អាជ្ញាធរមូលដ្ឋាននៅស្រុកសាលាក្រៅខេត្តប៉ៃលិន លួចកាត់បំផ្លាញស្លាកគណបក្សភ្លើងទៀនជាច្រើនកន្លែងជាបន្តបន្ទាប់។ មន្ត្រីគណបក្សភ្លើងទៀន ចាត់ទុកសកម្មភាពរបស់អាជ្ញាធរនេះថា ជាការធ្វើទុក្ខបុកម្នេញមកលើគណបក្ស ដែលជាដៃគួរប្រកួតប្រជែងការបោះឆ្នោត ដោយសារព្រួយបារម្ភខ្លាចចាញ់ឆ្នោតនៅពេលខាងមុខ។
មន្ត្រីគណបក្សភ្លើងទៀនស្នើឱ្យអាជ្ញាធរខេត្តប៉ៃលិនបំពេញការងារឱ្យបានស្មើភាពគ្នាគ្រប់និន្នាការគណបក្សនយោបាយ។
ប្រធានគណបក្សភ្លើងទៀនខេត្តប៉ៃលិន លោក ខឹម មុនីកុសល ប្រាប់វិទ្យុអាស៊ីសេរីនៅថ្ងៃទី១៦ កុម្ភៈថា ក្នុងរយៈពេលមួយសប្ដាហ៍មកនេះអាជ្ញាធរបានបំផ្លាញស្លាកគណបក្សរបស់លោកចំនួន ៣កន្លែងផ្សេងគ្នា។ លោកថា កាលពីថ្ងៃទី៩ កុម្ភៈ មេឃុំសាលាក្រៅបានដឹកនាំកម្លាំងមន្ត្រីក្រោមឱវាទកាត់បំផ្លាញស្លាកគណបក្សលោកមួយផ្ទាំង នៅភូមិកំពង់ចម្លងក្រោម ឃុំសាលាក្រៅ ហើយថ្ងៃទី១០ កុម្ភៈមេឃុំស្ទឹងកាច់ ក៏បាននាំមេភូមិ និងអាជ្ញាធរក្រោមឱវាទលួចកាត់បំផ្លាញស្លាកគណបក្សលោកចំនួន ២កន្លែងបន្ថែមទៀត ដែលដាក់នៅតាមចិញ្ចើមផ្លូវក្នុងភូមិផ្សារព្រំជើង ឃុំស្ទឹងកាច់។ លោកចាត់ទុកទង្វើរបស់អាជ្ញាធរនេះថា ជាការព្រួយបារម្ភខ្លាចចាញ់ការបោះឆ្នោតនៅពេលខាងមុខ។
លោក ខឹម មុនីកុសល៖ «អាជ្ញាធរហ្នឹងមានការលំអៀងទៅរកគណបក្សកាន់អំណាច គឺគណបក្សប្រជាជនតែម្ដង ពីព្រោះគណបក្សប្រជាជនដើរដាក់ស្លាកគ្រប់ទីកន្លែង គឺមិនមានអ្នកណាគេរករឿងអីទេ មិនថាឡើយទីសាធារណៈ ឬក៏មុខផ្ទះប្រជាពលរដ្ឋ ឬកន្លែងណាសំខាន់ៗ គឺគណបក្សប្រជាជនដាក់បានទាំងអស់។ហើយស្លាកហ្នឹងគឺ ដាក់ដូចម្រាមដៃ។ ប៉ុន្តែ ចំណែកឯគណបក្សភ្លើងទៀន យើងសុំច្បាប់សុំអីត្រឹមត្រូវហើយហ្នឹង ក៏តឹងតែង ទម្រាំតែអនុញ្ញាតឱ្យយើងហ្នឹង គឺពិបាកណាស់»។
ក្នុងវីដេអូឃ្លីបដែលវិទ្យុអាស៊ីសេរីទទួលបានបង្ហាញថា ក្រុមអាជ្ញាធរទាំងនោះមានគ្នាជិត១០ បានកាត់ផ្ដួលស្លាកគណបក្សភ្លើងទៀនទាំងកណ្ដាលថ្ងៃ រួចសែងដាក់លើឡានដឹកយកទៅបាត់ដោយពុំមានអាជ្ញាធរណាហាមឃាត់ឡើយ។
ឆ្លើយតបនឹងបញ្ហានេះ មេឃុំស្ទឹងកាច់ លោក ហ៊ុន ប៊ិន ប្រាប់វិទ្យុអាស៊ីសេរីថាមូលហេតុ ដែលលោកកាត់ស្លាកគណបក្សភ្លើងទៀន គឺដោយសារមន្ត្រីគណបក្សនេះលើកស្លាកតាមចិញ្ចើមផ្លូវ ដោយមិនបានសុំច្បាប់អនុញ្ញាតពីអាជ្ញាធរនោះទេ។ តែយ៉ាងនេះក្ដី លោកថា ស្លាកគណបក្សទាំងនោះ ត្រូវអាជ្ញាធររក្សានៅសាលាឃុំនៅឡើយ។
លោក ហ៊ុន ប៊ិន៖ «បាទអត់មានរើសអើងទេ ព្រោះជាសិទ្ធិនយោបាយបាន ក្រសួងមហាផ្ទៃ បានណែនាំឱ្យបង្កលក្ខណៈងាយស្រួលដល់គណបក្សនយោបាយ ដែលបានចុះបញ្ជីនៅក្រសួងមហាផ្ទៃ ធ្វើសកម្មភាពស្មើមុខគ្នា អត់រើសអើងទេ។ គេបន់ឱ្យតែបានបក្សច្រើន ដើម្បីបង្ហាញអំពីប្រជាធិបតេយ្យនៅកម្ពុជាថា ហ្នឹងហើយមានគណបក្សច្រើនពហុបក្ស សេរី អ៊ីចឹង ឱ្យតែគាត់ដាក់ពាក្យស្នើសុំមក តែមានអីគាត់អត់ដាក់ផង»។
ទោះជាយ៉ាងណាក្ដី មន្ត្រីគណបក្សភ្លើងទៀន លោក ខឹម មុនីកុសល អះអាងថា លោកបានសុំច្បាប់ពីអាជ្ញាធររួចអស់ហើយ ប៉ុន្តែមេឃុំសាលាក្រៅ និងមេឃុំស្ទឹងកាច់មិនឱ្យពួកគេលើកស្លាកក្រោមហេតុថាទីតាំងទាំងនោះ មន្ត្រីគណបក្សប្រជាជនកម្ពុជាបានសុំច្បាប់លើកស្លាកគណបក្សមុនហើយ។
ជុំវិញរឿងនេះ មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបាត់ដំបង និងខេត្តប៉ៃលិន លោក យិន ម៉េងលី ដែលបានចុះអង្កេតដល់កន្លែងកើតហេតុមានប្រសាសន៍ថា ទីតាំងដែលអាជ្ញាធរបំផ្លាញស្លាកគណបក្សភ្លើងទៀននោះ មានទីធ្លាធំទូលាយអាចលើកស្លាកគណបក្សបានជាច្រើនផ្ទាំង ដោយគ្មានប៉ះពាល់សណ្ដាប់ធ្នាប់សាធារណៈឡើយ។ លោកចាត់ទុកសកម្មភាពរបស់អាជ្ញាធរបំផ្លាញស្លាកគណបក្សភ្លើងទៀននេះថា ជាការគំរាមកំហែង និងតាមយាយីរំខានដៃគួប្រកួតប្រជែងនៅមុនការបោះឆ្នោត។
លោក យិន ម៉េងលី៖ «ដល់ពេលយើងបំផ្លិចបំផ្លាញ អីចឹងមានន័យថា ព្រួយបារម្ភខ្លាចចាញ់ឆ្នោត ឬក៏យ៉ាងម៉េច?ខ្ញុំគិតថា គណបក្សប្រជាជន លោកមានលទ្ធភាពច្រើនហើយ។ អ៊ីចឹង គប្បីតែបើកលំហបញ្ហានេះឱ្យមើលមកល្អផង។ អ៊ីចឹង ខ្ញុំចង់ឱ្យឃើញមានស្លាកចម្រុះនៅតាមទីសាធារណៈ មិនមែននៅតែទីឯកជនទេ ព្រោះគណបក្សប្រជាជនលោកមានស្លាកច្រើនហើយ ព្រោះលោកមានលទ្ធភាពគ្រប់បែបយ៉ាង ព្រោះលោកកាន់អំណាចយូរហើយ ប៉ុន្តែធ្វើម៉េចឱ្យគណបក្សដែលគាត់មានលទ្ធភាពតិចឱ្យបង្កលក្ខណៈឱ្យគាត់ផង»។
ការបំផ្លាញស្លាកគណបក្សភ្លើងទៀននៅខេត្តជាប់ព្រំដែនថៃមួយនេះតែងកើតមានជាហូរហែ។ ឧទាហរណ៍ កាលពីបោះឆ្នោតឃុំសង្កាត់ឆ្នាំ២០២២ កន្លងទៅ ជនមិនស្គាល់មុខលួចផ្ដួលស្លាកគណបក្សនេះចំនួន ២ផ្ទាំង។ ជាងនេះទៅទៀត អាជ្ញាធរតែងរារាំងដល់សកម្មជនគណបក្សភ្លើងលើកស្លាកម្ដងហើយម្ដងទៀត។ រហូតមកទល់ពេលនេះ យ៉ាងហោចណាស់មានស្លាកគណបក្សភ្លើងទៀនខេត្តប៉ៃលិនចំនួន ៥ផ្ទាំងហើយ ដែលត្រូវបានជនមិនស្គាល់មុខ និងអាជ្ញាធរឃុំលួចបំផ្លាញចោល។ ច្បាប់ស្ដីពីគណបក្សនយោបាយមាត្រា៤ ចែងថា គ្រប់គណបក្សនយោបាយមានសិទ្ធិស្មើៗ គ្នា ក្នុងការទទួលបានបុព្វសិទ្ធិ និងការយកចិត្តទុកដាក់ ដោយស្មើភាពគ្នាពីរដ្ឋាភិបាល និងអាជ្ញាធរគ្រប់ជាន់ថ្នាក់។
ចំណែកច្បាប់ស្ដីពីការជ្រើសតាំងតំណាងរាស្ត្រ មាត្រា៦៩ ចែងថា ស្លាកគណបក្សនយោបាយអាចលើកនៅទីសាធារណៈ ដោយមានការសម្របសម្រួលពីអាជ្ញាធរឃុំសង្កាត់ ផ្អែកលើគោលការណ៍ស្មើភាព សន្តិសុខ សណ្ដាប់សាធារណៈ និងសោភ័ណភាពសាធារណៈ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។