អ្នកគាំទ្រ​គណបក្ស​សង្គ្រោះ​ជាតិ​នៅ​ជប៉ុន​អំពាវនាវ​ឲ្យ​ពលករ​ខ្មែរ​ចូល​រួម​ធ្វើ​បាតុកម្ម​​ឲ្យ​បាន​ច្រើន​កុះករ ដើម្បី​ស្ដារ​ប្រជាធិបតេយ្យ​នៅ​កម្ពុជា

ដោយ អូន ភាព
2020-02-07
អ៊ីម៉ែល
មតិ
Share
បោះពុម្ព
សមាជិក​ចលនា​សង្គ្រោះ​ជាតិ​នៅ​ជប៉ុន នាំ​គ្នា​ធ្វើ​បាតុកម្ម​គាំទ្រ​ដំណើរ​មាតុភូមិ​និវត្តន៍​របស់​លោក សម រង្ស៊ី ថ្ងៃ​ទី៩ វិច្ឆិកា។
សមាជិក​ចលនា​សង្គ្រោះ​ជាតិ​នៅ​ជប៉ុន នាំ​គ្នា​ធ្វើ​បាតុកម្ម​គាំទ្រ​ដំណើរ​មាតុភូមិ​និវត្តន៍​របស់​លោក សម រង្ស៊ី ថ្ងៃ​ទី៩ វិច្ឆិកា។
រូប៖ ហ្វេសប៊ុក Vanna Hay

អ្នក​គាំទ្រ​គណបក្ស​សង្គ្រោះ​ជាតិ​នៅ​ប្រទេស​ជប៉ុន​អំពាវនាវ ពលរដ្ឋ​ខ្មែរ​រស់​នៅ​ប្រទេស​ជប៉ុន​ចូលរួម​ធ្វើ​បាតុកម្ម​ថ្ងៃ​ទី៨ ខែ​កុម្ភៈ​ឱ្យ​បាន​ច្រើន ដើម្បី​ប្រាប់​ទៅ​រដ្ឋាភិបាល​ខ្មែរ​ឲ្យ​ប្រញាប់​កែ​ខ្លួន​ឡើង​វិញ​មុន​ពេល​សហភាព​អឺរ៉ុប​សម្រេច​ព្យួរ​ប្រព័ន្ធ​អនុគ្រោះ EBA។ ប៉ុន្តែ​នាំ​ពាក្យ​គណបក្ស​ប្រជាជន​កម្ពុជា​លើក​ឡើង​ថា ការ​ធ្វើ​បាតុកម្ម គឺ​ជា​សិទ្ធិ​របស់​អ្នក​ទាមទារ ប៉ុន្តែ​រដ្ឋាភិបាល ឬ​គណបក្ស​កាន់​អំណាច​មិន​អាច​ធ្វើ​តាម​ការ​ទាមទារ​របស់​ពួក​គេ​បាន​នោះ​ទេ។

គោល​បំណង​ធំ​ដែល​អ្នក​គាំទ្រ​គណបក្ស​សង្គ្រោះ​ជាតិ​នៅ​ប្រទេស​ជប៉ុន​ធ្វើ​បាតុកម្ម គឺ​ទាមទារ​ឲ្យ​រដ្ឋាភិបាល​ដោះ​លែង​លោក កឹម សុខា និង​ទាមទារ​គណបក្ស​សង្គ្រោះ​ជាតិ​ដំណើរ​ការ​ឡើង​វិញ។ មេ​ដឹក​នាំ​បាតុកម្ម​រំពឹង​ថា បើ​រដ្ឋាភិបាល​យល់​ព្រម​ធ្វើ​តាម​សំណើ​របស់​ពួក​គេ នឹង​ធ្វើ​ឲ្យ​ប្រទេស​កម្ពុជា​អាច​រក្សា​ប្រព័ន្ធ​អនុគ្រោះ​ពន្ធ EBA បាន ព្រោះ​ការ​ទាមទារ​នេះ​មុន​ពេល​សហភាព​អឺរ៉ុប​សម្រេច​ព្យួរ​ប្រព័ន្ធ​អនុគ្រោះ​ពន្ធ EBA ពី​កម្ពុជា។

