លោក ហ៊ុន សែន ព្រមាន​ជា​ថ្មី​ថា​នឹង​មាន​សង្គ្រាម​បើ​បក្ស​លោក​មិន​បាន​កាន់​អំណាច

ដោយ ប្រាជ្ញ ចេវ
2017-05-10
Share
ហ៊ុន សែន ២០១៧ ១៤៤០ លោក​នាយក​រដ្ឋមន្ត្រី ហ៊ុន សែន ថ្លែង​ក្នុង​ខួប​ទី​១០ នៃ​ទិវា​អតីត​យុទ្ធជន​កម្ពុជា ថ្ងៃ​ទី​១០ ខែ​ឧសភា ឆ្នាំ​២០១៧។ Photo courtesy of PM Hun Sen's Facebook Page
Photo courtesy of PM Hun Sen's Facebook Page

លោក​នាយក​រដ្ឋមន្ត្រី ហ៊ុន សែន និង​ជា​ប្រធាន​គណបក្ស​ប្រជាជន​កម្ពុជា ដែល​កំពុង​កាន់​អំណាច​សព្វថ្ងៃ ព្រមាន​ថា បើ​គណបក្ស​លោក​មិន​បាន​កាន់​អំណាច​បន្ត​ទៀត​ទេ សង្គ្រាម​នឹង​ផ្ទុះ​ឡើង​ជា​ថ្មី​នៅ​កម្ពុជា។ អ្នក​វិភាគ​ព្រឹត្តិការណ៍​នយោបាយ​យល់​ថា សម្ដី​របស់​លោក ហ៊ុន សែន ជា​ការ​គំរាម​កំហែង​ដល់​ការ​សម្រេច​ចិត្ត​បោះឆ្នោត​របស់​ពលរដ្ឋ​ជា​ម្ចាស់​ឆ្នោត ប៉ុន្តែ​បើ​គណបក្ស​ប្រជាជន​កម្ពុជា ចាញ់​ឆ្នោត​មែន​នោះ គឺ​មិន​អាច​កើត​សង្គ្រាម​នោះ​ទេ។

ពីរ​ថ្ងៃ​ជាប់​គ្នា​ហើយ​ដែល​លោក​នាយក​រដ្ឋមន្ត្រី ហ៊ុន សែន ថ្លែង​ជា​សាធារណៈ ព្រមាន​ជា​ថ្មី​ទៀត​ពី​សង្គ្រាម​កើត​ឡើង​វិញ ប្រសិន​បើ​បក្ស​ខ្លួន​ចាញ់​ឆ្នោត ឬ​ពលរដ្ឋ​មិន​ខំ​ថែរក្សា​អ្វី​ដែល​មាន​នៅ​ក្នុង​ដៃ។

ស្ថិត​ក្នុង​សម្លៀកបំពាក់​យោធា ពាក់​ផ្កាយ​ប្រាំ​នៅ​លើ​ស្មា លោក​នាយ​ឧត្តមសេនីយ៍​ផ្កាយ​មាស​ប្រាំ​ផុត​លេខ ហ៊ុន សែន ថា​លោក​ខំ​ប្រឹង​កសាង​សន្តិភាព និង​បង្រួបបង្រួម​ជាតិ​យ៉ាង​លំបាក​មក​ឲ្យ​ប្រទេស​កម្ពុជា ដ៏​កម្សត់ ប៉ុន្តែ​បែរ​ជា​មាន​ក្រុម​មួយ​មក​សាង​គ្រោះ​ឲ្យ​ជាតិ​ទៅ​វិញ។ លោក​ថា បើ​គណបក្ស​លោក​មិន​បាន​កាន់​អំណាច​បន្ត​ទៀត​ទេ សង្គ្រាម​នឹង​ផ្ទុះ​ឡើង​ជា​ថ្មី​នៅ​កម្ពុជា៖ «វា​ជា​ចំណុច​ដែល​ខ្ញុំ​ត្រូវ​តែ​និយាយ​ថា សង្គ្រាម​វា​នឹង​កើត ខ្ញុំ​នៅ​តែ​អះអាង​ដាច់ខាត​លើ​រឿង​នេះ​ប្រសិន​មិន​បន្ត​គ្រប់គ្រង​អំណាច​នោះ​ទេ»

លោក ហ៊ុន សែន ថ្លែង​ដូច្នេះ​ក្នុង​ខួប​ទី​១០ នៃ​ទិវា​អតីត​យុទ្ធជន​កម្ពុជា ថ្ងៃ​ទី​១០ ខែ​ឧសភា។ ការ​ថ្លែង​សារ​ព្រមាន​នេះ ខណៈ​ការ​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​អាណត្តិ​ទី​៤ នៅ​មិន​ដល់​មួយ​ខែ​ទេ​ដល់​ថ្ងៃ​បោះឆ្នោត។

ការ​ព្រមាន​របស់​លោក ហ៊ុន សែន បែប​នេះ ហាក់​ខុស​គ្នា​ឆ្ងាយ​ទៅ​នឹង​ព្រះ​បន្ទូល​របស់​ព្រះមហាក្សត្រ ព្រះបាទ​សម្ដេច នរោត្ដម សីហមុនី ដែល​ទ្រង់​ស្នើ​ពលរដ្ឋ​កុំ​ឲ្យ​ចាញ់​សម្លុត​ជន​ណា​ម្នាក់ ឬ​គណបក្ស​នយោបាយ​ណា​មួយ​ទាក់ទង​នឹង​ការ​បោះឆ្នោត​រើស​ក្រុម​ប្រឹក្សា​ឃុំ-សង្កាត់​ឆ្នាំ​២០១៧ ដោយ​ត្រូវ​ប្រើ​សិទ្ធិ​សេរីភាព​បោះឆ្នោត​ទៅ​តាម​សតិសម្បជញ្ញៈ​ជ្រើសរើស​បេក្ខជន ឬ​គណបក្ស​ណា​ដែល​ខ្លួន​ពេញ​ចិត្ត។

ព្រះអង្គ​មាន​បន្ទូល​ថា ការ​បោះឆ្នោត​ជ្រើសរើស​ក្រុម​ប្រឹក្សា​ឃុំ-សង្កាត់​ឆ្នាំ​២០១៧ នេះ គឺ​ជា​ការ​បោះឆ្នោត​ជាទូទៅ ជា​សកល ដោយ​សម្ងាត់ តាម​លទ្ធិប្រជាធិបតេយ្យ សេរី ពហុ​បក្ស ដូចនេះ​សុំ​កុំ​ឲ្យ​មាន​ការ​ព្រួយ​បារម្ភ​ពី​ការ​គាប​សង្កត់ គំរាម​កំហែង ឬ​សម្លុត​ពី​ជន​ណា​ម្នាក់ ឬ​គណបក្ស​នយោបាយ​ណា​មួយ​ឡើយ។

អ្នក​ជំនាញ​ខាង​អភិបាលកិច្ច និង​វិទ្យាសាស្ត្រ​នយោបាយ លោក​បណ្ឌិត ចាន់ វិបុល មើល​មិន​ឃើញ​ថា​គណបក្ស​ណា​មួយ​អាច​ធ្វើ​ឲ្យ​មាន​សង្គ្រាម​នោះ​ទេ បើ​គណបក្ស​ប្រជាជន​កម្ពុជា ចាញ់​ឆ្នោត ព្រោះ​គណបក្ស​ទាំងនោះ​គ្មាន​អំណាច គ្មាន​កង​កម្លាំង​ប្រដាប់​អាវុធ។ ជាង​នេះ​ទៅ​ទៀត លោក​ថា​ប្រសិន​បើ​រដ្ឋាភិបាល​សព្វថ្ងៃ​ចាញ់​ឆ្នោត ក៏​គ្មាន​សង្គ្រាម​ដែរ ព្រោះ​ជា​រដ្ឋាភិបាល​របស់​លោក ហ៊ុន សែន មាន​កាតព្វកិច្ច​ការពារ​លទ្ធផល​បោះឆ្នោត៖ «ខ្ញុំ​ឃើញ​ថា គឺ​ជា​សារ​មួយ​ដែល​គំរាមកំហែង​ទៅ​ដល់​សេរីភាព​សង្គម ទៅ​ដំណើរ​ការ​នៃ​ការ​បោះឆ្នោត​ទៅ​ដល់​ការ​សម្រេច​ចិត្ត​របស់​ពលរដ្ឋ ហើយ​មួយ​ចំណុច​ទៀត យើង​មើល​មិន​ឃើញ​ពី​សញ្ញា​បង្កើត​សង្គ្រាម​ទេ»

ដំណាល​គ្នា​ដែល​លោក ហ៊ុន សែន ព្រមាន​ពី​ការ​កើត​សង្គ្រាម​ឡើង​វិញ​នេះ មាន​អ្នក​ប្រើប្រាស់​ហ្វេសប៊ុក (facebook) ខ្លះ បាន​ចូល​ទៅ​បញ្ចេញ​មតិ ឬ​ខមមិន (Comment) នៅ​ក្នុង​ហ្វេសប៊ុក​របស់​លោក ស្នើ​ឲ្យ​លោក​ជួយ​គិតគូរ​ដោះស្រាយ​បញ្ហា​កសិផល​របស់​កសិករ​ដែល​កំពុង​ធ្លាក់​ថ្លៃ។

ដូច​គ្នា​នេះ​ដែរ អង្គការ​វេទិកា​អនាគត រក​ឃើញ​ថា តម្រូវការ​ចាំបាច់​ចំពោះ​មុខ គឺ​ពលរដ្ឋ​ចង់​បាន​ការងារ​ធ្វើ មាន​ទីផ្សារ​លក់​ផលិតផល និង​សម្ភារ​ប្រើប្រាស់​ទាន់​សម័យ ដូចជា​ទូរស័ព្ទ​ដៃ ទូរទស្សន៍ និង​ម៉ូតូ ជាដើម ជាពិសេស​មិន​ជំពាក់​បំណុល​ធនាគារ។

ទាក់ទង​ការ​ព្រមាន​កើត​សង្គ្រាម​បែប​នេះ​របស់​លោក ហ៊ុន សែន អ្នក​នាំ​ពាក្យ​គណៈកម្មាធិការ​ជាតិ​រៀបចំ​ការ​បោះឆ្នោត (..) លោក ហង្ស ពុទ្ធា ឲ្យ​ដឹង​ថា នៅ​ពេល​នេះ គ..ប មិន​យក​សម្ដី​របស់​លោក ហ៊ុន សែន មក​ស្តាប់​ដើម្បី​ពិចារណា​នៅ​ឡើយ​ទេ។ ប៉ុន្តែ​លោក​ថា ចាប់​ពី​ថ្ងៃ​ទី​២០ ខែ​ឧសភា រហូត​ដល់​ថ្ងៃ​បោះឆ្នោត គ..ប នឹង​តាមដាន​ស្តាប់​សម្ដី​អ្នក​នយោបាយ​យក​មក​ថ្លឹងថ្លែង៖ «ពេល​នោះ​សមាជិក គ.ជ.ប ទាំង​៩ នឹង​ប្រជុំ​ជជែក​គ្នា បើ គ.ជ.ប ចេះ​តែ​ធ្វើ​ការ​វាតទី​ទៅ​ពេល​លើ​វេលា​នៃ​អាជ្ញាធរ ពេល​នេះ គ.ជ.ប ក៏​មាន​បញ្ហា​ដែរ»

កាល​ពី​មុន​ការ​បោះឆ្នោត​ជាតិ​ឆ្នាំ​២០១៣ និង​ក្រោយ​ការ​បោះឆ្នោត លោក​នាយក​រដ្ឋមន្ត្រី ហ៊ុន សែន តែងតែ​ព្រមាន​ថា នឹង​មាន​សង្គ្រាម បើ​គណបក្ស​លោក​ចាញ់​ឆ្នោត។ ជា​លទ្ធផល​នៃ​ការ​បោះឆ្នោត​ជាតិ​អាណត្តិ​ទី​៥ ដោយ​ការ​ព្រមាន​នេះ ធ្វើ​ឲ្យ​គណបក្ស​របស់​លោក​បាត់បង់​កៅអី​តំណាងរាស្ត្រ​នៅ​សភា​ចំនួន ២២​អាសនៈ ពី ៩០​អាសនៈ​មក​ត្រឹម ៦៨​អាសនៈ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល