គណៈកម្មាធិការជាតិរៀបចំការបោះឆ្នោត (គ.ជ.ប) មានផែនការពីរសម្រាប់ទប់ទល់នឹងស្ថានភាពទឹកជំនន់ នៅថ្ងៃបោះឆ្នោត។ ទោះយ៉ាងណា អ្នកនាំពាក្យគ.ជ.ប លោក ហង្ស ពុទ្ធា ឲ្យអាស៊ីសេរីដឹងថា ស្ថានភាពជំនន់ទឹកភ្លៀង មិនទាន់មានការគំរាមកំហែងដល់ការិយាល័យបោះឆ្នោតនៅឡើយទេ។ សង្គមស៊ីវិល ថា អាចនឹងមានការធ្លាក់ចុះចំនួនអ្នកបោះឆ្នោត ប្រសិនបើមានការិយាល័យបោះឆ្នោតណារងជំនន់ទឹកភ្លៀង។
អ្នកនាំពាក្យគ.ជ.ប លោក ហង្ស ពុទ្ធា បញ្ជាក់ថា គិតត្រឹមថ្ងៃទី២៤ កក្កដា គ.ជ.ប មិនទាន់មានគម្រោងជម្លៀសការិយាល័យបោះឆ្នោតនៅឡើយទេ ព្រោះការិយាល័យបោះឆ្នោតទាំងជាង២ម៉ឺន ការិយាល័យនៅទូទាំងប្រទេស មិនទាន់មានស្ថានភាពគំរាមកំហែង ពីជំនន់ទឹកភ្លៀងទេ។ លោក ហង្ស ពុទ្ធា ឲ្យដឹងថា ផែការ "ក" របស់គ.ជ.ប គឺជ្រើសរើសទីតាំងការិយាល័យណាខ្ពស់ ដែលទឹកមិនលិច ហើយប្រសិនបើមានករណីទឹកលិច គ.ជ.ប មានផែនការ "ខ" គឺ រើការិយាល័យបោះឆ្នោតទៅទីតាំងថ្មី។ «»
គណៈកម្មការជាតិគ្រប់គ្រងគ្រោះមហន្តរាយ បញ្ជាក់ក្នុងរបាយការណ៍ផ្ញើទៅលោកនាយករដ្ឋមន្ត្រី ហ៊ុន សែន កាលពីថ្ងៃទី១៩ កក្កដា បង្ហាញថា ជំនន់ទឹកភ្លៀងនេះ បង្កឡើងដោយឥទ្ធិពលព្យុះទី៩ ឈ្មោះ សុន ទីញ កំពុងរំកិលទៅក្បែរដីគោកក្រុងហាណូយ ស្របពេលដែលព្យុះទី១០ កំពុងវិវត្ដកើតឡើង ហើយខេត្តចំនួន៧របស់កម្ពុជាបានរងគ្រោះពីជំនន់ទឹកភ្លៀង រួមមាន ខេត្តកំពង់ស្ពឺ កោះកុង ប៉ៃលិន បាត់ដំបង កំពត កែប និង ខេត្តព្រះសីហនុ។
ក្រសួងធនធានទឹក និងឧតុនិយមវិញ ក៏បានជូនដំណឹងថា ទឹកទន្លេមេគង្គនៅប៉ែកខាងលើរបស់កម្ពុជា នឹងហក់ឡើងខ្ពស់ ហើយទឹកនឹងហូរចូលតាមព្រែក និងនៅតំបន់ទំនាបនានា ជាប់នឹងដងទន្លេមេគង្គ ហើយប្រជាពលរដ្ឋនៅខេត្តស្ទឹងត្រែង ក្រចេះ ត្បូងឃ្មុំ និងខេត្តកំពង់ចាម ដែលជាខេត្តជាប់ដងទន្លេមេគង្គ នឹងអាចរងគ្រោះពីទឹកជំនន់នេះ។
កាលពីថ្ងៃទី១៩ កក្កដា លោក ហង្ស ពុទ្ធា បានបញ្ជាក់ប្រាប់អាស៊ីសេរីថា បើទោះបីជាកម្ពុជា កំពុងរងគ្រោះដោយទឹកជំនន់ នៅខេត្តមួយចំនួនក្តី ក៏មិនអាចពន្យារពេលបោះឆ្នោតបានទេ។ អ្នកនាំពាក្យគ.ជ.បរូបនេះ បន្តថា បើទឹកជំនន់ធ្វើឲ្យលិចការិយាល័យរៀបចំការបោះឆ្នោត គឺគ.ជ.ប នឹងផ្លាស់ប្ដូរទីតាំងបោះឆ្នោតថ្មីទៅកាន់ទីទួលខ្ពស់ ធ្វើយ៉ាងបង្កលក្ខណៈងាយស្រួលពលរដ្ឋទៅបោះឆ្នោត តែមិនមានការលើកថ្ងៃបោះឆ្នោតទេ។
ប្រធានអង្គការនិចហ្វិច និងជាអតីតសមាជិកក្រុមបន្ទប់ស្ថានការណ៍ឃ្លាំមើលការបោះឆ្នោត លោក សំ គន្ធាមី សង្កេតឃើញថា ការបោះឆ្នោតកន្លងមក មានស្ថានភាពពលរដ្ឋរស់នៅតាមទំនាបនៃមាត់ទន្លេមេគង្គ បានប្រើប្រាស់ទូកសម្រាប់ជិះទៅបោះឆ្នោត។ ប៉ុន្តែ លោក សំ គន្ធាមី យល់ថា ប្រសិនបើស្ថានភាពទឹកជំនន់ នៅឆ្នាំនេះ នៅតែបន្តផលប៉ះពាល់ដល់ពលរដ្ឋទៀត បើទោះជាមានការរើការិយាល័យបោះឆ្នោតមែន ពលរដ្ឋខ្លះ អាចមានការធុញទ្រាន់ លែងចង់ទៅបោះឆ្នោត។ «»
នៅសល់មិនដល់មួយសប្ដាហ៍ទៀតទេ គឺនៅថ្ងៃទី២៩ កក្កដាខាងមុខ គ.ជ.ប ដែលរងការរិះគន់ថា ជាឧបករណ៍រៀបចំការបោះឆ្នោតបម្រើឲ្យរបបក្រុងភ្នំពេញបន្តកាន់អំណាច នឹងរៀបចំការបោះឆ្នោតមួយ ប្រកបដោយភាពចម្រូងចម្រាស។ ក្រុមអ្នកនិយមប្រជាធិបតេយ្យ ហៅការបោះឆ្នោតនេះ ធ្វើឡើងក្រោមស្លាកលទ្ធិប្រជាធិបតេយ្យ សេរីពហុបក្សក្លែងក្លាយ ដើម្បីបង្គ្រប់កិច្ចឲ្យរបបក្រុងភ្នំពេញ អាចបន្តកាន់អំណាចបន្តទៀត។
អ្នកនាំពាក្យគ.ជ.ប លោក ហង្ស ពុទ្ធា ឲ្យដឹងទៀត ការបោះឆ្នោតនៅអាណត្តិទី៦នេះ គ.ជ.ប បានរៀបចំការិយាល័យបោះឆ្នោត សរុបទាំងអស់ មានចំនួន២២.៩៦៧ ការិយាល័យ នៅទូទាំងប្រទេស។ ចំណែកសម្ភារៈបម្រើឲ្យការបោះឆ្នោតនៅតាមការិយាល័យនីមួយៗ ត្រូវបាន គ.ជ.ប បញ្ជាក់ថា ទៅដល់គោលដៅជាង៩០ភាគរយហើយ។ លោក ហង្ស ពុទ្ធា ថា ការិយាល័យបោះឆ្នោត នឹងបើកទ្វារ នៅមុនថ្ងៃបោះឆ្នោតមួយថ្ងៃ ពោលគឺនៅថ្ងៃទី២៨ កក្កដា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។