មន្ត្រី​សិទ្ធិ​មនុស្ស​យល់​ថា ការ​បន្ត​ពន្យារ​ពេល​ជំនុំជម្រះ​សំណុំរឿង​លោក កឹម សុខា ក្រោម​ហេតុផល​ទប់ស្កាត់​ជំងឺ​កូវីដ១៩ ជា​ហេតុផល​មិន​ទាន់​ពេញលេញ

ដោយ ខែ សុណង
2021-05-16
Share
មន្ត្រី​សិទ្ធិ​មនុស្ស​យល់​ថា ការ​បន្ត​ពន្យារ​ពេល​ជំនុំជម្រះ​សំណុំរឿង​លោក កឹម សុខា ក្រោម​ហេតុផល​ទប់ស្កាត់​ជំងឺ​កូវីដ១៩ ជា​ហេតុផល​មិន​ទាន់​ពេញលេញ លោក កឹម សុខា ប្រធាន​​គណបក្ស​​សង្គ្រោះជាតិ​។
រូប៖ គេ​ផ្ដល់​ឱ្យ

មន្ត្រី​សិទ្ធិ​មនុស្ស​យល់​ថា តុលាការ​បន្ត​ពន្យារ​ពេល​ជំនុំជម្រះ​សំណុំរឿង​លោក កឹម សុខា ក្រោម​ហេតុផល​ទប់ស្កាត់​ការ​ឆ្លង​រាលដាល​ជំងឺ​កូវីដ-១៩ គឺ​ជា​ហេតុផល​មិន​ទាន់​ពេញលេញ​នៅ​ឡើយ។

នាយករង​ទទួលបន្ទុក​ផ្នែក​ឃ្លាំមើល និង​ការពារ​សិទ្ធិមនុស្ស​នៃ​អង្គការ​លីកាដូ (LICADHO) លោក អំ សំអាត ថ្លែង​ថា សំណុំរឿង​លោក កឹម សុខា មេបក្ស​ប្រឆាំង​គឺ​ជា​សំណុំរឿង​ប្រវត្តិសាស្ត្រ​មួយ ដែល​ត្រូវ​បាន​តុលាការ​ចាប់​ខ្លួន និង​ចោទ​ប្រកាន់​ពី​បទ​ក្បត់​ជាតិ។

លោក​សង្កេត​ឃើញ​ថា បញ្ហា​នេះ គឺ​ជា​សំណុំរឿង​មួយ​ដែល​ទាញ​ការ​​ចាប់​​អារម្មណ៍​ពី​សហគមន៍​អន្តរជាតិ​ដែល​គេ​យល់​ថា មាន​ជាប់​ជំពាក់ជំពិន​ទៅ​នឹង​រឿង​នយោបាយ ច្រើន​ជាង​រឿងអនុវត្ត​ច្បាប់៖ «ការ​ពន្យារ​ពេល​យូរ​គឺ​វា​មិន​ជា​ការ​ល្អ​ទេ វា​អាច​ប៉ះពាល់​ទៅ​លើ​សិទ្ធិ​មួយ​ចំនួន ដូចជា ឯកឧត្ដម កឹម សុខា ក៏​តុលាការ​មាន​​ការ​ហាមឃាត់​សិទ្ធិ​មួយ​ចំនួន​ដែរ គួរ​ណាស់​តែ​មាន​ការ​ជំនុំជម្រះ​ឲ្យ​បាន​លឿន​ដែរ​តាម​ការ​គួរ​ដែល​អាច​រក​ពេល​វេលា​សមស្រប​ណា​មួយ ដើម្បី​ធ្វើការ​កាត់​ទៅ។ ទី២​ជា​ប្រវត្តិសាស្ត្រ​ខ្មែរ​ដែរ​ខ្ញុំ​ឃើញ​តាំង​ពី​ឆ្នាំ១៩៩៣ មក​ភាគច្រើន​អ្នក​នយោបាយ​ច្រើន​តែ​ដោះស្រាយ​គ្នា​តាម​បញ្ហា​រឿង​ទំនោរ​នយោបាយ នេះ​ជា​វប្បធម៌​មួយ​ល្អ​ដែរ។ យើង​សង្ឃឹម​ថា ​អ្នក​នយោបាយ​ទាំងអស់​អាច​ពង្រីក រក​ច្រក​ណា​មួយ​​ដើម្បី​សន្ទនា ឬ​ចរចា​គ្នា​ដើម្បី​ធ្វើការ​ចូលរួម​អភិវឌ្ឍន៍​ប្រទេស​ជាតិ ដោយ​គិត​ពី​ឧត្ដម​ប្រយោជន៍​ជាតិ និង​ឧត្ដម​ប្រយោជន៍​ប្រជាពលរដ្ឋ​ជា​ធំ»

Kem_Sokha_meet_usa_ambassador.jpg
លោក កឹម សុខា ប្រធានគណបក្សសង្គ្រោះជាតិជួបជាមួយឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជាលោក Patrick Murphy (ឆ្វេងជាប់លោកកឹមសុខា) កាលពីថ្ងៃទី២៨ ខែមករា ឆ្នាំ២០២១។

តុលាការ​ក្រុង​ភ្នំពេញបាន​​ផ្អាក​សវនាការសំណុំ​រឿង​លោក កឹម សុខា រយៈពេល​ជាង​មួយ​ឆ្នាំមក​ហើយ។ ក្រុម​មេធាវី​លោក កឹម សុខា បាន​ដាក់​ពាក្យ​ស្នើសុំ​ទៅ​សាលាដំបូង​រាជធានី​ភ្នំពេញ​ឲ្យ​បើក​ការ​ជំនុំជម្រះ​ជា​បន្ត​បន្ទាប់ ប៉ុន្តែ​តុលាការ​តែង​លើក​ហេតុផល​ទប់ស្កាត់​ការ​រីករាលដាល​ជំងឺ​កូវីដ-១៩។ តុលាការ​ក៏​​លើក​ហេតុផល​ដែរ​ថា សំណុំ​រឿងនេះ មិន​មែន​ជារឿងក្តី​អាទិភាព ព្រោះ​លោក កឹម សុខា កំពុង​ស្ថិត​នៅ​ក្រៅ​ឃុំ។

ការ​ដែល​តុលាការ​​ផ្អឹប​ទុក​សំណុំ​រឿង​នេះ គឺ​ស្រប​ទៅ​តាម​ការ​ចង់​បាន​របស់​លោកនាយករដ្ឋ​មន្ត្រី ហ៊ុន សែន ដែល​បាន​ថ្លែង​​ក្នុង​កិច្ច​ប្រជុំ​បិទ​ទ្វារ​គណៈរដ្ឋមន្ត្រី​កាល​ពី​ខែសីហា ​ឆ្នាំ២០២០ ថា លោក​ចង់​ឱ្យ​សំណុំ​រឿង​នេះ ដំណើរការ​នៅ​ក្រោយ​ការ​បោះឆ្នោត​ឆ្នាំ២០២២ និង​២០២៣ ខាងមុខ។

កាល​ពី​ដើម​ខែឧសភានេះ លោក កឹម សុខា អះអាង​​ថា លោក​ធ្វើអ្វីៗ​ដើម្បី​ខ្មែរ ទាំង​ការងារ​ការទូត ការ​ទាក់ទង​ជាមួយ​មេ​ដឹកនាំ​ខ្មែរ​នៅ​ក្នុង​ស្រុក និង​ការ​ចុះ​សួរ​សុខ​ទុក្ខ​ពលរដ្ឋ។ មេបក្ស​ប្រឆាំង​ដែល​ត្រូវ​របប​លោក ហ៊ុន សែន បិទ​សិទ្ធិ​ធ្វើ​នយោបាយ​រូប​នេះ មាន​ជំនឿ​ថា បើ​ខ្មែរ​មាន​ទុក្ខ ត្រូវ​តែ​ខ្មែរ​ជួយ​ខ្មែរ ហើយ​បើ​មាន​បញ្ហា​ក៏​ត្រូវ​តែ​មាន​ដំណោះស្រាយ​រវាង​ខ្មែរ និង​ខ្មែរ​ដែរ ទោះបី​ជាកន្លងទៅ​សហគមន៍​អន្តរជាតិ​ធ្លាប់​ជួយ​ដោះស្រាយ​យ៉ាង​ណា​ក៏​ដោយ។