ប្រធាន​ចលនា​យុវជន​សង្គ្រោះ​ជាតិ​នៅ​ប្រទេស​ជប៉ុន​ លោក ហៃ វណ្ណា អំពាវនាវ​ដល់​ពលករ​ខ្មែរ និង​ពលរដ្ឋ​ខ្មែរ​រស់​នៅ​ប្រទេស​ជប៉ុន​ចូលរួម​ធ្វើ​បាតុកម្ម​ឲ្យ​ច្រើន​កុះករ ដើម្បី​ជា​សារ​ប្រាប់​ទៅ​រដ្ឋាភិបាល​ក្រុង​ភ្នំពេញ​ឲ្យ​គិត​ពី​ផល​ប្រយោជន៍​ជាតិ។ លោក​យល់​ថា បាតុកម្ម​លើក​នេះ គឺ​មាន​សារ​សំខាន់ និង​ជា​ការ​ចាំបាច់ ដែល​ពលរដ្ឋ​នៅ​ក្រៅ​ស្រុក ដែល​មាន​សិទ្ធិ​សេរី​ពេញលេញ​ក្នុង​ការ​ធ្វើ​ការងារ​ទាមទារ៖ «សូម​អំពាវនាវ​ដល់​បង​ប្អូន​មក​ចូលរួម​កម្មវិធី​បាតុកម្ម​ថ្ងៃ​សៅរ៍​ទី៨ ខែ​កុម្ភៈ​ទាំង​អស់​គ្នា ដើម្បី​ឲ្យ​សហភាព​អឺរ៉ុប​បន្ត​អនុគ្រោះ​ពន្ធ​យើង​ខ្មែរ​នៅ​ប្រទេស​ជប៉ុន គឺ​យើង​មិន​ចង់​បាត់​ប្រព័ន្ធ​អនុគ្រោះ​ទេ»

តាម​គម្រោង​ក្រុម​បាតុករ​គ្រោង​ជួប​គ្នា​ពួក​គ្នា​ម៉ោង​ជាង ១រសៀល ហើយ​នៅ​ពេល​ពួក​គេ​ជុំ​គ្នា​រួច​ហើយ ដើរ​ហែ​ក្បួន​នៅ​ក្នុង​ទីក្រុង​តូក្យូ (TOKYO) ដោយ​មាន​លើក​បដា និង​ស្រែក​ទាមទារ។

ជុំវិញ​ការ​ទាមទារ​នេះ អ្នក​នាំ​ពាក្យ​គណបក្ស​ប្រជាជន​កម្ពុជា លោក ឈឹម ផលវរុណ យល់​ថា ការ​ធ្វើ​បាតុកម្ម គឺ​ជា​សិទ្ធិ​របស់​ខ្មែរ​នៅ​ក្រៅ​ស្រុក។ ប៉ុន្តែ​លោក​ថា រដ្ឋាភិបាល ឬ​គណបក្ស​ប្រជាជន​កម្ពុជា​មិន​អាច​ធ្វើ​តាម​ការ​ទាមទារ​របស់​ក្រុម​បាតុករ​បាន​ទេ ព្រោះ​អ្វី​ដែល​ពួក​គេ​ចង់​បាន​ផ្ទុយ​ពី​ច្បាប់៖ «គ្មាន​រដ្ឋាភិបាល​នៃ​ប្រទេស​ណា​មួយ​ទៅ​ធ្វើ​តាម​ការ​ទាមទារ​ពលរដ្ឋ​ខ្លួន​ឲ្យ​ធ្វើ​ផ្ទុយ​ទៅ​នឹង​ច្បាប់​ដែល​ចែង​ទេ»

