មន្ត្រីបក្សប្រឆាំងថា សុន្ទរកថាលោក ហ៊ុន សែន នៅក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ ប្រទេសស្វីស រឹតតែបង្ហាញអំពីភាពគ្រោះថ្នាក់នៃរបបផ្ដាច់ការ ដែលមិនប្រឹងស្ដារសិទ្ធិមនុស្ស និងប្រជាធិបតេយ្យ តែបែរជាប្រឹងការពារការប្រព្រឹត្តិខុសរបស់ខ្លួនទៅវិញ។
មន្ត្រីជាន់ខ្ពស់បក្សប្រឆាំង ថាសុន្ទរកថាលោក ហ៊ុន សែន នៅចំពោះមុខស្ថាប័នអង្គការសហប្រជាជាតិ និងទីតាំងនៃប្រទេសប្រជាធិបតេយ្យបែបនេះ គឺរឹតតែបង្ហាញ អំពីភាពពិសពុលនៃរបបផ្ដាច់ការ និងមហិច្ឆិតាបន្តក្រាញអំណាចមិនស្របច្បាប់របស់លោក ហ៊ុន សែន។ អនុប្រធានគណបក្សសង្គ្រោះជាតិអ្នកស្រី មូរ សុខហួរ ថា លោក ហ៊ុន សែន គ្មានភាពខ្មាសអៀនចំពោះអំពើរំលោភសិទ្ធិមនុស្ស និងបំផ្លាញប្រជាធិបតេយ្យធ្ងន់ធ្ងរ ដែលរងការថ្កោលទោសជុំទិសនោះឡើយ ទើបធ្វើដំណើរទៅថ្លែងសារ ការពារអំពើមិនត្រឹមត្រូវរបស់ខ្លួន។ អ្នកស្រី មូរ សុខហួរ ថ្លែងក្នុងន័យឌឺដង ចំពោះភាពក្លាហានបែបមិនចេះអៀនខ្មាសនេះ ថា ជាចរិតរបស់លោក ហ៊ុន សែន និងមន្ត្រីរបបក្រុងភ្នំពេញ៖ «គាត់ជាថ្នាក់ដឹកនាំមួយរូបដែល គេចាត់ទុកថាជាអ្នកដឹកនាំក្នុងចំណោមអ្នកផ្ដាច់ការ។ គាត់បង្ហាញខ្លួនឱ្យគេឃើញថា គាត់ជាអ្នកផ្ដាច់ការ។ សូមអរគុណ ហើយសូមកោតសរសើរ ដល់គាត់ ដែលគាត់ហ៊ានបង្ហាញខ្លួន ហើយដាក់សារដ៏សំខាន់ ដែលចេញមកពីប្រសាសន៍ ចេញមកពីមាត់ផ្ទាល់របស់គាត់ ថា គាត់ហ៊ានបង្ក្រាប គាត់អត់មានបារម្ភទេ នូវអ្វីដែលជាសិទ្ធិមនុស្សសាកល គាត់គ្មានខ្វល់ទេ ចំពោះគាត់គឺអំណាចរបស់គាត់ គឺជាអាទិភាពរបស់គាត់»។
ប្រតិកម្មរបស់មន្ត្រីជាន់ខ្ពស់បក្សប្រឆាំងរូបនេះ ធ្វើឡើងក្រោយនាយករដ្ឋមន្ត្រីនៃរបបឯកបក្សលោក ហ៊ុន សែន បានថ្លែងសារកម្រាស់ ៧ទំព័រ ដែលលោកប្រើពេលអានប្រមាណ ២០នាទី នៅក្នុងកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិលើកទី៤១ កាលពីថ្ងៃទី៤ ខែកក្កដា។
ខ្លឹមសារនៃសុន្ទរកថាលើកនេះ ក៏ដូចសុន្ទរកថា លើកមុនៗរបស់លោក និងដូចសេចក្ដីថ្លែងការណ៍ និងសារនយោបាយរបស់មន្ត្រីរបបក្រុងភ្នំពេញ ដែលលើកអួតសរសើរអំពីជោគជ័យ នៃការបោះឆ្នោត ដែលផាត់ចោលគណបក្សប្រឆាំង។ លោក ហ៊ុន សែន ហៅការបោះឆ្នោតបែបនោះ ថាសេរី ត្រឹមត្រូវ និងយុត្តិធម៌ បើទោះបីជាសហគមន៍អន្តរជាតិ ជាពិសេសសហភាពអឺរ៉ុបថ្កោលទោស និងកំពុងចាត់វិធានការព្យួរការអនុគ្រោះពន្ធ។ លោក ហ៊ុន សែន អួតអំពីចំនួនអង្គការសង្គមស៊ីវិល ដែលមានច្រើននៅកម្ពុជា ទោះបីជារយៈពេលពីរឆ្នាំចុងក្រោយនេះ របបលោក បានបណ្ដេញអង្គការសង្គមស៊ីវិល និងធ្វើទុក្ខបុកម្នេញដល់មន្ត្រីអង្គការសិទ្ធិមនុស្ស ដោយចាប់ដាក់ពន្ធនាគារ ដោយសារតែការបំពេញកិច្ចការប្រចាំថ្ងៃរបស់ខ្លួន។
ជាងនេះទៅទៀត លោក ហ៊ុន សែន ថ្លែងអួតអំពីសេរីភាពសារព័ត៌មាន ដែលថា មានកាសែត ជាង ៥០០ (៥៥០) ច្រើនស្ថាប័ន ស្ថានីយវិទ្យុជាង ២០០ (២១១) ស្ថានីយទូរទស្សន៍ជាង ២០ (២១) ជាដើម។ ប៉ុន្តែ លោកមិនបានលើកឡើង អំពីការបិទប្រព័ន្ធផ្សព្វផ្សាយឯករាជ្យ និងប៉ុស្តិ៍វិទ្យុជាង ៣០ (៣២) នៅទូទាំងប្រទេស ដែលផ្សាយបន្តផ្ទាល់សារព័ត៌មានឯករាជ្យនោះឡើយ។
លោក ហ៊ុន សែន អះអាងថា ប្រជាជនកម្ពុជា មានសិទ្ធិទទួលបានព័ត៌មានពីគ្រប់ប្រភព គ្រប់ប្រភេទ និងមានសិទ្ធិបញ្ចេញមតិ លើគ្រប់ប្រធានបទ។ ប៉ុន្តែ លោកមិនបានលើកឡើង ពីការបង្ក្រាបអ្នកហ៊ានរិះគន់របបលោកនោះឡើយ ដែលក្នុងរយៈពេលជិតពីរឆ្នាំនេះ ពលរដ្ឋជាច្រើនត្រូវជាប់ពន្ធនាគារ ដោយសារការបញ្ចេញមតិរិះគន់របបនេះ តាមហ្វេសប៊ុក។ អ្នកសារព័ត៌មានត្រូវបានរបបនេះ ចាប់ដាក់គុក។ មន្ត្រីបក្សប្រឆាំងជាង ១៤០នាក់ ត្រូវបានតុលាការកោះហៅ និង ប៉ូលិសមូលដ្ឋានហៅទៅសាកសួរ ដោយសារតែការជួបជុំគ្នាហូបនំបញ្ចុក និង ថ្លែងសារគាំទ្រប្រធានស្តីទីគណបក្សសង្គ្រោះជាតិ លោក សម រង្ស៊ី។
លោក ហ៊ុន សែន ចាត់ទុកការធ្វើទុក្ខបុកម្នេញលើសំឡេងប្រឆាំងថា ជាការគោរពច្បាប់ ដើម្បីពង្រឹងលទ្ធិប្រជាធិបតេយ្យ ការគោរពសិទ្ធិមនុស្ស និងនីតិរដ្ឋ។ ប៉ុន្តែ លោកចាត់ទុកប្រទេសប្រជាធិបតេយ្យ ដែលមិនពេញចិត្តនឹងចំណាត់ការបែបនេះ និងដែលទាមទារឱ្យរបបលោក ស្ដារសិទ្ធិមនុស្ស និង ប្រជាធិបតេយ្យឡើងវិញថា ជាអ្នកយកសិទ្ធិមនុស្ស មកធ្វើជាចំណាប់ខ្មាំងជាដើម។
អ្នកស្រី មូរ សុខហួរ ថា សាររបស់លោក ហ៊ុន សែន ក្នុងពេលដែលសហភាពអឺរ៉ុប កំពុងខិតជិតដល់ពេលសម្រេចព្យួរការអនុគ្រោះពន្ធបែបនេះ ពិតជាគ្រោះថ្នាក់កាន់តែខ្លាំងដល់ប្រជាពលរដ្ឋខ្មែរទាំងមូល។ អ្នកស្រីអំពាវនាវពលរដ្ឋខ្មែរ បន្តតស៊ូជាមួយគណបក្សប្រឆាំង ដើម្បីផ្លាស់ប្ដូរមេដឹកនាំ និងរបបដឹកនាំបែបផ្ដាច់ការដូចបច្ចុប្បន្ននេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។