សម្រាប់ការបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុង-ស្រុក-ខណ្ឌ អាណត្តិទី៤។
រូប៖ ហ្វេសប៊ុកគណបក្ស​ភ្លើងទៀន/2024-03-18

មន្ត្រី​គណបក្ស​ភ្លើង​ទៀន​និយាយ​ថា ការ​បង្ក​ការ​លំបាក​នៃ​ការ​ផ្លាស់ប្ដូរ​សមាជិក​ក្រុម​ប្រឹក្សា​ឃុំ-សង្កាត់ ដែល​ជា​អង្គ​បោះ​ឆ្នោត នឹង​ធ្វើ​ឱ្យ​ការ​បោះឆ្នោត​អសកល ជ្រើស​រើស​ក្រុម​ប្រឹក្សា​រាជធានី-ខេត្ត-ក្រុង-ស្រុក-ខណ្ឌ នៅ​ពេល​ខាង​មុខ នឹង​មិន​សេរី និង​យុត្តិធម៌​ឡើយ។ អ្នក​ឃ្លាំមើល​ការ​បោះ​ឆ្នោត​ថា ក្រសួង និង​អាជ្ញាធរ​ពាក់ព័ន្ធ គួរ​ឆ្លើយ​តប​សំណើ​របស់​បក្ស​ប្រឆាំង។

អគ្គលេខាធិការ​គណបក្ស​ភ្លើង​ទៀន លោក លី សុធារ៉ាយុត្តិ ប្រាប់​វិទ្យុ​អាស៊ី​សេរី​ នៅ​ថ្ងៃ​ទី១៨ មីនា ថា គណបក្ស​ភ្លើង​ទៀន បាន​ស្នើ​ទៅ​ក្រសួង​មហាផ្ទៃ និង​អាជ្ញាធរ ដើម្បី​សុំ​ផ្លាស់​ប្ដូរ​សមាជិក​ក្រុម​ប្រឹក្សា​ឃុំ-សង្កាត់ ចំនួន ៣៥រូប ប៉ុន្តែ​រយៈ​ពេល ៦ខែ​ហើយ នៅ​តែ​មិន​អាច​ផ្លាស់​ប្ដូរ​បាន ទោះបីជា​គណបក្ស​នេះ បាន​ដាក់​លិខិត​ទៅ​ក្រសួង​រួច​ហើយ​ក៏​ដោយ។

លោក​ថា ការ​ស្នើ​សុំ​ផ្លាស់​ប្ដូរ​នោះ ដោយសារ​តែ​ក្រុម​ប្រឹក្សា​ឃុំ-សង្កាត់​មួយ​ចំនួន លាលែង​ចេញ​ពី​សមាជិក​គណបក្ស ហើយ​មួយ​ចំនួន​ទៀត ទទួល​អនិច្ចកម្ម និង​មួយ​ចំនួន​ផ្សេង​ទៀត ត្រូវ​បាន​គណបក្ស​ភ្លើង​ទៀន បញ្ចប់​សមាជិក​ភាព​ជា​ដើម។

លោក​ទទូច​ទៅ​ក្រសួងមហាផ្ទៃ ឱ្យ​ពន្លឿន​នីតិវិធី​ផ្លាស់ប្ដូរ​សមាជិក​ក្រុម​ប្រឹក្សា​ឃុំ-សង្កាត់ តាម​សំណើ​របស់​គណបក្ស​នយោបាយ ពីព្រោះ​ការ​យឺតយ៉ាវ​នេះ នឹង​ប៉ះពាល់​ដល់​អង្គ​បោះ​ឆ្នោត និង​សិទ្ធិ​របស់​គណបក្ស ហើយ​ក៏​បង្ហាញ​ពី​ការ​អនុវត្ត​ច្បាប់​មាន​ស្តង់ដារ​ពីរ​ផង​ដែរ។

លោក លី សុធារ៉ាយុត្តិ៖ «យើង​បាន​ផ្ញើ​លិខិត​មួយ​ទៅ​ក្រសួង​មហាផ្ទៃ​ ស្នើ​សុំ​ឱ្យ​ក្រសួង​មហាផ្ទៃ ជួយ​អន្តរាគមន៍​ពន្លឿន​នូវ​នីតិវិធី​ក្នុង​ការ​ផ្លាស់ប្ដូរ​សមាជិក​ក្រុម​ប្រឹក្សា​ឃុំ-សង្កាត់ ដែល​បាន​ស្នើ​ដោយ​គណបក្ស​ភ្លើង​ទៀន ប៉ុន្តែ​មក​ដល់​ម៉ោង​នេះ គណបក្ស​ភ្លើង​ទៀន​អត់​ទាន់​ទទួល​ការ​ឆ្លើយ​តប​ជា​វិជ្ជមាន​ណា​មួយ​ពី​ក្រសួង​មហាផ្ទៃ​នៅ​ឡើយ​ទេ»

