ថ្នាក់ដឹកនាំគណបក្សសង្គ្រោះជាតិ ចាប់ផ្ដើមបំផុសចលនាលើកម្រាមដៃ៩ ជាសញ្ញាណាត់គ្នា គាំទ្រ លោក សម រង្ស៊ី វិលចូលកម្ពុជានៅថ្ងៃទី៩ វិច្ឆិកាខាងមុខ។ សមត្ថកិច្ចរបបក្រុងភ្នំពេញ ព្រមានថា អាជ្ញាធរនឹងមិនព្រងើយកន្តើយ ចំពោះសកម្មជនបក្សប្រឆាំងណា ដែលមានបំណងញុះញង់ឡើយ។
តំណាងរាស្ត្រជាប់ឆ្នោតមណ្ឌលភ្នំពេញ នៃគណបក្សសង្គ្រោះជាតិ លោក ហូ វ៉ាន់ បង្ហោះសារថា ចាប់ពីចុងខែកញ្ញា ទៅដល់ថ្ងៃទី៩ វិច្ឆិកា គ្រប់ការជួបស្វាគមន៍គ្នា គណបក្សប្រឆាំងនឹងលើកដៃម្រាម៩ ដើម្បីបញ្ជាក់ពីការគាំទ្រ ថ្ងៃទី៩ វិច្ឆិកា ជាថ្ងៃលោក សម រង្ស៊ី វិលចូលកម្ពុជា។ បន្ទាប់ពីលោក ហូ វ៉ាន់ បង្ហោះសារនេះ តាមហ្វេសប៊ុក (facebook) រួចមក សកម្មជនបក្សប្រឆាំងមួយចំនួន បានចែករំលែក និងថតលើកម្រាមដៃ៩ បង្ហោះជាការគាំទ្រ។
មន្ត្រីជាន់ខ្ពស់បក្សប្រឆាំង លោក សោ ចាន់ដេត ប្រាប់ថា ការលើកម្រាម៩ ជាសញ្ញាសំគាល់ដាក់គ្នារវាងសកម្មជនសង្គ្រោះជាតិ ជួបជុំគ្នានៅតាមវត្តក្នុងពេលភ្ជុំបិណ្ឌ និងរាល់កន្លែងផ្សេងទៀត ដើម្បីបញ្ចៀសការធ្វើទុក្ខបុកម្នេញ ពីអាជ្ញាធររបបលោក ហ៊ុន សែន។ លោក សោ ចាន់ដេត បញ្ជាក់ថា នេះមិនមែនជាគោលការណ៍នៅក្នុងបក្សប្រឆាំងទេ តែជាការធ្វើឡើងដើម្បីបង្ហាញការសាមគ្គីគ្នា មិនចុះញ៉ម និងមិនភិតភ័យពីការធ្វើទុក្ខបុកម្នេញ ពីរបបក្រុងភ្នំពេញ៖ « បំភិតបំភ័យ ដើរគំរាមកំហែង អត់ឲ្យយើងជុំគ្នា ជួបគ្នាអ៊ីចឹងណា វាដូចបំបិទសិទ្ធិ សេរីភាពពេក។ អ៊ីចឹងយើងបង្ហាញម្រាមដៃរបស់យើង ថា សុទ្ធតែគ្នាយើងហើយ។ អាហ្នឹងអ៊ីចឹងណា។ ជារឿងធម្មតា ឆន្ទៈរបស់មនុស្ស រង់ចាំថ្ងៃទី៩ វិច្ឆិកា រង់ចាំលោក ប្រធានសម រង្ស៊ី»។
យុទ្ធនាការបង្ហោះម្រាមដៃ៩ ជាសញ្ញានេះ ធ្វើឡើងនៅពេលអាជ្ញាធររបបក្រុងភ្នំពេញ កំពុងបង្កើនការចាប់ខ្លួនសកម្មជនបក្សប្រឆាំងដាក់ពន្ធនាគារ ដោយចោទពីបទញុះញង់ និងមានផែនការផ្ដួលរំលំរបបក្រុងភ្នំពេញ តាមរយៈទទួលផែនការពីប្រធានស្ដីទីគណបក្សប្រឆាំង លោក សម រង្ស៊ី នៅប្រទេសម៉ាឡេស៊ី។ ចំណែកលោក សម រង្ស៊ី វិញ អះអាងថា លោកនឹងដឹកនាំសមាជិកបក្សប្រឆាំងវិលចូលកម្ពុជាវិញ នៅថ្ងៃទី៩ វិច្ឆិកាឲ្យទាល់តែបាន។ គិតត្រឹមថ្ងៃទី២៤ កញ្ញានេះ នៅសល់ ៤៦ថ្ងៃទៀត ដល់ថ្ងៃកំណត់ លោក សម រង្ស៊ី ប្រកាសវិលចូលកម្ពុជាហើយ។
ជុំវិញយុទ្ធនាការម្រាមដៃ៩ របស់សកម្មជនបក្សប្រឆាំងនេះ អាស៊ីសេរី មិនអាចសុំការបញ្ជាក់បន្ថែមពីអ្នកនាំពាក្យក្នុងរបបក្រុងភ្នំពេញ លោក ផៃ ស៊ីផាន លោក ខៀវ សុភ័គ និងលោក ឆាយ គឹមខឿន បានទេ នៅថ្ងៃទី២៤ កញ្ញា ដោយសារទូរស័ព្ទរោទ៍គ្មានអ្នកទទួល។
