ប្រធានក្រុមអង្គរក្សលោក សម រង្ស៊ី ដែលត្រូវជនមិនស្គាល់មុខលួចវាយគ្រោងស្វែង អន្តរាគមន៍ពីអង្គការសង្គមស៊ីវិលឲ្យជួយឃ្លាំមើលសុវត្ថិភាព ព្រោះលោកមិនសូវជឿលើការអនុវត្តច្បាប់របស់សមត្ថកិច្ចនៃរបបក្រុងភ្នំពេញ។ អ្នកវិភាគថា ករណីបង្កហិង្សាជាបន្តបន្ទាប់លើសកម្មជនគណបក្សប្រឆាំង គឺជារៀបចំរបស់របបក្រុងភ្នំពេញ ដើម្បីគំរាមកំហែងពួកគេ មិនឱ្យចូលរួមអមដំណើរលោក សម រង្ស៊ី វិលចូលស្រុកវិញ នៅដើមខែវិច្ឆិកាខាងមុខ។
ប្រធានក្រុមអង្គរក្សលោក សម រង្ស៊ី លោក ពូក ចន្តា និយាយថា ទោះជាលោកបានប្តឹងទៅសមត្ថកិច្ចមូលដ្ឋានហើយក្តី ក៏លោកយល់ថា ករណីរបស់លោក នឹងមិនខុសពីករណីសកម្មជនគណបក្សសង្គ្រោះជាតិផ្សេងទៀតដែរ គឺមិនដែលឃើញសមត្ថកិច្ចចាប់បានជនដៃដល់យកមកផ្ដន្ទាទោសឡើយ។ លោកបន្តថា ដើម្បីឱ្យកក់ក្ដៅក្នុងចិត្ត លោកនឹងទៅស្វែងរកអន្តរាគមន៍ពីអង្គការសិទ្ធិមនុស្ស ដើម្បីឲ្យជួយឃ្លាំមើលសុវត្ថិភាពរបស់លោក៖ «ខ្ញុំដូចគ្មានជំនឿជាមួយអាជ្ញាធរទេ ខ្ញុំនិយាយត្រង់ ខ្ញុំធ្លាប់គេបោកគ្រាប់បែកដាក់លើខ្ញុំអីដែរ មិនដែលឃើញគេរកឃើញផង ទម្រាំអ៊ីចេះ ទៅរកឯណាឃើញ»។
លោក ពូក ចន្តា ត្រូវជនមិនស្គាល់មុខពីរនាក់យកដំបង ដែកលួចវាយពីក្រោយចំក្បាលបណ្ដាលឲ្យរងរបួសធ្ងន់ កាលពីថ្ងៃទី២២ ខែកញ្ញា។ ហេតុការណ៍នេះបានកើតឡើង នៅពេលលោកដើរពីផ្សារសំដៅទៅផ្ទះ ក្នុងភូមិសាស្ត្រ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ចម្ងាយប្រមាណ ១០០ម៉ែត្រ ពីទីស្នាក់ការគណបក្សសង្គ្រោះជាតិ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការ លីកាដូ (LICADHO) លោក អំ សំអាត និយាយថា អង្គការ លីកាដូ ស្វាគមន៍ការស្វែងរកកិច្ចអន្តរាគមន៍ពីពលរដ្ឋ ដែលមានបញ្ហា និងការរំលោភបំពាននានា។ លោកថា នៅពេលមានជនរងគ្រោះមកពឹងពាក់ និងទទួលបានបណ្ដឹងពីជនរងគ្រោះ អង្គការលីកាដូនឹងតាមឃ្លាំមើលសុវត្ថិភាពរបស់ពួកគេ និងចំណាត់ការស៊ើបអង្កេតរបស់សមត្ថកិច្ច៖ «យើងនឹងឃ្លាំមើលអំពីចំណាត់ការរបស់អាជ្ញាធរថា តើមានការវិវឌ្ឍទៅជាយ៉ាងម៉េចដែរបាទ » ។
នៅរយៈពេលចុងក្រោយនេះ ករណីជនមិនស្គាល់មុខលួចវាយធ្វើបាប សកម្មជនគណបក្សសង្គ្រោះជាតិនៅរាជធានីភ្នំពេញ កើតឡើងជាង ១០ករណីហើយ។ ក្នុងនោះ មានបីករណី ជនប្រព្រឹត្តសុទ្ធតែវាយសំដៅចំក្បាលសកម្មជនគណបក្សសង្គ្រោះជាតិ។ រហូតមកដល់ពេលនេះ សមត្ថកិច្ចរបបក្រុងភ្នំពេញមិនទាន់វែកមុខចាប់បានជនប្រព្រឹត្តណាម្នាក់យកមកផ្ដន្ទាទោសតាមផ្លូវច្បាប់នៅឡើយទេ។
លោក អំ សំអាត យល់ថា បើសមត្ថកិច្ចនៅតែមិនអាចស្វែងរកជនប្រព្រឹត្តមកផ្ដន្ទាទោសបាននោះទេ សាធារណជន នឹងរិះគន់ថា ករណីហិង្សានេះ គឺជាការធ្វើទុក្ខបុកម្នេញ និងជាការគំរាមកំហែងលើសកម្មជនគណបក្សប្រឆាំង។
អ្នកវិភាគបញ្ហានយោបាយលោក គឹម សុខ ដែលហ៊ានរិះគន់លោក ហ៊ុន សែន ឥតសំចៃមាត់ និង បច្ចុប្បន្នកំពុងរស់នៅនិរទេសខ្លួននៅប្រទេសហ្វាំងឡង់ យល់ថា ការបង្កហិង្សាដោយជនមិនស្គាល់មុខមកលើសកម្មជនគណបក្សសង្គ្រោះជាតិជាបន្តបន្ទាប់បែបនេះ គឺជាការរៀបចំរបស់របបក្រុងភ្នំពេញ។ លោកបន្តថា ប្រសិនបើលោក សម រង្ស៊ី ចូលស្រុកដូចការសន្យាមែននោះ សកម្មជនទាំងនោះ គឺជាកម្លាំងយ៉ាងរឹងមាំក្នុងការកៀរគរអ្នកគាំទ្រឲ្យទទួល លោក សម រង្ស៊ី និងការពារលោក សម រង្ស៊ី ដូច្នេះរបបក្រុងភ្នំពេញមិនឲ្យអ្នកទាំងបានសុខនោះទេ៖ «ម៉្លេះហើយផែនការរបស់លោក ហ៊ុន សែន គឺគេខ្ទប់ជាមុនមានន័យថា គ្រាន់តែមានសកម្មភាពពីសកម្មជនគណបក្សប្រឆាំងយើងឃើញមានរឿងប្លែកៗ មួយចំនួន គឺគេខ្ទប់ជាមុនរួចស្រេចហើយ ដើម្បីកុំឲ្យសកម្មភាពនៃការងើបឡើងនោះចេញជារូបភាពជាក់ស្ដែង»។
ជុំវិញការលើកឡើងរបស់លោក គឹម សុខ បែបនេះ អាស៊ីសេរីបានសុំការឆ្លើយតបពីអ្នកនាំពាក្យរដ្ឋាភិបាល នៃរបបក្រុងភ្នំពេញ លោក ផៃ ស៊ីផាន និងអ្នកនាំពាក្យគណបក្សប្រជាជនកម្ពុជា លោក សុខ ឥសាន ប៉ុន្តែទូរស័ព្ទចូលគ្មានអ្នកទទួល។
ដោយឡែក អ្នកនាំពាក្យអគ្គស្នងការនគរបាលជាតិលោក ឆាយ គឹមខឿន អះអាងថា សមត្ថកិច្ចអនុវត្តច្បាប់គ្មានការប្រកាន់និន្នាការនយោបាយ និងអតីតភាពរបស់ជនណាម្នាក់ឡើយ។ លោកច្រានចោលការចោទប្រកាន់ទាំងឡាយណាដែលថា សមត្ថកិច្ចមិនដែលរកឃើញជនដៃដល់បង្កហិង្សាលើសកម្មជនគណបក្សប្រឆាំងនាពេលកន្លងមក។ លោកបន្តថា ករណីរកមិនឃើញជនដៃដល់មានតិចតួចប៉ុណ្ណោះ៖ «ខ្ញុំអត់ខ្វល់រឿងសង្គមស៊ីវិល អត់ខ្វល់រឿងអ្នកណាទេ ខ្ញុំខ្វល់ថា ខ្ញុំនឹងខិតខំស្វែងរកល្មើសដែលបង្កបញ្ហា»។
ប្រធានក្រុមអង្គរក្សលោក សម រង្ស៊ី លោក ពូក ចន្តា បញ្ជាក់ថា លោកមិនដែលមានជម្លោះជាមួយអ្នកណាទេ ហើយសព្វថ្ងៃ លោកក៏មិនបានធ្វើសកម្មអ្វីទាក់ទងរឿងនយោបាយដែរ។ លោកថា សព្វថ្ងៃនេះ លោកគ្រាន់តែអ្នកជួយមើលថែផ្ទះឲ្យលោក សម រង្ស៊ី ប៉ុណ្ណោះ។ ក៏ប៉ុន្តែ កាលពីលោក សម រង្ស៊ី ស្ថិតនៅប្រទេសកម្ពុជា លោកជាអង្គរក្សជំនិតរបស់លោក សម រង្ស៊ី ដែលតែងតែនៅក្បែរខ្លួនមេដឹកនាំបក្សប្រឆាំងរូបនេះជានិច្ច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។