អ្នកវិភាគ​ចង់​ឃើញ​អ្នក​នយោបាយ​ខ្មែរ​យក​គំរូ​តាម​កម្លាំង​សាមគ្គី​របស់​កីឡាករ​អុំទូក

ដោយ សេក បណ្ឌិត
2023.11.28
អ្នកវិភាគ​ចង់​ឃើញ​អ្នក​នយោបាយ​ខ្មែរ​យក​គំរូ​តាម​កម្លាំង​សាមគ្គី​របស់​កីឡាករ​អុំទូក (ឆ្វេ) លោក បណ្ឌិត ឡៅ ម៉ុងហៃ និង​លោក គឹម សុខ ជាអ្នក​វិភាគ​នយោបាយ។
រូប៖ RFA

អ្នកវិភាគ​ជំរុញ​ទៅ​អ្នក​នយោបាយ ជា​ពិសេស គណបក្ស​កាន់​អំណាច​គួរ​យក​គំរូ និង​អត្ថន័យ​នៃ​ព្រះរាជ​ពិធី​បុណ្យ​អុំទូក សម្រាប់​ដឹកនាំ​ប្រទេស និង​រៀបចំ​ការ​ប្រកួត​ប្រជែង​ដណ្ដើម​អំណាច​ដោយ​យុត្តិធម៌។ ទោះ​ជា​យ៉ាង​ណា​ក្ដី មន្ត្រី​បក្ស​កាន់​អំណាច ឆ្លើយតប​ថា គណបក្ស​កាន់​អំណាច​មាន​របៀប​ដឹកនាំ​ប្រទេស​របស់​ខ្លួន​រួច​ហើយ និង​អួតអាង​ថា ប្រទេស​កម្ពុជា អាច​រៀបចំ​ព្រះរាជ​ពិធីបុណ្យ​អុំទូក បាន​នៅ​ពេល​នេះ ព្រោះ​ប្រទេស​មាន​សុខ​សន្តិភាព។

អ្នក​វិភាគ​នយោបាយ ថ្លែង​ថា ព្រះរាជ​ពិធី​បុណ្យ​អុំ​ទូក ដែល​ពលរដ្ឋ​ខ្មែរ​កំពុង​អបអរ​នៅ​ពេល​នេះ បាន​បង្កប់​គំរូ​ល្អ​សំខាន់​ពីរ​យ៉ាង​ដល់​អ្នក​នយោបាយ ដែល​គួរ​អនុវត្ត​តាម​គឺ សាមគ្គី​ជា​កម្លាំង មាន​សាមគ្គី ទើប​មាន​ជ័យជម្នះ និង​ចំណុច​សំខាន់​មួយ​ទៀត​គឺ ការ​ប្រកួត​ដោយ​យុត្តិធម៌ ហើយ​ចប់​ការ​ប្រកួត​អ្នក​ឈ្នះ និង​អ្នក​ចាញ់ នៅតែ​រាប់អាន​គ្នា និង​មិន​យក​គ្នា​ធ្វើ​ជា​សត្រូវ។

អ្នក​វិភាគ​នយោបាយ លោក បណ្ឌិត ឡៅ ម៉ុងហៃ លើក​ឡើង​ថា អ្នក​ប្រណាំង​ទូក ប្រឹងប្រែង​ប្រកួត​ប្រជែង ដើម្បី​ទទួល​ជ័យជំនះ ចំណែក​អ្នក​នយោបាយ ក៏​ប្រឹង​ប្រើ​គំនិត និង​យុទ្ធសាស្ត្រ យក​មក​ប្រកួត​ប្រជែង ដើម្បី​ឈ្នះ​ការ​បោះ​ឆ្នោត​ដឹកនាំ​ប្រទេស​ដែរ។ លោក​បន្ត​ថា ការ​ប្រកួត​ប្រជែង​របស់​អ្នក​នយោបាយ ហាក់​មិន​បាន​ធ្វើ​ឡើង​ដោយ​យុត្តិធម៌ ដូច​ការ​ប្រណាំង​ទូក​នោះ​ឡើយ។ អ្នក​វិភាគ​នយោបាយ ជើង​ចាស់​រូប​នេះ ជំរុញ​អ្នក​នយោបាយ ជាពិសេស គណបក្ស​កាន់​អំណាច​គួរ​រៀបចំ​ការ​បោះ​ឆ្នោត​ដោយ រក្សា​គុណ​តម្លៃ​យុត្តិធម៌។

បណ្ឌិត ឡៅ ម៉ុងហៃ៖ «ទូក​គេ​ប្រណាំង​ហ្នឹង​ប្រណាំង​គឺ ដោយ​យុត្តិធម៌។ មាន​ន័យ​ថា ទៅ​តាម​កម្លាំង​ទៅ​តាម​ការ​រៀបចំ​របស់​គេ ទូក​មួយៗ ហ្នឹង សូម្បី​គូ​ប្រកួត​ប្រជែង​ពីរ ទូក​ពីរ ក៏​គេ​អត់​ឱ្យ​ប៉ះទង្គិច​គ្នា ឬ​មួយ​ទៅ​ខាខាំង​មួយ​ទៀត​ទេ»

ស្រដៀង​គ្នា​នេះ​ដែរ អ្នក​វិភាគ​នយោបាយ​មួយ​រូប​ទៀត លោក គឹម សុខ លើក​ឡើង​ថា ព្រះរាជ​ពិធី​បុណ្យ​អុំទូក មាន​តម្លៃ​មហាសាល ដែល​បង្ហាញ​អំពី​គំរូ​សាមគ្គី និង​ការ​ប្រកួត​ប្រកប​ដោយ​យុត្តិធម៌​នៃ​កីឡា​ប្រពៃណី​នេះ។ លោក​បន្ត​ថា ប្រសិនបើ​អ្នក​នយោបាយ យក​គុណ​តម្លៃ​នៃ​ពិធីបុណ្យ​អុំទូក​ធ្វើ​ជា​គំរូ​អនុវត្តន៍ នឹង​ធ្វើ​ឱ្យ​ប្រទេស​កម្ពុជា មាន​ការ​រីក​ចម្រើន​រុងរឿង។ ទោះ​យ៉ាង​ណា​ក្ដី លោក គឹម សុខា សោកស្ដាយ ព្រោះ​លោក​ថា គណបក្ស​កាន់​អំណាច​មិន​បាន​យក​ពិធី​បុណ្យ​នេះ​ធ្វើ​ជា​គំរូ ដើម្បី​រៀបចំ​ការ​ប្រកួតប្រជែង​ដោយ​យុត្តិធម៌​នោះ​ទេ ប៉ុន្តែ​គណបក្ស​នេះ គ្រាន់តែ​យក​ពិធី​បុណ្យ​ប្រពៃណី​មួយ​នេះ ដើម្បី​កេង​ចំណេញ​នយោបាយ​ទៅ​វិញ។

លោក គឹម សុខ៖ «ដោយ​មាន​រូបភាព​បង្រួបបង្រួម​ផ្សះផ្សា​គ្នា​ប្រកួត​គ្នា​ដោយ​យុត្តិធម៌ ទើប​ថ្លៃថ្នូរ​ទៅ​កើត។ ប៉ុន្តែ និយាយ​ដដែលៗ ថា សោកស្ដាយ​ណាស់ ដែល​គណបក្ស​ប្រជាជន​កម្ពុជា និង​ពួក​អ្នក​មាន​អំណាច បែរ​ជា​យក​ពិធី​ហ្នឹង គ្រាន់តែ​ជា ដើម្បី​មុខមាត់​ស្លៀកពាក់​បង្ហាញ​ប្រជាពលរដ្ឋ ហើយ​យក​ទៅ​ថត​ដាក់​ខ្សែ​វីដេអូ​របស់​ពួក​គេ ផ្សាយ​បំភ័ន្ត​មហាជន»

ពលរដ្ឋ​កម្ពុជា កំពុង​អបអរ​ព្រះរាជ​ពិធី​បុណ្យ​អុំទូក បណ្ដែតប្រទីប សំពះព្រះខែ និង​អកអំបុក ដែល​ប្រារព្ធ​នៅ​រាជធានី​ភ្នំពេញ មាន​រយៈ​ពេល​បី​ថ្ងៃ ចាប់​ពី​ថ្ងៃ​ទី២៦ ដល់​ថ្ងៃ​ទី២៨ ខែវិច្ឆិកា។ ពិធី​នេះ ជា​ទំនៀមទម្លាប់​របស់​ខ្មែរ ដែល​ជា​មរតក​វប្បធម៌​ដូនតា​បាន​បន្សល់​ទុក​តាំង​ពី​សម័យ​បុរាណ​យូរលង់​ណាស់​មក​ហើយ។ សព្វថ្ងៃ ពិធី​បុណ្យ​នេះ ត្រូវ​បាន​ពលរដ្ឋ​ប្រតិបត្តិ​បន្ត​រាល់​ឆ្នាំ និង​ចាត់​ទុក​ថា ជា​បុណ្យ​ប្រពៃណី​វប្បធម៌​ជាតិ​ដ៏​ធំ​មួយ ក្នុង​ចំណោម​ពិធី​បុណ្យ​សំខាន់ៗ ជា​ច្រើន​ទៀត។

ទាក់ទង​ការ​លើក​ឡើង​របស់​អ្នកវិភាគ​នៅ​ពេល​នេះ អ្នក​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន បកស្រាយ​ដដែលៗ ថា ការ​បោះ​ឆ្នោត​កន្លង​ទៅ​នេះ ធ្វើ​ឡើង​ដោយ​ត្រឹមត្រូវ​សេរី និង​យុត្តិធម៌។ លោក​អះអាង​ទៀត​ថា គណបក្ស​របស់​លោក មិន​បាន​យក​ពិធីបុណ្យ​នេះ ធ្វើ​ជា​គំរូ​នោះ​ទេ ដោយ​លោក​ថ្លែង​អួតអាង​ថា រដ្ឋាភិបាល អាច​រៀបចំ​ព្រះរាជ​ពិធី​នេះ​បាន ព្រោះ​តែ​ប្រទេស​កម្ពុជា មាន​សន្តិសុខ​ពេញលេញ។

លោក សុខ ឥសាន៖ «មហាជន​ប្រជាជន​កម្ពុជា​ភាគ​ច្រើន​លើសលប់ ជាង ៨០ភាគ​រយ​ជាង គេ​រួបរួម​សាមគ្គី​គ្នា មាន​តែ​ក្រុម​ប្រឆាំង​ជ្រុល​និយម​មួយ​ចំនួន​តូច​ទេ​តើ ដែល​មិន​រួបរួម ហើយ​ចេះ​ឱ្យ​គំរូ​នេះ​គំរូ​នោះ។ ឥឡូវ​នេះ បើ​គាត់​ថា អុំទូក​ជា​គំរូ​ល្អ ឱ្យ​គាត់​យក​គំរូ​ហ្នឹង​ទៅ»

ជុំវិញ​រឿង​នេះ​ដែរ ទីប្រឹក្សា​គណបក្ស​កម្លាំង​ជាតិ លោក រ៉ុង ឈុន រិះគន់​ថា ប្រទេស​កម្ពុជា ថ្វីបើ​មើល​តែ​សំបក​ក្រៅ​មាន​សន្តិភាព​ក្ដី តែ​សន្តិភាព​នេះ មាន​តែ​សម្រាប់​ក្រុម​មនុស្ស​មួយ​ចំនួន​តូច​ប៉ុណ្ណោះ។ លោក​បន្ត​ថា សន្តិភាព ដែល​ពលរដ្ឋ​ទូទៅ​ចង់​បាន​គឺ សន្តិភាព​ផ្លូវ​ចិត្ត សន្តិភាព​ផ្លូវកាយ និង​យុត្តិធម៌​សង្គម។

លោក រ៉ុង ឈុន៖ «បើ​យើង​មិន​ទិដ្ឋភាព​រូបភាព​ខាង​ក្រៅ​ហាក់​បី​ដូចជា​សន្តិភាព តែ​បើ​យើង​ពិនិត្យ​មើល​ផ្លូវ​ចិត្ត និង​រាងកាយ​ប្រជាពលរដ្ឋ មិន​ទាន់​មាន​សន្តិភាព​ពេញលេញ​ទេ ហើយ​មួយ​ទៀត ទាក់ទង​យុត្តិធម៌​សង្គម​ដែរ សន្តិភាព​ទាល់តែ​មាន​យុត្តិធម៌​សង្គម មាន​ធាតុផ្សំ​ច្រើន​ណាស់ ពាក្យ​ថា សន្តិភាព​ហ្នឹង​បាទ»

គណបក្ស​ប្រជាជន​បាន​រៀបចំ​ការ​បោះ​ឆ្នោត​ពីរ​អាណត្តិ​ជាប់​គ្នា ដោយ​រារាំង​មិន​ឱ្យ​គណបក្ស​ប្រឆាំង​ចូលរួម​ប្រកួត​ប្រជែង គឺ​ការ​រំលាយ​គណបក្ស​សង្គ្រោះ​ជាតិ​មុន​ការ​បោះ​ឆ្នោត ឆ្នាំ២០១៨ និង​ការ​ហាមឃាត់​គណបក្ស​ភ្លើង​ទៀន មិន​ឱ្យ​ចូលរួម​ការ​បោះ​ឆ្នោត កាល​ពី​ថ្ងៃ​ទី២៣ ខែកក្កដា កន្លង​ទៅ។ សព្វថ្ងៃ​រដ្ឋាភិបាល​ដឹកនាំ​ដោយ​បក្ស​ឈ្នះ​ឆ្នោត ដោយ​គ្មាន​បក្ស​ប្រឆាំង​ចូលរួម​នេះ កំពុង​ជាប់​ទណ្ឌកម្ម និង​ការ​រិះគន់​ពី​ក្រុម​ប្រទេស​លោក​សេរី៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។