តើលោក គឹម សន្តិភាព ជានរណា?
2023.01.19
រដ្ឋលេខាធិការក្រសួងយុត្តិធម៌ លោក គឹម សន្តិភាព។
រូប៖ ហ្វេសប៊ុកលោក គឹម សន្តិភាព។
ការដឹកនាំប្រទេសតាមបែបឯកបក្សរបស់លោក ហ៊ុន សែន ក្នុងអាណត្តិទី៦ នេះ បានត្រួសត្រាយផ្លូវឱ្យមន្ត្រីជំនាន់ក្រោយនៃគណបក្សប្រជាជនកម្ពុជាបង្ហាញសមត្ថភាពរបស់ពួកគេរៀងៗខ្លួន។ ក្នុងចំណោមអ្នកទាំងនោះ ក៏មានរដ្ឋលេខាធិការក្រសួងយុត្តិធម៌ គឺលោក គឹម សន្តិភាព ម្នាក់ផងដែរ។ ភាពលេចធ្លោរបស់លោក គឺការគំរាមប្រើគុកច្រវាក់ និងការប្រមូលកម្លាំងឱ្យគណបក្សប្រជាជនកម្ពុជានៅក្រៅប្រទេស។ តើលោក គឹម សន្តិភាព មានប្រវត្តិយ៉ាងណា?
លោក គឹម សន្តិភាព គឺជាជំនិតផ្ទាល់របស់លោក ហ៊ុន ម៉ាណែត។ យីអ៊ុនរបស់លោកបានឡើងខ្ពស់ត្រដែតពេញមួយសករាជនៃការដឹកនាំបែបឯកបក្សរបស់លោក ហ៊ុន សែន។ ការងារតូចធំទាំងក្នុង និងក្រៅក្រសួងយុត្តិធម៌ រហូតដល់ការងារបក្សនៅក្រៅប្រទេស លោក គឹម សន្តិភាព រ៉ាប់រងបានទាំងអស់។ ក៏ប៉ុន្តែលោកត្រូវបានគេមើលឃើញថា ជាមន្ត្រីធ្វើការបម្រើប្រយោជន៍បក្ស និងអំណាចមេកោយរបស់លោក ជាជាងខិតខំជួយកែទម្រង់ប្រព័ន្ធយុត្តិធម៌របស់ជាតិដែលកំពុងចុះទន់ខ្សោយជាលំដាប់នោះ។
ប្រវត្តិសង្ខេប
លោក គឹម សន្តិភាព កើតនៅឆ្នាំ១៩៧៩ ដែលគិតមកដល់ពេលនេះ លោកមានអាយុ ៤៤ឆ្នាំហើយ។ លោកមានស្រុកកំណើតនៅខេត្តព្រៃវែង និងមានបងប្អូនបង្កើតចំនួន ៧នាក់ហើយលោកជាកូនពៅ។ លោកមានកូនចំនួន ៣ នាក់ ប្រុស ២ នាក់ និងស្រីម្នាក់។ លោក គឹម សន្តិភាព គឺជាកូនប្រសារបស់លោក ជាម យៀម អនុប្រធានទីមួយរដ្ឋសភា និងជាសមាជិកគណៈអចិន្ត្រៃយ៍គណបក្សប្រជាជនកម្ពុជា។ ភរិយារបស់លោកឈ្មោះ ជាម ច័ន្ទសុផារ៉ា ជាមន្ត្រីជាន់ខ្ពស់មួយរូបនៃអគ្គលេខាធិការដ្ឋានរដ្ឋសភា។
លោក គឹម សន្តិភាព បានបញ្ចប់ថ្នាក់បរិញ្ញាបត្រផ្នែកច្បាប់ពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ដែលគេនិយមហៅថា សាលារូល (RULE) នៅឆ្នាំ២០០០។ លោកបានបន្តការសិក្សាថ្នាក់បរិញ្ញាបត្រជាន់ខ្ពស់នៅសាកលវិទ្យាល័យលីយ៉ុង (Lyon) ប្រទេសបារាំង។ លោក គឹម សន្តិភាព និងលោក កើត រិទ្ធ រដ្ឋមន្ត្រីក្រសួងយុត្តិធម៌ដែលល្បីខាងកែរដ្ឋធម្មនុញ្ញ និងធ្វើច្បាប់បម្រើនយោបាយឱ្យលោក ហ៊ុន សែន នោះ ចេញមកពីសាលាតែមួយ តែលោក កើត រិទ្ធ រៀនមុនលោក គឹម សន្តិភាព មួយជំនាន់។
