សហព័ន្ធ​សហជីព​អន្តរជាតិ​ជំរុញ​រដ្ឋាភិបាល​ទម្លាក់​ចោល និង​ដោះលែង លោក រ៉ុង ឈុន ជា​បន្ទាន់

ដោយ មាន ឫទ្ធិ
2020-08-03
អ៊ីម៉ែល
មតិ
Share
បោះពុម្ព
លោក​ រ៉ុង ឈុន​ ប្រធាន​សហភាពសហជីពកម្ពុជា
លោក​ រ៉ុង ឈុន​ ប្រធាន​សហភាពសហជីពកម្ពុជា
រូប៖ ក្រសួង​ការងារ និង​បណ្ដុះបណ្ដាល​វិជ្ជាជីវៈ

សហព័ន្ធ​សហជីព​អន្តរជាតិ International Trade Union Confederation (ITUC) និង​សហព័ន្ធ​សហជីព​អន្តរជាតិ​ប្រចាំ​តំបន់​អាស៊ី​-​ប៉ាស៊ីហ្វិក (ITUC-AP) ជំរុញ​ឱ្យ​រដ្ឋាភិបាល លោកនាយក​រដ្ឋមន្ត្រី ហ៊ុន សែន ទម្លាក់​ចោល​ជាបន្ទាន់​រាល់​បទ​ចោទ​ទាំងអស់​ប្រឆាំង​នឹង​ប្រធាន​សហភាព​សហជីព​កម្ពុ​ជា លោក រ៉ុង ឈុន ព្រមទាំង​សកម្មជន​សហជីព​ដទៃ​ទៀត​ដែល​កំពុង​ជាប់ឃុំ ហើយ​ដោះលែង​ពួកគេ​ឱ្យ​មាន​សេរីភាព​ឡើងវិញ​។ សហព័ន្ធ​សហជីព​អន្តរជាតិ ITUC ក៏​ជំរុញ​ឱ្យ​រដ្ឋាភិបាល ត្រូវ​ប្ដេជ្ញា​ចិត្ត​គោរព​សិទ្ធិ និង​សេរី​ភាពជា​មូលដ្ឋាន​ដូចដែល​មាន​ចែង​ក្នុង​សន្ធិសញ្ញា​អន្តរជាតិ​នានា​ពាក់ព័ន្ធ​នឹង​បញ្ហា​សិទ្ធិមនុស្ស។

ការ​ជំរុញ​នេះ ធ្វើឡើង​ក្នុង​លិខិត​រួមគ្នា​មួយ​ច្បាប់​សរសេរ​ដោយ​អគ្គលេខាធិការ​នៃ​សហព័ន្ធ​សហជីព​អន្តរជាតិ ITUC និង​សហព័ន្ធ​សហជីព​អន្តរជាតិ​ប្រចាំ​តំបន់​អាស៊ី​-​ប៉ាស៊ីហ្វិក ITUC-AP ផ្ញើ​ទៅ​លោកនាយក​រដ្ឋមន្ត្រី ហ៊ុន សែន នៅ​ថ្ងៃ​ទី៣ ខែ​សីហា នេះ​។ ក្នុង​លិខិត​រួមគ្នា​នេះ សហព័ន្ធ​សហជីព​អន្តរជាតិ ITUC ដែល​តំណាង​ឱ្យ​កម្មករ​និយោជិត​ក្នុង​វិស័យ​ការងារ​ចំនួន ២០០​លាន​នាក់ មកពី​១៦៣ ប្រទេស និង​ដែនដី​នៅ​ទូទាំង​ពិភពលោក បាន​ថ្កោលទោស​ការ​ចាប់ខ្លួន​លោក រ៉ុង ឈុន ដែល​បច្ចុប្បន្ន​លោក​ក៏​ជា​ប្រធាន​ក្រុមប្រឹក្សា​សហព័ន្ធ​សហជីព​អន្តរជាតិ​កម្ពុជា​ផង​ដែរ។ អង្គការ​អន្តរជាតិ​មួយ​នេះ​ថា ពួកគេ​មាន​កង្វល់​ជា​ខ្លាំង ដែល​ការ​ចាប់ខ្លួន​លោក រ៉ុង ឈុន កើត​មានឡើង​ដោយសារតែ​លោក​មាន​ប្រវត្តិ និង​បាន​ធ្វើ​សកម្មភាព​ជាច្រើន​ឱ្យ​សហជីព​នា​រយៈពេល​ចុងក្រោយ​នេះ ដោយ​បាន​រិះគន់​ចំណាត់ការ និង​គោលនយោបាយ​របស់​រដ្ឋាភិបាល ជុំវិញ​ផល​ប៉ះពាល់​នៃ​ការ​ធ្លាក់​ចុះ​សេដ្ឋកិច្ច​បណ្ដាល​មក​ពី​ជំងឺ​រាតត្បាត​សាកល​កូវីដ-១៩។

សហព័ន្ធ​សហជីព​អន្តរជាតិ ITUC ដែល​មាន​មូលដ្ឋាន​នៅ​ទីក្រុង​ប្រ៊ុចសែល ប្រទេស​បែលហ្សិក ថា ពួកគេ​មានការ​ព្រួយបារម្ភ​យ៉ាង​ខ្លាំង​អំពី​និន្នាការ​ដ៏​គួរ​ឱ្យ​ភ័យខ្លាច​នៃ​ការ​បង្ក្រាប​មក​លើ​សំឡេង​ប្រឆាំង និង​ក្រុម​អ្នក​រិះគន់​នៅ​កម្ពុជា​។ អង្គការ​នេះ​សង្កត់​ធ្ងន់​ថា សេរីភាព​ក្នុង​ការ​សម្ដែង​មតិ និង​តំណាង​ឱ្យ​ផលប្រយោជន៍​របស់​កម្មករ-កម្មការិនី​ក្នុង​វិស័យ​ការងារ គឺ​ពិត​ជា​មាន​សារសំខាន់​មិន​អាច​ខ្វះ​បាន​ក្នុង​ការ​អនុវត្ត​ដោយ​សេរី នៃ​សេរីភាព​នៃ​ការ​ប្រមូល​ផ្តុំ​របស់​ពួកគេ​។ អង្គការ​អន្តរជាតិ​ដដែល​នេះ​ថា រដ្ឋាភិបាល​កម្ពុជា មាន​កាតព្វកិច្ច​ការពារ និង​គោរព​តាម​សិទ្ធិ​នានា ដូច​មាន​ចែង​ក្នុង​កតិកា​សញ្ញា​អន្តរជាតិ​របស់​អង្គការ​ការងារ​អន្តរជាតិ ILO លេខ ៨៧ និង​សន្ធិសញ្ញា​អន្តរជាតិ​នានា​ពាក់ព័ន្ធ​នឹង​បញ្ហា​សិទ្ធិមនុស្ស៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល