អាជ្ញាធរបានចេញមករារាំងប្រពន្ធ និងកូនរបស់សកម្មជនគណបក្សសង្គ្រោះជាតិមិនឱ្យតវ៉ាទាមទារឱ្យដោះលែងអ្នកទោសនយោបាយជាង ១០នាក់ នៅមុខសាលាដំបូងរាជធានីភ្នំពេញទេ នៅព្រឹកថ្ងៃទី២៦ មិថុនា។ មន្ត្រីអង្គការសង្គមស៊ីវិលផ្នែកការពារសិទ្ធិមនុស្សហៅការរារាំងរបស់សមត្ថកិច្ចនេះថា ជាការរឹតត្បិតសិទ្ធិសេរីភាពរបស់ប្រជាពលរដ្ឋដោយខុសច្បាប់។
តំណាងក្រុមអ្នកតវ៉ាម្នាក់នៅរាជធានីភ្នំពេញលោកស្រី ព្រុំ ចន្ថា ប្រាប់អាស៊ីសេរីថា មូលហេតុដែលពួកគាត់តវ៉ាដោយសារប្ដីរបស់លោកស្រីគឺលោក កាក់ កុម្ភារ ជាសមាជិកក្រុមប្រឹក្សារាជធានីភ្នំពេញជាប់ឆ្នោតគណបក្សសង្គ្រោះជាតិ និងសកម្មជនគណបក្សនេះជាង ១០នាក់ផ្សេងទៀត កំពុងជាប់គុកដោយអយុត្តិធម៌ពីព្រោះពួកគាត់មិនបានប្រព្រឹត្តខុសច្បាប់នោះឡើយ។ លោកស្រីហៅការចាប់ខ្លួនសកម្មជនបក្សប្រឆាំងនេះថា ជាការធ្វើឱ្យប្រពន្ធនិងកូនរបស់ជនជាប់ឃុំបែកបាក់គ្នាដោយឈឺចាប់បំផុត៖ «ពួកខ្ញុំស្ម័គ្រចិត្តទាំងអស់គ្នាការញុះញង់គ្មានមេដឹកនាំអីទាំងអស់ សូម្បីតែលុយកាក់ក៏ខ្លួនឯងដែរនិយាយរួមទៅគឺអត់មានតែម្ដងអ្នកខ្លះគាត់ចេញពីផ្ទះតាំងពីព្រលឹមមកមានតែនំប៉័ងមួយញាំក៏បានដែរ។ ធម្មតាគេចាប់ឪពុកគេចាប់ប្ដីសួរមានអារម្មណ៍យ៉ាងម៉េចដែរបើមិនមកជួយគ្នានោះយើងស្ម័គ្រចិត្តទាំងអស់គ្នា ដោយសារឈឺចាប់គេចាប់ប្ដីអីចឹងទៅមានតែនាំគ្នាងើបដើម្បីស្វែងរកយុត្តិធម៌ឱ្យអ្នកជាប់ឃុំព្រោះបើពួកខ្ញុំមិនងើបទេមានអ្នកណាជួយពួកខ្ញុំបានទេ»។
ការតវ៉ានេះពុំមានអាជ្ញាធរណាម្នាក់ទៅជួបពិភាក្សាជាមួយពួកគាត់នោះទេហើយក្រុមអ្នកតវ៉ាបាននាំគ្នាទៅដាក់ញត្តិនៅស្ថានទូតអាមេរិកវិញ ដើម្បីឱ្យជួយអន្តរាគមន៍នៅព្រឹកថ្ងៃដដែលនេះ។ ជំនួយការឯកអគ្គរដ្ឋទូតអាមេរិកប្រចាំនៅរាជធានីភ្នំពេញម្នាក់បានចេញមកទទួលញត្តិពីក្រុមអ្នកតវ៉ា និងបានសន្យាថា ស្ថានទូតអាមេរិកនឹងតាមដានឃ្លាំមើលរឿងនេះយ៉ាងយកចិត្តទុកដាក់។ ក្រុមអ្នកតវ៉ាគ្រោងប្រមូលគ្នាតវ៉ានៅមុខសាលាដំបូងរាជធានីភ្នំពេញបន្តទៀតនៅសប្ដាហ៍ក្រោយ។
នេះជាលើកទី២ហើយ ដែលសាច់ញាតិសកម្មជនបក្សប្រឆាំងនាំគ្នាតវ៉ានៅមុខសាលាដំបូងរាជធានីភ្នំពេញប៉ុន្តែត្រូវបានប៉ូលិស និងកងសន្តិសុខក្រុងភ្នំពេញរារាំង និងចាប់ដកយកបដាពីពួកគាត់។ បដានោះមានខ្លឹមសារប្រហាក់ប្រហែលគ្នា គឺទាមទារឱ្យតុលាការដោះលែងឪពុកនិងប្ដីរបស់ពួកគាត់ដោយគ្មានលក្ខខណ្ឌ។
ឆ្លើយតបនឹងបញ្ហានេះស្នងការនគរបាលរាជធានីភ្នំពេញលោក ស ថេត ប្រាប់អាស៊ីសេរីថា ប៉ូលិសមិនបានរារាំងក្រុមអ្នកតវ៉ាដូចការចោទប្រកាន់នោះឡើយ។ លោកបញ្ជាក់ថា សមត្ថកិច្ចទៅការពារសន្តិសុខនៅមុខតុលាការដោយសារខ្លាចក្រុមអ្នកតវ៉ាបិទផ្លូវធ្វើឱ្យប៉ះពាល់ដល់សណ្ដាប់សាធារណៈ៖ «អត់មានពីណាគេណែនាំឱ្យគាត់ដកបដាទេ។ តវ៉ាតអីប៉ុន្តែរឿងសិទ្ធិនៅលើតុលាការទេនគរបាលអត់មានសិទ្ធិទេ។ ខ្ញុំបានណែនាំឱ្យបងប្អូនទៅរៀបចំសណ្ដាប់ធ្នាប់ ប៉ុន្តែការតវ៉ាទាមយ៉ាងម៉េចលើសិទ្ធិរបស់តុលាការទេ»។
ចំណែកអ្នកនាំពាក្យក្រសួងយុត្តិធម៌ លោក ជិន ម៉ាលីន ប្រាប់ថា រឿងក្ដីនេះជានីតិវិធីរបស់តុលាការដោយពុំមានក្រុម ឬស្ថាប័នណាអាចបង្គាប់បញ្ជាឬដាក់សម្ពាធទៅលើតុលាការបានឡើយ៖ «ក៏ប៉ុន្តែផ្ទុយទៅវិញពួកគាត់គួរតែធ្វើការតវ៉ាទៅមេកើយរបស់គាត់នៅក្រៅប្រទេសឱ្យជួយពួកគាត់ ដូចជាជំនួយផ្នែកច្បាប់អីជាដើម។ ពីព្រោះថា ក្រុមទាំងនោះហើយដែលបានរៀបចំផែនការញុះញង់ពួកគាត់ឱ្យធ្វើសកម្មភាពអីផ្សេងៗដែលឈានទៅការល្មើសច្បាប់ហើយនាំឱ្យមានការទទួលខុសត្រូវតាមផ្លូវច្បាប់បែបនេះ»។
ផ្ទុយពីការលើករបស់មន្ត្រីក្រសួងយុត្តិធម៌នេះ អ្នកនាំពាក្យសមាគមការពារសិទ្ធិមនុស្សអាដហុក(Adhoc) លោក ស៊ឹង សែនករុណា មានប្រសាសន៍ថា ការចាប់ខ្លួនសកម្មជនគណបក្សប្រឆាំងនេះជារឿងនយោបាយច្រើនជាងការអនុវត្តច្បាប់។លោកបន្តថា ប្រទេសប្រជាធិបតេយ្យការតវ៉ាគឺជាសិទ្ធិសេរីភាពសម្ដែងមតិរបស់ប្រជាពលរដ្ឋដោយស្របច្បាប់។ លោកបញ្ជាក់ថា ករណីអាជ្ញាធររារាំងមិនឱ្យប្រជាពលរដ្ឋតវ៉ាគឺជាការរឹតត្បិតសិទ្ធិសេរីភាពរបស់ប្រជាពលរដ្ឋ៖ «គឺគេផ្ដល់សិទ្ធិឱ្យក្រុមគ្រួសារឬអ្នកដែលរងគ្រោះហ្នឹងតវ៉ាទាមទារនូវអ្វីដែលពួកគេមិនពេញចិត្តហើយសុំការទទួលយកនិងធ្វើការដោះស្រាយអីជាដើម។ប្រសិនបើប្រើវិធានការរឹតត្បិតដកបដាដកងីពួកគាត់អីចឹងតើវាជាសេរីភាពមួយនៅក្នុងប្រទេសដែលមានប្រជាធិបតេយ្យឬអត់ ដែលតែងតែមានការអះអាងពីខាងសំណាក់រដ្ឋាភិបាលនោះ»។
ចាប់តាំងពីដើមឆ្នាំ២០២០មកមានសកម្មជនបក្សប្រឆាំង ចំនួន១៥នាក់ហើយ ត្រូវបានអាជ្ញាធរចាប់ខ្លួនដាក់ពន្ធនាគារព្រៃស។ មន្ត្រីគណបក្សប្រឆាំងទាំងនោះត្រូវបានចោទប្រកាន់ដូចៗគ្នាពីបទរួមគំនិតក្បត់ ញុះញង់ កុំឲ្យយោធិនស្តាប់បង្គាប់ និងញុះញង់ឱ្យប្រព្រឹត្តបទឧក្រិដ្ឋជាអាទិ៍។
កាលពីថ្ងៃទី១១ មិថុនាក្រុមអង្គការសង្គមស៊ីវិល ៣០ស្ថាប័នចេញសេចក្តីថ្លែងការណ៍រួមគ្នាអំពាវនាវឱ្យរដ្ឋាភិបាលបញ្ឈប់ទង្វើយាយីលើសកម្មជនគណបក្សសង្គ្រោះជាតិ ព្រមទាំងដោះលែងអ្នកទោសនយោបាយ ឱ្យមានសេរីភាពឡើងវិញ។ ក្រុមអង្គការសង្គមស៊ីវិលទាំងនោះក៏បានជំរុញឱ្យរដ្ឋាភិបាល និងភាគីពាក់ព័ន្ធ ត្រូវគោរពសិទ្ធិជាមូលដ្ឋាន របស់ពលរដ្ឋ ដូចជាសិទ្ធិនយោបាយ និងសិទ្ធិបញ្ចេញមតិជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។