អតីតមិត្តរួមថ្នាក់ម្នាក់របស់លោក គឹម សន្តិភាព ទម្លាយថា រដ្ឋលេខាធិការក្រសួងយុត្តិធម៌រូបនេះ ជាសិស្សពូកែ ប៉ុន្តែលោកមានចរិតក្រអឺតក្រទមចំពោះអ្នកដែលមិនមែនជាគ្នីគ្នារបស់ខ្លួន។
ការងារក្នុងជួររដ្ឋាភិបាល
ក្រោយបញ្ចប់ការសិក្សា លោក គឹម សន្តិភាព បានចូលបម្រើការជាមន្ត្រីនៅក្រសួងយុត្តិធម៌ ហើយក្រោយមកលោកត្រូវបានតែងតាំងជាអនុរដ្ឋលេខាធិការនៃក្រសួងមួយនេះ។ លោកបានក្លាយជារដ្ឋលេខាធិការក្រសួងយុត្តិធម៌នៅឆ្នាំ២០១៨ ក្រោយពេលរដ្ឋាភិបាលលោក ហ៊ុន សែន រំលាយគណបក្សសង្គ្រោះជាតិ និងរៀបចំការបោះឆ្នោតបែបបង្គ្រប់កិច្ច ដើម្បីប្រមូលយកអាសនៈសភាទាំងអស់មកគ្រប់គ្រងតែម្នាក់ឯង។
លោកទទួលបានការងារជាច្រើននៅក្នុងក្រសួងយុត្តិធម៌ និងគណៈកម្មការអន្តរក្រសួង ដូចជា រដ្ឋលេខាធិការ និងជាអ្នកនាំពាក្យក្រសួងយុត្តិធម៌ ប្រធានគណៈកម្មការជាតិដោះលែងដោយមានលក្ខខណ្ឌ ប្រធានគណៈកម្មការគ្រប់គ្រង និងចាត់ចែងវត្ថុតាង និងជាប្រធានលេខាធិការដ្ឋាននៃគណៈប្រតិបត្តិរបស់គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ-១៩ ជាដើម។ នៅឯរដ្ឋសភាវិញ លោក គឹម សន្តិភាព គឺជានាយកខុទ្ទកាល័យឪពុកក្មេករបស់លោក។ បច្ចុប្បន្ន ប្រព័ន្ធឃោសនាក្នុងស្រុកមួយចំនួនបានហៅអ្នកទាំងពីរថា ឯកឧត្ដមបណ្ឌិត គឹម សន្តិភាព នាយកខុទ្ទកាល័យ ឯកឧត្ដមកិត្តិសេដ្ឋាបណ្ឌិត ជាម យៀប។
អ្នកច្បាប់ដែលពូកែខាងសម្លុតគំរាមគេឯង
ដោយសារឡើងបុណ្យសក្ដិកាន់តែធំ លោក គឹម សន្តិភាព ក៏ហាក់បីដូចជាខំប្រឹងដំឡើងឫកពារបស់ខ្លួនឱ្យកាន់តែធំតាមនោះដែរ។ លោកមិនញញើតនឹងគំរាមកំហែងពលរដ្ឋ អ្នកនយោបាយ និងអង្គការសង្គមស៊ីវិលជាសាធារណៈអំពីរឿងគុកច្រវាក់នោះទេ នៅពេលពួកគេបញ្ចេញមតិរិះគន់ចំពោះរឿងអយុត្តិធម៌ផ្សេងៗ។
ឧទាហរណ៍ត្រួសៗ លោកធ្លាប់ព្រមានក្រុមអង្គការសង្គមស៊ីវិលថា ការចេញសេចក្ដីថ្លែងការណ៍រិះគន់ការសម្រេចរបស់តុលាការដែលលោកថា ធ្វើឱ្យបាត់ជំនឿលើតុលាការនោះ គឺជាបទល្មើសព្រហ្មទណ្ឌ។ ទាក់ទងនឹងបទចោទក្បត់ជាតិប្រឆាំងនឹងលោក កឹម សុខា វិញ ក្នុងឋានៈជាអ្នកនាំពាក្យដែលតំណាងឱ្យក្រសួងយុត្តិធម៌ លោក គឹម សន្តិភាព តែងបញ្ចេញសារក្នុងន័យគំរាមមេបក្សប្រឆាំងរូបនេះផង និងដាក់សម្ពាធលើតុលាការផង ដូចជាថា លោក កឹម សុខា ក្បត់ជាតិ សម្ដីលោក កឹម សុខា ជាបទល្មើសជាក់ស្ដែង និងថា លោក កឹម សុខា ត្រូវប្រយ័ត្នចំពោះសកម្មភាពរបស់ខ្លួន ជាដើម។ ជាមួយគ្នានេះ លោក គឹម សន្តិភាព តែងតែបន្ទរតាមលោក ហ៊ុន សែន ដោយហៅលោក សម រង្ស៊ី ថាជាឧក្រិដ្ឋជន ដែលមានបំណងទុច្ចរិត។
លោក គឹម សន្តិភាព៖ «ញុះញង់ឱ្យបងប្អូនចេញពីផ្ទះ ញុះញង់ឱ្យប្អូនប្រឆាំងនឹងរាល់វិធានការ[កូវីដ-១៩]ទាំងអស់ ដូច្នេះហើយទង្វើនេះ គឺជាទង្វើដែលប្រឆាំងជាមួយនឹងច្បាប់កម្ពុជា។ អយ្យការអមសាលាដំបូងរាជធានីភ្នំពេញបានចាត់វិធានការ ដោយធ្វើការចោទប្រកាន់ឧក្រិដ្ឋជន សម រង្ស៊ី នេះ ក្នុងបទរារាំងវិធានការរដ្ឋបាល និងញុះញង់បង្កឱ្យមានអសន្តិសុខនៅក្នុងសង្គម»។
ការលួចស្ដាប់សំឡេងសន្ទនាឯកជនរបស់ពលរដ្ឋពីសំណាក់អាជ្ញាធរដោយគ្មានដីកាពីតុលាការ ក៏លោក គឹម សន្តិភាព អាចបកស្រាយបានថា នេះជារឿងត្រឹមត្រូវដែរ។ ហើយក្នុងក្រសែភ្នែករបស់លោក ការបញ្ចេញមតិរិះគន់រដ្ឋាភិបាលលើហ្វេសប៊ុក (Facebook) អាចទាញចេញទៅជាបទល្មើសញុះញង់ ឬប៉ះពាល់ដល់សន្តិសុខជាតិ ដែលត្រូវផ្ដន្ទាទោសតាមក្រមព្រហ្មទណ្ឌ។ លោក គឹម សន្តិភាព ក្លាយជាមន្ត្រីឈានមុខគេខាងយកច្បាប់មកសម្លុតគំរាមពលរដ្ឋ អំឡុងពេលផ្ទុះរាលដាលជំងឺកូវីដ-១៩។ សាររបស់លោកដែលគេចាំមិនភ្លេចនោះ មានជាអាទិ៍ អ្នកល្មើសវិធានការកូវីដត្រូវទទួលទោសទណ្ឌ សាលសវនាការត្រៀមរួចរាល់សម្រាប់កាត់ក្ដីអ្នកបំពានវិធានការកូវីដ-១៩ និងអ្នកបំពានច្បាប់កូវីដត្រូវជាប់ពន្ធនាគារ ជាដើម។
អ្នកសិក្សាផ្នែកច្បាប់ លោក វ៉ន ចាន់ឡូត ពន្យល់ថា មានតែក្នុងរបបដឹកនាំបែបផ្ដាច់ការទេ ដែលច្បាប់ត្រូវបានក្រុមអ្នកមានអំណាចយកមកប្រើជាឧបករណ៍ដើម្បីគាបសង្កត់ពលរដ្ឋ ឬអ្នកទន់ខ្សោយ។
