អតីតតំណាងរាស្ត្របក្សប្រឆាំងថា គម្រោង CLV ត្រូវបានរដ្ឋាភិបាលត្រកូលហ៊ុនលាក់បាំងនៅសភា
2024.08.17
លោក សម រង្ស៊ី (ឆ្វេង) ប្រធានស្ដីទីគណបក្សសង្គ្រោះជាតិ និងលោក ឡុង រី អតីតតំណាងរាស្ត្រគណបក្សសង្គ្រោះជាតិ។
រូប៖ ហ្វេសប៊ុកលោក ឡុង រី
មន្ត្រីបក្សប្រឆាំងអះអាងថា កិច្ចសហប្រតិបត្តិការតំបន់ត្រីកោណអភិវឌ្ឍន៍ (CLV-DTA) កន្លងទៅត្រូវបានរដ្ឋាភិបាលត្រកូលហ៊ុនលាក់បាំងមិនឱ្យសមាជិកមកគណបក្សជំទាស់បានដឹង ឬចូលរួមជជែងសួរដេញទេ។ ការបញ្ជាក់នេះធ្វើឡើងបន្ទាប់ពីលោក ហ៊ុន ម៉ាណែត ចោទថា សមាជិកសភាមកពីបក្សជំទាស់នៅក្នុងសភាជាច្រើនអាណត្តិកន្លងទៅមិនបានចេញមុខតវ៉ាកិច្ចសហប្រតិបត្តិការតំបន់ត្រីកោណអភិវឌ្ឍន៍(CLV-DTA) ប៉ុន្តែជាអ្នកនៅពីក្រោយការបញ្ឆេះឱ្យពលរដ្ឋងើបតវ៉ានៅពេលនេះ។
អតីតតំណាងរាស្ត្រគណបក្សសង្គ្រោះជាតិលោក ឡុង រី ចាត់ទុកការចោទប្រកាន់របស់រដ្ឋាភិបាលលោក ហ៊ុន ម៉ាណែត នោះថា ជាអំពើទុច្ចរិតធ្វើឱ្យប្រជាពលរដ្ឋភាន់ច្រឡំមកលើគោលជំហររបស់គណបក្សប្រឆាំងពាក់ព័ន្ធរឿងបញ្ហាទឹកដី។ លោកភ្ញាក់ផ្អើលពេលឃើញមន្ត្រីរដ្ឋាភិបាលបង្ហាញលិខិតរបស់រដ្ឋសភាមួយច្បាប់មានឈ្មោះរបស់លោកនៅក្នុងគណៈកម្មការតំបន់ត្រីកោណអភិវឌ្ឍន៍(CLV-DTA) កាលពីឆ្នាំ២០១០។
លោក ឡុង រី៖ «យើងអត់បានដឹង យើងអត់បានចូលរួម អ៊ីចឹងកុំចេះតែស្រែកឱ្យលឺ កាលនោះមានប្រជុំកន្លែងណា មានកំណត់ហេតុអ្វីខ្លះ ដឹកនាំប្រជុំដោយអ្នកណា តើមានហត្ថលេខារបស់ខ្ញុំទេត្រូវបញ្ជាក់ជាសាធារណៈ ទីពីរត្រូវមានសុចរិតទៀងត្រង់ជាមួយជាតិមាតុភូមិ សាសនារបស់យើងត្រូវតែត្រង់ មិនមែននិយាយឱ្យតែលឺៗទេ ដើម្បីបង្កាច់បង្ខូច តែការពិតខ្លួនឯងធ្វើការវិនិយោគដីទៅបរទេស ហើយបង្ហូរអន្តោប្រវេសន្តចូលស្រុកខ្មែរ កាត់ដីឱ្យខ្លួនឯងឱ្យគេត្រួតត្រា មកចោទបក្សប្រឆាំងបានចូលរួមចំណែកគឺវាខុស»។
មន្ត្រីរដ្ឋាភិបាលមួយចំនួនបង្ហោះលិខិតមួយច្បាប់របស់រដ្ឋសភាដែលបានបង្កើតគណៈកម្មការសភាប្រទេសកម្ពុជា នៃគណៈកម្មការអន្តរសភាកម្ពុជា-ឡាវ-និងវៀតណាម កាលពីថ្ងៃទី១ ខែមិថុនា ឆ្នាំ២០១០ ដើម្បីធ្វើការជំរុញ និងតាមដានការអនុវត្តនូវនយោបាយអភិវឌ្ឍតំបន់ត្រីកោណ។ គណៈកម្មការដែលអតីតប្រធានសភាលោក ហេង សំរិន បានចុះហត្ថលេខា តែងតាំងសមាសភាពសមាជិកសភាចំនួន២៥នាក់ ដែលមានលោក ឈា វុន ជាប្រធានគណៈកម្មការ និងសមាជិកសភាម្នាក់មកពីគណបក្ស សម រង្ស៊ី គឺលោក ឡុង រី ដែលជាសមាជិកគណៈកម្មការ។
លិខិតនេះត្រូវបានមន្ត្រីរដ្ឋាភិបាលចំនួនយកទៅធ្វើជាប្រធានបទចោទប្រកាន់លើមន្ត្រីគណបក្សបឆាំងថាបានចូលរួមដឹងលឺគម្រោង CLV កន្លងទៅ។ លោកនាយករដ្ឋមន្ត្រី ហ៊ុន ម៉ាណែត កាលពីថ្ងៃទី១៥ ខែសីហា ចោទថា កិច្ចសហប្រតិបត្តិការនេះចាប់ផ្តើមតាំងពីឆ្នាំ១៩៩៩ ដល់ឆ្នាំ២០១៧ មានសមាជិករបស់គណបក្សប្រឆាំងនៅក្នុងរដ្ឋសភាជាបន្តបន្ទាប់ ប៉ុន្តែអ្នកទាំងនោះមិនបានចេញមុខជំទាស់នឹងកិច្ចសហប្រតិបត្តិការតំបន់ត្រីកោណអភិវឌ្ឍន៍CLV របស់រដ្ឋាភិបាលនោះទេ។ លោក ហ៊ុន ម៉ាណែត ចោទក្រុមអ្នកប្រឆាំងនៅក្រៅប្រទេស នៅពីក្រោយការបំផុស និងដុតស្ថានការណ៍ឱ្យមានការតវ៉ាប្រឆាំងនឹងកិច្ចសហប្រតិបត្តិការCLV នេះ។
លោក ហ៊ុន ម៉ាណែត៖ «គណបក្សប្រជាជនកម្ពុជាមិនមែនជាគណបក្សដឹកនាំសភាម្នាក់ឯងទេតាំងពី១៩៩៩ ២០០៣មានបីគណបក្សរបស់លោក ក៏មាននៅក្នុងសភាដែរមិចក៏មិនតវ៉ាជំទាស់ពេលនោះ ស្ងាត់ម្ល៉េះបានន័យថាអស់លោកក៏យល់ថា កិច្ចព្រមព្រៀងមិនគ្រោះ ទើបឯងឥឡូវមកចាប់ផ្តើមចេញមកបំផុស និងឃើញចរន្តចាប់ផ្តើមដុតបន្ថែម ពេលគាត់ជាសមាជិកសភានៅគណបក្សរបស់គាត់មាន៥៥កៅអីនៅក្នុងសភា ម៉េចក៏មិននិយាយរឿងហ្នឹង បងប្អូនសួរមើល បក្សប្រឆាំងឱ្យតែរដ្ឋាភិបាលធ្វើអ្វីខុស គ្រោះថ្នាក់ គឺគេយកឱកាសហ្នឹងដើម្បីវាយ វាយខ្លាំងបំផុតនៅក្នុងសភា នៅពេលដែលខ្លួនឯងនៅក្នុងសភាមាន៥៥កៅអី ហើយតាំងពីអាណត្តិនៅឆ្នាំ១៩៩៨ មានបីបក្សនុះ ហេតុអ្វីមិននិយាយថា អាហ្នឹងខុស»។
វិទ្យុអាស៊ីសេរីមិនអាចទាក់ទងអគ្គលេខាធិការរដ្ឋសភាលោក ឡេង ប៉េងឡុង ដើម្បីសុំការឆ្លើយតបរឿងនេះបានទេនៅថ្ងៃទី១៦ ខែសីហា។ ចំណែកសមាជិកសភាមកពីគណបក្សប្រជាជនកម្ពុជាលោក ឈាង វុន បដិសេធឆ្លើយតបសំនួររបស់វិទ្យុអាស៊ីសេរី។