រីឯ​អ្នក​នាំ​ពាក្យ​គណបក្ស​ភ្លើង​ទៀន លោក គីមសួរ ភីរិទ្ធ លើក​ឡើង​ថា ទោះបី​ជា ​ការ​បោះឆ្នោត​នៅ​ពេល​ខាង​មុខ ជា​ការ​បោះ​ឆ្នោត​អសកល​ក៏​ដោយ ប៉ុន្តែ​ការ​ បោះឆ្នោត​នេះ ក៏​មាន​ការ​វាយ​តម្លៃ​ពី​អ្នក​តាម​ដាន​ជាតិ និង​អន្តរជាតិ ទាំង​មុន​ពេល ​និង​ទាំង​ដំណើរ​ការបោះឆ្នោត​ដែរ។ ដូច្នេះ ក្រសួង​មហាផ្ទៃ គួរ​ពន្លឿន​ការ​ផ្លាស់ប្ដូរ​អង្គ​បោះឆ្នោត​មក​ពី​បក្ស​ប្រឆាំង ឱ្យ​បាន​ឆាប់រហ័ស​តាម​ការ​ស្នើ​សុំ។

លោក គីមសួរ ភីរិទ្ធ៖ «អ៊ីចឹង​បើ​ការ​ដោះដូរ​នៅ​តែ​មាន​បញ្ហា​ប្រឈម ដោយ​មាន​ការ​រារាំង​បែប​នោះ។ មាន​ន័យ​ថា លទ្ធផល​ការ​បោះ​ឆ្នោត​ខាង​មុខ ក៏​វា​អត់​សេរី និង​យុត្តិធម៌​ដែរ។ ទោះ​បី​សំឡេង​គណបក្ស​និយាយ​ទៅ​តិច ក៏​ប៉ុន្តែ​វា​តម្លៃ​សម្រាប់​សហគមន៍​អន្តរជាតិ។ [...]ប្រទេស​មួយ​នេះ ធ្វើ​ច្បាប់​ហើយ​ប្រកាស​ថា នីតិរដ្ឋ។ តែ​ផ្ទុយ​ទៅ​វិញ នៅ​ពេល​អនុវត្ត ត្រូវ​បាន​បំពាន​តែ​ប៉ុណ្ណឹង​ទេ។ សូម​ឱ្យ​ក្រសួង​មហាផ្ទៃ យក​ចិត្ត​ទុកដាក់​ឡើង​វិញ ចំពោះ​បញ្ហា​នេះ ហើយ​ផ្ដល់​កិច្ចសហការ​ជាមួយ​គណបក្ស​នយោបាយ​ឱ្យ​បាន​ល្អ​ប្រសើរ»

ឆ្លើយ​តប​រឿង​នេះ អ្នក​ពាក្យ​រង​នៃ​ក្រសួង​មហាផ្ទៃ លោក ទូច សុខៈ ប្រាប់​វិទ្យុ​អាស៊ី​សេរី នៅ​ថ្ងៃ​ទី១៨ មីនា ថា ក្រសួង​ធ្វើ​ការងារ គឺ​ទៅ​តាម​ច្បាប់។ លោក​ស្នើ​ទៅ​គណបក្ស​ភ្លើង​ទៀន ឱ្យ​ពិនិត្យ​មើល​សមាសភាព និង​ផ្ទៃក្នុង​របស់​ខ្លួន​ឡើង​វិញ។

លោក ទូច សុខៈ «យើង​មិន​មាន​ចេតនា​ទៅ​រារាំង​ទៅ​ដល់​កិច្ច​ការងារ​របស់​គណបក្ស​នយោបាយ​ណា​ទេ។ បើ​សិន​ជា​រារាំង​មែន មិនមែន​គណបក្ស​នយោបាយ​ថ្មីៗ​ជា​ច្រើន កើត​ចេញ​ពី​ថ្នាក់​ដឹក​នាំ​របស់​គណបក្ស​ប្រឆាំង​មក​បើក ហើយ​ឈរ​ឈ្មោះ​បាន​នោះ​ទេ លើកលែង​តែ​គណបក្ស​ណា​មួយ​ធ្វើ​ខុស​នីតិវិធី មិន​បាន​បំពេញ​លក្ខណៈ​ទៅ​តាម​ច្បាប់​កំណត់​អា​ហ្នឹង គឺ​ជា​រឿង​ច្បាប់​កំណត់ រឿង​មិន​គោរព​តាម​ច្បាប់។ នេះ​ជា​រឿង​មួយ​ដែល​យើង​ត្រូវ​ពិចារណា​ដែរ»

