មន្ត្រី​សង្គ្រោះ​ជាតិ​ជំរុញ​ឱ្យ​លោក ហ៊ុន សែន ចូល​និវត្តន៍ បើ​មិន​ចង់​ឱ្យ​គេ​រិះគន់

ដោយ សុជីវី
2020-03-02
អ៊ីម៉ែល
មតិ
Share
បោះពុម្ព
លោក ម៉ន ផល្លា (ឆ្វេង) ប្រធាន​ប្រតិបត្តិ​គណបក្ស​សង្គ្រោះ​ជាតិ​រាជធានី​ភ្នំពេញ និង​លោក​នាយក​រដ្ឋមន្ត្រី លោក ហ៊ុន សែន (ស្ដាំ)
លោក ម៉ន ផល្លា (ឆ្វេង) ប្រធាន​ប្រតិបត្តិ​គណបក្ស​សង្គ្រោះ​ជាតិ​រាជធានី​ភ្នំពេញ និង​លោក​នាយក​រដ្ឋមន្ត្រី លោក ហ៊ុន សែន (ស្ដាំ)
រូប៖ ហ្វេសប៊ុក​លោក ហ៊ុន សែន

មន្ត្រី​ជាន់​ខ្ពស់​គណបក្សប្រឆាំង​ដែល​កំពុង​​​​រត់​ភៀស​ខ្លួន​ ជំរុញ​ឱ្យ​លោកនាយក​រដ្ឋ​មន្ត្រី​ ហ៊ុន សែន ចូល​និវត្តន៍​​ ប្រសិន​បើ​បុរស​ខ្លាំង​រូប​នេះ​មិន​ចង់​ឱ្យ​គេ​រិះគន់​ខ្លួន​ទេ​នោះ។ ការ​លើក​ឡើង​របស់​មន្ត្រី​បក្ស​ប្រឆាំង​នេះ ធ្វើ​ឡើង​ក្រោយ​ពេល​លោក ហ៊ុន សែន អះអាង​ថា អ្នក​ខ្លះ​ជាប់​ពន្ធនាគារ និង​រត់​ចោល​ស្រុក​ គឺ​ដោយសារ​តែ​ពួក​​គេ​រិះគន់​លោក​មិន​សម​ហេតុផល។

ប្រធាន​ប្រតិបត្តិ​គណបក្ស​សង្គ្រោះ​ជាតិ​រាជធានី​ភ្នំពេញ ដែល​រស់នៅ​ភៀស​ខ្លួន​នៅ​ក្រៅ​ប្រទេស លោក ម៉ន ផល្លា ប្រតិកម្ម​ថា ​ប្រសាសន៍​របស់​លោក ហ៊ុន សែន នៅ​ពេល​នេះ​​បង្ហាញ​ថា លោក​គឺ​ជា​អ្នក​នៅ​ពីក្រោយ​ខ្នង​ការ​ធ្វើ​ទុក្ខ​បុក​ម្នេញ​គ្រប់​បែបយ៉ាង​លើ​​មន្ត្រី និង​អ្នក​គាំទ្រ​គណបក្ស​សង្គ្រោះ​ជាតិ។ ម្យ៉ាង​វិញ​​ទៀត លោក​ថា រឿង​នេះ​ស​បញ្ជាក់​ឱ្យ​​ឃើញ​ថា ការ​ចាប់ខ្លួន និង​​ចោទ​ប្រកាន់​សកម្មជន​គណបក្ស​សង្គ្រោះ​ជាតិ​នា​ពេល​កន្លង​ទៅ​នោះ មិន​មែន​ជា​ការ​អនុវត្ត​តាម​ច្បាប់​ ដូច​ការ​ប្រកាស​ក្តែងៗ របស់​អាជ្ញាធរ​នោះ​ឡើយ ប៉ុន្តែ​ជា​ការ​អនុវត្ត​តាម​បញ្ជា​របស់​លោក ហ៊ុន សែន៖ «គាត់​មាន​ការ​ព្រួយ​បារម្ភ​ខ្លាច​គណបក្ស​សង្គ្រោះ​ជាតិ​រស់​ឡើងវិញ ដូច្នេះ​ហើយ​គាត់​មាន​តែ​សកម្មភាព មាន​តែ​វិធានការ ដើម្បី​បន្ត​ធ្វើ​ទុក្ខ​បុក​ម្នេញ​ គំរាម​កំហែង បំភិតបំភ័យ​មក​លើ​សកម្មជន​គណបក្ស​សង្គ្រោះ​ជាតិ​នៅ​ទូទាំង​ប្រទេស​ ហើយ​ម្ដង​ណា​ក៏​គាត់​ប្រើ​ទស្សនៈ​ប្រមាថ ហិង្សា​មក​លើ​ប្រជាពលរដ្ឋ​ដោយ​គ្មាន​ការ​ទទួល​ខុស​ត្រូវ»

