អតីតនាយករដ្ឋមន្ត្រី និងជាប្រធានគណបក្សប្រជាជនកម្ពុជា លោក ហ៊ុន សែន អបអរសាទរ ប្រធានាធិបតីរុស្សីលោក វ្ល៉ាឌីមៀ ពូទីន (Vladimir Putin) ដែលត្រូវតុលាការអន្តរជាតិចោទប្រកាន់ពីបទឧក្រិដ្ឋកម្មសង្គ្រាម បានបន្តជាប់ឆ្នោតជាប្រធានាធិបតីសហព័ន្ធរុស្ស៊ី អាណត្តិទី៥នេះ។
ក្នុងលិខិតផ្លូវការផ្ញើជូនលោក វ្ល៉ាឌីមៀ ពូទីន កាលពីថ្ងៃទី១៩ ខែមីនា លោក ហ៊ុន សែន វាយតម្លៃខ្ពស់នៃ ចំណងមិត្តភាពជាប្រពៃណី រវាងកម្ពុជា និងសហព័ន្ធរុស្សី ក្នុងស្មារតីគោរព និងយោគយល់គ្នា ដើម្បីផលប្រយោជន៍រួម។ លោក ហ៊ុន សែន ក៏បានបញ្ជាក់ថា ក្នុងតួនាទីជាប្រធានគណបក្សប្រជាជនកម្ពុជា លោកត្រៀមខ្លួនជានិច្ច ដើម្បីធ្វើការយ៉ាងជិតស្និទ្ធជាមួយប្រធានាធិបតីរុស្សីលោក វ្ល៉ាឌីមៀ ពូទីន ដើម្បីលើកកម្ពស់ទំនាក់ទំនងរវាងគណបក្សកាន់អំណាច និងរដ្ឋាភិបាលកម្ពុជា ដើម្បីជាផលប្រយោជន៍រួម សម្រាប់ប្រជាជាតិ និងប្រជាជននៃប្រទេសទាំងពីរ។
ការដឹកនាំនៅក្នុងប្រទេសកម្ពុជា និងរុស្សី មានភាពស្រដៀងគ្នា ដោយរដ្ឋាភិបាលប្រើអំណាចផ្ដាច់ការ ប្រើអំពើហិង្សា បំភិតបំភ័យ និងលុបបំបាត់ គណបក្សប្រឆាំងមិនឲ្យចូលរួមការបោះឆ្នោតជាតិ។
ជាក់ស្តែងការបោះឆ្នោតនៅក្នុង អាណត្តិទី៥ រយៈពេល៣ថ្ងៃ ចាប់ពីថ្ងៃទី១៥ ខែមីនា ដល់ថ្ងៃទី ១៧ ខែមីនា នៅសហព័ន្ធរុស្សីនេះ គឺគ្មានគណបក្សប្រឆាំងចូលរួមប្រកួតប្រជែងនោះឡើយ។ ប្រធានគណបក្សប្រឆាំងដ៏លេចធ្លោម្នាក់ និងជាមេធាវី លោក អាឡិចស៊ី ណាវ៉ាល់នី (Alexei Navalny) ត្រូវបានរដ្ឋាភិបាលពូទីន ចាប់ដាក់គុក និងទទួលអនិច្ចកម្ម កាលពីខែកុម្ភៈ នៅក្នុងពន្ធនាគារ។
តុលាការឧក្រិដ្ឋកម្មអន្តរជាតិ (ICC) កាលពីខែមីនា ឆ្នាំ២០២៣ បានចេញដីកាឃាត់ខ្លួន លោក វ្ល៉ាឌីមៀ ពូទីន ពីបទឧក្រិដ្ឋកម្មសង្គ្រាម ដោយបានចាប់ជំរិតកុមារអ៊ុយក្រែន (Ukrainian) យកទៅប្រទេសរុស្ស៊ី ក្នុងសង្គ្រាមឈ្លានពាននៅប្រទេសអ៊ុយក្រែន ក៏ប៉ុន្តែរដ្ឋាភិបាលរុស្ស៊ី បដិសេធការចោទប្រកាន់នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។