កន្លង​ទៅ មន្ត្រី​មក​ពី​គណបក្ស​ប្រជាជន​កម្ពុជា តាំង​ពី​ថ្នាក់​ឃុំ​រហូត​ដល់​ថ្នាក់​ខេត្ត​តែង​ធ្វើ​ឱ្យ​មាន​ភាព​យឺតយ៉ាវ និង​បង្ក​ការ​លំបាក ចំពោះ​សំណើ​សុំ​ផ្លាស់​ប្ដូរ​សមាជិក​ក្រុម​ប្រឹក្សា​ឃុំ​សង្កាត់​របស់​គណបក្ស​ភ្លើង​ទៀន ហើយ​បើ​ទោះ​ជា​ករណី​ខ្លះ  បក្ស​ប្រឆាំង​បាន​ប្ដឹងផ្ដល់​រហូត​ទៅ​ក្រសួង​មហាផ្ទៃ ក៏​ក្រសួង​គ្មាន​ដំណោះស្រាយ។

ចំពោះ​បញ្ហា​នេះ នាយក​ប្រតិបត្តិ​អង្គការ​និចហ្វិក (NICFEC) លោក សំ គន្ធាមី លើក​ឡើង​ថា ក្រសួង​គួរ​ឆ្លើយតប​សំណើ​របស់​គណបក្ស​នយោបាយ ។

លោក សំ គន្ធាមី៖ «ដល់​អ៊ីចឹង​មិន​ជា​ខ្វះ​ខាត​ចំណុច​ត្រង់​ណា ។ ការ​បំភ្លឺ​របស់​ក្រសួង​មហាផ្ទៃ តើ​គណបក្ស​ភ្លើង​ទៀន​មាន​ចំណុច​ខ្វះខាត​ដូច​ក្រសួង​មហាផ្ទៃ​ថា ទេ? បើ​អ៊ីចឹង​ទេ វា​យ៉ាង​ម៉េច? អី​យ៉ាង​ម៉េច? និយាយ​ឱ្យ​ខ្លី​ភាគី​ទាំង​ពី​រ អ្នក​សុំ អ្នក​រៀបចំ ​ធ្វើ​ការ​ឱ្យ​ស្និទ្ធ​ជាមួយ​គ្នា​ទៅ ឱ្យ​ជាមួយ​គ្នា ដើម្បី​ងាយ​ស្រ័យ»

ការ​បោះឆ្នោត​ជ្រើសរើស​ក្រុម​ប្រឹក្សា​រាជធានី​ខេត្ត ក្រុង ស្រុក ខណ្ឌ នឹង​ប្រព្រឹត្ត​ទៅ នៅ​ថ្ងៃ​ទី២៦ ខែឧសភា។ ការ​បោះឆ្នោត​នេះ មាន​កៅអី​សមាជិក​ក្រុម​ប្រឹក្សា រាជ​ធានី​ខេត្ត​សរុប៥៥៩ និង​កៅអី​សមាជិក​ក្រុម​ប្រឹក្សា ក្រុង-ស្រុក​ខណ្ឌ សរុប ៣.៦៤១ សម្រាប់​គណបក្ស​នយោបាយ​ដណ្ដើម​យក។

ការ​បោះឆ្នោត​នេះ គឺ​ជា​ការ​បោះឆ្នោត​អសកល និង​មិន​ចំពោះ ដោយ​មាន​តែ សមាជិក​ក្រុម​ប្រឹក្សា​ឃុំ-សង្កាត់ ក្នុង​មុខ​តំណែង​សរុប ១១.៦២២នាក់ គឺ​ជា​អ្នក​បោះឆ្នោត។

គណបក្ស​នយោបាយ​ចំនួន៥ បាន​ដាក់​បេក្ខជន​ឈរ​ឈ្មោះ​បោះ​ឆ្នោត​នេះ។ ក្នុង​នោះ មាន​តែ​គណបក្ស​ប្រជាជន​កម្ពុជា​ទេ ដែល​ដាក់​បេក្ខជន​នៅ​គ្រប់​មណ្ឌល នៅ​ទូទាំង​ប្រទេស។ រីឯ​គណបក្ស​ឆន្ទៈ​ខ្មែរ ដែល​តំណាង​ឱ្យ​គណបក្ស​ភ្លើង​ទៀន បាន​ដាក់​បេក្ខជន​របស់​ខ្លួន​នៅ ២៣រាជធានី-ខេត្ត ខណៈ​គណបក្ស​កម្លាំង​ជាតិ ដាក់​បេក្ខជន​ឈរ​ឈ្មោះ​នៅ ២២ រាជធានី-ខេត្ត។ ក្រៅ​ពី​នេះ ក៏​មាន​គណបក្ស​ហ៊្វុនស៊ិនប៉ិច និង​គណបក្ស​ខ្មែរ​រួបរួម​ជាតិ​ចូលរួម​ផង​ដែរ៕

អត្ថបទពេញនិយម
នយោបាយ
ពលករខ្មែរនៅប្រទេសកូរ៉េខាងត្បូងត្រៀមធ្វើបាតុកម្មប្រឆាំងលោក ហ៊ុន ម៉ាណែត
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។