លោក វ៉ន ចាន់ឡូត៖ «ស្មារតី ឬក៏គុណតម្លៃរបស់ច្បាប់ គឺការពារទៅដល់ការប្រើប្រាស់សិទ្ធិរបស់ប្រជាពលរដ្ឋ ឬក៏ធានាទៅដល់យុត្តិធម៌សង្គម។ នេះជាគោលការណ៍រួម ប៉ុន្តែជាក់ស្ដែងនៅក្នុងសង្គមដែលមានការដឹកនាំបែបអំណាចផ្ដាច់ការ ឬក៏ការរំលោភអំណាច អ្នកដឹកនាំនោះនឹងប្រើប្រាស់ច្បាប់ជាឧបករណ៍ ឬក៏ជាយន្តការមួយដើម្បីដាក់សម្ពាធ ឬគំរាមកំហែងទៅដល់អ្នកដែលហ៊ានរិះគន់ភាពអសកម្មរបស់ខ្លួន»។
លោក គឹម សន្តិភាព ហាក់បីដូចជាពូកែតែខាងបកស្រាយច្បាប់ដើម្បីសម្លុតគំរាមពលរដ្ឋ ក្រុមសង្គមស៊ីវិល និងសកម្មជនបក្សប្រឆាំងប៉ុណ្ណោះ។ ប៉ុន្តែចំពោះករណីដែលពាក់ព័ន្ធនឹងក្រុមគ្រួសារ និងមេរបស់លោកវិញ លោកស្ងាត់មាត់ឱ្យជ្រាប។ ជាឧទាហរណ៍ ករណីរថយន្តឪពុកក្មេករបស់លោក គឺលោក ជាម យៀប បុកពលរដ្ឋស្លាប់នៅស្រុកកៀនស្វាយ ខេត្តកណ្ដាល រួចបើករត់គេច កាលពីឆ្នាំ ២០១៣ ករណីក្រុមកងអង្គរក្សលោក ហ៊ុន សែន អូសតំណាងរាស្ត្របក្សសង្គ្រោះជាតិពីររូបទៅវាយដំច្រំធាក់នៅមុខរដ្ឋសភា ការវាយបង្ក្រាបក្នុងថ្លុកឈាមនៅផ្លូវវេងស្រេង និងសារគំរាមសម្លាប់របស់លោក ហ៊ុន សែន លើសកម្មជនបក្សប្រឆាំង ជាដើមនោះ លោកមិនដែលនិយាយត្រូវរឿងទាំងនេះទេ។
ប្រធានសមាគមការពារសិទ្ធិមនុស្សអាដហុក (ADHOC) លោក នី សុខា កត់សម្គាល់ថា ការបកស្រាយច្បាប់របស់លោក គឹម សន្តិភាព ច្រើនតែជាសារបន្ទរបន្ថែមពីលោកនាយករដ្ឋមន្ត្រី ហ៊ុន សែន និងការពារទង្វើរបស់អាជ្ញាធររដ្ឋាភិបាល ជាជាងផ្អែកលើគោលការណ៍ច្បាប់ពិតប្រាកដ។
លោក នី សុខា៖ «ជាទូទៅ គាត់តែងតែខំបកស្រាយក្នុងន័យមួយ ដើម្បីការពាររដ្ឋាភិបាល ក្នុងន័យមួយដើម្បីជាការបំភិតបំភ័យ ក្នុងការធ្វើឱ្យមានការបារម្ភ ឬក៏គំរាមជាស្មារតីទៅដល់ក្រុមអង្គការសង្គមស៊ីវិល និងក្រុមអ្នកតវ៉ាទាមទារជារឿយៗ។ អ៊ីចឹងអ្វីដែលយើងឃើញពីការបកស្រាយរបស់គាត់ហ្នឹង ខ្ញុំគិតថា ជាការបកស្រាយមួយដែលមិនបានឆ្លុះបញ្ចាំងអំពីច្បាប់»។
បែកធ្លាយទំហំទ្រព្យសម្បត្តិ និងគម្រោងកម្ចាត់សំឡេងប្រឆាំង
លោក គឹម សន្តិភាព ជាមន្ត្រីមួយរូបដែលមានទ្រព្យសម្បត្តិច្រើនហួសពីតួនាទីរបស់ខ្លួន។ យោងតាមឯកសារប្រកាសទ្រព្យសម្បត្តិ និងបំណុលដែលបែកធ្លាយចេញពីអ៊ីមែលផ្ទាល់ខ្លួនរបស់លោក គឹម សន្តិភាព កាលពីឆ្នាំ២០១៧ លោកមានលុយទុកក្នុងធនាគារជិត ៧សែនដុល្លារ។ លោកមានរថយន្ត ២គ្រឿង និងអចលនទ្រព្យដូចជា ដីធ្លី និងផ្ទះសម្បែង ជាច្រើនកន្លែង នៅខេត្តកណ្ដាល ព្រៃវែង កំពង់ស្ពឺ និងខេត្តព្រះសីហនុ។ ក្រៅពីនេះ លោកមានមាសដុំ និងមាសសន្លឹកសរុប ៧០ដំឡឹង ជាមួយនឹងខ្សែក នាឡិកាដៃ និងចិញ្ចៀនពេជ្រថែមទៀត ហើយគ្រាន់តែក្បាលខ្សែក្រវាត់របស់លោកមួយ មានតម្លៃរហូតដល់ជាង ២ម៉ឺនដុល្លារ។
ទាំងនេះគឺជាទ្រព្យសម្បត្តិដែលលោក គឹម សន្តិភាព មាននៅមុនឆ្នាំ២០១១ ខណៈពេលលោកមានតួនាទីត្រឹមអនុរដ្ឋលេខាធិការ និងមានប្រាក់ខែដុលត្រឹមតែជាង ៥ពាន់ដុល្លារក្នុងមួយឆ្នាំ។ គេមិនដឹងថា ទ្រព្យសម្បត្តិរបស់លោកកើនឡើងដល់កម្រិតណានោះទេ ព្រោះលោកឡើងតួនាទីដល់រដ្ឋលេខាធិការ និងមានការងារច្រើនស្អេកស្កះ។ ម្យ៉ាងវិញទៀត លោកមានផ្ទះជួល និងភាគហ៊ុនក្នុងក្រុមហ៊ុនឯកជន ដែលរកបានចំណូលរាប់សិបម៉ឺនដុល្លារក្នុងមួយឆ្នាំ។
ក្រៅពីទ្រព្យសម្បត្តិដ៏ច្រើនសន្ធឹកសន្ធាប់នេះ ឯកសារបែកធ្លាយដដែលក៏បានបង្ហាញអំពីការងារពីក្រោយឆាកមួយទៀតរបស់លោក គឹម សន្តិភាព នៅមុនការបោះឆ្នោតឆ្នាំ ២០១៣ ដែរ។ លោកជាអនុប្រធានក្រុមការងារបណ្ដាញព័ត៌មានសង្គម ហៅថា Cyber War Room ដែលស្ថិតក្រោមការគ្រប់គ្រងដោយផ្ទាល់ពីលោក ហ៊ុន ម៉ាណែត។ សកម្មភាពរបស់ក្រុមនេះ គឺតាមដាន និងគ្រប់គ្រងព័ត៌មាននានាលើបណ្ដាញសង្គម ព្រមទាំងរៀបចំវិធានការនានាដើម្បីទប់ស្កាត់ ឆ្លើយតប និងវាយបកទៅលើមជ្ឈដ្ឋានរិះគន់ការដឹកនាំរបស់រដ្ឋាភិបាលគណបក្សប្រជាជនកម្ពុជា។
ជុំវិញរឿងនេះ លោក គឹម សន្តិភាព ធ្លាប់បកស្រាយថា ក្រុមចោរបច្ចេកវិទ្យា ឬ Hacker បានលួចចូលគ្រប់គ្រងទំព័រហ្វេសប៊ុក (Facebook) និងអ៊ីមែល (E-mail) ផ្ទាល់ខ្លួនរបស់លោកនៅពេលនោះ។ លោកមិនបានបដិសេធព័ត៌មានដែលបែកធ្លាយទាំងនេះទេ ដោយលោកគ្រាន់តែបញ្ជាក់ថា ក្រុម Hackerបានលួចចូលគ្រប់គ្រងគណនីអ៊ីមែលរបស់លោក ដូច្នេះពួកគេក៏អាចបំផ្លាញ ឬកែប្រែទិន្នន័យព័ត៌មានទាំងនោះក្នុងបំណងទុច្ចរិតដែរ។
វិទ្យុអាស៊ីសេរីបានព្យាយាមទាក់ទងលោក គឹម សន្តិភាព ដើម្បីឆ្លើយតបចំពោះមតិរិះគន់លើរូបលោក តែទូរស័ព្ទចូលជាច្រើនដង ពុំមានអ្នកទទួល និងពេលខ្លះមានគេចុចផ្ដាច់។ លោក គឹម សន្តិភាព ធ្លាប់ប្រកាសកាលពីឆ្នាំ២០២១ ថា លោកមិនផ្ដល់សម្ភាសដល់វិទ្យុអាស៊ីសេរីនោះទេ។
ក៏ប៉ុន្តែអ្នកនាំពាក្យគណបក្សប្រជាជនកម្ពុជា លោក សុខ ឥសាន ចេញមុខការពារលោក គឹម សន្តិភាព ថា ជាមន្ត្រីគំរូ និងត្រឹមត្រូវ ទាំងនៅក្នុងរដ្ឋាភិបាល និងគណបក្ស។ លោកថា ការបកស្រាយរបស់មន្ត្រីរូបនេះទាក់ទងទៅនឹងរឿងផ្លូវច្បាប់ មិនមែនជាការគំរាមកំហែងនោះទេ តែជាការពន្យល់ពលរដ្ឋឱ្យយល់ដឹងច្បាប់ប៉ុណ្ណោះ។
លោក សុខ ឥសាន៖ «អត់ទេ! ឯកឧត្តម គឹម សន្តិភាព មនុស្សស្លូតបូតចង់ងាប់ហ្នឹង។ មនុស្សស្លូតបូត ខ្ញុំស្គាល់គាត់យូរឆ្នាំហើយ។ យើងនិយាយថា គាត់មានសម្ដី អាកប្បកិរិយាគំរាមកំហែងនោះ វាអត់ត្រឹមត្រូវសោះ។ បើគាត់ជួបប្រជាជន ជួបមហាជន គាត់សុភាពរាបសា ជាមន្ត្រីជាន់ខ្ពស់ម្នាក់ដែលមានគំរូល្អ មានសីលធម៌នយោបាយល្អ»។
ផ្ទុយពីការបកស្រាយរបស់តំណាងបក្សកាន់អំណាចនេះ អនុប្រធានគណបក្សសង្គ្រោះជាតិ លោក អេង ឆៃអ៊ាង ដែលលោក គឹម សន្តិភាព ចោទពេញៗមាត់ថា ជាក្រុមឧទ្ទាមនោះ ថ្លែងថា មន្ត្រីច្បាប់រូបនេះ ពូកែតែខាងបកស្រាយច្បាប់បន្ទរតាមមេកោយរបស់ខ្លួន មិនមែនជាមន្ត្រីដែលមានឥទ្ធិពលជួយកែទម្រង់ប្រព័ន្ធយុត្តិធម៌ឡើយ។
លោក អេង ឆៃអ៊ាង៖ «សព្វថ្ងៃ ស្រុកខ្មែរអំណាចប្រមូលផ្ដុំតែលើលោក ហ៊ុន សែន អ៊ីចឹងអ្នកហ្នឹងគ្រាន់តែចេះអែបអប មានទេពកោសល្យប្រើប្រាស់ភាពឆ្លាតរបស់ខ្លួន ដើម្បីអែបអប យកមុខយកមាត់ យកបុណ្យសក្ដិ យកតួនាទីគឺមាន។ ប៉ុន្តែបើថា ចង់យកចំណេះដឹងរបស់ខ្លួន ដើម្បីទៅធ្វើកិច្ចការទៅតាមសម្បជញ្ញៈមនសិការ គឺអត់មានទេ»។
ភាពប្ដូរផ្ដាច់ និងអនាគតជាមួយបក្សប្រជាជនកម្ពុជា
លោក គឹម សន្តិភាព ជាមនុស្សឆ្អិនឆ្អៅរបស់គណបក្សប្រជាជនកម្ពុជា។ លោកបានចូលរួមជាសមាជិកគណបក្សនេះតាំងពីនៅជាយុវជន និងចុះពង្រឹងមូលដ្ឋាននៅស្រុកពាមរ ខេត្តព្រៃវែង។ បច្ចុប្បន្ន លោកជាសមាជិកគណៈកម្មាធិការកណ្ដាល និងជាអនុប្រធានចលនាយុវជនរបស់គណបក្ស។ ក្រៅពីនេះ លោកជាអនុប្រធានក្រុមការងារគណបក្សចុះជួយមូលដ្ឋានស្រុកពញាក្រែក ខេត្តត្បូងឃ្មុំ ទីដែលបងថ្លៃរបស់លោក គឺលោក ជាម ច័ន្ទសោភ័ណ ជាអភិបាលខេត្ត។ ជាមួយគ្នានេះ លោក គឹម សន្តិភាព គឺជាប្រធានក្រុមការងាររៀបចំយុវជនប្រចាំប្រទេសអូស្ត្រាលី (Australia) និងណូវែលហ្សេឡង់ដ៍ (New Zealand)។ ការងារស្នូលរបស់លោក គឺកៀរគរកម្លាំង និងរៀបចំអង្គការចាត់តាំងគណបក្សប្រជាជនកម្ពុជានៅប្រទេសទាំងពីរនេះ។ ប៉ុន្តែសហគមន៍ខ្មែរនៅទីនោះបានចាត់ទុកថា នេះជាការចូលមកបំបែកបំបាក់សាមគ្គីភាព ជាពិសេសបានគំរាមកំហែងទៅដល់សុវត្ថិភាព និងផ្លូវចិត្តរបស់ពួកគាត់។
ទោះជាយ៉ាងណា សម្រាប់គណបក្សកាន់អំណាចវិញ លោក គឹម សន្តិភាព បំពេញការងារបានយ៉ាងល្អ និងមានស្នាដៃជាច្រើន ដូច្នេះមន្ត្រីរូបនេះនឹងក្លាយជាថ្នាក់ដឹកនាំជាន់ខ្ពស់មួយរូបក្នុងឈុតគណៈរដ្ឋមន្ត្រីរបស់លោក ហ៊ុន ម៉ាណែត ដែលជាបេក្ខជននាយករដ្ឋមន្ត្រីគណបក្សប្រជាជនកម្ពុជានៅថ្ងៃមុខ។
ក៏ប៉ុន្តែតើថ្ងៃនោះពិតជានឹងកើតមានមែន ឬយ៉ាងណា? មានតែពលរដ្ឋម្ចាស់ឆ្នោតទេ ទើបជាអ្នកផ្ដល់ចម្លើយនេះពិតប្រាកដ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- លោក ស ខេង ចង់ឱ្យមានការធ្វើតេស្ដរកគ្រឿងញៀនលើពលរដ្ឋចាប់ពីអាយុ១៣ឆ្នាំដល់ក្រោម៤៥ឆ្នាំ
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- "លោក ហ៊ុន សែន សម្ញែងនាឡិកាដៃតម្លៃរាប់លានដុល្លារ បង្ហាញថា លោកជាមេដឹកនាំពុករលួយ"
- សង្គមស៊ីវិលប្រតិកម្មនឹងក្រសួងអប់រំដែលឱ្យសិស្សឈប់សំរាកយូរដើម្បីគាំទ្រកីឡាស៊ីហ្គេម
អត្ថបទពេញនិយម
នយោបាយ
- តំណាងរាស្ត្រសភាអឺរ៉ុប ព្រមានថា នឹងមិនមានការផ្លាស់ប្ដូរឡើយ បើអឺរ៉ុបមិនដាក់សម្ពាធលើរដ្ឋាភិបាលកម្ពុជា
- អ្នកឃ្លាំមើល ថា លោក ហ៊ុន សែន ទំនងលែងទុកចិត្តអ្នកណាក្រៅពីកូនរបស់ខ្លួនហើយ
- "ការពង្រីកផ្ទៃដីទ័ពអាកាសនៅរាម នឹងនាំឱ្យសង្ស័យកាន់តែខ្លាំងពីវត្តមានទ័ពចិននៅកម្ពុជា"
- អ្នកវិភាគ និងមន្ត្រីបក្សប្រឆាំងថា លោក ហ៊ុន សែន ប្រើប្រាស់អប្បិយជំនឿដើម្បីបោកពលរដ្ឋ
- ក្រុមមេដឹកនាំបក្សភ្លើងទៀនផ្ដាំមន្ត្រីកុំចាញ់ការបំភិតបំភ័យ