ក្រោយកាន់អំណាចជិត ៤០ឆ្នាំ លោក ហ៊ុន សែន ផ្ទេរតំណែងនាយករដ្ឋមន្ត្រីទៅឱ្យកូន រួចទៅធ្វើជាប្រធានព្រឹទ្ធសភា
លោកនាយករដ្ឋមន្រ្តី ហ៊ុន សែន
រូប៖ ហ្វេសប៊ុកលោក ហ៊ុន សែន
លោក ហ៊ុន សែន ដែលបានកាន់តំណែងជានាយករដ្ឋមន្រ្តីជិត ៤០ឆ្នាំមកហើយនោះ ប្រកាសផ្ទេរតំណែងនាយករដ្ឋមន្រ្តីនេះទៅឱ្យកូនប្រុសច្បង គឺលោក ហ៊ុន ម៉ាណែត នៅថ្ងៃទី២២ សីហា ខាងមុខនេះ។ ទោះជាយ៉ាងណាក្ដី មេដឹកនាំក្រាញអំណាចរូបនេះ មិនទាន់បោះបង់តំណែងកំពូលៗ នៅក្នុងស្ថាប័នរដ្ឋនោះទេ។ លោកនឹងទៅអង្គុយតំណែងកំពូលក្នុងអង្គនីតិបញ្ញត្តិ គឺប្រធានព្រឹទ្ធសភា នៅដើមឆ្នាំ២០២៤ ដែលតំណែងនេះបច្ចុប្បន្ន គឺជារបស់លោក សាយ ឈុំ អនុប្រធានគណបក្សប្រជាជនកម្ពុជា។
ថ្លែងទៅកាន់ប្រជាពលរដ្ឋតាមរយៈវីដេអូផ្សាយផ្ទាល់នៅថ្ងៃទី២៦ កក្កដា ដែលធ្វើឡើងក្រោយការបោះឆ្នោត ដែលគ្មានគណបក្សភ្លើងទៀនចូលរួមនោះ មិនដល់មួយសប្ដាហ៍ផង លោក ហ៊ុន សែន ឱ្យដឹងថា ព្រះមហាក្សត្រដែលជាព្រះប្រមុខរដ្ឋ នឹងត្រាស់បង្គាប់តែងតាំងឥស្សរជនមួយរូបចេញពីគណបក្សប្រជាជនកម្ពុជា នៅថ្ងៃទី៧ សីហា។ បន្ទាប់មករដ្ឋសភានីតិកាលទី៧ នឹងកោះប្រជុំជាលើកដំបូង នៅថ្ងៃទី២១ សីហា ហើយសមាជិកសភានឹងចូលស្បថនៅព្រះបរមរាជវាំងនៅក្នុងថ្ងៃដដែលនោះ។ ដោយឡែកនៅថ្ងៃទី២២ សីហា សភានឹងបើកកិច្ចប្រជុំក្រោមអធិបតីភាពរបស់ព្រឹទ្ធបុរស ហើយនៅពេលល្ងាចថ្ងៃដដែលនោះ គណៈរដ្ឋមន្ត្រីថ្មី ដែលមានលោក ហ៊ុន ម៉ាណែត ជានាយករដ្ឋមន្ត្រី នឹងស្បថចូលកាន់តំណែង។
លោក ហ៊ុន សែន អះអាងថា មូលហេតុដែលលោកលាឈប់ពីតំណែងជានាយករដ្ឋមន្ត្រីតាំងពីក្បាលអាណត្តិថ្មីនេះ ដោយសារតែលោកគិតគូរទៅដល់ស្ថិរភាពនយោបាយរយៈពេលវែង និងជាការយកគំរូតាមអតីតព្រះមហាក្សត្រ សម្ដេចព្រះ នរោត្តម សីហនុ ដែលព្រះអង្គបានផ្ទេរព្រះរាជបល្ល័ង្ក។ ទោះជាយ៉ាងណា ក្ដី មេដឹកនាំរដ្ឋាភិបាលចាំផ្ទះរូបនេះ បែរជាអួតថា គិតត្រឹមថ្ងៃទី២២ ខែសីហា ឆ្នាំ២០២៣ គឺមានរយៈពេល ៣៨ឆ្នាំ ៧ខែ និង ៨ថ្ងៃគត់ ដែលលោកបានធ្វើជានាយករដ្ឋមន្ត្រីនៅកម្ពុជា។ ក្នុងពេលជាមួយគ្នានោះ លោក ហ៊ុន សែន ក៏បានវាយបកទៅកាន់សហគមន៍អន្តរជាតិ ដែលបានរិះគន់ការបោះឆ្នោតនៅកម្ពុជា។ លោកហាក់ថ្លែងឌឺដងថា