ជន​ភៀស​ខ្លួន​កៀរគរ​ពលករ​ខ្មែរ​​​​​​ត្រៀម​ធ្វើ​បាតុកម្ម​​ប្រឆាំង​វត្តមាន​លោក​ ហ៊ុន ម៉ាណែត​​ទៅ​ទស្សនកិច្ច​នៅ​ប្រទេស​ថៃ

ដោយ ទីន ហ្សាការីយ៉ា
2024.01.22
ជន​ភៀស​ខ្លួន​កៀរគរ​ពលករ​ខ្មែរ​​​​​​ត្រៀម​ធ្វើ​បាតុកម្ម​​ប្រឆាំង​វត្តមាន​លោក​ ហ៊ុន ម៉ាណែត​​ទៅ​ទស្សនកិច្ច​នៅ​ប្រទេស​ថៃ (រូបឯកសារ​តំណាង) ជន​ភៀស​ខ្លួន​ខ្មែរ​នៅ​ប្រទេស​ថៃ​
រូប៖ ហ្វេសប៊ុក

សកម្មជន​​គណបក្ស​ប្រឆាំង​ដែល​កំពុង​ភៀស​ខ្លួន​​នៅ​ប្រទេស​ថៃ​​ដើរ​កៀរគរ​ពលករ​ខ្មែរ​ឱ្យ​ត្រៀម​ចូល​​រួម​ធ្វើ​បាតុកម្ម​ប្រឆាំង​​​​លោក​នាយករដ្ឋមន្ត្រី​ ហ៊ុន ម៉ាណែត​ ​​ដែល​គ្រោង​ទៅ​ទស្សនកិច្ច​នៅ​ប្រទេស​​ថៃ​នៅ​ដើម​ខាង​កុម្ភៈ​ខាង​មុខ។ ពួកគេ​​​ថា ​គម្រោង​ធ្វើ​បាតុកម្ម​នេះ​ ដើម្បី​ទាមទារ​ឱ្យ​​ប្រមុខ​រដ្ឋាភិបាល​ក្រុង​ភ្នំពេញ​​ងាក​មក​​ដើរ​តាម​គន្លង​ប្រជាធិបតេយ្យ​ និង​ឈប់​តាម​យាយី​​ដល់​អ្នក​​ដែល​មាន​និន្នាការ​ផ្ទុយ​បន្ត​ទៅ​ទៀត។​

​​​​​ជន​ភៀស​ខ្លួន​ខ្មែរ​នៅ​ប្រទេស​ថៃ​ ​អះអាង​ថា ​មាន​​ពលករ​ខ្មែរ​​ជាង​២ពាន់​​នាក់​ហើយ​បាន​ចុះ​ឈ្មោះ​ត្រៀម​ចូល​រួម​​ធ្វើ​បាតុកម្ម​​ប្រឆាំង​​វត្ត​មាន​លោក ហ៊ុន ម៉ាណែត​​​​ នៅ​ប្រទេស​ថៃ​​។

មន្ត្រី​គណបក្ស​ភ្លើង​ទៀន​ដែល​កំពុង​ភៀស​ខ្លួន​នៅ​ប្រទេស​ថៃ លោក លី ម៉េង​ឃៀង ប្រាប់​វិទ្យុ​អាស៊ី​សេរី​ នៅ​ថ្ងៃ​ទី​២២​មករា​ថា ​ការ​ដើរ​កៀរគរ​ពលករ​ខ្មែរ​ធ្វើ​បាតុកម្ម​នេះ​ ដោយសារ​មិន​ពេញ​ចិត្ត​លោក ហ៊ុន ម៉ាណែត​ ​ដឹក​នាំ​ប្រទេស​​ផ្ដាច់​ការ និង​​តាម​ធ្វើ​ទុក្ខបុកម្នេញ​អ្នក​ដែល​មាន​និន្នាការ​ផ្ទុយ​ពី​រដ្ឋាភិបាល។ លោក​បញ្ជាក់​ថា ​​បាតុកម្ម​​នៅ​ពេល​ខាង​មុខ​នេះ នឹង​មាន​​លើក​បដា​នៅ​តាម​ដង​ផ្លូវ​ទាមទារ​ឱ្យ​លោក ហ៊ុន ម៉ាណែត​ គោរព​សិទ្ធិមនុស្ស​និង​​បើក​លំហ​ប្រជាធិបតេយ្យ​ឡើង​វិញ​។

លោក លី ម៉េង​ឃៀង៖ «អីចឹង​យើង​អត់​ចង់​ឃើញ​ការ​ដឹក​នាំ​របៀប​នឹង​ទៀត​ទេ​។​សំខាន់​ទៅ​ទៀត​គឺ​គាត់​បាន​បិទ​សិទ្ធិ​សេរីភាព​គណបក្ស​នយោបាយ​ជា​ពិសេស​គណបក្ស​ភ្លើង​ទៀន​មិន​ឱ្យ​ចូល​ប្រកួត​រាល់​ការ​បោះឆ្នោត​​ដោយ​គាត់​ខ្លាច​ការ​បាត់បង់​អំណាច​។ អីចឹង​​គាត់​ខំប្រឹង​ធ្វើ​ទង្វើ​ទាំង​អស់​ហ្នឹង​ធ្វើ​ឱ្យ​​យើង​ជា​អ្នក​ប្រជាធិបតេយ្យ​ជា​អ្នក​ភៀស​ខ្លួន​នយោបាយ​​ យើង​មិន​អាច​នៅ​ស្ងៀម​បាន​ទេ​ យើង​ត្រូវ​តែ​កៀរគរ​កម្លាំង​ប្រជាពលរដ្ឋ​ដែល​ស្នេហា​ជាតិ​ ស្នេហា​ប្រជាធិបតេយ្យ ស្នេហា​ប្រទេស​ជាតិ​ឱ្យ​គាត់​ចូលរួម​ជា​មួយ​ពួក​យើង»

​​​​ការ​កៀរគរ​ពលករ​ត្រៀម​ធ្វើ​បាតុកម្ម​នេះ​ បន្ទាប់​ពី​ពួកគេ​ទទួល​ដំណឹង​ថា​ លោក​ ហ៊ុន ម៉ាណែត​ គ្រោង​​​ទៅ​ទស្សនកិច្ច​​នៅ​ប្រទេស​ថៃ​នៅ​ថ្ងៃ​ទី​៧​កុម្ភៈ​ខាង​មុខ។

ទាក់​ទង​នឹង​បញ្ហា​នេះ​ អ្នក​នាំ​ពាក្យ​គណបក្ស​ប្រជាជន​កម្ពុជា​កម្ពុជា​ លោក សុខ ឥសាន​ ប្រាប់​វិទ្យុ​អាស៊ី​សេរី ​ថា ​រដ្ឋាភិបាល​​ក្រុង​ភ្នំពេញ​ដឹក​នាំ​ប្រទេស​តាម​បែប​ប្រជាធិបតេយ្យ​​រួច​ទៅ​ហើយ​ ដូច្នេះ​លោក​ មិន​ព្រួយបារម្ភ​​ការ​ធ្វើ​បាតុកម្ម​របស់​​ជន​ភៀស​ខ្លួន​និង​ពលករ​ខ្មែរ​នៅ​ប្រទេស​ថៃ​​នោះ​ឡើយ។

លោក សុខ ឥសាន៖ «ថា​តើ​លទ្ធផល​បាន​អី​ខ្លះ​អ្នក​ធ្វើ​បាតុកម្ម​ ហើយ​រដ្ឋាភិបាល​​ដែល​ដំណើរ​ទស្សនកិច្ច​ទៅ​ថៃ​នឹង​​បាន​ស្អី​ខ្លះ​អា​ហ្នឹង​យើង​ប្រៀបធៀប​​ទៅ​។​វា​បាន​តែ​បន្ទរ​បាន​តែ​ប្រមូល​ហើយ​​យើង​កំពុង​តែ​មាន​សិទ្ធិ​ស្រែក​ យើង​កំពុង​មាន​សិទ្ធិ​ដើរ​ហើរ​គ្រប់​កន្លែង​ហើយ​យើង​វ៉ៃ​ប្រហារ​ថា​គេ​នឹង​អត់​គោរព​សិទ្ធិមនុស្ស​អត់​មាន​​ប្រជាធិបតេយ្យ​ប្រទេស​កម្ពុជា​កំពុង​មាន​រាជាធិបតេយ្យ​»

ទោះ​ជា​យ៉ាង​ណា មន្ត្រី​សម្របសម្រួល​សមាគម​ការពារ​សិទ្ធិមនុស្ស​អាដហុក​(Adhoc) ខេត្ត​បាត់ដំបង លោក យិន ម៉េងលី ​យល់​ឃើញ​ថា ​គម្រោង​ធ្វើ​បាតុកម្ម​របស់​ជន​ភៀស​ខ្លួន​ខ្មែរ​នេះ​ជា​សិទ្ធិ​សេរីភាព​របស់​ប្រជាពលរដ្ឋ​ស្រប​តាម​រដ្ឋធម្មនុញ្ញ។​ ​លោក​បន្ថែម​ថា ​បាតុកម្ម​ពេល​ខាង​មុខ​​នេះ​​ជា​ការ​បញ្ជូន​សារ​ទៅ​សហគមន៍​អន្តរជាតិ​​ឱ្យ​មើល​ឃើញ​ថា​​ពលរដ្ឋ​ខ្មែរ​រស់​នៅ​ក្រៅ​ប្រទេស​​កាន់​តែ​ច្រើន​ឡើង​​មិន​ពេញ​ចិត្ត​នឹង​ការ​ដឹក​នាំ​របស់​លោក ហ៊ុន ម៉ាណែត​ឡើយ​​។​

លោក យិន ម៉េងលី៖ «វា​ជា​ភាព​អាម៉ាស់​​មួយ​ដែរ​។​ខ្ញុំ​មាន​ការ​ព្រួយបារម្ភ​ដែរ​ ដែល​​ប្រមុខ​រដ្ឋាភិបាល​ទៅ​ទីណា​យើង​ឮសូរ​តែ​មាន​ការ​តវ៉ា​ ប្រហែល​ជា​មាន​បញ្ហា​ដូច​ពួកគាត់​លើក​ឡើង​មែន​ឬ​មួយ​យ៉ាង​ម៉េច​។​អា​នេះ​ត្រូវ​តែ​ធ្វើ​ការ​ពិនិត្យ​ឡើង​វិញ​​បើ​អីចឹង​ទេ​វា​ពិបាក​មុខ​ម៉ាត់​របស់​​រដ្ឋាភិបាល​នៅ​លើ​ឆាក​អន្តរជាតិ​ឃើញ​តែ​ប្រជាពលរដ្ឋ​​របស់​​ធ្វើ​ការ​តវ៉ា​យើង​អត់​​ឃើញ​មាន​រដ្ឋាភិបាល​នៃ​ប្រទេស​ផ្សេង​ទៀត​ទេ​»​​​

លោក​ហ៊ុន ម៉ាណែត បាន​កាន់​តំណែង​ជា​នាយករដ្ឋមន្ត្រី​អស់​រយៈ​ពេល​៥​ខែ​ហើយ​ ក៏​ប៉ុន្តែ​​អ្នក​ឃ្លាំមើល​លើក​ឡើង​ថា រដ្ឋាភិបាល​​មិន​ទាន់​បាន​ដោះស្រាយ​បញ្ហា​ភាព​អត់ឃ្លាន​របស់​​ពលរដ្ឋ​​​​បាន​នៅ​ឡើយ​ទេ​ ខណៈ ពលរដ្ឋ​មួយ​ចំនួន​​រង​ការ​ធ្វើ​ទុក្ខបុកម្នេញ​ពី​សំណាក់​អាជ្ញាធរ​ដដែល។ ថ្មី​ៗ​នេះ​អាជ្ញាធរ​បាន​ចាប់​អ្នក​រិះគន់​ភាព​អសកម្ម​របស់​គណបក្ស​កាន់​អំណាច​ និង​មន្ត្រី​រដ្ឋាភិបាល​ដាក់​ពន្ធនាគារ​​ជា​បន្តបន្ទាប់​ ជា​ឧទាហរណ៍​ ប្រជាពលរដ្ឋ​​ម្នាក់​នៅ​ខេត្ត​បន្ទាយមានជ័យ​ គឺ​លោក កង សារ៉ន ​ត្រូវ​បាន​តុលាការ​កាត់​ទោស ​​ដាក់​ពន្ធនាគារ​៣​ឆ្នាំ​និង​ ​ការ​ចាប់​ខ្លួន​អ្នក​ជំនាញ​កសិកម្ម​លោក នី ណាក់ ជា​ដើម​។ តុលាការ​បាន​ចោទ​ប្រកាន់​ពួកគេ​​ពី​បទ​ញុះញង់​ ពាក់ព័ន្ធ​នឹង​ការ​​បញ្ចេញ​មតិ​រិះគន់​​រដ្ឋាភិបាល​តាម​បណ្ដាញ​សង្គម​ហ្វេសប៊ុក​(Face book)​

​​ថ្មីៗ​នេះ​នាយករង​ប្រចាំ​តំបន់​អាស៊ី នៃ​អង្គការ​ឃ្លាំមើល​សិទ្ធិមនុស្ស​អន្តរជាតិ យូមែន រ៉ៃត៍ វ៉ច្ឆ (Human Right Watch) លោក ហ្វីល រ៉ូបឺតសុន (Phil Robertson) ​បាន​ចាត់​ទុក​​ការ​ធ្វើទុក្ខបុកម្នេញ​ទៅ​លើ​​អ្នក​រិះគន់​​ភាព​អសកម្ម​របស់​រដ្ឋាភិបាល​​ឆ្លុះបញ្ចាំង​ថា រដ្ឋាភិបាល​លោក ហ៊ុន ម៉ាណែត កំពុង​ដើរ​​តាម​គន្លង​ដឹកនាំ​តាម​បែប​ផ្ដាច់ការ​ដូច​ឪពុក​របស់​លោក តាមរយៈ​ការ​រឹតត្បិត​ទៅ​លើ​សេរីភាព​បញ្ចេញមតិ​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។