ប្រធានគណបក្សសង្គ្រោះជាតិលោក កឹម សុខា សរសេរសារបង្ហាញការសោកស្តាយដែលរូបលោកមិនអាចធ្វើដំណើរទៅចូលរួមវេទិកាពិភពលោកនៅប្រទេសអាល្លឺម៉ង់ (Germany) តាមកម្មវិធីដែលបានគ្រោងទុកដោយសារតែសិទ្ធិសេរីភាពរបស់លោកត្រូវបានហាមឃាត់។
លោកត្រូវបានវេទិកាគោលនយោបាយពិភពលោក (World Policy Forum) របស់ប្រទេសអាល្លឺម៉ង់អញ្ជើញឲ្យចូលរួមធ្វើបាឋកថាដោយផ្ទាល់ ដើម្បីចែករំលែកនូវទស្សនៈនិងបទពិសោធន៍ក្នុងសន្និសីទកំពូលស្តីពីដំណោះស្រាយសាកល (Global Solution Summit) នៅថ្ងៃទី២៨ ខែមីនា នាទីក្រុងប៊ែរឡាំង (Berlin) ប្រទេសអាល្លឺម៉ង់។ ប៉ុន្តែតុលាការកម្ពុជាមិនអនុញ្ញាត។
សហមេធាវីការពារក្តីលោក កឹម សុខា គឺអ្នកស្រី ម៉េង សុភារី ប្រាប់វិទ្យុអាស៊ីសេរី ថាក្រុមសហមេធាវីបានដាក់ពាក្យសុំព្យួរដីកាសម្រេច ដែលដាក់លោក កឹម សុខា ឲ្យស្ថិតក្រោមការត្រួតពិនិត្យតាមផ្លូវតុលាការនោះដែរ ដើម្បីឲ្យលោក កឹម សុខា អាចទៅចូលរួមដោលផ្ទាល់ដែរ។ ប៉ុន្តែ អ្នកស្រីថា សាលាដំបូងរាជធានីភ្នំពេញបដិសេធសំណើនោះ។
អ្នកស្រីបន្ថែមថា តុលាការអនុញ្ញាតឲ្យត្រឹមលោក កឹម សុខា ចូលរួមវេទិកានោះពីចម្ងាយ តាមប្រព័ន្ធអនឡាញ។ ប៉ុន្តែ អ្នកស្រីអះអាងថា លោក កឹម សុខា មិនអាចចូលរួមពីចម្ងាយ តាមប្រព័ន្ធអនឡាញនោះបានទេ ដោយសារតែកម្មវិធីនោះ តម្រូវឲ្យលោក កឹម សុខា មានវត្តមានដោយផ្ទាល់៖ «ទោះបីជាមានការអនុញ្ញាត ឲ្យចូលរួមតាមរយៈប្រព័ន្ធអនឡាញនេះក៏ដោយ ក៏ឯកឧត្តម កឹម សុខា នៅតែមិនអាចចូលរួមបាន ដោយសារតែអ្នករៀបចំបានបញ្ជាក់មកវិញយ៉ាងច្បាស់ថា ការចូលរួម និងការថ្លែងបាឋកថា តាមវិធីអនឡាញដែលតុលាការ បានអនុញ្ញាតហ្នឹង គឺមិនមែនជាគោលបំណងនិងកម្មវិធីដែលអ្នករៀបចំកម្មវិធីសន្និសីទស្ដីពីដំណោះស្រាយ រៀបចំដើម្បីឯកឧត្តម កឹម សុខា នៅក្នុងអង្គប្រជុំនោះទេ ។ គោលបំណងរបស់កម្មវិធី គឺអញ្ជើញឯកឧត្តម កឹម សុខា ទៅចូលរួម ដើម្បីធ្វើបាឋកថាដោយផ្ទាល់ »។
លោក កឹម សុខា ដែលជាប់ចោទពីបទក្បត់ជាតិត្រូវតុលាការដាក់ឲ្យនៅក្រៅឃុំជាបណ្ដោះអាសន្ន ប៉ុន្តែហាមឃាត់សិទ្ធិធ្វើសកម្មភាពនយោបាយ និងមិនឲ្យធ្វើដំណើរចាកចេញពីប្រទេសកម្ពុជា។ បើតាមច្បាប់បម្រាមនេះនឹងនៅជាប់រហូតដល់តុលាការចេញសាលក្រមស្ថាបពរក្នុងរឿងក្តីរបស់លោក។តែរឿងក្តីដែលអូសបន្ថាយពេលជាងបួនឆ្នាំ និងត្រូវមជ្ឈដ្ឋានទូទៅថាមានចរិតនយោបាយនេះមិនដឹងថ្ងៃណាបិទបញ្ចប់ចប់នោះឡើយ។ លោកនាយករដ្ឋមន្រ្តី ហ៊ុន សែន ឯណោះវិញលោកធ្លាប់អារកាត់ជំនួសតុលាការ ថាទាល់តែឆ្នាំ២០២៤ ទើបរឿងក្តីនេះចប់។
ទោះជាយ៉ាងនេះក្ដី លោក កឹម សុខា ថាការរឹតត្បិតសិទ្ធិសេរីភាពរបស់លោកនេះ ធ្វើឲ្យលោកមិនអាចផ្តល់ផលប្រយោជន៍ដល់ពិភពលោកនិងមិនអាចជួយលើកកេរ្តិ៍ឈ្មោះ និងកិត្តិយសរបស់កម្ពុជាលើឆាកអន្តរជាតិបាន។
លោកសូមឲ្យមនុស្សជាតិទាំងឡាយមានសិទ្ធិសេរីភាព មានយុត្តិធម៌ និងមានព្រហ្មវិហារធម៌ដើម្បីឲ្យពិភពលោកមានសន្តិភាពពិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។