សហ​មេធាវី​បញ្ជាក់​ថា លោក កឹម សុខា មាន​សិទ្ធិ​ប្ដឹង​ទាស់​ដីកា​ករណី​គេ​ចោទ​ថា ក្បត់ជាតិ

ដោយ មួង ណារ៉េត
2019-12-07
អ៊ីម៉ែល
មតិ
Share
បោះពុម្ព
ប្រធាន​គណបក្ស​សង្គ្រោះ​ជាតិ លោក កឹម សុខា ថ្លែង​តាម​វីដេអូ​នៅ​លើ​ហ្វេសប៊ុក (Facebook) របស់​លោក​នៅ​ថ្ងៃ​ទី​២៨ ខែ​សីហា ឆ្នាំ​២០១៧។ Photo courtesy of Kem Sokha's Facebook Page
ប្រធាន​គណបក្ស​សង្គ្រោះ​ជាតិ លោក កឹម សុខា ថ្លែង​តាម​វីដេអូ​នៅ​លើ​ហ្វេសប៊ុក (Facebook) របស់​លោក​នៅ​ថ្ងៃ​ទី​២៨ ខែ​សីហា ឆ្នាំ​២០១៧។ Photo courtesy of Kem Sokha's Facebook Page
Photo courtesy of Kem Sokha's Facebook Page

សហ​មេធាវី​ការពារ​ក្ដី​លោក កឹម សុខា បញ្ជាក់​ថា កូន​ក្តី​របស់​ខ្លួន មាន​សិទ្ធិ​ប្ដឹង​ជំទាស់​ដីកា​របស់​ចៅក្រម​ស៊ើបសួរ​សាលាដំបូង ដែល​បញ្ជូន​រឿង​លោក កឹម សុខា ទៅ​ជំនុំជម្រះ​ទាំង​អយុត្តិធម៌ ករណី​ក្បត់ជាតិ​។ ប្រតិកម្ម​នេះ ដោយសារតែ​ក្រុម​មេធាវី​ការពារ​របប​លោក ហ៊ុន សែន ចាត់​ទុក​បណ្ដឹង​របស់​មេធាវី លោក កឹម សុខា ដើម្បី​ពន្យារ​ពេល​នីតិវិធី​តុលាការ។

សហ​មេធាវី ការពារ​ក្ដី​ប្រធាន​គណបក្ស​សង្គ្រោះ​ជាតិ​លោក កឹម សុខា ថា ក្រុម​មេធាវី​បាន​សិក្សា​អង្គហេតុ និង​អង្គច្បាប់​ល្អិតល្អន់​ណាស់ មុននឹង​សម្រេច​ប្ដឹង​ឧទ្ធរណ៍​ជំទាស់​ទៅ​នឹង​ដីកា​បញ្ជូន​រឿង​ទៅ​ជំនុំជម្រះ​នេះ។

លោក ផែង ហេង សហ​មេធាវី​មួយ​រូប ក្នុងចំណោម​សហ​មេធាវី​បួន​រូប​ថា សិទ្ធិ​របស់​ជនជាប់ចោទ ក្នុង​ការ​ប្តឹង​ជំទាស់​បែបនេះ ត្រូវ​បាន​អនុវត្ត​ជា​ហូរហែ​រួចមក​ហើយ ដូចជា​ឧទាហរណ៍​ជាក់ស្ដែង ក្នុង​ករណី​សំណុំរឿង​ក្តី​នៅ​សាលា​ក្តី​ខ្មែរក្រហម៖ «ជន​ត្រូវ​ចោទ​មាន​សិទ្ធិ​ប្ដឹង​ជំទាស់​នឹង​ដីកា​ដំណោះស្រាយ​ដែរ។ យើង​មើល​គំរូ​តុលាការ​ខ្មែរក្រហម។ ជនជាប់ចោទ​ឈ្មោះ នួន ជា ខៀវ សំផន អៀង សារី ជាដើម គាត់​សុទ្ធតែ​ប្ដឹង​ជំទាស់​ដីកា​ដំណោះស្រាយ ដោយសារតែ​សហ​ចៅក្រម​ស៊ើបអង្កេត មិនបាន​ដោះស្រាយ​សម្រេច​ទៅលើ​ពាក្យ​ស្នើសុំ​របស់​ជនជាប់ចោទ»

ពាក្យ​ស្នើ​សុំ​របស់​ជនជាប់ចោទ​ទាំងនោះ គឺ​ភាគច្រើន​សុំ​ឱ្យ​តុលាការ​ដោះលែង​ពួកគាត់ ឱ្យ​នៅ​ក្រៅ​ឃុំ​ជា​បណ្ដោះអាសន្ន ឬ​សុំ​ឱ្យ​ទម្លាក់​ចោល​រាល់​ការចោទប្រកាន់​ប្រឆាំង​នឹង​ពួកគាត់​ជាដើម។

ថ្មីៗ ​នេះ អង្គ​បុរេ​ជំនុំ​ជម្រះ​នៃ​សាលា​ក្តី​ខ្មែរក្រហម ទើបតែ​បាន​បញ្ចប់​សវនាការ​រយៈពេល​បី​ថ្ងៃ ដើម្បី​ស្ដាប់​ភាគី នៃ​រឿង​ក្តី​ក្នុង​សំណុំរឿង​លោក មាស មុត ជុំវិញ​បណ្ដឹង​ឧទ្ធរណ៍​ជំទាស់​នឹង​ដីកា​ដំណោះស្រាយ របស់​សហ​ចៅក្រម​ស៊ើបអង្កេត​អន្តរជាតិ ដែល​សម្រេច​បញ្ជូន​រឿង​លោក មាស មុត ទៅ​ជំនុំជម្រះ​។ ជន​ត្រូវ​ចោទ​លោក មាស មុត ប្ដឹង​ជំទាស់​ដីកា​នេះ។ ចំណែក​សហ​ព្រះរាជ​អាជ្ញា​​​ជាតិ ក៏​ប្ដឹង​ឧទ្ធរណ៍​ជំទាស់​នឹង​ដីកា​នេះ​ដែរ។

ប្រតិកម្ម​របស់​លោក ផែង ហេង ធ្វើឡើង​ក្រោយ​អ្នកច្បាប់ និង​ជា​ប្រធាន​ក្រុម​មេធាវី​ការពារ​ក្តី​ឱ្យ​របប​ក្រុង​ភ្នំពេញ​លោក គី តិច អះអាង​ថា លោក កឹម សុខា មិន​អាច​ប្ដឹង​ឧទ្ធរណ៍​ទៅ​នឹង​ដីកា​សម្រេច​បញ្ជូន​រឿង​ទៅ​ជំនុំជម្រះ​នេះ​បាន​ឡើយ។ តាមរយៈ​ប្រព័ន្ធ​ឃោសនា​របស់​លោក ហ៊ុន សែន លោក គី តិច បន្ថែម​ថា បណ្ដឹង​របស់​សហ​មេធាវី​ការពារ​ក្ដី​លោក កឹម សុខា កាល​ពី​ថ្ងៃ​ទី៣ ខែ​ធ្នូ ដែល​ប្ដឹង​ជំទាស់​ដីកា​របស់​ចៅក្រម​ស៊ើបអង្កេត​សាលាដំបូង​ក្រុងភ្នំពេញ ដែល​សម្រេច​បញ្ជូន​រឿង​លោក កឹម សុខា ទៅ​ជំនុំជម្រះ​នោះ ថា​ធ្វើឡើង​ដោយមាន​កំហុស​ឆ្គង​ផ្នែក​នីតិវិធី។ លោក គី តិច ចាត់​ទុក​បណ្ដឹង​បែបនេះ គឺ​អាច​មាន​ចេតនា​គេចវេះ​ពី​ការទទួលខុសត្រូវ និង​ជា​របៀប​នៃ​ការ​ពន្យារ​នីតិវិធី​តុលាការ​ទៅវិញ។

ជាង​​នេះ​ទៅ​ទៀត លោក គី តិច ថា ក្រុម​មេធាវី​ការពារ​ក្តី​ឱ្យ​លោក កឹម សុខា គួរ​ទុក​ពេលវេលា​នេះ ដើម្បី​សិក្សា​សំណុំរឿង និង​ខិតខំ​ស្វែងរក​ភស្តុតាង​ដោះ​បន្ទុក​លើ​បទ​ចោទ​ប្រកាន់ ទើប​ប្រសើរ​ជាង​មក​ធ្វើ​បណ្តឹង​ឧទ្ធរណ៍ ដែល​លោក​នៅតែ​អះអាង​ថា ធ្វើឡើង​ដោយ​មិន​ត្រឹមត្រូវ​តាមច្បាប់​បែបនេះ។

ឆ្លើយតប​ទៅ​នឹង​ការ​លើកឡើង​របស់​លោក គី តិច បែបនេះ លោក ផែង ហេង ថា នោះ​គ្រាន់តែ​ជា​សិទ្ធិ​ក្នុង​ការ​បញ្ចេញមតិ និង​បកស្រាយ ទៅតាម​ការ​យល់​ឃើញ​របស់​អ្នកច្បាប់​របស់​រដ្ឋាភិបាល​កម្ពុជា​មួយ​រូប​តែប៉ុណ្ណោះ ប៉ុន្តែ​ក្រុម​សហ​មេធាវី​របស់​លោក កឹម សុខា មិន​ថ្លោះធ្លោយ បណ្ដោយ​ឱ្យ​ខុស​នីតិវិធី ក្នុង​ការ​ប្តឹង​នេះ​នោះ​ទេ៖ «ការយល់​របស់​មេធាវី វា​ជា​សិទ្ធិ​បកស្រាយ​របស់​មេធាវី​។ ប៉ុន្តែ​ការ​សម្រេច​គឺ​តុលាការ​ជា​អ្នក​សម្រេច​។ អ្វី​ដែល​សហ​មេធាវី​របស់​ឯកឧត្តម កឹម សុខា ប្តឹង គឺ​យើង​បាន​អាន​ចប់​អស់​ហើយ​មាត្រា​ហ្នឹង យើង​សិក្សា​ហើយ»

លោក ផែង ហេង ថា ការ​ដាក់​ពាក្យ​ប្ដឹង​នេះ មិនមែន​គ្រាន់តែ​ត្រឹមត្រូវ តាម​នីតិវិធី​ច្បាប់​ប៉ុណ្ណោះ​ទេ ប៉ុន្តែ​វា​ជា​ការ​ចាំបាច់​បំផុត​ថែម​ទៀត​ផង ដើម្បី​រក​ភាព​យុត្តិធម៌​ជូន​លោក កឹម សុខា។ ម្យ៉ាងទៀត​លោក​ថា ចៅក្រម​ស៊ើបសួរ​សាលាដំបូង មិន​អាច​រក​យុត្តិធម៌ ឱ្យ​កូន​ក្តី​របស់​ពួក​លោក​បាន ហើយ​លោក​រំពឹង​ថា សភា​ស៊ើបសួរ​សាលាឧទ្ធរណ៍​នឹង​រក​យុត្តិធម៌​ក្នុង​រឿង​នេះ ទើប​ពួក​លោក​ប្ដឹង៖ «យើង​អត់ធ្មត់​គ្រប់គ្រាន់​ហើយ។ កូន​ក្តី​យើង​ជា​ជនរងគ្រោះ ក្នុង​ការ​ចោទ​មួយ ដែល​យើង​ក៏​មាន​សិទ្ធិ​ទាមទារ​រក​យុត្តិធម៌ ហើយ​ចៅក្រម​ស៊ើប​ត្រូវតែ​ស្វែងរក​ទាំង​ភស្តុតាង​ដោះ​បន្ទុក និង​ដាក់​បន្ទុក»

ទោះបីជា​ចៅក្រម​ស៊ើបអង្កេត មាន​ករណីយកិច្ច​ស៊ើបអង្កេត​រក​ទាំង​ភស្តុតាង​ដាក់​បន្ទុក និង​ភស្តុតាង​ដោះ​បន្ទុក​ជន​ត្រូវ​ចោទ​យ៉ាង​ណា​ក្តី បើ​តាម​លោក គី តិច ចៅក្រម​ស៊ើបសួរ បាន​ប្រើប្រាស់​ពេលវេលា​ជាង ២​ឆ្នាំ​កន្លង​មក​នេះ ដើម្បី​ប្រមូល​ភស្តុតាង តែ​ដាក់​បន្ទុក​ដ៏​ធ្ងន់ធ្ងរ​នេះ។

លោក គី តិច ជា​មេធាវី​ការពារ​ក្ដី​ឱ្យ​លោក ហ៊ុន សែន និង​របប​ក្រុង​ភ្នំពេញ។ លោក​ក៏​ការពារ​ក្តី​ឱ្យ​ក្រសួង​មហាផ្ទៃ ក្នុង​សំណុំរឿង​រម្លាយ​គណបក្ស​សង្គ្រោះជាតិ​ដែរ។ តុលាការ​កម្ពុជា​រង​ការ​រិះគន់​ថា ជា​ឧបករណ៍​នយោបាយ សម្រាប់​បក្ស​កាន់អំណាច​។ សម្ដី​របស់​ថ្នាក់ដឹកនាំ​នៃ​របប​នេះ តែងតែ​មាន​ឥទ្ធិពល​លើ​សេចក្តី​សម្រេច​របស់​តុលាការ ជាពិសេស​ក្នុង​រឿង​ក្តី​នយោបាយ ពាក់ព័ន្ធ​នឹង​ការ​ធ្វើទុក្ខបុកម្នេញ​សំឡេង​ប្រឆាំង​។ មន្ត្រី​បក្ស​ប្រឆាំង និង​អ្នកវិភាគ​នយោបាយ​ផង​ថា ​របប​សព្វថ្ងៃ គ្មាន​នីតិរដ្ឋ​ទេ គឺ​មានតែ​នីតិ​មាត់ ដោយ​សំដៅ​ទៅលើ​ការសម្រេច​របស់​តុលាការ ដែល​ធ្វើ​តាមតែ​បញ្ជា​របស់​អ្នក​កាន់​អំណាច។

លោក គី តិច កាលពី​ដើម​ខែ​វិច្ឆិកា ធ្លាប់​បកស្រាយ​ជំទាស់​ទៅ​នឹង​អ្នកច្បាប់​អន្តរជាតិ ជុំវិញ​ផលវិបាក​នៃ​សារ​គំរាម​កម្ទេច ឬ​សម្លាប់​ក្រុម​អ្នក​អម​ដំណើរ​ប្រធាន​ស្ដីទី​គណបក្ស​សង្គ្រោះ​ជាតិ​លោក សម រង្ស៊ី ដែល​ប៉ុនប៉ង​ធ្វើ​មាតុភូមិនិវត្តន៍​ទៅ​កម្ពុជា​វិញ​នោះ​។ កាលណោះ មេធាវី​ជនជាតិ​អង់គ្លេស ដែល​ធ្លាប់​ជា​ប្រធាន​អង្គភាព​គាំពារ​ការ​ការពារ​ក្តី​នៅ​សាលាក្តី​ខ្មែរក្រហម​ផង​នោះ គឺ​លោក រីឆាត រ៉ូយជើរ (Richard Rogers) ថា សារ​គំរាម​បែបនេះ គឺជា​អង្គហេតុ​នៃ​ធាតុ​ផ្សំ​បទល្មើស ដែល​ជា​ភស្តុតាង​ទៅ​ថ្ងៃក្រោយ នៃ​ចេតនា​ឧក្រិដ្ឋ ដើម្បី​ផ្ដន្ទាទោស​លោក ហ៊ុន សែន និង មន្ត្រី​របប​នេះ កាល​ណា​ជន​ស៊ីវិល​ណា​ម្នាក់ ត្រូវ​គេ​សម្លាប់​ដោយសារ​ការ​ប្រើ​កម្លាំង​ប្រដាប់​អាវុធ​ជ្រុល​ហួសហេតុ លើ​ជន​ស៊ីវិល ដែល​គ្មាន​អាវុធ​ក្នុង​ដៃ​នេះ។ បទឧក្រិដ្ឋ​នេះ នឹង​ស្ថិត​ក្នុង​ចំណាត់ថ្នាក់​នៃ​ធាតុ​ផ្សំ​នៃ​បទល្មើស​រួម នៃ​ឧក្រិដ្ឋកម្ម​ប្រឆាំង​មនុស្ស​ជាតិ។ លោក គី តិច ចោទ​មេធាវី​អន្តរជាតិ​រូប​នេះ ថា ជា​ការ​បំភ្លៃ​ការពិត។ទោះជា​យ៉ាង​នេះ​ក្តី មាត្រា ៧() () នៃ​ច្បាប់​អន្តរជាតិ ស្ដីពី​ឧក្រិដ្ឋកម្ម​ប្រឆាំង​មនុស្សជាតិ ចែងថា ក្នុង​ករណី​មាន​ការ​សម្លាប់​មនុស្ស​ម្នាក់ ឬ​ច្រើន ដោយ​ការ​សម្លាប់​នោះ គឺ​ជា​ផ្នែក​មួយ​នៃ​ការ​វាយប្រហារ​ជា​ប្រព័ន្ធ ទៅលើ​ប្រជាពលរដ្ឋ​ស៊ីវិល គឺជា​ធាតុ​ផ្សំ​នៃ​បទល្មើស ស្ដីពី​ឧក្រិដ្ឋកម្ម​ប្រឆាំង​មនុស្សជាតិ។

ការ​បកស្រាយ​របស់​លោក​មេធាវី គី តិច ដែល​ថា​ជនជាប់ចោទ មិន​អាច​ប្ដឹង​ឧទ្ធរណ៍ ជំទាស់​ទៅ​នឹង​ដីកា​សម្រេច​បញ្ជូន​រឿង​លោក កឹម សុខា ទៅ​ជំនុំជម្រះ​នេះ បែរជា​ផ្ទុយ​ទៅ​នឹង​ការយល់ឃើញ​របស់​មន្ត្រី​ក្រសួងយុត្តិធម៌ នៃ​របប​ក្រុងភ្នំពេញ​ទៅវិញ​។ អ្នកនាំពាក្យ​ក្រសួងយុត្តិធម៌ លោក ជិន ម៉ា​លីន ​ធ្លាប់​លើក​ឡើង​ថា ការ​ប្ដឹង​ទាស់​ទៅ​សាលាឧទ្ធរណ៍​របស់​សហ​មេធាវី​លោក កឹម សុខា ទៅ​លើ​ដីកា​ដំណោះស្រាយ​របស់​ចៅក្រម​ស៊ើបសួរ​នោះ គឺជា​សិទ្ធិ​ស្របច្បាប់​របស់​សហ​មេធា​វី​ការពារ​ក្តី​លោក កឹម សុខា៖ «ចៅក្រម​ស៊ើបសួរ​បាន​បិទ​សំណុំរឿង​ស៊ើបសួរ និង​ចេញ​ដីកា​ទៅ​ជម្រះ ហើយ​​បន្ទាប់​នឹង​មាន​ដីកា​កំណត់​កាលបរិច្ឆេទ​ដើម្បី​ជំនុំជម្រះ ហើយ​សហ​មេធាវី​មាន​សិទ្ធិ​ប្ដឹង​ឧទ្ធរណ៍ ហើយ​សាលាឧទ្ធរណ៍​នឹង​ពិនិត្យ​ផ្លូវច្បាប់​អំពី​បណ្ដឹង​នោះ»

ជុំវិញ​ការប្រញាប់​ប្រញាល់​ក្នុង​ការ​ចាត់ការ​រឿង​លោក កឹម សុខា នេះ ក្នុង​រយៈពេល​ត្រឹមតែ​បី​សប្ដាហ៍​ប៉ុណ្ណោះ តុលាការ​នៃ​របប​ក្រុងភ្នំពេញ បានសម្រេច​លើ​ករណី​លោក កឹម សុខា យ៉ាង​តក់ក្រហល់​។ ភ្លាមៗ ​ក្រោយ​គណៈកម្មការ​អឺរ៉ុប កាលពី​ថ្ងៃទី១២ ខែ​វិច្ឆិកា ដាក់​ឱសានវាទ ៣០​ថ្ងៃ ឱ្យ​របប​នេះ ឆ្លើយតប​ចំពោះ​ការរំលោភ​សិទ្ធិមនុស្ស និង​បំផ្លាញ​ប្រជាធិបតេយ្យ​ធ្ងន់ធ្ងរ ចៅក្រម​ស៊ើបអង្កេត កាលពី​ថ្ងៃទី១៥ ខែ​វិច្ឆិកា បិទ​បញ្ចប់​កិច្ច​ស៊ើបសួរ​សំណុំរឿង​លោក កឹម សុខា ភ្លាមៗ ដែល​រយៈពេល​ជាង ២​ឆ្នាំ​មក​ហើយ គ្មាន​តម្រុយ​ណាមួយ ថា​ការស៊ើបអង្កេត​នេះ នឹង​ចប់​ពេល​ណា​នោះ​ឡើយ។ ជាង​នេះ​ទៅ​ទៀត ស្រប​ពេល​ដែល​ថ្ងៃ​អវសានវាទ​នោះ កាន់តែ​ខើច​ណាស់​ទៅ​ហើយ នៅ​ថ្ងៃ​ទី២ ខែ​ធ្នូ ចៅក្រម​ស៊ើបអង្កេត សាលាដំបូង​រាជធានី​ភ្នំពេញ បានសម្រេច​បញ្ជូន​សំណុំរឿង លោក កឹម សុខា ទៅ​ជំនុំជម្រះ ពី​បទ​សន្ទិដ្ឋិភាព ឬ​ការ​ត្រូវរ៉ូវ​គ្នា​ជាមួយ​បរទេស ដើម្បី​ផ្តួល​រំលំ​រដ្ឋាភិបាល។

ការសម្រេច​បញ្ជូន​រឿង​លោក កឹម សុខា ទៅ​ជំនុំជម្រះ​ក្នុង​ពេល​ដ៏​ខ្លី និង​យ៉ាង​ប្រញាប់ប្រញាល់​នេះ ធ្វើ​ឱ្យ​បណ្ដឹង​មុន​អង្គ​សេចក្តី​របស់​សហ​មេធាវី​លោក កឹម សុខា នៅ​មិន​ទាន់​បាន​ដោះស្រាយ​នៅ​ឡើយ​។ ប៉ុន្តែ តុលាការ​បែរជា​ចេញ​ដីកា​បញ្ជូន​រឿង​ទៅ​ជំនុំជម្រះ ដែល​ជា​ដំណាក់កាល​នៃ​អង្គ​សេចក្តី ទាំង​មិនទាន់​ដោះស្រាយ​បណ្ដឹង​មុន​អង្គ​សេចក្ដី ឱ្យ​រួចរាល់​អស់​ជាមុន​សិន។

មន្ត្រី​បក្ស​ប្រឆាំង ធ្លាប់​រិះគន់​ថា ច្បាប់​កម្ពុជា ត្រូវ​បាន​អ្នកច្បាប់ ដែល​មាន​និន្នាការ​គាំទ្រ​របប​ក្រុងភ្នំពេញ បកស្រាយ​ឱ្យ​យឺត​ដូច​កៅស៊ូ ដើម្បី​ចំណេញ​តែ​ប្រយោជន៍​បក្សពួក និង​ក្រុម​របស់​ខ្លួន ដែល​ការ​ធ្វើ​ដូច្នេះ ប៉ះពាល់​យ៉ាង​ធ្ងន់ធ្ងរ​ដល់​ប្រព័ន្ធ​ច្បាប់ និង​ប្រព័ន្ធ​យុត្តិធម៌​ព្រហ្មទណ្ឌ និង​នីតិរដ្ឋ​នៅ​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល