លោក ហ៊ុន សែន ប្រកាស​ធ្វើ​យុទ្ធនាការ​ចុះ​ជួប​ក្រុម​កម្មករ​នៅ​ទូទាំង​ប្រទេស មុនពេលបោះឆ្នោត

0:00 / 0:00

លោក​នាយក​រដ្ឋមន្ត្រី ហ៊ុន សែន ប្រកាស​ធ្វើ​យុទ្ធនាការ​ចុះ​ជួប​សួរ​សុខទុក្ខ​ក្រុម​កម្មករ​រោងចក្រ​នៅ​ទូទាំង​ប្រទេស ខណៈ​ការ​បោះឆ្នោត​ជ្រើសតាំង​តំណាងរាស្ត្រ​នីតិកាល​ទី៧ កាន់​តែ​កៀក​មក​ដល់។ អ្នក​វិភាគ​និង​សហជីព​យល់ឃើញ​ថា ការ​ចុះ​ជួប​កម្មករ​នេះ គឺ​លោក ហ៊ុន សែន មិន​មែន​ចង់​ដឹង​ពី​សុខទុក្ខ​ពិត​ប្រាកដ​របស់​កម្មករ​ឡើយ ប៉ុន្តែ​គ្រាន់​តែ​ចង់​ស្វែងរក​ការ​គាំទ្រ​ប៉ុណ្ណោះ។

វា​ហាក់​ក្លាយ​ជា​វប្បធម៌​ច្រំដែល​ទៅ​ហើយ​របស់​លោក ហ៊ុន សែន និង​មន្ត្រី​ក្រោម​ឱវាទ​របស់​លោក ដែល​តែង​បង្ហាញ​សកម្មភាព​ចុះ​ជួប​ពលរដ្ឋ​ឬ​ក្រុម​កម្មករ​នៅ​មុនរដូវ​កាល​បោះឆ្នោត ខណៈ​អ្នក​វិភាគ​ចាត់​ទុក​ថា វា​គ្រាន់​តែ​ជា​ឈុត​ឆាក​សម្ដែង​មួយ ហើយ​មិន​អាច​បោកប្រាស់​ពលរដ្ឋ​ទូទៅ​បាន​នោះ​ទេ។

អ្នក​វិភាគ​នយោបាយ​លោក គឹម សុខ ប្រាប់​វិទ្យុ​អាស៊ី​សេរី​នៅ​ថ្ងៃ​ទី២៤ ឧសភា​ថា លោក ហ៊ុន សែន មិន​ហ៊ាន​ជួប​ក្រុម​កម្មករ​ទូទៅ និង​បើក​ឱ្យ​មាន​ការ​សួរ​ដេញដោល ជុំវិញ​បញ្ហា​នានា ដែល​កំពុង​កើត​ឡើង​លើ​ក្រុម​កម្មករ ដូច​ជា ការ​បាត់បង់ ឬ​ព្យួរ​ការ​អនុគ្រោះ​ពន្ធ EBA ពី​សហភាព​អឺរ៉ុប បញ្ហា​របស់​កម្មករ​និង​ពលរដ្ឋ​គ្មាន​លទ្ធភាព​បំណុល​ធនាគារ ឬ​អ្នក​ខ្លះ​ទៀត ត្រូវ​បាន​ក្រុមហ៊ុន ឬ​បក្ខពួក​របស់​លោក ហ៊ុន សែន រំលោភ​យក​ដី​ធ្លី និង​ផ្ទះ​សម្បែង​ឡើយ។ លោក​បន្ត​ថា លោក ហ៊ុន សែន មិន​មែន​ជួប​សួរ​សុខទុក្ខ ដើម្បី​យល់​ពី​តម្រូវការ​ជាក់ស្ដែង​របស់​ក្រុម​កម្មករ​នោះ​ទេ ផ្ទុយ​ទៅ​វិញ លោក​គ្រាន់​តែ​ជួប​ក្រុម​កម្មករ ដែល​គេ​បាន​រៀបចំ​មិន​ឱ្យ​មាន​ប្រតិកម្ម​សួរ​ដេញដោល ជុំវិញ​ការ​បាត់បង់​ការ​អនុគ្រោះ​ពន្ធ GSP ពី​សហរដ្ឋ​អាមេរិក និង​ការ​កាត់ EBA ២០% ពី​សហភាព​អឺរ៉ុប​ជាដើម។ លោក គឹម សុខ ហៅ​សកម្មភាព​លោក ហ៊ុន សែន បែប​នេះ ជា​នយោបាយ​ប្រជាភិថុតិ។