ប៉ុន្តែ​សមាជិក​ក្រុម​អ្នក​វិភាគ​វ័យ​ក្មេង​លោក បុង ដែត យល់ថា ទោះ​រដ្ឋាភិបាល​មិន​បាន​ស្ដាប់​តាម​ការ​ទាមទារ​របស់​បាតុករ​ក្តី តែ​បាតុកម្ម​នេះ​នឹង​ធ្វើ​ឲ្យ​រដ្ឋាភិបាល​ក្រុង​ភ្នំពេញ​បាក់​មុខ​នៅ​លើ​ឆាក​អន្តរជាតិ ខណៈ​លោក​សង្កេត​ឃើញ​ថា ពលរដ្ឋ​នៅ​ក្រៅ​ប្រទេស​ជា​ញឹកញាប់​តែង​ធ្វើ​បាតុកម្ម​ប្រឆាំង​រដ្ឋាភិបាល។ លោក​បន្ត​ថា ​ប្រសិន​បើ​កម្ពុជា​បាត់បង់​ប្រព័ន្ធ​អនុគ្រោះ​ពន្ធ​ពី​អឺរ៉ុប​មែន​នោះ​នឹង​ធ្វើ​ឲ្យ​ប្រទេស​កម្ពុជា​ខាត​បង់​ប្រយោជន៍​យ៉ាង​ច្រើន និង​អាច​ធ្វើ​ឲ្យ​ប្រទេស​ជាតិ​ជួប​វិបត្តិ​ធ្ងន់ធ្ងរ៖ «ការ​ដឹក​នាំ​បាតុកម្ម​នេះ​ធ្វើ​ឲ្យ​គណបក្ស​ប្រជាជន​កម្ពុជា​រង​សម្ពាធ​ពី​អន្តរជាតិ​នានា ធ្វើ​ឲ្យ​យល់​ថា ចុម​ម៉េច​រដ្ឋាភិបាល​នៃ​គណបក្ស​ប្រជាជន​មាន​ពលរដ្ឋ​បាតុកម្ម​ធ្វើ​ឲ្យ​អន្តរជាតិ ចាប់​អារម្មណ៍​អ៊ីចឹង​ទៅ​ចង់​មិន​ចង់ គឺ​ប្រជាពលរដ្ឋ​ដែល​បាតុកម្ម​ហ្នឹង​ធ្វើ​ឲ្យ​គណបក្ស​ប្រជាជន​កម្ពុជា​រង​ភាព​អាម៉ាស់»

គណៈកម្មការ​អឺរ៉ុប​គ្រោង​នឹង​ប្រកាស​លទ្ធផល​ស្ដីពី​ប្រពន្ធ​អនុគ្រោះ​ពន្ធ EBA ដល់​កម្ពុជា​នៅ​ថ្ងៃ​ទី១២ ខែ​កុម្ភៈ​សប្ដាហ៍​ខាង​មុខ​នេះ។ បញ្ហា EBA នេះ​ត្រូវ​បាន​គណបក្ស​ប្រជាជន​កម្ពុជា​លើក​ឡើង​ក្នុង​ពេល​គណបក្ស​នេះ​ធ្វើ​សន្និបាត​លើក​ទី៤២ នៃ​គណៈកម្មាធិការ​កណ្ដាល​កាល​ពី​ដើម​ខែ​កុម្ភៈ​កន្លង​ទៅ ប៉ុន្តែ​គណបក្ស​នេះ​មិន​បង្ហាញ​ជា​សាធារណៈ​ថា ខ្លួន​នឹង​ទប់ទល់​យ៉ាង​ណា​ឡើយ បើ​សិន​បាត់​បង់ EBA មែន​នោះ។ ក្រុម​អ្នក​ដឹក​នាំ​សហជីព​មួយ​ចំនួន​ព្រមាន​ថា បើ​រដ្ឋាភិបាល​ធ្វើ​ឲ្យ​បាត់​បង់​ប្រព័ន្ធ​អនុគ្រោះ​ពន្ធ​នេះ ពួក​គេ​នឹង​នាំ​គ្នា​ធ្វើ​បាតុកម្ម​មិន​ខ្លាច​ការ​បង្ក្រាប​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល