លោក ស៊ាង ចែត ត្រូវបានដោះលែងបន្ទាប់ពីតុលាការទើបតែផ្ដន្ទាទោសដាក់គុក៥ឆ្នាំ
2016.12.08
មេឃុំគណបក្សប្រឆាំងលោក ស៊ាង ចែត (រូបកណ្ដាលលើកដៃ) ពេលចេញពីពន្ធនាគារព្រៃស នៅថ្ងៃទី៨ ខែធ្នូ ឆ្នាំ២០១៦។
RFA
មេឃុំស្រក ស្រុកកំពង់សៀម ខេត្តកំពង់ចាម ត្រូវបានដោះលែងឲ្យមានសេរីភាពវិញហើយ កាលពីព្រឹកថ្ងៃទី៨ ខែធ្នូ ក្រោយពីបក្សទាំងពីរបានបើកផ្លូវចរចាវិបត្តិនយោបាយដែលអូសបន្លាយជាងពាក់កណ្ដាលអាណត្តិ។ ការផ្ដល់សម្បទាឡើងវិញឲ្យមេឃុំរបស់បក្សប្រឆាំងនេះ បន្ទាប់ពីមានព្រះរាជក្រឹត្យរបស់ព្រះមហាក្សត្រ ដែលព្រះអង្គព្រះរាជទានលើកលែងទោស តាមរយៈការសម្របសម្រួលផ្នែកនយោបាយរួចមក។ អ្នកវិភាគបញ្ហាសង្គមយល់ឃើញថា នេះជាការវិវឌ្ឍន៍មួយដ៏ល្អសម្រាប់បរិបទនយោបាយ ក្នុងដំណាក់កាលចុងក្រោយនេះ ហើយអ្នកដែលចំណេញពីការត្រូវរ៉ូវគ្នានេះឡើងវិញ គឺពលរដ្ឋ។
ការដោះលែងលោក ស៊ាង ចែត នៅពេលនេះ ស្របពេលប្រធានស្ដីទីគណបក្សប្រឆាំងក៏បានបង្ហាញវត្តមានជាលើកដំបូងរបស់ខ្លួនដែរនៅពន្ធនាគារព្រៃស ដើម្បីជួបសកម្មជនទាំង ១៥រូប ដែលកំពុងជាប់ឃុំ។
ថ្វីបើលោក កឹម សុខា បានលេចមុខជាថ្មីទៀតកាលពីព្រឹកថ្ងៃទី៨ ធ្នូ នៅចំពោះមុខអ្នកគាំទ្រជាច្រើននាក់ក៏ដោយចុះ អនុប្រធានបក្សប្រឆាំងរូបនេះ ពុំបានថ្លែងសារនយោបាយអ្វីឡើយ ទាំងមុន និងក្រោយចេញពីគុកព្រៃសវិញ ដោយគ្រាន់តែនិយាយយ៉ាងខ្លីថា ទិដ្ឋភាពនយោបាយនៅពេលនេះវិវឌ្ឍន៍ទៅល្អហើយ។
យ៉ាងនេះក្ដី លោក អ៊ូ ច័ន្ទឫទ្ធិ មន្ត្រីជាន់ខ្ពស់គណបក្សសង្គ្រោះជាតិ ឲ្យដឹងក្រោយចេញពីសួរសុខទុក្ខសកម្មជនទាំង ១៥រូបនៅពន្ធនាគារព្រៃស ថា ជំនួបទ្វេភាគីរវាងលោក ហ៊ុន សែន និងលោក កឹម សុខា នៅវិមានរដ្ឋសភាកាលពីថ្ងៃទី៧ ធ្នូ គឺបានពិភាក្សាលម្អិតជុំវិញការដោះលែងអ្នកទោសនយោបាយមួយចំនួនរបស់បក្សប្រឆាំង រួមទាំងអ្នកការពារសិទ្ធិមនុស្សដែរ។ លោកបន្តថា «កំពុងតែជជែកពិភាក្សារកដំណោះស្រាយ ដើម្បីដោះស្រាយអ្នកដែលជាប់ពន្ធនាគារទាំងអ្នកការពារសិទ្ធិមនុស្ស ហើយនិងសកម្មជនគណបក្សសង្គ្រោះជាតិ។ អ្នកស្រី ទេព វន្នី នឹងដោះស្រាយពេលក្រោយទៀត»។
នៅថ្ងៃដោះលែងលោក ស៊ាង ចែត គេឃើញថ្នាក់ដឹកនាំបក្សប្រឆាំង បានរៀបចំកម្រងផ្កាបំពាក់ឲ្យមេឃុំរូបនេះ មុននឹងរៀបចំនិមន្តព្រះសង្ឃសូត្រជយន្តោនៅមុខខ្លោងទ្វារចូលពន្ធនាគារ និងពិធីស្រោចទឹកតាមបែបព្រះពុទ្ធសាសនាមួយជាន់ទៀត នៅក្នុងវត្តអង្គមេត្រី ដែលនៅមិនឆ្ងាយពីពន្ធនាគារព្រៃសនោះដែរ។
លោក ស៊ាង ចែត ដែលត្រូវបានតុលាការក្រុងភ្នំពេញផ្ដន្ទាទោសដាក់ពន្ធនាគារព្រៃស ៥ឆ្នាំ និយាយផង និងសម្រក់ទឹកភ្នែកផងថា លោកនៅតែហួសចិត្តចំពោះការចោទប្រកាន់របស់អង្គភាពប្រឆាំងអំពើពុករលួយ របស់លោក ឱម យ៉ិនទៀង ដែលរកឃើញថា លោកមានបទល្មើសក្នុងអំពើស៊ីសំណូកសូកប៉ាន់។ លោកបន្ថែមថា តាមពិត រឿងលុយ ៥០០ដុល្លារនោះ គឺគ្រាន់តែជាលុយដែលគេផ្ញើបន្តឲ្យម្ដាយរបស់អ្នកនាង ខុម ចាន់តារាទី ហៅស្រីមុំ ប៉ុណ្ណោះ។ បើទោះជាបែបណា មេឃុំមកពីបក្សប្រឆាំងរូបនេះ មិនប្តឹងផ្តល់អ្វីឡើយ ហើយនៅតែរក្សាជំហរនៅក្នុងបក្សដដែល ជាពិសេសស្នើសុំឲ្យគណបក្សនយោបាយទាំងពីរ និង គ.ជ.ប រក្សាបេក្ខភាពរបស់លោកឲ្យនៅត្រឹមជាមេឃុំទៀតចុះ។ លោកបន្តថា «ខ្ញុំសូមឲ្យ គ.ជ.ប បន្ថែមឈ្មោះតែមួយគត់ តែប្រជាពលរដ្ឋដែលនៅខ្វះខាតប៉ុន្មានកុំតូចចិត្ត។ នេះជាការសំណូមពររបស់ខ្ញុំ។ ខ្ញុំមិនចង់បានធំបានអីមកលើទៀតទេ។ នេះជាឆន្ទៈរបស់ខ្ញុំ»។
អាស៊ីសេរី ពុំអាចសុំការបំភ្លឺជុំវិញសំណើរបស់លោក ស៊ាង ចែត នេះបានទេពីមន្ត្រីនាំពាក្យ គ.ជ.ប លោក ហង្ស ពុទ្ធា នៅថ្ងៃទី៨ ខែធ្នូ។
ទន្ទឹមនឹងនេះ មន្ត្រីជាន់ខ្ពស់បក្សប្រឆាំង លោក អេង ឆៃអ៊ាង បញ្ជាក់ថា បេក្ខភាពរបស់លោក ស៊ាង ចែត ក្នុងឋានៈជាមេឃុំ គឺពុំមានការប្រែប្រួលទេ។ លោកបន្ថែមថា នៅពេលមេឃុំរូបនេះទទួលបាននីតិសម្បទាឡើងវិញដូច្នេះហើយ គឺតួនាទីជាមេឃុំនេះ លោកទទួលបានដោយស្វ័យប្រវត្តិវិញដែរ។
ការលើកលែងទោសឲ្យលោក ស៊ាង ចែត នៅពេលនេះ ដោយព្រះរាជ្យក្រឹត្យរបស់ព្រះមហាក្សត្រ ធ្វើឡើងតែប៉ុន្មានថ្ងៃប៉ុណ្ណោះក្រោយពីប្រធានក្រុមប្រឹក្សាជំនុំជម្រះនៃតុលាការក្រុងភ្នំពេញ លោក កៅ វណ្ឌី ផ្ដន្ទាទោសដាក់ពន្ធនាគារ ៥ឆ្នាំ កាលពីថ្ងៃទី៥ ខែធ្នូ។
លោក អ៊ូ វីរៈ ប្រធានវេទិកាអនាគត យល់ឃើញថា នេះជាសញ្ញាវិជ្ជមានសម្រាប់យុទ្ធសាស្ត្រនយោបាយ ប៉ុន្តែអ្វីដែលជាការព្រួយបារម្ភនោះ គឺប្រាកដណាស់នៅមុនការបោះឆ្នោតឆ្នាំ២០១៨ ការខ្វែងគំនិតផ្នែកនយោបាយ វានឹងចាប់ផ្ដើមជាថ្មីឡើងវិញ។ លោកមើលឃើញថា ភាពចាស់ទុំផ្នែកនយោបាយនៅកម្ពុជា នៅតែផុយស្រួយនៅឡើយ បើទោះជាម្ខាងៗប្រកាន់យកគោលការណ៍វប្បធម៌សន្ទនាយ៉ាងណាក្ដី។ លោកបន្តថា «ទន្ទឹមគ្នានឹងដែរ ចំពោះខ្ញុំ ទោះបីស្ថានភាពថ្នាក់ជាតិមានរឹងមាំ មានភាពវិជ្ជមានក៏ដោយ ខ្ញុំមើលទៅមូលដ្ឋាននៃការប្រកួតប្រជែងគ្នារវាងបក្សទាំងពីរ នៅតែមានឧបសគ្គពេលខាងមុខទៀត»។
ទាក់ទិនទំនាស់ផ្នែកនយោបាយនេះ លោកនាយករដ្ឋមន្ត្រី ហ៊ុន សែន ធ្លាប់ព្រមានបក្សប្រឆាំងថា លោកនឹងកំដរបក្សប្រឆាំងគ្រប់ទម្រង់ ទាំងក្ដៅ ត្រជាក់ និងល្វីងជូរចត់។ យ៉ាងណា អ្នកវិភាគនយោបាយយល់ឃើញថា ការបន្ទន់ឥរិយាបថផ្នែកនយោបាយម្នាក់មួយជំហាននេះ មានន័យថា អ្នកដែលចំណេញ គឺពលរដ្ឋ និងប្រទេសជាតិ។
បទសម្ភាសន៍បន្ថែមជាមួយលោក ស៊ាង ចែត ក្រោយពីលោកចេញពីពន្ធនាគារ តាមការសាកសួររបស់លោក ជុន ច័ន្ទបុត្រ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
នយោបាយ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- តើកម្ពុជាអាចជម្នះសាងសង់ព្រែកជីកហ្វូណនតេជោបានដែរឬទេ?
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន