អ្នក​ឃ្លាំមើល​ថា ការ​តែងតាំង​ទីប្រឹក្សា​របស់​លោក ហ៊ុន សែន ច្រើន​ស្អេកស្កះ ធ្វើ​ឱ្យ​ខ្ជះខ្ជាយ​ថវិកា​ជាតិ និង​បង្កើត​ឱ្យ​មាន​អំពើ​ពុករលួយ

ដោយ សុ ជីវី
2024.05.02
អ្នក​ឃ្លាំមើល​ថា ការ​តែងតាំង​ទីប្រឹក្សា​របស់​លោក ហ៊ុន សែន ច្រើន​ស្អេកស្កះ ធ្វើ​ឱ្យ​ខ្ជះខ្ជាយ​ថវិកា​ជាតិ និង​បង្កើត​ឱ្យ​មាន​អំពើ​ពុករលួយ លោក ហ៊ុន សែន ប្រធានព្រឹទ្ធសភា ចូលរួមទស្សនាការប្រកួតបាល់ទាត់សប្បុរសធម៌ កាលពីថ្ងៃទី១ ឧសភា ២០២៤។
រូប៖ ហ្វេសប៊ុកលោក ហ៊ុន សែន

អ្នក​ឃ្លាំ​មើល លើកឡើង​ថា ការ​តែងតាំង​ទីប្រឹក្សា​ប្រធាន​ព្រឹទ្ធសភា លោក ហ៊ុន សែន ច្រើន​ស្អេកស្កះ​នា​ពេល​នេះ ពុំ​បាន​ជួយ​ឱ្យ​សេដ្ឋកិច្ច​ជាតិ និង​បញ្ហា​ក្នុង​សង្គម​ល្អ​ប្រសើរ​នោះ​ទេ។ ផ្ទុយ​ទៅ​វិញ ពួកគាត់​ថា ការ​តែងតាំង​នេះ ធ្វើ​ឱ្យ​ខ្ជះខ្ជាយ​ថវិកា​ជាតិ និង​អាច​បង្កើត​ទៅជា​អំពើ​ពុករលួយ ដោយសារ​បុគ្គល​ខ្លះ​យក​តួនាទី ទៅ​ប្រើ​ដើម្បី​ប្រយោជន៍​ផ្ទាល់​ខ្លួន។

ក្រោយ​ពី​បាន​ឡើង​កាន់​តំណែង​ជា​ប្រធាន​ព្រឹទ្ធសភា​មក លោក ហ៊ុន សែន នៅតែ​បន្ត​តែងតាំង​ទីប្រឹក្សា​ឱ្យ​ហែហម​លោក ឥត​ឈប់ឈរ ដែល​សឹង​តែ​ធ្វើ​ឱ្យ​តួនាទី​មួយ​នេះ កើត​ជា​វិបត្តិ​អតិផរណា​ទីប្រឹក្សា ឬ​វិបត្តិ​ទីប្រឹក្សា​ច្រើន​ហួសហេតុ ដោយ​មិន​ចាញ់​កូន​ប្រុស​របស់​លោក គឺ​នាយក​រដ្ឋមន្ត្រី ហ៊ុន ម៉ាណែត នោះ​ឡើយ។

ប្រធាន​ប្រតិបត្តិ​របស់​គណបក្ស​សង្គ្រោះ​ជាតិ នៅ​រាជធានី​ភ្នំពេញ លោក ម៉ន ផល្លា ប្រាប់​វិទ្យុ​អាស៊ី​សេរី នៅ​ថ្ងៃ​ទី២ ឧសភា ថា លោក​មើល​មិន​ឃើញ​ពី​ភាព​សំខាន់​របស់​ទីប្រឹក្សា​ដ៏​ច្រើន​លើសលប់​នេះ​ទេ ក្រៅ​តែ​ពី​ការ​បង្ហិន​ថវិកា​ជាតិ ខណៈ​ប្រទេស​អភិវឌ្ឍ​មួយ​ចំនួន​ហាក់​គ្មាន​ការ​តែងតាំង​ទីប្រឹក្សា​ហូរហែ​ដូច​កម្ពុជា​ឡើយ។