ទោះយ៉ាងណាលោក ឡុង រី បញ្ជាក់ទៀតថា បើគណបក្សប្រឆាំងបានដឹងនៅពេលនោះ នឹងបកអាក្រាតបំណងទុច្ចរិតមេដឹកនាំផ្ដាច់ការ ដើម្បីឱ្យពលរដ្ឋបានដឹងតាំងពីពេលនោះមកម្ល៉េះ។
លោក ឡុង រី៖ «ពួកយើងមិនទទួលស្គាល់ដាច់ខាត ការធ្វើច្បាប់ ការរៀបចំជាប្រព័ន្ធគណៈកម្មការដែលផ្តល់ទឹកដីបួនខេត្តទៅឱ្យគេគ្រប់គ្រងត្រួតត្រាក្តី គឺយើងអត់ទទួលស្គាល់ទេ ពីព្រោះដីនេះជាដីរបស់ខ្មែរ បើយើងបានដឹងយើងមិនអនុញ្ញាតឱ្យធ្វើអ៊ីចឹងទេ យើងនឹងប្រកាសឱ្យពលរដ្ឋបានដឹង អ៊ីចឹងសួរថា យើងបានដឹងទេ គឺយើងអត់បានដឹងទេ តើយើងបានតវ៉ាទេ ដោយសារយើងអត់បានដឹង ទើបយើងមិនបានតវ៉ា យើងចង់ឱ្យបាត់បង់ទេ គឺយើងអត់ចង់ឱ្យបាត់ទេ អ៊ីចឹងពេលនេះយើងដឹង យើងត្រូវងើបតវ៉ា អាហ្នឹងវាជាសេរីភាព ជាសិទ្ធិរបស់ពលរដ្ឋគ្រប់រូបត្រូវតែងើបឡើងដើម្បីតវ៉ារកលទ្ធភាពបែបណាដើម្បីជួយការពារទឹកដីរបស់យើង»។
រដ្ឋាភិបាលប្រទេសកម្ពុជា វៀតណាម និង ឡាវ បានព្រមព្រៀងគ្នាបង្កើតកិច្ចសហប្រតិបត្តិការតំបន់ត្រីកោណអភិវឌ្ឍន៍(CLV) កាលពីឆ្នាំ ១៩៩៩។ គម្រោងនេះ មានខេត្តចំនួន ១៣ ជាចំណុះ ដោយប្រទេសកម្ពុជាមាន៤ខេត្តនៅភាគឦសាន ដែលមានពលរដ្ឋ សរុបតែជាង ៥០ម៉ឺននាក់។ ប្រទេសឡាវមាន៤ខេត្ត ដែលមានប្រជាជនសរុបជាង៧០ម៉ឺននាក់។ រីឯប្រទេសវៀតណាមមាន៥ខេត្ត ដែលមានប្រជាជន រហូតដល់ជាង ៧លាននាក់។
ប្រជាពលរដ្ឋខ្មែរទាំងក្នុងនិងក្រៅប្រទេសនៅតែទាមទារឱ្យរដ្ឋាភិបាលលោក ហ៊ុន ម៉ាណែត បញ្ឈប់ដាក់ខេត្តខ្មែរចំនួន៤នៅក្នុងកិច្ចសហប្រតិបត្តិការតំបន់ត្រីកោណអភិវឌ្ឍន៍ (CLV) ដើម្បីការពារអធិបតេយ្យភាពជាតិឱ្យបានគង់វង្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
អត្ថបទពេញនិយម
នយោបាយ
- សារលោក ហ៊ុន សែន បញ្ជាឲ្យកម្ទេចអ្នករិះគន់ «ជាភស្តុតាងអាចប្តឹងទៅតុលាការ ICC»
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
- ពលរដ្ឋខ្មែរនៅប្រទេសនូវែលហ្សេឡង់ធ្វើបាតុកម្មប្រឆាំងគម្រោង CLV-DTA និងទាមទារស្ដារប្រជាធិបតេយ្យ
- ពលរដ្ឋខ្មែរនៅអូស្ត្រាលីធ្វើបាតុកម្មទាមទារឱ្យរដ្ឋាភិបាលកម្ពុជាដកគម្រោង CLV ទាំងស្រុង
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់