អ្នកឃ្លាំមើលបញ្ហាព្រំដែនចង់ឃើញរដ្ឋាភិបាលប្តឹងទៅតុលាការអន្តរជាតិទាមទារយកកោះគុតពីថៃមកវិញ
2024.11.05
លោកនាយករដ្ឋមន្ត្រី ហ៊ុន ម៉ាណែត(ស្ដាំ) ជួបនាយករដ្ឋមន្ត្រីថៃ អ្នកស្រី ផែថងថាន ស៉ីណាវ៉ាត្រា (Paetongtarn Shinawatra) ក្នុងជំនួបទ្វេភាគី និងពិភាក្សាការងារ នៅទីក្រុងវៀងចន្ទន៍ ប្រទេសឡាវ កាលពីថ្ងៃទី៩ តុលា ២០២៤។
រូប៖ ហ្វេសប៊ុកលោក ហ៊ុន ម៉ាណែត
អ្នកឃ្លាំមើលបញ្ហាព្រំដែន ចង់ឃើញរដ្ឋាភិបាលលោក ហ៊ុន ម៉ាណែត ប្តឹងទៅតុលាការអន្តរជាតិ ទាមទារយកកោះគុត (Koh Kut) និងសមុទ្រខ្មែរដែលថៃអះអាងថាជា «តំបន់ត្រួតស៊ីគ្នា» ពីថៃមកវិញ។
អតីតតំណាងរាស្ត្រគណបក្សសង្គ្រោះជាតិ និងជាអ្នករិះគន់បញ្ហាព្រំដែន លោក អ៊ុំ សំអាន សរសេរនៅលើទំព័រហ្វេសប៊ុក (Facebook) របស់លោកនៅថ្ងៃទី៤ ខែវិច្ឆិកា ថា កម្ពុជាត្រូវប្តឹងទៅតុលាការអាជ្ញាកណ្តាលអន្តរជាតិ (Permanent Court of Arbitration 'PCA') នៅទីក្រុងឡាអេ (The Hague) ដើម្បីទាមទារយកកោះគុត សមុទ្រ និងដែនសមុទ្រខ្មែរដែលភាគីថៃអះអាងថាជា «តំបន់ត្រួតស៊ីគ្នា» មកវិញ។ លោកផ្តល់អំណះអំណាងថា ផ្អែកតាមសន្ធិសញ្ញាបារាំង-សៀម ឆ្នាំ១៩០៧ តំបន់ដែលភាគីថៃ អះអាងថា «ត្រួតស៊ីគ្នា» ក្នុងឈូងសមុទ្រថៃ ចំនួន ២ម៉ឺន ៦ពាន់គីឡូម៉ែត្រការ៉េ ហើយដែលត្រូវបានរដ្ឋាភិបាលអតីតនាយករដ្ឋមន្ត្រី ហ៊ុន សែន គ្រោងយកទៅដាក់ទុនរកស៊ីរួមគ្នាលើប្រេងនិងឧស្ម័នជាមួយថៃ និងដែនសមុទ្រខ្មែរទំហំ ៤ពាន់គីឡូម៉ែត្រការ៉េ ដែលថៃកំពុងកាន់កាប់នោះ គឺស្ថិតក្នុងដែនសមុទ្ររបស់កម្ពុជា ១០០%។
លោក អ៊ុំ សំអាន លើកឡើងយ៉ាងដូច្នេះ គឺស្របពេលដែលបក្សប្រឆាំងថៃអះអាងថា កោះគុត និង តំបន់ដែលអះអាងថា «ត្រួតស៊ីគ្នា» ជារបស់ថៃ។ កាសែត បាងកក ប៉ុស្តិ៍ (Bangkok Post) រាយការណ៍កាលពីថ្ងៃទី៤ ខែវិច្ឆិកា ដោយស្រង់ប្រសាសន៍រដ្ឋមន្ត្រីមហាផ្ទៃថៃ លោក អានុទីន ឆាន់វិរៈគល់ (Anutin Charnvirakul) ថា «កោះគុត គឺជារបស់កម្មសិទ្ធិទាំងស្រុងរបស់ប្រទេសថៃដោយគ្មានមន្ទិលសង្ស័យឡើយ»។ រដ្ឋមន្ត្រីមហាផ្ទៃថៃរូបនេះ ថ្លែងយ៉ាងដូច្នេះ ស្របពេលដែលគណបក្សប្រឆាំងថៃ គឺគណបក្ស ផាលាង ប្រាឆារ៉ាត់ (Palang Pracharath Party) និងក្រុមអ្នកសិក្សាថៃ កំពុងទាមទារឱ្យរដ្ឋាភិបាលថៃលុបចោលកិច្ចព្រមព្រៀង ឬ MoU កាលពីឆ្នាំ២០០១ ស្តីពីការអភិវឌ្ឍរួមគ្នានៃធនធានប្រេង និងឧស្ម័នជាមួយកម្ពុជា។ ការទាមទារនេះក៏ដោយសារតែពួកគេ ព្រួយបារម្ភខ្លាចកិច្ចព្រមព្រៀងនេះ ធ្វើឱ្យថៃបាត់បង់អធិបតេយ្យលើកោះគុតមកកម្ពុជា។ ទោះជាយ៉ាងណា រដ្ឋមន្ត្រីមហាផ្ទៃថៃរូបនេះ ថ្លែងទៅក្រុមប្រឆាំងថៃវិញថា កិច្ចព្រមព្រៀង ឬ MoU ឆ្នាំ២០០១ ជាមួយកម្ពុជានេះ ថៃមិនអាចលុបចោលជាឯកតោភាគីបានទេ។
វិទ្យុអាស៊ីសេរី នៅមិនទាន់អាចទាក់ទងរដ្ឋមន្ត្រីទទួលបន្ទុកកិច្ចការព្រំដែន លោក ឡាំ ជា បាននៅឡើយទេ កាលពីយប់ថ្ងៃទី៤ ខែវិច្ឆិកា។
លោក អ៊ុំ សំអាន ចោទថា រដ្ឋាភិបាលអតីតនាយករដ្ឋមន្ត្រី ហ៊ុន សែន ធ្វើឱ្យបាត់បង់អធិបតេយ្យរបស់កម្ពុជាលើកោះគុត និងសមុទ្រខ្មែរទាំងនេះ ដោយសារតែលោក ហ៊ុន សែន បានចុះកិច្ចព្រមព្រៀងតំបន់ទឹកប្រវត្តិសាស្ត្រឆ្នាំ១៩៨២ ជាមួយប្រទេសវៀតណាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- លោក ហ៊ុន សែន តែងតាំងលោក ហៃ វណ្ណា និងសកម្មជន ១៨នាក់ទៀតជាទីប្រឹក្សា និងជំនួយការ
- លោក ហ៊ុន សែន ទៅមជ្ឈិមបូព៌ា «ទំនងចង់ទៅដើរទាក់ទាញវិនិយោគទុន ខណៈរដ្ឋាភិបាលកូន កំពុងជួបបញ្ហាសេដ្ឋកិច្ច»
- យុវជនរិះគន់ការផ្ដល់គ្រឿងឥស្សរិយយសឱ្យចៅប្រុសលោក ហ៊ុន សែន ដែលធ្លាប់ប្រកាសលក់កាំភ្លើងលើបណ្ដាញសង្គម
អត្ថបទពេញនិយម
នយោបាយ
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- ពលរដ្ឋខ្មែរនៅជប៉ុនធ្វើបាតុកម្មជំរុញឱ្យលោក ហ៊ុន ម៉ាណែត ស្ដារលទ្ធិប្រជាធិបតេយ្យឡើងវិញ
- អ្នកវិភាគថា របបផ្ដាច់ការត្រកូលហ៊ុន នឹងដួលរលំដូចរបបផ្ដាច់ការនៅស៊ីរីដែរ
- ពលរដ្ឋខ្មែរនៅអាមេរិកធ្វើសមាជទាមទារឲ្យរដ្ឋាភិបាលកម្ពុជា ប្ដឹងករណីកោះគជ់ទៅតុលាការអន្តរជាតិ
- អ្នកឃ្លាំមើលនិងបក្សប្រឆាំងថា គម្រោងធ្វើច្បាប់ដាក់មនុស្សមួយក្រុមជាភេរវកម្មនឹងឡងទៅក្រុមលោក ហ៊ុន សែន វិញ