លោក ម៉ន ផល្លា៖ «មិន​ត្រឹម​តែ​ជា​ការ​ខ្ជះខ្ជាយ​ថវិកា​ជាតិ​ប៉ុណ្ណោះ​ទេ មនុស្ស​មួយ​ចំនួន​ដែល​មាន​មុខងារ​ដែល​មាន​តួនាទី​ឋានៈ​ស្មើ​រដ្ឋលេខាធិការ ស្មើ​អនុ​រដ្ឋលេខាធិការ ស្មើ​រដ្ឋ​មន្រ្ដី​អី​ទាំងអស់​ហ្នឹង តែងតែ​យក​តួនាទី​នេះ​ទៅ​ធ្វើ​បាប​ប្រជាពលរដ្ឋ​តាម​រយៈ​ការ​គំរាមកំហែង បំភិត​បំភ័យ ឬ​ក៏​ប្លន់​ដី​ធ្លី​ប្រជាពលរដ្ឋ​ទៅ​វិញ​នោះ​ទេ មិន​បាន​ប្រើ​នូវ​តួនាទី​នោះ​ក្នុង​ក្របខ័ណ្ឌ​បម្រើ​ឱ្យ​ជាតិ​ពិត​ប្រាកដ​ទេ»

ការ​រិះគន់​នេះ​ធ្វើឡើង គឺ​បន្ទាប់​ពី​បុគ្គល ២០រូប​បន្ថែម​ទៀត ត្រូវ​បាន​តែងតាំង​ធ្វើជា​ទីប្រឹក្សា​របស់​ប្រធាន​ព្រឹទ្ធសភា លោក ហ៊ុន សែន។ ក្នុង​នោះ បុគ្គល​ដែល​តែងតាំង​មាន​ឋានៈ​ស្មើ រដ្ឋលេខាធិការ​ចំនួន ៧រូប អនុរដ្ឋលេខាធិការ ៤រូប មិន​មាន​ឋានៈ​ស្មើ និង​ពុំ​ទទួល​ប្រាក់​បំណាច់​មុខងារ តែ​ត្រូវ​បាន​ហៅ​ឋានៈ​ជា ឯកឧត្ដម លោក​ជំទាវ​ចំនួន ៨រូប និង​ម្នាក់​ទៀត​ត្រូវ​បាន​ហៅ​ឋានៈ​ជា លោកជំទាវ ដោយ​ធ្វើ​ជា​ទីប្រឹក្សា​របស់​លោក អ៊ុច បូររិទ្ធ អនុ​ប្រធាន​ទី២ ព្រឹទ្ធសភា។

យ៉ាងណា​ក៏​ដោយ​ចុះ ការ​តែងតាំង​ក្រុម​ឈ្មួញ​អ្នក​រកស៊ី និង​ក្រុម​មន្ត្រី ដែល​ស្និទ្ធ​នឹង​គ្រួសារ​របស់​លោក ហ៊ុន សែន ឱ្យ​មាន​តួនាទី​ជា​ទីប្រឹក្សា នេះ បាន​ក្លាយ​ជា​ទម្លាប់​ដ៏​សាមញ្ញ​ទៅ​ហើយ​របស់​រដ្ឋាភិបាល ដែល​ដឹកនាំ​ដោយ​ពីរ​នាក់​ឪពុក និង​កូន​ត្រកូល​ហ៊ុន នេះ។ ប៉ុន្តែ មនុស្ស​មួយ​ចំនួន ដែល​ត្រូវ​បាន​តែងតាំង​ទាំងនោះ មិន​មែន​ជា​អ្នក​មាន​សមត្ថភាព ឬ​មាន​ស្នាដៃ​ជួយ​ជាតិ​នោះ​ទេ ដោយ​ពួកគេ​មួយ​ចំនួន គឺជា​អ្នក​វិនិយោគ​ទុច្ចរិត ដែល​រកស៊ី​បំផ្លាញ​ធនធាន​ធម្មជាតិ និង​មិន​លើកលែង​សូម្បី​ឧក្រិដ្ឋជន។

ជា​ឧទាហរណ៍ មេ​ឈ្មួញ​រកស៊ី​កាប់​បំផ្លាញ​ព្រៃឈើ​លោក ទ្រី ភាព និង​ឧក្រិដ្ឋជន​ចិន​ម្នាក់ ដែល​ជាប់​ឈ្មោះ​ថា ជា​អ្នក​រកស៊ី​បនល្បែង​អនឡាញ​ឆ្លងដែន​ខុស​ច្បាប់ គឺ​លោក ចេន ហ្ស៊ី (Chen Zhi) សុទ្ធ​តែ​ជា​ទីប្រឹក្សា​របស់​លោក ហ៊ុន សែន។ មិន​ខុស​គ្នា​នោះ​ទេ ទណ្ឌិត ដែល​ជា​អតីត​អគ្គសេនាធិការ​រង នៃ​កងរាជអាវុធហត្ថ​ផ្ទៃ​ប្រទេស លោកស្រី ជា រដ្ឋា ដែល​ត្រូវ​សាលាឧទ្ធរណ៍​កាត់​ទោស ឱ្យ​ជាប់​ពន្ធនាគារ​ចន្លោះ​ពី ១៥ឆ្នាំ ទៅ​ដល់ ១៨ឆ្នាំ ពាក់ព័ន្ធ​ករណី​វាយប្រហារ​ទឹក​អាស៊ីដ​ក្នុង​រឿង​វិវាទ​ស្នេហា ដែល​ប្រព្រឹត្ត​កាល​ពី​ខែ​ឧសភា ឆ្នាំ២០០៨ កន្លង​ទៅ ត្រូវ​លោក ហ៊ុន សែន តែងតាំង​ជា​ទីប្រឹក្សា​ផ្ទាល់​របស់​លោក​ដូច​គ្នា។

វិទ្យុ​អាស៊ី​សេរី មិន​អាច​ទាក់ទង​ប្រធាន​អង្គភាព​អ្នក​នាំ​ពាក្យ លោក ប៉ែន បូណា និង​អ្នក​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន ដើម្បី​សុំ​ការ​បកស្រាយ​បាន​ទេ នៅ​ថ្ងៃ​ទី​២ ខែ​ឧសភា។

ទាក់ទិន​រឿង​នេះ អ្នក​ប្រឹក្សា​យោបល់​ផ្នែក​អភិវឌ្ឍន៍​ផ្នត់​គំនិត និង​ការ​ស្រាវជ្រាវ លោក សេក សុជាតិ យល់​ឃើញ​ថា គឺជា​រឿង​ធម្មតា​ទៅ​ហើយ ដែល​រដ្ឋាភិបាល ដឹកនាំ​ដោយ​គណបក្ស​ប្រជាជន​កម្ពុជា បង្កើន​ចំនួន​កៅអី សម្រាប់​ចែក​ឱ្យ​សមាជិក ឬ​អ្នក​ដែល​ស្មោះស្ម័គ្រ​ជាមួយ​បក្ស​កាន់​អំណាច។

លោក ប៉ែន បូណា៖ «ខ្ញុំ​នៅតែ​យល់​ថា​ការ​តែងតាំង​ទីប្រឹក្សា​នេះ ភាគច្រើន​គឺ​ជា​ការ​ខាតបង់ គឺ​ការ​ចំណាយ​ប្រាក់​ខុស​គោលដៅ ទីប្រឹក្សា​ច្រើន​ពេក​តែ​ទីប្រឹក្សា​មួយ​ចំនួន​មិន​មាន​សមត្ថភាព​គ្រប់គ្រាន់​អី​អ៊ីចឹង គ្រាន់តែ​តែងតាំង​ដើម្បី​បាន​តួនាទី និង​ផលប្រយោជន៍​មួយ​ចំនួន​សម្រាប់​តែ​ពួកគាត់»

កាល​ពី​ថ្ងៃ​ទី៤ ខែ​មេសា ព្រះមហាក្សត្រ បាន​ចេញ​ព្រះរាជក្រឹត្យ​តែងតាំង​ទីប្រឹក្សា សម្រាប់​ប្រធាន​ព្រឹទ្ធសភា ដែល​ទើប​ឡើង​កាន់​តំណែង​ចំនួន ៧៣នាក់ តាម​ការ​ស្នើ​របស់​លោក ហ៊ុន សែន។

អ្នកឃ្លាំមើល និង​មន្ត្រី​សង្គម​ស៊ីវិល បារម្ភ​ថា ការ​តែងតាំង​ទីប្រឹក្សា​ថ្នាក់​ដឹកនាំ​ធំៗ ច្រើន​ស្អេកស្កះ​បែប​នេះ គឺជា​ការ​បង្ហិន​ថវិកា​ជាតិ និង​អាច​ធ្វើឱ្យ​សង្គម​កាន់​តែ​ប្រឈម​នឹង​បញ្ហា​អំពើ​ពុករលួយ ដោយសារ​បុគ្គល​ខ្លះ យក​តួនាទី ទៅ​ប្រើ​ដើម្បី​ផល​ប្រយោជន៍​ផ្ទាល់​ខ្លួន។ ពួកគាត់​ថា ថ្នាក់​ដឹកនាំ គួរ​ចម្រាញ់​យក​មនុស្ស​ដែល​មាន​សមត្ថភាព​ពិតប្រាកដ និង​គិត​ប្រយោជន៍​ជាតិ​ជា​ធំ​មក​ធ្វើជា​ទីប្រឹក្សា ទើប​មាន​ប្រយោជន៍​ដល់​សង្គម​ជាតិ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។