លោក​ថា​៖​«​គាត់​គ្រាន់​តែ​ជួប​កម្មករ​កម្មការិនី ក្នុង​សេនារីយោ នៃ​ក្រុម​សហជីព​របស់​គណបក្ស​ប្រជាជន​កម្ពុជា គឺ​គេ​រៀប​ក្រុម​មនុស្ស​ឱ្យ​ទៅ​ជួប​លោក​នាយក​រដ្ឋមន្ត្រី ហ៊ុន សែន មួយ​វិញ​ទៀត ក៏​អាច​ដាក់​បញ្ចូល​នូវ​ក្រុម​សហភាព​សហព័ន្ធ​យុវជន​កម្ពុជា ស.ស.យ.ក របស់​លោក ហ៊ុន ម៉ានី ឱ្យ​ឃើញ​វត្តមាន​ច្រើន នៅ​ក្នុង​ជំនួប​នោះ​ដែរ មិន​សុទ្ធ​តែ​កម្មករ​កម្មការិនី​ទេ​។ ដូច្នេះ​!វិធី​បែប​ហ្នឹង មិន​ទាក់ទាញ​បាន​ការ​ចាប់​អារម្មណ៍ ឬ​ការ​គាំទ្រ​ពី​ក្រុម​កម្មករ​កម្មការិនី​ឡើយ វា​គ្រាន់​តែ​ជា​ឆាក​សម្ដែង​របស់​លោក ហ៊ុន សែន យក​ទៅ​ផ្សាយ​តាម​កញ្ចក់​ទូរទស្សន៍​របស់​ពួកគាត់​តែ​ប៉ុណ្ណោះ»។

ការ​លើកឡើង​ពី​អ្នក​វិភាគ​រូប​នេះ​ធ្វើ​ឡើង បន្ទាប់​ពី​លោក ហ៊ុន សែន បាន​ប្រកាស​នៅ​ពិធី​សម្ពោធ​ទីតាំង​ថ្មី នៃ​សាកល​វិទ្យាល័យ​ភូមិន្ទ​វិចិត្រ​សិល្បៈ និង​ពិធី​ប្រគល់​សញ្ញាប័ត្រ​ជូន​ដល់​និស្សិត​សាកល​វិទ្យាល័យ​ភូមិន្ទ​វិចិត្រ​សិល្បៈ នៅ​ព្រឹក​ថ្ងៃ​ទី២៤ ឧសភា​ថា នៅ​ក្នុង​រយៈពេល​ពេញ​មួយ​ខែ​ខាង​មុន​នេះ លោក​ត្រូវ​មមាញឹក​ខ្លាំង និង​មាន​កម្មវិធី​ថ្លែង​សារ​ស្ទើរ​ជា​រៀងរាល់​ថ្ងៃ​។ លោក​បញ្ជាក់​ថា ក្នុង​រយៈពេល​មួយ​ខែ​ខាង​មុខ​នេះ លោក​ត្រូវ​ចុះ​ជួប​កម្មករ ១៨លើក ដោយ​ក្នុង​មួយ​លើក ត្រូវ​ជួប​កម្មករ​ចាប់​ពី​១​ម៉ឺន​៥​ពាន់​នាក់​ឡើយ​។ លោក​បន្ថែម​ថា ចំណែក​កូន​ប្រុស​របស់​លោក គឺ​លោក ហ៊ុន ម៉ាណែត ក៏​លោក​ចាត់​ឱ្យ​ធ្វើ​ជា​តំណាង​ឱ្យ​លោក ដើម្បី​ចុះ​ជួប​ពលរដ្ឋ​នៅ​តាម​ទី​វត្តអារាម ក្នុង​ពេល​លោក​មមាញឹក​នេះ​។ លោក ហ៊ុន សែន ក៏​បាន​បញ្ជា​ឱ្យ​មាន​ការ​រៀបចំ​ក្រុម​អ្នក​ផ្សាយ​ផ្ទាល់​តាម​កញ្ចក់​ទូរទស្សន៍ ចុះ​ទៅ​ផ្សាយ​ផ្ទាល់​ពី​កន្លែង​ដែល​លោក​ជួបជុំ​ក្រុម​កម្មករ​ទាំង​នោះ។

លោក​ថា​៖«នៅ​សល់ ១៨លើក ក្នុង​មួយ​លើក មិន​តិច​ជាង ១ម៉ឺន ៥ពាន់​នាក់​ទេ ហើយ​គ្រាន់​តែ​ថ្ងៃ​សុក្រ ថ្ងៃ​សៅរ៍ អា​ហ្នឹង​ទៅ​តំបន់​សេដ្ឋកិច្ច​ពិសេស ដោយសារ​យើង​ជួប​អត់​អស់ យើង​ជួប​ពីរ​លើក មួយ​លើក ១ម៉ឺន ៩ពាន់​នាក់ មួយ​លើក ១ម៉ឺន ៩ពាន់​នាក់ ដើរ​ជួប​សូរ​សុខទុក្ខ​កម្មករ ទាន់​ឱកាស​កូវីដ​រៀង​ធ្លាក់​ចុះ»។

តែទោះជាយ៉ាងណាក៏ដោយ ហ៊ុន សែន ប្រកាស​ថា ការ​ចុះ​ជួប​កម្មករ​នៅ​ពេល​ខាង​មុខ​នេះ ដើម្បី​ចង់​ដឹង​ពី​សុខទុក្ខ​របស់​ក្រុម​កម្មករ​ក្ដី ប៉ុន្តែ​កន្លង​ទៅ លោក​មិន​ដែល​អនុញ្ញាត​បើក​ឱ្យ​ក្រុម​កម្មករ​សួរ​ដេញដោល និង​លើកឡើង​ពី​សុខទុក្ខ​របស់​ពួកគាត់​ឡើយ​។ ផ្ទុយ​ទៅ​វិញ លោក ហ៊ុន សែន និយាយ​តែ​ម្នាក់​ឯង​អួត​ពី​នយោបាយ​របស់​លោក រឿង​គ្រួសារ​និង​កូន​ចៅ​របស់​លោក និង​ពេល​ខ្លះ ប្រើប្រាស់​ពាក្យ​អសុរោះ​ជេរ​ប្រមាថ​អ្នក​ដទៃ នៅ​មុខ​ក្រុម​កម្មករ​និង​ក្រុម​និស្សិត​ទៅ​វិញ។

លោក គឹម សុខ លើកឡើង​ទៀត​ថា ការ​ចុះ​ជួប​សួរ​សុខទុក្ខ​កម្មករ​ទាំង​នោះ គឺ​លោក ហ៊ុន សែន គ្រាន់​តែ​ចង់​បង្កើត​ឈុត​ឆាក​ឃោសនា​នយោបាយ​តាម​កញ្ចក់​ទូរទស្សន៍ បន្លំ​ភ្នែក​ពលរដ្ឋ​ថា លោក​ទទួល​បាន​ការ​គាំទ្រ​ច្រើន​ពី​ក្រុម​កម្មករ និង​ចង់​បញ្ជូន​សារ​ទៅ​សហគមន៍​អន្តរជាតិ​ថា បើ​ទោះ​បី​ជា​រដ្ឋាភិបាល​របស់​លោក​កំពុង​ប្រឈម​នឹង​វិបត្តិ​ដោយសារ​ការ​គាបសង្កត់​ពី​បរទេស​ក្ដី ក៏​ប៉ុន្តែ​លោក​នៅ​តែ​មាន​ការ​គាំទ្រ​ពី​ក្រុម​កម្មករ​។ ទោះជាយ៉ាងណាក៏ដោយ អ្នក​វិភាគ​រូប​នេះ​បន្ត​ថា វប្បធម៌​សម្ដែង​ល្ខោន​ដដែល​ៗ របស់​លោក ហ៊ុន សែន នេះ មិន​អាច​បោកបញ្ឆោត​ពលរដ្ឋ​ទូទៅ​បាន​ឡើយ ពីព្រោះ​នៅ​ពេល​នេះ កម្មករ​នៅ​ទូទាំង​ប្រទេស ដែល​បាត់បង់​ការងារ​ធ្វើ ​មាន​ជីវភាព​ដុនដាប ប្រឈម​បញ្ហា​ដាច់​ស្បៀង ដែល​បញ្ហា​ទាំង​នេះ បង្ក​ឡើង​ពី​ការ​ដឹកនាំ​​របស់​លោក ហ៊ុន សែន។

ចំណែក​ប្រធាន​សហភាព​ការងារ​កម្ពុជា លោក អាត់ ធន់ យល់ឃើញ​ដែរ​ថា ការ​ចុះ​ជួប​ក្រុម​កម្មករ​នៅ​មុន​ការ​បោះឆ្នោត​របស់​លោក ហ៊ុន សែន ជា​សកម្មភាព​មួយ​ដើម្បី​ទាក់ទាញ​ឱ្យ​មាន​ការ​គាំទ្រ ហើយ​ក៏​អាច​ដោះស្រាយ​បញ្ហា​ឱ្យ​កម្មករ​បាន​ខ្លះ​ដែរ។

លោក អាត់ ធន់៖«ខ្ញុំ​គិត​ថា ដើម្បី​ឱ្យ​មាន​ប្រយោជន៍​តែ​ម្ដង ទី​១ គាត់​ត្រូវ​ប្រមូល​បញ្ហា​រួម ពី​កម្មករ ពី​សហជីព និង​ពី​អ្នក​ពាក់ព័ន្ធ ដែល​បញ្ហា​ទាំង​នោះ មិន​មែន​ប្រមូល​ពី​មន្ត្រី ឬ​ពី​និយោជក ឬ​អ្នក​ដែល​ធ្លាប់​ផ្ដល់​ឱ្យ​គាត់​នោះ​ទេ​។ មាន​ន័យ​ថា ប្រមូល​តាំង​ពី​សហជីព​ឯករាជ្យ តាំង​ពី​កម្មករ​រងគ្រោះ​ពិតប្រាកដ ហើយ​យក​ទៅ​ពិនិត្យ​មើល»។

នៅ​ដើម​ឆ្នាំ២០២៣ មាន​រោងចក្រ​ប្រហែល​១៤០ ខ្លះ​បិទ​ទ្វារ ព្យួរ​ការងារ​កម្មករ និង​កាត់បន្ថយ​បុគ្គលិក និង​បាន​ធ្វើ​ឱ្យ​ប៉ះពាល់​កម្មករ​ជាង​៣​ម៉ឺន​នាក់ ខណៈ​រដ្ឋាភិបាល​ថា បណ្ដាល​មក​ពី​ការ​ធ្លាក់​ចុះ​ការ​បញ្ជា​ទិញ​ដោយសារ​សង្គ្រាម​នៅ​អ៊ុយក្រែន​ទៅវិញ។ ប៉ុន្តែ​អ្នក​វិភាគ​ថា បណ្ដាល​មក​ពី​ការ​បាត់បង់​ការ​អនុគ្រោះ​ពន្ធ​ពី​អាមេរិក​និង​សហភាព​អឺរ៉ុប ដោយសារ​ការ​ដឹកនាំ​របស់​លោក ហ៊ុន សែន បំផ្លាញ​លទ្ធិ​ប្រជាធិបតេយ្យ​និង​ការ​រំលោភ​សិទ្ធិ​មនុស្ស​កាន់​តែ​ធ្ងន់ធ្ងរ។

អ្នកវិភាគ​លើកឡើង​ថា លោក ហ៊ុន សែន គួរ​តែ​បង្កើត​កម្មវិធី​ជួបជុំ​បែប​សមាជ​ជាតិ ដូច​នៅ​ជំនាន់​សង្គម​រាស្ត្រនិយម ដែល​អតីត​ព្រះមហាក្សត្រ​បើក​ឱ្យ​ប្រជាពលរដ្ឋ​ចូលរួម ហើយ​បញ្ចេញ​មតិយោបល់ សួរ​សំនួរ និង​លើក​ពី​បញ្ហា​ថ្វាយ​អតីត​ព្រះមហាក្សត្រ ដើម្បី​ឱ្យ​ព្រះអង្គ​ដោះស្រាយ​ជូន​។ រីឯ​ករណី​លោក ហ៊ុន សែន នេះ ក៏​គួរ​ធ្វើ​ដូច​គ្នា​ដែរ បើក​ទូលាយ​ឱ្យ​ចូលរួម និង​សួរ​ដេញដោល ជុំវិញ​បញ្ហា​ដែល​កំពុង​កើតឡើង​នៅ​ពេល​បច្ចុប្បន្ន ដូច​ជា​បញ្ហា​ដែល​កម្ពុជា​កំពុង​ប្រឈម​បាត់បង់​ការ​អនុគ្រោះ​ពន្ធ EBA បន្ថែម ឬ​មូលហេតុ​ដែល​មិន​អាច​ទទួល​បាន​ការ​អនុគ្រោះ​ពន្ធ GSP ពី​សហរដ្ឋ​អាមេរិក​មក​វិញ​។ ជាពិសេស​លោក ហ៊ុន សែន ត្រូវ​ស្ដាប់​សំឡេង​ក្រុម​កម្មករ ដើម្បី​បើក​ឱ្យ​មាន​សេរីភាព​សហជីព សេរីភាព​ការងារ​និង​ការ​តវ៉ា និង​ការ​ស្ដារ​លទ្ធិ​ប្រជាធិបតេយ្យ ទើប​អាច​ស្វែងរក​ផល​ប្រយោជន៍​ដល់​កម្មករ និង​កសិករ​បាន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។