លោក ហ៊ុន សែន ជួប​ពិភាក្សា​ទ្វេភាគី​ជាមួយ​មេដឹកនាំ​ចិន មុន​កិច្ច​ប្រជុំ​អាស៊ាន

លោក​នាយករដ្ឋមន្ត្រី ហ៊ុន សែន ​ជួប​ពិភាក្សា​ការងារ​ទ្វេភាគី​ជាមួយ​នាយក​រដ្ឋមន្ត្រី​ចិន ​នៅ​ល្ងាច​ថ្ងៃទី៩​ ខែវិច្ឆិកា ​នៅ​វិមាន​សន្តិភាព ​ដែល​ធ្វើ​ឡើង​នៅមុន​​មួយ​ថ្ងៃ​នៃ​កិច្ច​ប្រជុំ​កំពូល​អាស៊ាន​ និង​កិច្ចប្រជុំ​ពាក់ព័ន្ធ។ អ្នកជំនាញ​ផ្នែក​ភូមិសាស្ត្រ​នយោបាយ​យល់ថា ​ជំនួប​ទ្វេភាគី​នេះ ​ចិន​ទំនង​ជា​ព្យាយាម​បញ្ចុះ​បញ្ចូល​​មេដឹកនាំ​កម្ពុជា​​រឿង​សមុទ្រ​ចិន​ខាងត្បូង។

ជំនួប​បិទ​ទ្វារ​រវាង​លោក​នាយករដ្ឋមន្ត្រី ហ៊ុន សែន និង​នាយករដ្ឋ​មន្ត្រីចិន ​លោក លី ខឺឈាង (Li Keqiang) នៅ​វិមាន​សន្តិភាព គឺ​ជជែក​ពិភាក្សា​ផ្ដោត​លើ​​ប្រធានបទ​មួយចំនួន ​ពាក់ព័ន្ធ​នឹង​ការ​ពង្រឹង​កិច្ច​សហ​ប្រតិបត្តិការ​ភាព​ជា​ដៃគូ​យុទ្ធសាស្ត្រ​គ្រប់​ជ្រុង​ជ្រោយ​រវាង​ប្រទេស​ទាំង​ពីរ និង​បញ្ហា​តំបន់ និង​អន្តរជាតិ​មួយ​ចំនួន​ដែល​ជា​កង្វល់​រួម។

ជំនួយការ​ផ្ទាល់​របស់លោក ហ៊ុន​ សែន គឺ​លោក អ៊ាង សុផល្លែត ថ្លែង​ប្រាប់​អ្នកកា​សែត ​ក្រោយ​ជំនួប​នោះ​ថា នាយក​រដ្ឋមន្ត្រីចិន​ពេញចិត្ត ចំពោះ​ទំនាក់ទំនងគ្រប់​វិស័យ​រវាង​កម្ពុជា-ចិន​។ លោកថា ភាគីចិន​ ក៏​បន្ត​ប្ដេជ្ញា​ជួយ​កម្ពុជា​ ឲ្យ​កាន់​តែ​រីក​ចម្រើន​បន្ថែម តាម​ការ​ផ្តល់​ជំនួយ​ផ្សេងៗ​៖

«ចិនផ្តល់ជំនួយ​បន្ថែមដល់កម្ពុជា ទៅលើវិស័យជារួមមាន៖ទី១ ទឹកប្រាក់ចំនួន២រយលានយ័ន សម្រប់ជួយកែលម្អជីវភាពប្រជាពលរដ្ឋកម្ពុជា ជួយដល់ការស្តាឡើងវិញនូវបេតិកភ័ណ្ឌកម្ពុជា បង្កើនចំនួននិស្សិតកម្ពុជា ទៅបន្តការសិក្សានៅប្រទេសចិន ជួយដល់សកម្មភាពដោះមីន ជួយដល់វិស័យសុខាភិបាល ជួយដល់ការរៀបចំការប្រគួតស៊ីហ្គេម នៅឆ្នាំខាងមុខក៏ដូចជួយដល់ កីឡាករ កីឡាការិនីកម្ពុជា ជួយដល់ការស្ថាបនាស្ពានឆ្លងទន្លេមេគង្គ ជួយការស្ថាបនាផ្លូវដេកការតភ្ជាប់ពីកម្ពុជា ថៃ ឡាវ និងប្រទេសចិន។ ជាពិសេសទៀត ជួយ ដល់កម្ពុជាលើវិស័យកសិកម្ម ធ្វើយ៉ាងណាឲ្យផលិតផលកសិផលកម្ពុជា មានគុណភាពអាចនាំចូលទៅប្រទេសចិន ស្របតាមកូតាដែលបានប្រគល់ជូន»។

លោក អ៊ាង សុផល្លែត ​ឲ្យដឹងដែរ​​ថា ​ជា​ការ​ឆ្លើយ​តប ​គឺ​លោក​នាយករដ្ឋមន្ត្រី​ ហ៊ុន សែន អរគុណ​ចិន​ដែល​បន្ត​ជួយ​កម្ពុជា និង​ចាត់ទុក​ថា ជំនួយ​របស់​ចិន នឹង​ជួយ​អភិវឌ្ឍ​កម្ពុជា​បន្ថែម​ទៀត។

ក្រោយ​ជំនួប​នេះ សម​ភាគី​ទាំងពីរ បាន​ចុះហត្ថលេខា​លើ​ឯកសារ​ចំនួន១៨ រួមមាន​ឯកសារ​ផ្តល់​ជំនួយ​លើ​គម្រោង​អភិវឌ្ឍន៍​មួយ​ចំនួន​នៅ​កម្ពុជា ដូច​ជា​ផ្លូវថ្នល់​សាលា​រៀន ​សេដ្ឋកិច្ច ​ពាណិជ្ជកម្ម ​និង​កសិកម្ម​ ជាដើម។

ទោះជាយ៉ាងណា​ អ្នកស្រាវជ្រាវ​វិទ្យាស្ថាន​ខ្មែរ​សម្រាប់​សហប្រតិបត្តិការ និង​សន្តិភាព លោកវណ្ណប៊ុនណា ​យល់​ថា​ ​ដំណើរ​ទស្សនកិច្ច​របស់​នាយក​រដ្ឋមន្ត្រី​ចិន ​និង​នាយករដ្ឋមន្ត្រី​វៀតណាម​មក​បំពេញ​ទស្សនកិច្ច​នៅ​កម្ពុជា​ទន្ទឹមគ្នា​ នៅ​មុន​កិច្ច​ប្រជុំ​អាស៊ាន​នេះ ​ទំនង​ជា​ដើម្បី​បញ្ចុះ​បញ្ចូល​មេដឹកនាំ​កម្ពុជា ​ឲ្យ​លើក​យក​​បញ្ហា​ជម្លោះ​សមុទ្រ​ចិន​ខាងត្បូង​ទៅ​ដាក់​ក្នុង​កិច្ចប្រជុំ​កំពូល​អាស៊ាន​ទៅតាម​ការ​ចង់​បាន​របស់​ពួកគេ​រៀងៗ​ខ្លួន៖

«ខ្ញុំមើលឃើញថា​ជាជម្រើសកម្ពុជា គឺកម្ពុជាគួរតែមិនចាំបាច់យករបៀបវារៈរឿងសមុទ្រចិនខាងត្បូងគឺជារបៀបវារៈសំខាន់ក្នុងការ​ ចរចារពិភាក្សាគ្នាទេ ប៉ុន្តែជំរុញឲ្យភាគីពាក់ព័ន្ធទាំងផ្នែកអាស៊ាន និងចិនដោះស្រាយជាលក្ខណៈទ្វេភាគី​គឺជារឿងល្អដោយសារកម្ពុជាមិនពាក់ព័ន្ធលើរឿងសមុទ្រចិនខាងត្បូង។នេះគឺជាជម្រើសដែលកម្ពុជា គួរធ្វើសម្រាប់ដោះស្រាយបញ្ហា រឿងសមុទ្រចិនខាងត្បូង ដើម្បីកុំឲ្យពាក់ព័ន្ធដល់ខ្លួនផងដែរ។ នេះគឺជាជម្រើសឆ្លាត​វៃមួយសម្រាប់កម្ពុជាដែលត្រូវការផលប្រយោជន៍ទាំងចិន និងអាស៊ាន»។

នៅមុន​នេះ​មួយថ្ងៃលោក ហ៊ុន សែន ​ក៏បាន​ជួប​ពិភាក្សា​ទ្វេភាគី​ជាមួយ​នាយក​រដ្ឋមន្ត្រី​វៀតណាម លោក ​ផាម មិញជិញ (Pham Minh Chinh) ​ដែរ ដោយ​ផ្ដោត​លើ​ពង្រឹង​ទំនាក់ទំនង ​នយោបាយ ​និង​សេដ្ឋកិច្ច។ភាគី​ទាំង​ពីរ​ក៏​បាន​ចុះ​កិច្ចព្រម​ព្រៀង​ព្រៀង​លើ​ឯកសារ​ចំនួន១១ចំណុច​រួមមាន៖ វិស័យ​ក្រសួង​កសិកម្ម ​ក្រសួង​ពាណិជ្ជកម្ម ​ទូរគមនាគមន៍ ​ការងារ ​និង​វិស័យ​ហិរញ្ញវត្ថុ​ជាដើម។

បើ​ទោះ​បី​ជា​នៅ​ពេល​នេះ ​ទាំង​​រដ្ឋាភិបាល​កម្ពុជា ​ចិន ​និង​វៀតណាម ​មិន​បាន​លើក​ឡើង​ជា​សាធារណៈ​អំពី​បញ្ហា​សមុទ្រ​ចិន​ខាងត្បូង​ក្តី ក៏ប៉ុន្តែ​រដ្ឋាភិបាល​ចិន​ និង​វៀតណាម ​ធ្លាប់​បាន​ប្រើ​ឥទ្ធិពល​របស់​ខ្លួន​មក​លើ​កម្ពុជា​ម្តង​រួច​មក​ហើយ ​នៅ​ពេល​កម្ពុជា​ធ្វើជា​ម្ចាស់ផ្ទះ​ក្នុង​កិច្ចប្រជុំ​កំពូល​អាស៊ាន​ កាលពី​ឆ្នាំ​២០១២។នៅ​ពេល​នោះ វៀតណាម ​បាន​ស្នើ​ឲ្យ​កម្ពុជា ​ដាក់​ជម្លោះ​​សមុទ្រ​ចិន​ខាងត្បូង​នៅក្នុង​របៀប​វារៈ​នៃ​កិច្ច​ប្រជុំ​អាស៊ាន។ ចំណែក​ប្រទេស​ចិន​មិន​ចង់​​ឱ្យ​យក​ជំលោះ​ប្រជុំ​កោះ​ប៉ារ៉ា​សែល ​នៅ​សមុទ្រ​ចិន​ខាង​ត្បូង ​ទៅ​ជជែក​គ្នា​ក្នុង​វេទិកា​តំបន់​បែបនេះ​ទេ។នៅទីបំផុត​ ចិន ​​បាន​រាំង​ខ្ទប់​កម្ពុជា ​មិន​ឱ្យ​ចេញ​សេចក្តី​ថ្លែងការណ៍​រួម​របស់​រដ្ឋមន្ត្រីការបរទេស​អាស៊ាន​ឡើយ​​ ព្រោះ​វា​ប៉ះ​ពាល់​ដល់​ផល​ប្រយោជន៍​របស់​ចិន ​នៅក្នុង​ជម្លោះ​​សមុទ្រ​ចិន​ខាងត្បូង។

ដោយឡែក ​នៅមុន​ជំនួប​ជាមួយ​នាយក​រដ្ឋមន្ត្រី​ចិន​​​នេះ​ ​លោក​នាយករដ្ឋមន្ត្រី ហ៊ុន សែន ​ក៏បាន​ជួប​ពិភាក្សា​ជាមួយ​រដ្ឋមន្ត្រី​ការបរទេស​អ៊ុយក្រែន​ លោក ​ដឹមីត្រូ គូលេបា (Dmytro Kuleba ) នៅ​វិមាន​សន្តិភាព​ដែរ។ ជំនួប​នោះ​ ប្រមុខ​ការទូត​អ៊ុយក្រែន ​អរគុណ​កម្ពុជា ​ដែល​បាន​គាំទ្រ​អ៊ុយក្រែន និង​ថ្កោលទោស​រុស្ស៊ី​ដែល​ឈ្លាន​ពាន​អ៊ុយក្រែន។ ជំនួយការ​ផ្ទាល់​របស់​លោក ហ៊ុន សែន គឺ​លោក អ៊ាង ​សុផល្លែត​ ថ្លែង​ប្រាប់​អ្នក​កាសែត​ក្រោយ​ជំនួប​នោះ​ថា ​ជា​ការ​ឆ្លើយតប​របស់​លោក​នាយករដ្ឋមន្ត្រី ហ៊ុន សែន គឺ​កម្ពុជា ​ប្រឆាំង​ការ​ឈ្លានពាន ការ​គំរាម​កំហែង ឬ​ការ​ប្រើប្រាស់​ហិង្សា​លើ​អធិបតេយ្យ​ភាព បូរណភាព​ទឹកដី​នៃ​រដ្ឋ​ដែល​ឯករាជ្យ ស្របតាម​ក្នុង​ធម្មនុញ្ញ​របស់​អង្គការ​សហប្រជាជាតិ និង​ច្បាប់​អន្តរជាតិ។ លោក បន្ត​ថា កម្ពុជា ក៏​មិន​គាំទ្រ​ដល់​ការ​បំបែក​រដ្ឋ​ឬ​ការ​ទន្ទ្រាន​យក​ទឹកដី​ពី​ប្រទេស​ដទៃ​ឡើយ។ក្រៅពី​ជំនួប​ទ្វេ​ភាគី​នេះ ​វត្តមាន​របស់​រដ្ឋមន្ត្រី​ការ​បរទេស​អ៊ុយក្រែន​នៅ​កម្ពុជា​នៅ​ពេលនេះ ​គឺ​ដើម្បី​ចូលរួម​ចុះ​ហត្ថលេខា​លើ​លិខិតុបករណ៍​នៃ​ការ​ចូល​ជា​ភាគី​នៃ​សន្ធិសញ្ញា​មិត្តភាព និង​កិច្ច​សហប្រតិបត្តិការ​នៅ​តំបន់​អាស៊ីអាគ្នេយ៍ (TAC)៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។