ទោះបីជា​យ៉ាងណា អ្នក​នាំពាក្យ​បក្ស​កាន់​អំណាចលោក សុខ ឥសាន ធ្លាប់​បាន​ប្រាប់​អាស៊ីសេរី​នៅ​ពេល​ថ្មីៗ​នេះ​ថា គណបក្ស​ប្រជាជន​កម្ពុជា​មិន​អាច​​ជជែក​ជា​មួយ​​លោក កឹម សុខា បាន​ទេ ព្រោះ​លោក​កំពុង​ជាប់​ក្តីក្តាំ​នៅ​តុលាការ។ លោក សុខ ឥសាន បន្ថែម​ថា ទាល់​តែ​សំណុំ​រឿង​ដំណើរការ​ចប់​សព្វគ្រប់​សិន ទើប​អាច​និយាយ​គ្នា​បាន។

Kem_Sokha_meet_eu_ambassador_25_01_2021.jpg
លោក កឹម សុខា នៅក្នុងជំនួបមួយជាមួយលោកស្រី Carmen Moreno ឯកអគ្គរដ្ឋទូតសហភាពអឺរ៉ុបប្រចាំកម្ពុជា កាលពីថ្ងៃទី២៥ ខែមករា ឆ្នាំ២០២១។

តុលាការ​របប​លោក ហ៊ុន សែន បាន​ចោទ​ប្រកាន់​លោក កឹម សុខា ពី​បទ ​«សន្ទិដ្ឋិភាព ឬ​ការ​ត្រូវ​រ៉ូវគ្នា​ជាមួយ​បរទេស» ដើម្បី​ផ្តួល​រំលំ​រដ្ឋាភិបាល ខណៈ​លោកនាយករដ្ឋ​មន្ត្រី ហ៊ុន សែន បាន​ចោទ​មេ​បក្ស​ប្រឆាំង​រូប​នេះ​ពេញៗមាត់​ថា បានប្រព្រឹត្ត​អំពើ​ក្បត់​ជាតិ។ ក៏​ប៉ុន្តែ​រយៈពេល​ជាង ៣ ឆ្នាំ មក​នេះ ទាំង​លោក ហ៊ុន សែន និង​តុលាការ​របស់​លោក មិន​បាន​បង្ហាញ​ភស្តុតាង​រឹងមាំ​ដែល​គាំទ្រ​ដល់​ការ​ចោទ​ប្រកាន់​លោក កឹម សុខា នោះឡើយ។ អាជ្ញាធរ​ប្រើ​តែ​វីដេអូ​ឃ្លីប​មួយ ដែល​លោក កឹម សុខា បាន​ថ្លែង​អំពី​ការ​តស៊ូ​របស់​លោក​ដើម្បី​លទ្ធិ​ប្រជាធិបតេយ្យ​នៅ​កម្ពុជា ដើម្បី​ដាក់​បន្ទុក​លោក​តែ​ប៉ុណ្ណោះ។

ក្រុម​ប្រទេស​ប្រជាធិបតេយ្យ អង្គការ​សង្គម​ស៊ីវិល​ជាតិនិង​អន្តរជាតិ​ ព្រមទាំង​ទីភ្នាក់ងារ​អង្គការ​សហប្រជាជាតិផ្នែក​សិទ្ធិមនុស្ស នៅ​តែទទួល​ស្គាល់ថា ​លោក កឹម សុខា ជា​មនុស្ស​ស្អាតស្អំ និង​រងការ​ចោទប្រកាន់​ដោយ​អយុត្តិធម៌។ ពួកគេ​ស្នើ​យ៉ាង​ទទូច​ដល់​របប​លោក ហ៊ុន សែន ទម្លាក់​ចោល​បទ​ចោទប្រកាន់ និង​ផ្តល់​សេរីភាព​ពេញលេញ​ដល់​លោក កឹម សុខា ដើម្បី​ឱ្យ​លោក​អាច​ចាប់ផ្តើម​ជីវិត​នយោបាយ​បាន​ឡើងវិញ​ដូច​ដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល