នាយករដ្ឋមន្ត្រី ហ៊ុន សែន និងមន្ត្រីរដ្ឋាភិបាល កាលពីថ្ងៃទី១២ ខែកញ្ញា បានទៅចូលរួមរំលែកទុក្ខនៃការយាងសោយទិវង្គតរបស់ព្រះមហាក្សត្រិយានី អេលីហ្សាប៊ែត ទី២ របស់ចក្រភពអង់គ្លេស នៅឯស្ថានទូតអង់គ្លេស ប្រចាំនៅរាជធានីភ្នំពេញ។
លោក ហ៊ុន សែន បានសរសេររៀបរាប់ក្នុងសៀវភៅរំលែកទុក្ខថា លោកក្រៀមក្រំយ៉ាងខ្លាំង នៅពេលទទួលដំណឹងថា មហាក្សត្រិយានី អេលីហ្សាប៊ែត ទី២ បានយាងសោយទិវង្គត។ លោកថា ការបាត់បង់ មហាក្សត្រិយានី អេលីហ្សាប៊ែត ទី២ នេះថា មិនមែនសម្រាប់តែប្រទេសអង់គ្លេសមួយប៉ុណ្ណោះទេ ប៉ុន្តែជាការបាត់បង់ របស់ពិភពលោកទាំងមូលផងដែរ។
ព្រះមហាក្សត្រិយានី អេលីហ្សាប៊ែត ទី២ បានយាងសោយទិវង្គត កាលពីថ្ងៃទី៨ ខែកញ្ញា ឆ្នាំ២០២២ ក្នុងព្រះជន្ម ៩៦ ព្រះវស្សា ក្នុងព្រះរាជដំណាក់ បលម៉ូវ៉ល (Balmoral) របស់គ្រួសាររាជវង្ស នៅប្រទេសស្កុតឡែនដ៍ របស់ចក្រភពអង់គ្លេស។ ទ្រង់ជាក្សត្រ ដែលសោយរាជ្យបានជាង ៧០ឆ្នាំ គឺយូរជាងគេ ក្នុងប្រវត្តិសាស្ត្ររបស់ចក្រភពអង់គ្លេស។
ពិធីបុណ្យព្រះសពរបស់ព្រះមហាក្សត្រិយានី Elizabeth II នឹងប្រព្រឹត្តទៅនៅថ្ងៃចន្ទ ទី១៩ ខែកញ្ញា នៅឯព្រះវិហារ Westminster Abbey ក្នុងទីក្រុងឡុងដ៍ នៃចក្រភពអង់គ្លេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។