រដ្ឋាភិបាលលោក ហ៊ុន សែន នៅតែបន្តអះអាងថា ការឃុំខ្លួនលោក កឹម សុខា គឺស្របតាមច្បាប់។ លោក ហ៊ុន សែន ថ្លែងបញ្ជាក់យ៉ាងដូច្នេះ នៅក្នុងកិច្ចប្រជុំពេញអង្គរបស់គណៈរដ្ឋមន្ត្រី កាលពីព្រឹកថ្ងៃសុក្រ ទី១៩ ខែឧសភា។
សេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រីស្ដីពីលទ្ធផលនៃកិច្ចប្រជុំពេញអង្គនេះ បានបញ្ជាក់ជាថ្មីទៀតថា សាលក្រមកាត់ក្តីផ្ដន្ទាទោសលើជនជាប់ចោទ កឹម សុខា ពីបទសន្ទិដ្ឋិភាពជាមួយបរទេស គឺអនុវត្តស្របតាមច្បាប់ និងនីតិវិធីជាធរមាន ដែលជាការពង្រឹងនីតិរដ្ឋនៅកម្ពុជាក្នុងនាមជារដ្ឋឯករាជ្យ។
ចំណែករឿងទាក់នឹងគណបក្សភ្លើងទៀនវិញ សេចក្តីប្រកាសព័ត៌មានដដែលនេះ ក៏បានឲ្យដឹងដែរថា ការដែលគ.ជ.បមិនចុះបញ្ជីគណបក្សភ្លើងទៀនសម្រាប់ចូលរួមការបោះឆ្នោតនាពេលខាងមុខនេះ គឺមកពីទង្វើល្ងង់ខ្លៅ និងជាការគ្មានការទទួលខុសត្រូវរបស់មេដឹកនាំរបស់គណបក្សនេះ និងជាផែនការបង្កប់នូវចេតនាទុច្ចរិតបង្កើតឧបសគ្គរារាំងដល់ការបោះឆ្នោត ហើយទម្លាក់កំហុសមកលើរដ្ឋាភិបាល ដោយព្យាយាមបង្កើតចលាចល និងអស្ថិរភាពក្នុងសង្គម ជាពិសេសក្នុងខណៈដែលកម្ពុជាធ្វើជាម្ចាស់ផ្ទះ នៃការប្រកួតកីឡាស៊ីហ្គេមលើកទី៣២នេះ។
ឆ្លើយតបនឹងការចោទប្រកាន់នេះ ប្រធានគណបក្សភ្លើងទៀន លោក ទាវ វណ្ណុល បានប្រតិកម្មកាលពេលថ្មីនេះថា លោកសោកស្ដាយចំពោះការចោទប្រកាន់របស់លោក ហ៊ុន សែន បែបនេះ។
ប្រធានគណបក្សភ្លើងទៀនរូបនេះ រំលឹកថា ឯកសារដើមរបស់គណបក្សភ្លើងទៀន ត្រូវបានសមត្ថកិច្ចនៃរដ្ឋាភិបាល លោក ហ៊ុន សែន បានសម្រុកមកប្រមូលយកទៅអស់ហើយ ក្នុងអំឡុងពេលសមត្ថកិច្ចចុះឆ្មក់ប្រមូលឯកសារនានា របស់គណបក្សសង្គ្រោះជាតិ នៅទីស្នាក់ការគណបក្សនេះ កាលពីឆ្នាំ២០១៩។
លោកបន្តថា នៅពេលនោះសមត្ថកិច្ចបានប្រមូលទាំងឯកសារពាក់ព័ន្ធរបស់គណបក្សភ្លើងទៀន ហើយបើទោះបីជាគណបក្សភ្លើងទៀន ប្ដឹងទៅតុលាការទាមទារយកឯកសារទាំងនោះមកវិញ ប៉ុន្តែតុលាការគ្រប់ជាន់ថ្នាក់មិនព្រមប្រគល់មកឱ្យគណបក្សភ្លើងទៀនវិញទេ។
ចំណែកបណ្ដាស្ថានទូតប្រទេសមហាអំណាច ដូចជាស្ថានទូតសហរដ្ឋអាមេរិក បារាំង និងសហភាពអឺរ៉ុប រួមទាំងអង្គការអន្តរជាតិមួយចំនួនទៀត បានចេញសេចក្ដីថ្លែងការណ៍ជាបន្តបន្ទាប់ ដោយចាត់ទុកករណីនេះ ថាជាការរឹតត្បិតការប្រកួតប្រជែងផ្នែកនយោបាយ និងចាត់ទុកសកម្មភាពបែបនេះ គឺជាការដកហូតសិទ្ធិពលរដ្ឋកម្ពុជាបន្ថែមទៀត ក្នុងការជ្រើសរើសតំណាងរបស់ពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។