ក្រុម​មេធាវី​លោក ហ៊ុន សែន ប្ដឹង​មន្ត្រី​សិទ្ធិមនុស្ស​អាដហុក​ទៅ​តុលាការ ទាមទារ​សំណង​កន្លះ​លាន​ដុល្លារ

ដោយ ខាន់ លក្ខិណា
2024.02.05
ក្រុម​មេធាវី​លោក ហ៊ុន សែន ប្ដឹង​មន្ត្រី​សិទ្ធិមនុស្ស​អាដហុក​ទៅ​តុលាការ ទាមទារ​សំណង​កន្លះ​លាន​ដុល្លារ លោក ស៊ឹង សែនករុណា អ្នក​នាំ​ពាក្យ​សមាគម​ការពារ​សិទ្ធិមនុស្ស អាដហុក។
រូប៖ ហ្វេសប៊ុក Soeng Senkaruna

មេធាវី​របស់​អតីត​តំណាង​របស់​គណបក្ស​ប្រជាជន​កម្ពុជា នៅ​រសៀល​ថ្ងៃ​ទី៥ កុម្ភៈ បាន​ដាក់​បណ្ដឹង​ទៅ​អយ្យការ​អម​សាលាដំបូង​រាជធានី​ភ្នំពេញ ប្ដឹង​មន្ត្រី​សិទ្ធិមនុស្ស​សមាគម​អាដហុក លោក ស៊ឹង សែនករុណា ដោយ​ទាមទារ​សំណង​ជំងឺ​ចិត្ត​ឱ្យ​គណបក្ស​កាន់​អំណាច ចំនួន ២ពាន់​លាន​រៀល ឬ​ស្មើ​នឹង​ជិត​កន្លះ​លាន​ដុល្លារ​អាមេរិក។

ការ​ដាក់​ពាក្យ​បណ្ដឹង​ទៅ​តុលាការ​នេះ បន្ទាប់​ពី​លោក ហ៊ុន សែន កាល​ពី​ថ្ងៃ​ទី៤ កុម្ភៈ បញ្ជា​ទៅ​ក្រុម​មេធាវី​គណបក្ស ឱ្យ​សិក្សា​ផ្លូវ​ច្បាប់ ប្ដឹង​មន្ត្រី​សិទ្ធិមនុស្ស​អាដហុក ចំពោះ​ការ​អត្ថាធិប្បាយ​លើ​សំណុំរឿង​បក្ស​កាន់​អំណាច​ប្ដឹង​លោក សុន ឆ័យ។

ពាក្យ​បណ្ដឹង​របស់​ក្រុម​មេធាវី​តំណាង​របស់​គណបក្ស​ប្រជាជន​កម្ពុជា ត្រូវ​បាន​សារព័ត៌មាន​ស្និទ្ធ​របស់​រដ្ឋាភិបាល Fresh News ចុះ​ផ្សាយ​នៅ​ថ្ងៃ​ទី៥ កុម្ភៈ។

ក្នុង​ពាក្យ​បណ្ដឹង​ចុះ​ថ្ងៃ​ទី៥ កុម្ភៈ របស់​ក្រុម​មេធាវី ដែល​ប្ដឹង​អ្នក​នាំ​ពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា គឺ​យោង​ទៅ​តាម​អត្ថបទ​ចុះ​ផ្សាយ​របស់​សារព័ត៌មាន ឌឹ ខេមបូឌា ដេលី កាល​ពី​ថ្ងៃ​ទី២ កុម្ភៈ។

ក្រុម​មេធាវី​របស់​បក្ស​កាន់​អំណាច​ចោទ​ថា ការ​ថ្លែង​របស់​លោក ស៊ឹង សែនករុណា ធ្វើ​ឱ្យ​ប៉ះពាល់​ដ៏​ធ្ងន់ធ្ងរ​ដល់​កិត្តិយស​របស់​គណបក្ស​ប្រជាជន​កម្ពុជា និង​ជា​អំពើ​បង្ក​ចលាចល ញុះញង់​បង្កើត​ឱ្យ​មាន​ការ​ស្អប់​រើសអើង ចំពោះ​គណបក្ស​ប្រជាជន​កម្ពុជា និង​មាន​ចេតនា ធ្វើ​ឱ្យ​ប៉ះពាល់​ដល់​ការ​បោះ​ឆ្នោត​ជ្រើសតាំង សមាជិកព្រឹទ្ធសភានីតិកាលទី៥ ដែល​នឹង​ប្រព្រឹត្ត​ទៅ​ក្នុង​ខែកុម្ភៈ ឆ្នាំ២០២៤ នា​ពេល​ដ៏​ខ្លី​ខាង​មុខ​នេះ។

ក្រុម​មេធាវី​តំណាង​គណបក្ស​ប្រជាជន​កម្ពុជា សំណូមពរ​ដល់​តុលាការ​ឱ្យ​ចោទ​ប្រកាន់ និង​ផ្ដន្ទាទោស​លើ​លោក ស៊ឹង សែនករុណា រួម​ទាំង​ទាមទារ​សង​សំណង​ជំងឺ​ចិត្ត​ឱ្យ គណបក្ស​កាន់​អំណាច ចំនួន .០០០.០០០.០០០ (ពីរ​ពាន់​លាន) រៀល។

បណ្ដឹង​របស់​ក្រុម​មេធាវី​គណបក្ស​ប្រជាជន​កម្ពុជា គឺ​ធ្វើ​ឡើង​មួយ​ថ្ងៃ បន្ទាប់​ពី​លោក ហ៊ុន សែន បាន​គំរាម​ប្ដឹង​អ្នក​នាំ​ពាក្យ​សមាគម​ការពារ​សិទ្ធិមនុស្ស អាដហុក លោក ស៊ឹង សែនករុណា ចំពោះ​ការ​អត្ថាធិប្បាយ​លើ​សំណុំ​រឿងបក្ស​កាន់​អំណាច​ប្ដឹង​លោក សុន ឆ័យ នៅ​សារព័ត៌មាន ឌឹ ខេមបូឌា ដេលី (The Cambodia Daily)។

សារព័ត៌មាន ឌឹ ខេមបូឌា ដេលី កាល​ពី​ថ្ងៃ​ទី២ កុម្ភៈ បាន​ចុះផ្សាយ​ដោយ​ស្រង់ប្រសាសន៍ លោក ស៊ឹង សែនករុណា ទៅ​ចុះ​ផ្សាយ​ថា វិវាទ​របស់​អ្នក នយោបាយ​គួរ​បញ្ចប់​ដោយ​នយោបាយ មិន​គួរ​ប្រើ​ប្រព័ន្ធ​តុលាការ​មក​ដោះស្រាយ​ទេ គណបក្ស​ប្រជាជន​កម្ពុជា​ជា​គណបក្ស​មួយ​មាន​ធនធាន​ថវិកា​ច្រើន គណបក្ស​នេះ គួរ​យោគយល់​ដល់​លោក សុន ឆ័យ គណបក្ស​កាន់​អំណាច តែងតែ យក​តុលាការ​មក​ធ្វើ​ជា​របាំង ក្នុង​ការ​គាប​សង្កត់​ដៃគូ​នយោបាយ​ប្រឆាំង​របស់​ខ្លួន និង​ថា គណបក្ស​នយោបាយ ទាំង​អស់​គួរតែ​ប្រើ​វិធី​ចាស់ទុំ ដើម្បី​ធ្វើការ​ប្រកួត​ប្រជែង​គ្នា​គួរ​បញ្ឈប់​នូវ​វប្បធម៌​គំរាមកំហែង​ដៃគូ​នយោបាយ​របស់​ខ្លួន ដើម្បី​ទុក​ជា​គំរូ សម្រាប់​អ្នក​នយោបាយ​ជំនាន់​ក្រោយ​ជា​ដើម។

វិទ្យុអាស៊ីសេរី មិន​ទាន់​អាច​សុំ​ការ​អត្ថាធិប្បាយ​បញ្ហា​នេះ ពី​លោក ស៊ឹង សែនករុណា បាន​នៅ​ឡើយ​ទេ នៅ​ថ្ងៃ​ទី៥ កុម្ភៈ ប៉ុន្តែ​នៅ​ថ្ងៃ​នេះ​ដែរ លោក ស៊ឹង សែនករុណា បាន​សរសេរ លើ​ហ្វេសប៊ុក​របស់​លោក អះអាង​ថា បេសកកម្ម សកម្មភាព និង​ការ​ផ្តល់​បទ​សម្ភាសន៍​របស់​លោក ក្នុង​បំណង​ពង្រឹង​ការ​គោរព​សិទ្ធិមនុស្ស ច្បាប់ យុត្តិធម៌ សង្គម និង​ប្រជាធិបតេយ្យ ដោយ​មិន​បម្រើ​បក្ស​នយោបាយ​ណា​មួយ​នោះ​ទេ។