មន្ត្រី​ជាន់ខ្ពស់​គណបក្ស​សង្គ្រោះ​ជាតិ​រូប​នេះ​បញ្ចេញ​ប្រតិកម្ម​ភ្លាមៗ​ ក្រោយ​ពេល​លោក​នាយក​រដ្ឋ​មន្ត្រី ហ៊ុន សែន បាន​ថ្លែង​នៅ​ព្រឹក​ថ្ងៃ​ទី២ មីនា​ថា មូលហេតុ​ដែល​ធ្វើ​ឱ្យ​មន្ត្រី​បក្ស​ប្រឆាំង​ជាប់​ពន្ធនាគារ និង​រត់​ចោល​ស្រុក​ គឺ​ដោយសារ​តែ​ពួក​​គេ​រិះគន់​លោក។

នៅចំពោះមុខ​ក្រុម​និស្សិត​បញ្ចប់​ការ​សិក្សា​ជាង១ ពាន់​នាក់ រួម​មាន​ទាំង​ព្រះសង្ឃ​ផង លោក ហ៊ុន សែន បាន​ថ្លែង​ដោយ​សម្ដី​អសុរោះ​អា​មឹង​ថា មនុស្ស​មួយ​ចំនួន​ មិន​ដែល​មើល​ឃើញ​ពី​ចំណុច​ល្អ​​ក្រោម​ការ​ដឹក​នាំ​របស់​លោក​ឡើយ ហើយ​ពួក​គេ​តែង​ជេរ​ស្ដី​នៅ​ពេល​មាន​កំហុស​អ្វីមួយ​កើតឡើង។ ដូច្នេះ​លោក​ថា ក្រុម​អ្នក​ទាំងនេះ​សម​នឹង​ជាប់​ពន្ធនាគារ និង​រត់​ចោល​ស្រុក​​បែប​នេះ​ឯង៖ «ម៉េច​ក៏​ពួក​ឯង​ថា អញ​ជូន​សារ​រាល់​ថ្ងៃ? បើ​កម្មវិធី​អញ វា​អ៊ីចឹង។ បើ​ឯង​ភ្លើ​ណាស់ ឯង​ទៅ​ងាប់​ឯណា ងាប់​ទៅ។ ប៉ុន្តែ​ដោយសារ​ពួក​ឯង​អ៊ីចឹង​ហើយ បាន​ជា​ពួក​ឯង​រត់​ចោល​ស្រុក ឯង​ជឿ​អញ​ចុះ។ ដោយសារ​តែ​អ៊ីចឹង​ហើយ​បាន​ជា​អា​ខ្លះ​ជាប់​គុក អាខ្លះ​រត់​ចោល​ស្រុក​នោះ។ បើ​ទោះបី​​យើង​ធ្វើ​ត្រូវ​ប៉ុនណា រាប់​ទាំង​កីឡាករ-កីឡាការិនី​របស់​យើង​បាន​ទទួល​​មេដាយ​​មាស វា​មិន​ដែល​ចេះ​អរ​មួយ​ម៉ាត់ ហើយ​តែ​មានរឿង​អ្វី​ខុស​តែ​បន្តិច​ អានេះ​ជេរ​បញ្ចោរ​ពេញ​ទឹក​ពេញ​ដី»

ទោះ​ជា​យ៉ាង​ណា មន្ត្រី​ជាន់ខ្ពស់​គណបក្ស​សង្គ្រោះ​ជាតិ លោក ម៉ន ផល្លា ច្រានចោល​ការ​លើក​​ឡើង​បែប​នេះ​របស់​លោក ហ៊ុន សែន។ លោក​ចាត់​ទុក​ថា នេះ​គឺ​លេស​ដែល​លោក ហ៊ុន សែន បង្កើត​ឡើង ដើម្បី​បន្ត​ដាក់​បន្ទុក​ និង​ចោទ​ប្រកាន់​លើ​សកម្មជន​គណបក្ស​សង្គ្រោះ​ជាតិ បន្ទាប់​ពី​លោក​បាន​ប្រើប្រាស់​តុលាការ​កំពូល​ឱ្យ​រំលាយ​គណបក្ស​នេះ​រួច​មក​​។ លោក​បន្ថែម​ថា​ ប្រសិន​បើ​លោក ហ៊ុន សែន ខ្លាច​ការ​រិះគន់ នោះ​មេ​ដឹក​នាំ​របប​ក្រុង​ភ្នំពេញ​រូប​នេះ​គួរ​តែ​ចូល​និវត្តន៍​វិញ​ប្រសើរ​ជាង៖ «គាត់​ជា​បុគ្គល​សាធារណៈ ហើយ​ត្រូវ​ទទួល​ខុស​ត្រូវ​ក្នុង​ជោគ​វាសនា​ជាតិ​ចំពោះ​ប្រជាពលរដ្ឋ។ អ៊ីចឹង​ដើម្បី​ឱ្យ​ស្ងប់​ចិត្ត រស់​នៅ​ដោយ​សេចក្ដី​សុខ គេច​ផុត​ពី​ការ​រិះគន់​ហ្នឹង អា​ហ្នឹង​គាត់​គួរ​តែ​ចូល​និវត្តន៍​ទៅ ហើយ​ការ​រិះគន់​ទាំងឡាយ​នឹង​មិន​មាន​តទៅទៀត​ទេ»

ចាប់​តាំងពី​របប​លោក ហ៊ុន សែន បាន​រំលាយ​គណបក្ស​សង្គ្រោះ​ជាតិ​នៅ​ចុង​ឆ្នាំ២០១៧ និង​យុទ្ធនាការ​បង្ក្រាប​អ្នក​គាំទ្រ​ដំណើរ​មាតុភូមិនិវត្តន៍​របស់​ថ្នាក់​ដឹក​នាំ​គណបក្ស​សង្គ្រោះ​ជាតិ​នៅ​ខែ​វិច្ឆិកា ឆ្នាំ២០១៩ មក ក្រុម​មន្ត្រី​ និង​សកម្មជន​មូលដ្ឋាន​ជាច្រើន​នាក់​របស់​គណបក្ស​ប្រឆាំង​ត្រូវ​បាន​ចោទ​ប្រកាន់ និង​​ចាប់​ដាក់​​ពន្ធនាគារ ហើយ​មាន​អ្នក​ខ្លះ​បាន​សម្រេច​ចិត្ត​រត់​ភៀសខ្លួន​ទៅក្រៅ​ប្រទេស​ ដើម្បី​គេច​ចេញ​ពី​ការ​យាយី​ផ្សេងៗ។ ករណី​គួរ​ឱ្យ​​កត់​សម្គាល់​មួយ​ទៀត គឺ​នៅ​ប៉ុន្មាន​ខែ​ចុង​ក្រោយ​នេះ អតីត​សកម្មជន​គណបក្ស​​សង្គ្រោះជាតិចំនួន១៥ នាក់​នៅ​​រាជធានី​ភ្នំពេញ​ ត្រូវ​បាន​ជន​មិន​ស្គាល់​អត្តសញ្ញាណ​លួច​​វាយប្រហារ​បណ្ដាល​ឱ្យ​រង​របួស​ ហើយ​សមត្ថកិច្ច​មិន​ដែល​ចាប់​បាន​ជន​​ដៃ​ដល់​ណា​ម្នាក់​​យក​មក​ផ្ដន្ទាទោស​នោះ​ឡើយ។

អគ្គលេខាធិការ​សហព័ន្ធ​និស្សិត​បញ្ញវន្ត​កម្ពុជា លោក គៀន ពន្លក ថ្លែង​ថា នៅ​ក្នុង​សង្គម​ប្រជាធិបតេយ្យ រដ្ឋាភិបាល​ចៀស​មិន​ផុត​ពី​មតិ​រិះគន់​នោះ​ឡើយ ប្រសិន​បើ​សាធារណជន ឬ​ក្រុម​នយោបាយ​ដទៃ យល់​ថា រដ្ឋាភិបាល​ខ្វះ​ចន្លោះ​ត្រង់​ចំណុច​ណាមួយ ឬ​បាន​ប្រព្រឹត្ត​ផ្ទុយ​នឹង​ក្របខ័ណ្ឌ​ច្បាប់។ លោក​បញ្ជាក់​ថា នេះ​ជា​សិទ្ធិ​ដែល​ធានា​ដោយ​ច្បាប់​កម្ពុជា និង​ច្បាប់​អន្តរជាតិ​ដទៃ​ទៀត។ លោក​​សង្កត់​ធ្ងន់​ថា មាន​តែ​នៅ​ក្នុង​របប​ផ្ដាច់​ការ​ទេ ទើប​រដ្ឋាភិបាល​សម្រេច​ចិត្ត​បែប​អត្តនោម័តិ​ ដោយ​ផាត់ចោល​មតិ​រិះគន់​​របស់​សាធារណជន និង​ក្រុម​នយោបាយ​ប្រឆាំង៖ «គាត់​បុគ្គល​​ខ្លួន​ឯង​ទេ ដែល​មាន​គំនិត​គុំកួន​ទៅលើ​មន្ត្រី​បក្ស​ប្រឆាំង​ហ្នឹង​ឯង ហើយ​រហូត​ដល់​មាន​ការ​ដាក់​ទោស​ទណ្ឌ​ទៅលើ​បុគ្គល​ដែល​ហ៊ាន​រិះគន់​រដ្ឋាភិបាល​ចំៗ អំពី​​បញ្ហា​អវិជ្ជមាន​ដែល​កើត​ឡើង​នៅ​ក្នុង​ស្រុក​​ ជាពិសេស​បុគ្គល​នយោបាយ​ផ្ទាល់​ រហូត​ដល់​មាន​ការ​ភៀស​ខ្លួន​ទៅក្រៅ​ប្រទេស​។ អ៊ីចឹង​ហើយ​ខ្ញុំ​គិត​ថា រដ្ឋាភិបាល​ គឺ​ធ្វើ​តាម​អារម្មណ៍​ ច្រើន​ជាង​ការ​អនុវត្ត​ច្បាប់»

អ្នក​​ឃ្លាំមើល​សង្គម​រូប​នេះ​ថ្លែង​ទៀត​ថា ដំណាក់​កាល​នេះ រដ្ឋាភិបាល​គួរ​តែ​បញ្ឈប់​ការ​ធ្វើ​ទុក្ខ​បុក​ម្នេញ​លើ​សកម្មជន​គណបក្ស​សង្គ្រោះ​ជាតិ​ហើយ​ ដោយ​​​ដោះលែង​អ្នក​ទោស​មនសិការ​ទាំង​អស់​ឱ្យ​មាន​សេរីភាព​វិញ និង​​បើក​ផ្លូវ​ឱ្យ​ជន​ភៀស​ខ្លួន​នយោបាយ​អាច​វិល​ត្រឡប់​ចូល​ស្រុក​វិញ ជាដើម។ ជា​ពិសេស​លោក​ថា គណបក្ស​កាន់​អំណាច​គួរ​តែ​ប្រញាប់​ងាក​មក​រក​តុចរចា​ជាមួយ​គណបក្ស​ប្រឆាំង​វិញ ដើម្បី​ស្ដារ​ស្ថានការណ៍​ស្រុក​​ទេស ដែល​អាច​នឹង​​ធ្លាក់​ដុនដាប​ខ្លាំង នៅ​ក្រោយ​ពេល​សហភាព​អឺរ៉ុប​ដក​ហូត​ការ​អនុគ្រោះ​ពន្ធ EBA និង​ដោះ​ស្រាយ​ហានិភ័យ​​សង្គម​ផ្សេង​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

អ្នក​អាន​អនាមិក

REAL PEOPLE THEY WON'T AS SAME THAT GUY

Mar 02, 2020 01:50 PM

អ្នក​អាន​អនាមិក

covin19 die soon

Mar 02, 2020 07:36 AM

គេហទំព័រ​ទាំងមូល