លោក ហ៊ុន ម៉ាណែត ប្ដេជ្ញាអនុវត្តកម្មវិធីនយោបាយរបស់រដ្ឋាភិបាលថ្មីសម្រាប់នីតិកាលទី៧ ឱ្យបានជោគជ័យ ដោយយករបៀបដឹកនាំរបស់ឪពុកលោកធ្វើជាគម្រូ។ អ្នកវិភាគលើកឡើងថា លោក ហ៊ុន ម៉ាណែត នឹងបន្តការពារអំណាចបក្ខពួកជាជាងការពារប្រយោជន៍ និងលើកស្ទួយសិទ្ធិសេរីភាពរបស់ពលរដ្ឋ។
លោក ហ៊ុន ម៉ាណែត ប្រកាសដាក់ចេញកម្មវិធីនយោបាយអាទិភាពចំនួន៦ ដែលលោកថា នឹងត្រូវចាប់ផ្ដើមអនុវត្តភ្លាមៗ នៅឆ្នាំ២០២៣។ កម្មវិធីនយោបាយទាំងនោះមានជាអាទិ៍ ការពង្រឹងសេវាថែទាំសុខភាព ការបណ្ដុះបណ្ដាលជំនាញវិជ្ជាជីវៈ បច្ចេកទេស រួមទាំងផ្ដល់ជំនួយសង្គមជូនជនក្រីក្រ និងគ្រួសារងាយរងគ្រោះ។ លោកក៏ជំរុញឱ្យអនុវត្តយុទ្ធសាស្ត្រអភិវឌ្ឍសេដ្ឋកិច្ចក្រៅប្រព័ន្ធ លើកស្ទួយផលិតកម្ម រកទីផ្សារ និងការដាក់ពង្រាយមន្ត្រីបច្ចេកទេសកសិកម្មទៅគ្រប់ឃុំសង្កាត់ជាដើម។
លោក ហ៊ុន ម៉ាណែត៖«ផ្អែកលើមូលដ្ឋាននៃការគាំទ្ររបស់ប្រជាជនរដ្ឋាភិបាលប្ដេជ្ញារួមកម្លាំងប្រឹងប្រែង ជំរុញអនុវត្តបេសកកម្មជាប្រវត្តិសាស្ត្រនៅក្នុងនីតិកាលទី៧ នៃរដ្ឋសភានេះសម្រេចជោគជ័យ»។
លោក ហ៊ុន ម៉ាណែត ប្រកាសបែបនេះក្នុងសម័យប្រជុំសភាលើកដំបូង កាលពីថ្ងៃទី២២ ខែសីហា។ ទន្ទឹមនឹងថ្លែងពីកម្មវិធីនយោបាយអាទិភាពនេះ លោក ហ៊ុន ម៉ាណែត បានឆ្លៀតវាយប្រហារគណបក្សប្រឆាំង និងអួតសរសើរចំពោះការដឹកនាំរបស់លោក ហ៊ុន សែន ហើយថា នឹងយកឪពុករបស់លោកធ្វើជាគំរូ ដោយលោកមិននិយាយពីការស្ដារប្រជាធិបតេយ្យ និងការគោរពសិទ្ធិមនុស្សនោះទេ។
អ្នកតាមដានស្ថានការណ៍នយោបាយ និងមន្ត្រីគណបក្សប្រឆាំងយល់ថា កម្មវិធីនយោបាយថ្មីរបស់លោក ហ៊ុន ម៉ាណែត នេះ មិនមានអ្វីខុសប្លែកពីរដ្ឋាភិបាលឪពុករបស់លោកនោះទេ ហើយទំនងជាមិនអាចអនុវត្តបានដោយមានប្រសិទ្ធភាពនោះឡើយ។
អ្នកអត្ថាធិប្បាយនយោបាយ លោក គឹម សុខ មិនជឿថា លោក ហ៊ុន ម៉ាណែត អាចកែទម្រង់ការដឹកនាំប្រទេសឱ្យមាននីតិរដ្ឋ និងប្រជាធិបតេយ្យពិតបានឡើយ ដោយសារលោកឡើងកាន់តំណែងជានាយករដ្ឋមន្ត្រីនេះតាមរយៈការជួយជ្រោមជ្រែងពីលោក ហ៊ុន សែន។ លោកថា គណៈរដ្ឋមន្ត្រីថ្មីដឹកនាំតាមបែបបក្ខនិយម ដែលជាប្រភពអំពើពុករលួយចាក់ស្រេះក្នុងក្រសួងស្ថាប័ន និងរំលោភអំណាចរដ្ឋ។
លោក គឹម សុខ៖«ដើរអត់ឆ្ងាយពីឪពុករបស់គាត់ទេ គឺធ្វើតាមគម្រូរបស់ឪពុកគាត់ដោយធ្វើបាបប្រជាពលរដ្ឋ ដឹកនាំប្រទេសជាតិច្របូកច្របល់ ហើយព្រំដែនគោក ទឹក និងកោះប្រទេសជិតខាងកាត់យកបន្តិចម្តងៗ អន្តោប្រវេសន៍ចូលមកក្នុងប្រទេសតាមចិត្ត ដូច្នេះលោក ហ៊ុន ម៉ាណែត អត់មានអ្វីដើរឆ្ងាយពីគន្លងឪពុកទេ គឺមានតែផ្លាស់ប្ដូរ ហ៊ុន ម៉ាណែត ឬអំណាចគ្រួសារ ហ៊ុន ចេញទេ ទើបអាចស្ដារអនាគតប្រទេសជាតិបាន»។
ស្រដៀងគ្នានេះ អតីតតំណាងរាស្ត្រគណបក្សសង្គ្រោះជាតិ លោក ម៉ែន សុថាវរិន្ទ យល់ឃើញថា លោក ហ៊ុន ម៉ាណែត ដែលឡើងមកជំនួសតំណែងឪពុកនេះពេលនេះ ប្រៀបបានទៅនឹងការទទួលថ្មបាក់ពីឪពុក ព្រោះរដ្ឋាភិបាលអាណត្តិចាស់របស់លោក ហ៊ុន សែន បានបន្សល់ទុកនូវ កេរ្តិ៍ឈ្មោះមិនល្អ និងបញ្ហាធំៗ ជាច្រើន ដូចជា អំពើពុករលួយ ការរំលោភសិទ្ធិមនុស្ស បំផ្លាញប្រជាធិបតេយ្យ និងបំបិទប្រព័ន្ធផ្សព្វផ្សាយឯករាជ្យជាដើម។
លោក ម៉ែន សុថាវរិន្ទ៖«យើងធ្វើឱ្យល្អប្រសើរឡើងវិញ នូវស្ថានភាពសិទ្ធិមនុស្ស និងលទ្ធិប្រជាធិបតេយ្យ នៅកម្ពុជាឡើងវិញ។ ទម្លាក់ចោលបទចោទប្រកាន់លើគណបក្សប្រឆាំងទាំងអស់ ឱ្យគណបក្សសង្គ្រោះជាតិត្រឡប់មកវិញទាំងអស់ ហើយរៀបចំបោះឆ្នោតដោយសេរី និងយុត្តិធម៌ឡើងវិញទៅ គឺគាត់នឹងបានស្អីៗ មកវិញទាំងអស់»។
រីឯប្រធានគណបក្សខ្មែរឈប់ក្រ លោក ក្រវ៉ាញ ដារ៉ន ដែលបានចូលរួមក្នុងការបោះឆ្នោត កាលពីខែកក្កដាវិញ លោកយល់ថា ការផ្លាស់ប្ដូររដ្ឋាភិបាលថ្មីនេះ មិនមែនជាជ័យជម្នះ ដែលតំណាងឱ្យសំឡេងឆន្ទៈរបស់ប្រជាពលរដ្ឋនោះទេ ប៉ុន្តែជាការរំលោភច្បាប់រដ្ឋធម្មនុញ្ញ របស់គ្រួសារត្រកូល “ហ៊ុន” ក្នុងការផ្ទេរអំណាចតត្រកូល។
លោក ក្រវ៉ាញ ដារ៉ន៖«យើងមិនអនុញ្ញាតទេ ហើយអង្គការសហប្រជាជាតិ ត្រូវតែបញ្ឈប់អត់ទទួលស្គាល់ បង្កកកៅអីមិនទទួលស្គាល់រដ្ឋាភិបាលខុសច្បាប់នេះ ហើយបង្កករដ្ឋាភិបាល រៀបចំការបោះឆ្នោតសាដើមឡើងវិញ»។
ទាក់ទងរឿងនេះដែរ ស្ថាបនិកចលនាមាតាធម្មជាតិ លោក អាឡិច ហាន់ដ្រូហ្គន់សាឡេស ដេវិតសុន (Alejandro Gonzalez Davidson) ថ្លែងថា រដ្ឋាភិបាលរបស់ឪពុក និងកូនទាំងពីរនេះ គ្មានភាពខុសប្លែកគ្នានោះទេ ដោយសារតែអំពើពុករលួយស៊ីរូងផ្ទៃក្នុងក្នុងប្រព័ន្ធដឹកនាំរដ្ឋ។
លោក អាឡិច៖«ដរាបណាប្រជាជនខ្មែរនៅស្ងាត់ នៅស្ងៀមរាល់ថ្ងៃ សម្ពាធអន្តរជាតិទៅលើកម្ពុជា គឺអត់ខ្លាំងទេ។ ប៉ុន្តែ នៅពេលប្រជាជនខ្មែរចាប់ផ្ដើមសកម្ម ចាប់ផ្ដើមស្វាហាប់ ចាប់ផ្ដើមហ៊ាន ដូចយើងឃើញយុវជនយើងមួយចំនួនកំពុងតែធ្វើ អាហ្នឹងប្រាកដថា សម្ពាធអន្តរជាតិនឹងឡើងហើយ»។
កន្លងទៅ រដ្ឋាភិបាលអាណត្តិមុនៗ ដឹកនាំដោយលោក ហ៊ុន សែន ធ្លាប់បានប្រកាសអនុវត្តគោលនយោបាយកែទម្រង់លើគ្រប់វិស័យ ប៉ុន្តែទៅទីបំផុត រដ្ឋាភិបាលបានបរាជ័យក្នុងការអនុវត្តគោលនយោបាយទាំងនោះឱ្យមានប្រសិទ្ធភាព។ ប្រជាពលរដ្ឋនៅតែលើកឡើងពីទុក្ខកង្វល់ជាបន្តបន្ទាប់ ដូចជា បញ្ហាសេដ្ឋកិច្ច អសន្តិសុខក្នុងសង្គម វិវាទដីធ្លី បញ្ហាកង្វះទីផ្សារ ចំពោះកសិផល តម្លៃជី ថ្នាំ និងសម្ភារៈកសិកម្មលើទីផ្សារឡើងថ្លៃជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។