លោក ស៊ឹង សែនករុណា សរសេរ​នៅ​លើ​ទំព័រ​ហ្វេសប៊ុក នៅ​ថ្ងៃ​ទី៥ កុម្ភៈ ថា រាល់​ការ​ស្រង់​សម្ដី​របស់​លោក ទៅ​បន្ថែម​បន្ថយ​បញ្ចេញ​បញ្ចូល​វាយ​ប្រហារ​ចំៗ លើ​ឈ្មោះ​បក្ស​នយោបាយ​ណា​មួយ នោះ វា​មិនមែន​ជា​ចេតនា និង​គោលបំណង របស់​លោក​នោះ​ទេ ដូច្នេះ​លោក​មិន​ទទួល​ស្គាល់​ឡើយ។

លោក​បញ្ជាក់​ថា បេសកកម្ម សកម្មភាព និង​ការ​ផ្តល់​បទ​សម្ភាសន៍​របស់​លោក ក្នុង​បំណង​ពង្រឹង​ការ​គោរព​សិទ្ធិមនុស្ស ច្បាប់ យុត្តិធម៌​សង្គម និង​ប្រជាធិបតេយ្យ ដោយ​មិន​បម្រើ​បក្ស​នយោបាយ​ណា​មួយ​នោះ​ទេ ហើយ​ក៏​គ្មាន​ចេតនា​ណា​មួយ វាយ​ប្រហារ​បក្ស​នយោបាយ​ណា​មួយ​ឡើយ។

លោក ស៊ឹង សែនករុណា «សូម​អរគុណ​ច្រើន​នូវ​ទឹកចិត្ត​ផ្ញើ​សារ​សួរ​សុខទុក្ខ និង​ព្រួយ​បារម្ភ​ពី​ខាង​គ្រួសារ​បងប្អូន មិត្តភ័ក្ដិ បងប្អូន​ខាង​សារព័ត៌មាន បងប្អូន​ខាង​អង្គការ​សង្គម​ស៊ីវិល ជា​ដៃគូ​ជាតិ​អន្តរជាតិ បងប្អូន​មិត្តភ័ក្ដិ​ទូត​បរទេស​មួយ​ចំនួន ចំពោះ​សុវត្ថិភាព​របស់​ខ្ញុំ។ ខ្ញុំ​បាទ​មិន​អី​នោះ​ទេ»

ជុំវិញ​រឿង​នេះ នាយក​ទទួល​បន្ទុក​កិច្ចការ​ទូទៅ​នៃ​អង្គការ​ការពារ​សិទ្ធិមនុស្ស​លីកាដូ (LICADHO) លោក អំ សំអាត សោកស្ដាយ ដែល​ទទួល​ព័ត៌មាន​នេះ។

លោក​ថា អ្នក​ធ្វើការ​នៅ​អង្គការ​សិទ្ធិមនុស្ស​មិន​មាន​ទ្រព្យ​អ្វី​ច្រើន​នោះ​ទេ គឺ​ធ្វើការ​ដោយ​សន្ដានចិត្ត ដោយ​ចង់​ចូលរួម​ក្នុង​ការ​អភិវឌ្ឍ​ប្រទេស​ជាតិ​ជាមួយ​រដ្ឋាភិបាល ទាក់ទង​នឹង​ផ្នែក​អភិវឌ្ឍន៍​សិទ្ធិមនុស្ស។

លោក អំ សំអាត ថា ការ​ផ្ដល់​បទ​សម្ភាសន៍​ទៅ​ដល់​សារព័ត៌មាន​របស់​លោក ស៊ឹង សែនករុណា កន្លងមក លោក​សង្កេត​ឃើញ គឺ​ក្នុង​ន័យ​ស្ថាបនា កែលំអ​នៅ​បញ្ហា​សិទ្ធិមនុស្ស សង្គម បរិស្ថាន ឬ​ធនធាន​ធម្មជាតិ​ជា​ដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

មតិយោបល់៖

Larry
Feb 05, 2024 12:08 PM

Sue! Sue! Sue!. . . . sue his own people nonstop. Do you have anything better to do?
In Pol Pot regime, they killed own people, in Hun Sen regime they sue, sue, sue own people nonstop.
I am so sick and tired of this communist party. Come on people, wake up now!