លោក ទេព នីថា អគ្គលេខាធិការ គ.ជ.ប មានប្រសាសន៍ថា គិតត្រឹមថ្ងៃទី៧ ខែកក្កដា គ.ជ.ប ទទួលបានបណ្តឹងជាង ១០០បណ្ដឹង នៅគណៈកម្មការឃុំសង្កាត់រៀបចំការបោះឆ្នោត។ លោកបន្តថា បណ្ដឹងទាំងនោះ ភាគច្រើនប្ដឹងដោយគណបក្សសង្គ្រោះជាតិ និងគណបក្សប្រជាជនកម្ពុជា ហើយថា បណ្តឹងទាំងនេះកើតមាននៅរាជធានី ខេត្តចំនួន ១៨ ក្នុងចំណោម ២៤រាជធានីខេត្តទូទាំងប្រទេស។
លោក ទេព នីថា បញ្ជាក់ថា បណ្ដឹងជាង ១០០ ស្ថាប័នរៀបចំការបោះឆ្នោតពាក់ព័ន្ធដោះស្រាយ បានជាងពាក់កណ្តាលហើយៗ ក្រៅពីនេះកំពុងដោះស្រាយ។
យ៉ាងនេះក្តី លោក ទេព នីថា អះអាងថា សភាពការណ៍ឃោសនាបោះឆ្នោតចាប់ផ្ដើមពីថ្ងៃទី២៧ ខែមិថុនា ដល់ថ្ងៃទី៧ ខែកក្កដា ដំណើរការទូទៅនៃយុទ្ធនាការឃោសនានេះ ប្រព្រឹត្តទៅជាធម្មតា។ ប៉ុន្តែទទួលស្គាល់ថា មានភាពអសកម្ម ឬក៏សកម្មភាពអវិជ្ជមាន និងអំពើហិង្សាតិចតួចកើតឡើង ប៉ុន្តែមិនរាំងស្ទះដល់ដំណើរការឃោសនាបោះឆ្នោតទេ។
លោក កឹម សុខា ប្រធានស្ដីទីគណបក្សសង្គ្រោះជាតិ មានប្រសាសន៍ថា យុទ្ធនាការជាង ១០ថ្ងៃមកនេះ សកម្មភាពចុះឃោសនារបស់គណបក្សសង្គ្រោះជាតិនៅតាមមូលដ្ឋាន ពិសេសនៅរាជធានីភ្នំពេញ ត្រូវរំខានដោយក្បួនឃោសនារបស់គណបក្សកាន់អំណាច។
បញ្ហានេះ លោកស្នើទៅស្ថាប័ន គ.ជ.ប ឬសមត្ថកិច្ចពាក់ព័ន្ធ ត្រូវរក្សាឯករាជភាពរបស់ខ្លួន និងត្រូវអន្តរាគមន៍បញ្ឈប់សកម្មភាពបក្សកាន់អំណាចឲ្យឈប់តាមរំខានសកម្មភាពឃោសនារបស់គណបក្សសង្គ្រោះជាតិ តទៅទៀត។
កាលពីព្រលប់ថ្ងៃសុក្រ ទី៥ ខែកក្កដា មានការប៉ះទង្គិចគ្នា ដោយពាក្យសម្ដីឈានទៅដល់ការវាយតប់ និងគប់ដុំថ្មទៅលើក្បួនឃោសនាគណបក្សសង្គ្រោះជាតិ និងបាញ់កាំភ្លើងឡើងលើគំរាមទៅលើក្បួនឃោសនាគណបក្សសង្គ្រោះជាតិ នៅសង្កាត់ផ្សារដើមថ្កូវ ខណ្ឌចំការមន បណ្ដាលឲ្យយុវជន ៣នាក់រងរបួស។
ករណីប្រើហិង្សានេះ នាំឲ្យមន្ត្រីសង្គមស៊ីវិល និងស្ថានទូតសហរដ្ឋអាមេរិក សម្ដែងក្ដីបារម្ភពីបញ្ហាសន្តិសុខ មុនការបោះឆ្នោតសភាអាណត្តិទី៥ ចូលមកដល់។
លោកបណ្ឌិត ហង្ស ពុទ្ធា ជានាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរីនៅកម្ពុជា ឬហៅកាត់ថា និចហ្វិក (NICFEC)។ លោកទទួលស្គាល់ថា សកម្មភាពរំខានផ្ដើមដោយអ្នកគាំទ្របក្សកាន់អំណាចក្នុងពេលឃោសនាបានបន្តកើតមាន។
លោកបន្តថា ករណីរំខាននេះ បើសមត្ថកិច្ចស្ថាប័នពាក់ព័ន្ធ ឬ គ.ជ.ប មិនចាត់វិធានការទប់ស្កាត់ទេ នឹងអាចមានអំពើហិង្សាធ្ងន់ធ្ងរនៅពេលអនាគត។
ចំណែកលោក សន ម៉ាកគិនថូស (Sean McIntosh) មន្ត្រីទំនាក់ទំនងសាធារណៈនៃស្ថានទូតសហរដ្ឋអាមេរិក ប្រចាំកម្ពុជា បានឲ្យដឹងតាមសំឡេងអ្នកបកប្រែភាសាកាលពីថ្ងៃទី៦ ខែកក្កដា ថា សហរដ្ឋអាមេរិក កំពុងតាមដានយ៉ាងយកចិត្តទុកដាក់ជុំវិញដំណើរការឃោសនាបោះឆ្នោតសភាអាណត្តិទី៥ ដែលកំពុងប្រព្រឹត្តទៅរាល់ថ្ងៃនេះ ហើយថា លទ្ធផលដែលអាចទទួលយកបានទាល់តែការបោះឆ្នោតនោះមានដំណើរការល្អ មានលក្ខណៈសេរី យុត្តិធ៌ម ត្រឹមត្រូវ គ្មានអំពើហិង្សា និងការគំរាមកំហែងផ្សេងៗពីគណបក្សនយោបាយមួយទៅគណបក្សមួយទៀត។
កាលបរិច្ឆេទនៃការបោះឆ្នោតជ្រើសរើសតំណាងរាស្ត្រអាណត្តិទី៥ នឹងចាប់ផ្ដើមនៅថ្ងៃអាទិត្យ ទី២៨ ខែកក្កដា ឆ្នាំ២០១៣។ រីឯយុទ្ធនាការឃោសនាបោះឆ្នោតរបស់គណបក្សនយោបាយនឹងបញ្ចប់នៅថ្ងៃទី២៦ ខែកក្កដា។
យ៉ាងណាក៏ដោយ ការបោះឆ្នោតនេះ លោក ទេព នីថា អគ្គលេខាធិការ គ.ជ.ប បានស្នើដល់គ្រប់គណបក្សនយោបាយត្រូវចូលរួមគោរពបទបញ្ជា និងច្បាប់ស្ដីពីការបោះឆ្នោតឲ្យបានគ្រប់គ្នា ដើម្បីកាត់បន្ថយជម្លោះ និងអំពើហិង្សាផ្សេងៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។