ប៉ុន្តែ អ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់សារព័ត៌មានក្នុងស្រុកថា ចលនាម្រាមដៃ៩ នេះថា នឹងមិនទទួលបានការចាប់អារម្មណ៍ ដូចយុទ្ធនាការម្រាមដៃស្អាតអ៊ីចឹងដែរ។ តែយ៉ាងណា លោកថាសមត្ថកិច្ចនឹងមិនព្រងើយកន្តើយ ឲ្យសកម្មជនបក្សប្រឆាំង ធ្វើសកម្មភាពអ្វីមួយប្រឆាំងរដ្ឋាភិបាលទេ។ លោក ខៀវ សុភ័គ បន្ថែមថា ពលរដ្ឋនឹងមិនទៅទទួលលោក សម រង្ស៊ី តាមការអំពាវនាវនៅថ្ងៃទី៩ វិច្ឆិកាទេ ដោយសារពលរដ្ឋមិនពេញចិត្តនឹងលោក សម រង្ស៊ី ប្រមាថព្រះមហាក្សត្រ៖ « ទោះយ៉ាងណាក៏ដោយ សមត្ថកិច្ចមិនព្រងើយកន្តើយចំពោះសញ្ញាណា ឬក៏បរិវារណាមួយនោះទេ»។
ស្របពេលគណបក្សប្រឆាំង បង្ហាញយុទ្ធនាការលើកម្រាមដៃ៩ នេះ អាជ្ញាធររបបក្រុងភ្នំពេញវិញ ក៏កំពុងបង្កើនការបង្ក្រាបលើសកម្មជនបក្សប្រឆាំងដែរ គឺរដ្ឋមន្ត្រីក្រសួងមហាផ្ទៃ លោក ស ខេង និងអគ្គស្នងការនគរបាលជាតិ លោក នេត សាវឿន បញ្ជាឲ្យពង្រាយកងកម្លាំងនគរបាលតាមវត្ត ក្នុងឱកាសភ្ជុំបិណ្ឌ ដើម្បីត្រៀមបង្ក្រាបការប្រមូលផ្ដុំរបស់សកម្មជនបក្សប្រឆាំងជួបជុំគ្នា ពេលធ្វើបុណ្យតាមវត្ត។
ប្រធានផ្នែកឃ្លាំមើលសិទ្ធិមនុស្ស នៃសមាគមអាដហុក លោក នី សុខា ចង់ឲ្យរដ្ឋាភិបាលពន្យល់ពលរដ្ឋឲ្យច្បាស់ថា សកម្មភាពអ្វីជាការញុះញង់ ហើយសកម្មភាពបែបណាជាការបញ្ចេញមតិ។ សង្គមស៊ីវិលរូបនេះ យល់ថា បើត្រឹមការលើកដៃជាសញ្ញាគាំទ្រនរណាម្នាក់ ឬការបង្ហាញឆន្ទៈ មិនខុសច្បាប់ទេ ព្រោះជាគោលការណ៍ ទាំងរដ្ឋធម្មនុញ្ញ និងកតិកាសញ្ញា ស្ដីពីសិទ្ធិមនុស្ស សុទ្ធតែអនុញ្ញាតឲ្យពលរដ្ឋសម្ដែងមតិ និងចូលរួមសិទ្ធិនយោបាយ៖ « សុំឲ្យរដ្ឋហ្នឹង ធ្វើការពន្យល់ទៅដល់ប្រជាពលរដ្ឋខ្លួន ឬក៏ធ្វើការពន្យល់ជាសាធារណៈឲ្យបានច្បាស់លាស់ ថាតើកម្រិតនៃសេរីភាពបញ្ចេញមតិ ដែលនាំប៉ះពាល់ដល់អសន្តិសុខជាតិ ឬប៉ះពាល់ដល់សន្តិសុខជាតិហ្នឹង កម្រិតប៉ិនណា ហើយថាតើគ្រាន់តែការលើកម្រាមដៃប៉ិនហ្នឹង ដើម្បីជាសញ្ញាក្នុងការទទួល បង្ហាញពីឆន្ទៈរបស់ខ្លួន ក្នុងការគាំទ្រទៅលើបុគ្គល ឬក៏អ្នកនយោបាយណាម្នាក់ ថាជារឿងខុសច្បាប់ ឬក៏យ៉ាងម្ដេច ? អាហ្នឹងណា។ អ៊ីចឹងរដ្ឋត្រូវតែធ្វើការពន្យល់បញ្ហាហ្នឹង»។
គិតត្រឹមថ្ងៃទី២៤ កញ្ញា អាជ្ញាធររបបក្រុងភ្នំពេញ បានចាប់ខ្លួនសកម្មជនបក្សប្រឆាំងចំនួន ២៩នាក់ ដាក់ពន្ធនាគារ និងបានកោះហៅសកម្មជនបក្សប្រឆាំង ទៅសាកសួរកើនដល់១៥៨នាក់។ ក្រៅពីនេះ សកម្មជនបក្សប្រឆាំងមួយចំនួនទៀត ក៏កំពុងទទួលរងការគំរាមគំហែង និងរងការវាយបែកក្បាល តាមរូបភាពហិង្សាផ្សេងៗ ខណៈសកម្មជនខ្លះទៀត រត់លាក់ខ្លួន គេចចេញពីការធ្វើទុក្ខបុកម្នេញទាំងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។