គណបក្សភ្លើងទៀនផ្ញើសាររំលែកទុក្ខប្អូនថ្លៃលោក ហ៊ុន សែន ទោះរងការធ្វើទុក្ខបុកម្នេញពីគណបក្សកាន់អំណាច
2023.02.06
អ្នកស្រី ប៊ុន សុថា ប្អូនថ្លៃលោក ហ៊ុន សែន ស្លាប់កាលពីថ្ងៃទី៣ ខែកុម្ភៈ ឆ្នាំ២០២៣។
រូប៖ ហ្វេសប៊ុក SPM
មន្ត្រីគណបក្សភ្លើងទៀនបង្ហាញពីការផ្សះផ្សានយោបាយ និងគោលជំហរលទ្ធិប្រជាធិបតេយ្យដោយការចូលរួមរំលែកទុក្ខប្អូនថ្លៃលោក ហ៊ុន សែន នៅថ្ងៃទី៦ ខែកុម្ភៈ។ អ្នកតាមដានស្ថានការណ៍សង្គម យល់ឃើញថា ការបន្ទន់ឥរិយាបថរបស់មន្ត្រីគណបក្សភ្លើងទៀន ជារឿងល្អដើម្បីបន្ធូរបន្ថយបរិយាកាសនៅមុនពេលបោះឆ្នោត។
ទោះបីជាគណបក្សភ្លើងទៀនរងការធ្វើទុក្ខបុកម្នេញ ការគំរាមកំហែង ប្ដឹងរឹបអូសផ្ទះសម្បែង ពីមន្ត្រីគណបក្សកាន់អំណាចយ៉ាងក៏ដោយ ក៏មន្ត្រីគណបក្សនេះនៅតែបង្ហាញការសោកស្ដាយ ចំពោះមរណភាពប្អូនថ្លៃលោកនាយករដ្ឋមន្ត្រីដែរ។
អ្នកនាំពាក្យគណបក្សភ្លើងទៀន លោក គឹមសួរ ភីរិទ្ធ ប្រាប់វិទ្យុអាស៊ីសេរីថា ការឈ្លោះប្រកែកការគ្នា ការគំរាមកំហែងគ្នាវាមិនចំណេញនោះទេ។ លោកបញ្ជាក់ថា មានសាមគ្គីជាតិគ្នាប៉ុណ្ណោះទើបធ្វើឱ្យប្រទេសជាតិរីកចម្រើន ហើយលោកចូលរួមរំលែកទុក្ខចំពោះក្រុមគ្រួសារលោកនាយករដ្ឋមន្ត្រី។
ក្រោយពីប្អូនថ្លៃលោកនាយករដ្ឋមន្ត្រី ហ៊ុន សែន ទទួលមរណភាពមួយថ្ងៃ គណបក្សភ្លើងទៀន បានចេញលិខិតចូលរួមរំលែកទុក្ខនៅថ្ងៃទី៤ ខែកុម្ភៈ។ លិខិតរបស់មន្ត្រីជាន់ខ្ពស់គណបក្សភ្លើងទៀននេះមាន លោក ទាវ វណ្ណុល លោក ចាន់ ចេង លោក ចេប គឹមអ៊ាង អ្នកស្រី ឡាយ បូនី និង អ្នកស្រី ពត ពៅ ដើម្បីចូលរួមរំលែកទុក្ខ ក្រុមគ្រួសារលោកនាយករដ្ឋមន្ត្រី ហ៊ុន សែន។
ឆ្លើយតបរឿងនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា ការចូលរួមរំលែកទុក្ខរបស់គណបក្សភ្លើងទៀន គឺជារឿងសុជីវធម៌ និងសីលធម៌ ដែលមនុស្សនៅក្នុងសង្គមតែងជួយគ្នាទៅវិញទៅមក។ លោកបន្តថា ការចូលរួមនេះមិនពាក់ព័ន្ធរឿងនឹងនយោបាយទេ គឺជាបុគ្គល។ ចំណែករឿងនយោបាយ លោកអះអាងថា ត្រូវអនុវត្តន៍ផ្សេងគ្នា៖
«លើកឡើងពីបញ្ហាថា មានការធ្វើទុក្ខបុកម្នេញពីគណបក្សប្រជាជន គឺមិនមានទេករណីហ្នឹង ពីព្រោះអឺឥស្សរជននៅក្នុងគណបក្សភ្លើងទៀនគាត់ប្រព្រឹត្តល្មើសច្បាប់ដោយខ្លួនឯងបាទ»។
ទោះបីជាយ៉ាងណា អគ្គលេខាធិការសហព័ន្ធនិស្សិតបញ្ញវន្តកម្ពុជា លោក គៀន ពន្លក យល់ឃើញថា ការបន្ទន់ឥរិយាបថរបស់មន្ត្រីគណបក្សភ្លើងទៀនដែលការចូលរួមរំលែកទុក្ខប្អូនថ្លៃ លោក ហ៊ុន សែន ជារឿងល្អដើម្បីបន្ធូរបន្ថយបរិយាកាសនៅមុនពេលបោះឆ្នោត។ លោកស្នើឱ្យរដ្ឋាភិបាលរៀបចំការបោះឆ្នោតនៅពេលខាងមុខប្រកបដោយសេរី ត្រឹមត្រូវ និងយុត្តិធម៌៖
«ខ្ញុំគិតថា ប្រសិនបើអឺគណបក្សកាន់អំណាចនៅតែប្រកាន់ឥរិយាបថមួយដែលថា មិនអាចផ្សះផ្សាជាតិបង្រួបបង្រួមជាតិបាន ហើយនៅតែចាត់ទុកគណបក្សប្រឆាំងថា ជាអ្នកបង្កចលាចលនៅក្នុងសង្គមនៅពេលនោះ គឺលទ្ធផលនៃការបោះឆ្នោតឆ្នាំ២០២៣ គឺអន្តរជាតិប្រាកដជាមិនទទួលស្គាល់លទ្ធផលនៃការបោះឆ្នោតនេះទេ»។
រីឯប្រធានគណបក្សសង្រ្គោះជាតិ លោក កឹម សុខា វិញ ដែលតែងតែទៅចូលរួមរំលែកទុក្ខគ្រួសារលោកនាយករដ្ឋមន្ត្រី ហ៊ុន សែន ដូចជាកន្លងមក លោកទៅចូលរួមបុណ្យ សពម្ដាយក្មេកលោក ហ៊ុន សែន ទទួលមរណភាព និងបងប្រុសបង្កើតលោក ហ៊ុន ណេង នោះ លើកនេះលោក កឹម សុខា មិនបានទៅចូលរួមរំលែកទុក្ខដោយផ្ទាល់ឡើយ។ ប៉ុន្តែលោក កឹម សុខា បានចាត់តាំងភរិយារបស់លោក គឺអ្នកស្រី តែ ចន្ទមនោ ទៅចូលរួមរំលែកទុក្ខ ដល់គេហដ្ឋានសពលោកស្រី ប៊ុន សុថា ដែលទទួលមរណភាព។ ប្អូនស្រីរបស់អ្នកស្រី ប៊ុន រ៉ានី ហ៊ុនសែន គឺអ្នកស្រី ប៊ុន សុថា អាយុ ៦៧ឆ្នាំបានទទួលមរណភាព ថ្ងៃទី៣ ខែកុម្ភៈ។
អ្នកវិភាគមើលឃើញថា អ្នកនយោបាយនៅបក្សផ្សេងគ្នា ចូលរួមរំលែកទុក្ខគ្នានេះ ជារឿងល្អមួយនៅក្នុងសង្គម ក៏ប៉ុន្តែដោយផ្អែកលើស្ថានភាពនយោបាយដូចសព្វថ្ងៃនេះ គេមិនរំពឹងថា ការចូលរួមរំលែកទុក្ខតាមបែបប្រពៃណីនេះ អ្នកនយោបាយមិនអាចឈានទៅផ្សះផ្សាជាតិបានឡើយ។ កន្លងមកលោក កឹម សុខា ក៏ធ្លាប់ជួបលោក ហ៊ុន សែន នាឱកាសពិធីបុណ្យសពម្ដាយក្មេកនិងបងប្រុសលោកនាយករដ្ឋមន្ត្រីរយៈពេលជាច្រើនម៉ោង តែមកទល់ពេលនេះ មិនអាចផ្សះផ្សាជាតិ ឬស្ដារស្ថានភាពនយោបាយឲ្យល្អឡើងវិញនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- ស្ត្រីដែលគ្រូពេទ្យវះកាត់ខុសបច្ចេកទេសបានបាត់បង់ជីវិត
- លោក ហ៊ុន សែន ប្រើលុយដើម្បីដោះស្រាយបញ្ហាកម្មករក្នុងពេលរោងចក្រជាច្រើនបិទទ្វារ
- លោក ហ៊ុន សែន ជួយលោក ហ៊ុន ម៉ាណែត ឱ្យឡើងសក្ដិមួយកម្រិតទៀត
អត្ថបទពេញនិយម
នយោបាយ
- សហមេធាវីប្រតិកម្មរឿងសមត្ថកិច្ចយាមផ្ទះ មិនឲ្យជួបលោក កឹម សុខា គឺជារឿងផ្ទុយពីច្បាប់
- លោក ហ៊ុន សែន មិនគាំទ្រដីកាតុលាការICCដើម្បីចាប់ខ្លួនមេដឹកនាំរុស្ស៊ី
- តំណាងរាស្ត្រសភាអឺរ៉ុបព្រមានស្នើដក EBA បន្ថែមទៀតពីកម្ពុជាបើការបោះឆ្នោតមិនស្របតាមស្តង់ដារ
- មន្ត្រីបក្សប្រឆាំងថា ការធានារបស់លោក ស ខេង ឱ្យគណបក្សនយោបាយធ្វើសកម្មភាពដោយសេរីភាព នឹងបន្តគ្មានប្រសិទ្ធភាព
- លោក ហ៊ុន សែន ចំអកគោលនយោបាយឧបត្ថម្ភប្រាក់ដល់មនុស្សចាស់