ពលរដ្ឋចំនួនជាង២សែននាក់ បានទៅចុះឈ្មោះបោះឆ្នោតក្នុងរយៈពេល១៨ថ្ងៃ ដែល គណៈកម្មាធិការជាតិរៀបចំការបោះឆ្នោត (គ.ជ.ប) បើកដំណើរការពិនិត្យបញ្ជីឈ្មោះ និងចុះឈ្មោះបោះឆ្នោត សម្រាប់ឆ្នាំ២០២១។
របាយការណ៍របស់ គ.ជ.ប ឱ្យដឹងថា គិតចាប់ពីថ្ងៃទី១២ ដល់ថ្ងៃទី៣០ ខែតុលា ពលរដ្ឋចុះឈ្មោះថ្មី មានចំនួនជាង ២សែន ៣ពាន់នាក់ (២០៣.៧១៩នាក់)។ ចំណែកអ្នក ដែល គ.ជ.ប នឹងលុបឈ្មោះចេញពីបញ្ជីបោះឆ្នោតសរុបជាង ១សែន ៧ពាន់ នាក់ (១០៧.៤៣០នាក់)។
ទីប្រឹក្សា និងជាអគ្គលេខធិការរង គ.ជ.ប លោក សោម សូរីដា បញ្ជាក់ថា ចំនួនអ្នកទៅចុះឈ្មោះបោះឆ្នោតថ្មីនៅមានតិចនៅឡើយ។ លោកថា ហេតុផលសំខាន់គឺកម្ពុជាកំពុងទប់ស្កាត់ការឆ្លងរាលដាលជំងឺកូវីដ-១៩៖ «បីកុំបីការពារនេះ គឺជាចំណុចសំខាន់ នៅក្នុងការកាពារជំងឺកូវីដ- ១៩ ហើយវាក៏ធ្វើឱ្យមានបញ្ហាពាក់ព័ន្ធនឹងកំណើនពលរដ្ឋមកចុះឈ្មោះបោះឆ្នោតផងដែរ។ ចំណុចមួយទៀតទាក់ទងនឹងពលរដ្ឋចំណាកស្រុកក្រៅប្រទេស ដែលពួកគាត់អាចមិនមានពេលមកចុះឈ្មោះ។ ចំណុចទី៣ ការពិនិត្យឈ្មោះ និងចុះឈ្មោះស្ថិតនៅក្នុងរដូវវស្សាមានភ្លៀងធ្លាក់ច្រើន ហើយកន្លែងខ្លះក៏ទទួលរងនូវទឹកជំនន់។ ការកត់សម្គាល់ទី៤ គឺការបោះឆ្នោតជាសិទ្ធិរបស់ពលរដ្ឋតាមមាត្រា ៣៤ នៃរដ្ឋធម្មនុញ្ញ គឺជាសិទ្ធិមិនត្រូវបានដាក់កំហិតទេ ពលរដ្ឋមានសិទ្ធិចូលរួម និងមិនចូលរួម»។
គ.ជ.ប បើកដំណើរការការពិនិត្យបញ្ជីឈ្មោះ និងការចុះឈ្មោះបោះឆ្នោតសម្រាប់ឆ្នាំ២០២១ នៅទូទាំងប្រទេស រយៈពេល ៥០ថ្ងៃ ដោយគ្រោងបិទបញ្ចប់នៅថ្ងៃទី ៣០ ខែវិច្ឆិកា។ ប្រជាពលរដ្ឋដែលគ្រប់អាយុបោះឆ្នោត អាចទៅពិនិត្យបញ្ជីឈ្មោះ និងចុះឈ្មោះបោះឆ្នោត នៅតាមឃុំ សង្កាត់ ជារៀងរាល់ថ្ងៃ រួមទាំងថ្ងៃ សៅរ៍ និងថ្ងៃអាទិត្យផង។
គ.ជ.ប ប៉ាន់ស្មានថា អ្នកចុះឈ្មោះបោះឆ្នោតថ្មីសម្រាប់ឆ្នាំ២០២១ មានចំនួនជាង ១លាន៦សែននាក់ (១.៦៣៥.៩៩០)។
កម្ពុជាត្រៀមរៀបចំបោះឆ្នោតឃុំសង្កាត់អាណត្តិទី៥ នៅថ្ងៃទី៥ ខែមិថុនា ឆ្នាំ២០២២ និងការបោះឆ្នោតជាតិជ្រើសតាំងតំណាងរាស្ត្រអាណត្តិទី៧ នៅខែកក្កដា ឆ្នាំ២០២៣។ សហគមន៍ជាតិ និងអន្តរជាតិ នៅតែបន្តជំរុញឱ្យកម្ពុជាបើកលំហសិទិ្ធពលរដ្ឋ និងសិទ្ធិនយោបាយឡើងវិញ កែប្រែច្បាប់នានា ពាក់ព័ន្ធនឹងការបោះឆ្នោត កែទម្រង់ និងធានាឯករាជ្យរបស់ស្ថាប័នជាតិរៀបចំការបោះឆ្នោតនេះឱ្យបាននៅមុនការបោះឆ្នោត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។