ប្រទេសមួយចំនួនតែងតែបង្អាប់រដ្ឋាភិបាលរបស់លោក ប៉ុន្តែប្រទេសទាំងនោះ នៅតែបន្តធ្វើការជាមួយរដ្ឋាភិបាលលោក ហើយថែមទាំងមកចូលរួមកិច្ចប្រជុំកំពូលអាស៊ាននៅកម្ពុជាផង នៅពេលដែលកម្ពុជាធ្វើជាម្ចាស់ផ្ទះ។ ចំពោះការទទួលស្គាល់ភាពស្របច្បាប់របស់លោក ហ៊ុន ម៉ាណែត ជានាយករដ្ឋមន្ត្រីថ្មី លោក ហ៊ុន សែន ថា លោក ហ៊ុន ម៉ាណែត មិនចាំបាច់ត្រូវមានការគាំទ្រពីបរទេសណាមួយនោះទេ។ ទន្ទឹមនឹងនេះ លោក ហ៊ុន សែន ប្រកាសបន្តកម្ចាត់ក្រុមអ្នកនយោបាយប្រឆាំង ដែលជាគូប្រជែងរបស់លោក។
ក្រៅពីទៅយកតំណែងប្រធានព្រឹទ្ធសភារបស់លោក សាយ ឈុំ ក្រោយបោះបង់អំណាចជានាយករដ្ឋមន្ត្រី លោក ហ៊ុន សែន ប្រកាសថា ព្រះមហាក្សត្រក៏នឹងតែងតាំងរូបលោកជាប្រធានឧត្ដមក្រុមប្រឹក្សាព្រះមហាក្សត្រ។ លើសពីនេះ អ្នកនយោបាយចាស់វស្សា នៅក្នុងគណបក្សប្រជាជន ដូចជា លោក ហេង សំរិន លោក ស ខេង លោក ទៀ បាញ់ និងអ្នកស្រី ម៉ែន សំអន ជាដើម លោក ហ៊ុន សែន ថា ក៏នឹងត្រូវបានព្រះមហាក្សត្រតែងតាំងជាឧត្ដមទីប្រឹក្សាផ្ទាល់របស់ព្រះមហាក្សត្រដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អាជីវករនៅភ្នំពេញខ្លះត្អូញត្អែរលក់ដូរមិនសូវដាច់ក្នុងថ្ងៃបុណ្យអុំទូក
- សម្ព័ន្ធភាពចាក់ស្រេះរវាងគ្រួសារអ្នកកាន់អំណាច និងគ្រួសារអ្នកជំនួញ «អាចបង្កផលប៉ះពាល់ប្រយោជន៍ជាតិធ្ងន់ធ្ងរ»
- រដ្ឋាភិបាលកាត់ដីគម្របព្រៃឈើនៅខេត្តព្រះសីហនុជិត៣០ហិកតារឲ្យប្រពន្ធលោក នេត សាវឿន
- សិស្សជាប់បាក់ឌុបមួយចំនួន មិនទទួលស្គាល់លទ្ធផលប្រឡង
- សាច់ញាតិ និងសហជីព ទាមទារតុលាការឱ្យទម្លាក់ការចោទប្រកាន់ និងដោះលែងកញ្ញា ឈឹម ស៊ីថរ បន្ទាប់ពីឃុំខ្លួនរយៈពេល ១ឆ្នាំ
អត្ថបទពេញនិយម
នយោបាយ
- សហព័ន្ធខ្មែរក្រោមទាមទារឱ្យវៀតណាមឈប់ប្រើហិង្សាលើព្រះសង្ឃនិងពលរដ្ឋខ្មែរក្រោម
- តើការដឹកនាំរបស់នាយករដ្ឋមន្ត្រីកម្ពុជា និងថៃ ដូចឬខុសដូចម្ដេចខ្លះ ក្នុងរយៈពេល៣ខែនេះ?
- សកម្មជនភៀសខ្លួននៅម៉ាឡេស៊ី ថា ប៉ូលិសប៉ុនប៉ងចាប់ខ្លួនពួកគាត់ តាមសំណើរបស់អាជ្ញាធរខ្មែរ
- គ្រួសារថា អាជ្ញាធរបង្ខំឱ្យលោក កង សារ៉ន សុំទោសជាថ្នូរទទួលបានសេរីភាពឡើងវិញ
- អ្នកវិភាគចង់ឃើញអ្នកនយោបាយខ្មែរយកគំរូតាមកម្លាំងសាមគ្គីរបស់កីឡាករអុំទូក