សាច់ញាតិអះអាងថា មន្ត្រីគណបក្សប្រឆាំងនៅក្រុងប៉ោយប៉ែត គឺលោក ចៅ វាសនា ធ្លាក់ខ្លួនឈឺនៅក្នុងពន្ធនាគារខេត្តបន្ទាយមានជ័យ ប៉ុន្តែមន្ត្រីពន្ធនាគារមិនអនុញ្ញាតឱ្យលោកទៅព្យាបាលជំងឺនៅខាងក្រៅពន្ធនាគារឡើយ។ មន្ត្រីសង្គមស៊ីវិលចាត់ទុករឿងនេះថា ជាការអនុវត្តច្បាប់ស្តង់ដារពីរ និងជាការរំលោភសិទ្ធិជនជាប់ឃុំ។
សាច់ញាតិលោកចៅវាសនា ព្រួយបារម្ភពីសុខភាព របស់មន្ត្រីបក្សប្រឆាំងរូបនេះ ដែលមានវ័យកាន់តែចាស់ កំពុងធ្លាក់ខ្លួនឈឺ ក្នុងពន្ធនាគារ អាចនឹងគ្រោះថ្នាក់ដល់អាយុជីវិត ប្រសិនបើមិនបញ្ជូនគាត់ទៅព្យាបាលនៅមន្ទីរពេទ្យខាងក្រៅពន្ធនាគារទាន់ពេល។
ចៅសង្កាត់រងទី២ នៃសង្កាត់ប៉ោយប៉ែត ដែលត្រូវជា កូនបង្កើតលោក ចៅ វាសនា គឺអ្នកស្រី ចៅ រតនៈ ប្រាប់វិទ្យុអាស៊ីសេរី នៅថ្ងៃទី២៣ តុលាថា ឪពុកអ្នកស្រី មានជំងឺទល់លាមក ជាច្រើនថ្ងៃមកហើយ ពិបាកទទួលទានអាហារ និងគេងមិនលក់។ អ្នកស្រីបន្ថែមថា លោក ចៅ វាសនា សាច់ញាតិ និងអង្គការសង្គមស៊ីវិល បានស្នើសុំមន្ត្រីពន្ធនាគារជាច្រើនដងមកហើយ ដើម្បីឱ្យឪពុកអ្នកស្រី មកព្យាបាលនៅមន្ទីរពេទ្យខាងក្រៅ ក៏ប៉ុន្តែមន្ត្រីពន្ធនាគារបដិសេធ។ អ្នកស្រីបារម្ភអំពីសុខភាពឪពុក ប្រសិនបើនៅតែពន្យារពេល ស្ថានភាពជំងឺនឹងវិវត្តកាន់តែធ្ងន់ មិនអាចព្យាបាលបានឡើយ។
អ្នកស្រី ចៅ រតនៈ៖ «គឺគាត់ប្រឈមនឹងជំងឺច្រើន ប៉ះពាល់ដល់សុខភាពគាត់។ អីចឹង ឧទាហរណ៍ថា មានការអីចាំបាច់ភ្លាមៗ ខ្ញុំមិនប្រាកដថា មន្ត្រីពន្ធនាគារនឹងអាចទទួលខុសត្រូវលើសុខភាពរបស់គាត់ទេ។ ដោយសារតែមិនពន្លឿនការព្យាបាលឱ្យគាត់ភ្លាមៗ»។
ប្រធានប្រតិបត្តិគណបក្សភ្លើងទៀនក្រុងប៉ោយប៉ែត លោក ចៅ វាសនា មានដើមកំណើតខ្មែរក្រោម ត្រូវបានអាជ្ញាធរខេត្តបន្ទាយមានជ័យចាប់បញ្ជូនទៅឃុំខ្លួនក្នុងពន្ធនាគារខេត្តនេះ កាលពីថ្ងៃទី២៥ ខែកក្កដាកន្លងទៅ។
តុលាការបានចោទប្រកាន់លោក ចៅ វាសនា ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងញុះញង់ឱ្យមានការរើសអើង ពាក់ព័ន្ធនឹងរឿងចូលរួមធ្វើយុទ្ធនាការអំពាវនាវឱ្យពលរដ្ឋគូសខ្វែងសន្លឹកឆ្នោត តាមបណ្ដាញសង្គមតេឡេក្រាម (Telegram) ក្នុងពេលបោះឆ្នោតជាតិ កាលពីខែកក្កដា ឆ្នាំ២០២៣។ ប៉ុន្តែ លោក ចៅ វាសនា បានច្រាលចោលការចោទប្រកាន់នេះ។
លោក ចៅ វាសនា ធ្លាប់ត្រូវបានតុលាការខេត្តបន្ទាយមានជ័យកាត់ទោសជាប់ពន្ធនាគារម្ដងរួចមកហើយ អំពីបទញុះញង់ និងបានចេញពីពន្ធនាគារវិញ កាលពីដើមឆ្នាំ២០២២ បន្ទាប់ពីលោកបានអនុវត្តទោសគ្រប់ចំនួនរយៈពេល ៥ឆ្នាំពេញនៅក្នុងពន្ធនាគារ។
វិទ្យុអាស៊ីសេរីមិនទាន់អាចទាក់ទង ប្រធានពន្ធនាគារខេត្តបន្ទាយមានជ័យ លោក អ៊ុង ស៊ីផាន ដើម្បីសុំការឆ្លើយតប ជុំវិញការស្នើសុំនេះ បាននៅឡើយទេ នៅថ្ងៃទី២៣ តុលា។
ក៏ប៉ុន្តែលោកស្រី ចៅ រតនៈ អះអាងថា មន្ត្រីពន្ធនាគារ បានលើកហេតុផលថា មូលហេតុដែលមិនអនុញ្ញាត ដោយសារលោក ចៅ វាសនា មានសុខភាពល្អអាចដើរបាន។ លោកស្រីចាត់ទុកទង្វើនេះ ជាការរើសអើងនយោបាយ។
ជុំវិញរឿងនេះ មន្ត្រីនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា យល់ថា មន្ត្រីពន្ធនាគារធ្វើបែបនេះ នឹងធ្វើឱ្យសាធារណៈជនបន្តរិះគន់ថា ជាការអនុវត្តច្បាប់ស្តង់ដារពីរ។ លោកសង្កេតឃើញថា កាលពីពេលកន្លងទៅ ក្រុមឧក្រិដ្ឋជន និងអ្នកមានលុយមានអំណាច ត្រូវបានមន្ត្រីពន្ធនាគារអនុញ្ញាតឱ្យទៅព្យាបាលជំងឺនៅមន្ទីរពេទ្យក្រៅពន្ធនាគារ ដោយងាយស្រួល។
លោក ស៊ឹង សែនករុណា៖ «ជាចំណុចមួយ ត្រូវមានការចកចិត្តទុកដាក់ ពីព្រោះពួកគាត់បាត់បង់តែសេរីភាពទេ មិនអាចដើរហើរបាន ប៉ុន្តែបញ្ហាសុខភាពរបស់គាត់នៅក្នុងពន្ធនាគារហ្នឹង ជាការទទួលខុសត្រូវមន្ត្រីពន្ធនាគារនឹងហើយ។ អីចឹង បើសិនជាការលើកឡើងអ៊ីចឹងហើយ ស្រាប់តែថ្ងៃក្រោយ ស្រាប់តែខុសភាពគាត់ធ្ងន់ធ្ងរ ឬក៏មិនអាចព្យាបាលបាន ឬប៉ះពាល់ដល់អាយុជីវិត អាហ្នឹងគឺជាការទទួលខុសត្រូវ ហើយការទទួលខុសត្រូវបែបហ្នឹងវាជារឿងយឺតពេល»។
កន្លងទៅឧកញ៉ា ថោង សារ៉ាត់ ដែលត្រូវតុលាការក្រុងភ្នំពេញផ្ដន្ទាទោសដាក់ពន្ធនាគារអស់មួយជីវិតក្នុងរឿងក្ដីបាញ់សម្លាប់ឧកញ៉ា អ៊ឹង ម៉េងជឺ កាលពីឆ្នាំ២០១៥ នោះ បានជាប់ឃុំក្នុងពន្ធនាគារមិនដល់មួយសប្ដាហ៍ផង ក៏ត្រូវបានមន្ត្រីពន្ធនាគារបញ្ជូនមកស្នាក់នៅបន្ទប់វីអាយភី (VIP) ក្នុងមន្ទីរពេទ្យខាងក្រៅពន្ធនាគារ រហូតទាល់តែតុលាការដោះលែង។
រីឯបងប្រុសបង្កើតរបស់ឧកញ៉ា គិត ម៉េង គឺឧកញ៉ា គិត ធាង វិញ តុលាការក្រុងភ្នំពេញបានកាត់ទោសឱ្យជាប់ពន្ធនាគារ ៤ឆ្នាំ រឿងជួញដូរគ្រឿងញៀនជិត ៥០គីឡូក្រាម ប៉ុន្តែលោកជាប់ឃុំប្រមាណកន្លះខែ ក៏ត្រូវគេបញ្ជូនទៅស្នាក់នៅក្នុងបន្ទប់វីអាយភី (VIP) ក្នុងមន្ទីរពេទ្យខាងក្រៅពន្ធនាគារដែរ រហូតទាល់តែតុលាការដោះលែងកាលពីឆ្នាំ២០២១។
ករណីចុងក្រោយមួយទៀត មន្ត្រីពន្ធនាគារ និងតុលាការខេត្តសៀមរាបបានអនុញ្ញាតឱ្យអ្នកទោសគ្រឿងញៀនជនជាតិតៃវ៉ាន់ (Taiwanese) ម្នាក់ចេញទៅព្យាបាលធ្មេញនៅគ្លីនិកធ្មេញឯកជនមួយក្នុងក្រុងសៀមរាប កាលពីថ្ងៃទី១៧ សីហាកន្លងទៅ។ បើទោះជាឧក្រិដ្ឋជនរូបនេះ មានទោសទណ្ឌធ្ងន់ធ្ងរក្ដី តែមន្ត្រីពន្ធនាគារនៅតែមានការអនុគ្រោះ។
គ្រួសារលោក ចៅ វាសនា និងសង្គមស៊ីវិលទទូចឱ្យតុលាការ និងពន្ធនាគារអនុវត្តច្បាប់ដោយគ្មានការរើសអើង និងស្មើភាពគ្នាចំពោះជនជាប់ឃុំទាំងឡាយ ដែលមានជំងឺធ្ងន់ធ្ងរពិតប្រាកដ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។