១ . មន្ត្រីសង្គមស៊ីវិលថា ក្រុមឧកញ៉ាឧបត្ថម្ភប្រាក់រាប់ម៉ឺនដុល្លារដើម្បីផលិតខ្សែភាពយន្តប្រវត្តិលោក ហ៊ុន សែន គឺដើម្បីប្រយោជន៍អាជីវកម្មរបស់ខ្លួន
មន្ត្រីអង្គការសង្គមស៊ីវិលយល់ឃើញថា ការឧបត្ថម្ភសាច់ប្រាក់របស់ក្រុមឧកញ៉ាដើម្បីផលិតខ្សែភាពយន្ត អំពីជីវប្រវត្តិរបស់លោកនាយករដ្ឋមន្ត្រី ហ៊ុន សែន មិនមែនធ្វើឡើងដោយចេញពីចិត្តនោះទេ តែគឺជាការបរិច្ចាគដើម្បីទទួលបាន ការការពារ ឬអត្ថប្រយោជន៍បន្ថែម លើអាជីវកម្មរបស់ពួកគេ។ ប្រតិកម្មនេះ ធ្វើឡើងក្រោយពីឧកញ៉ា និងមន្ត្រីជាន់ខ្ពស់រដ្ឋាភិបាលជាច្រើននាក់បានឧបត្ថម្ភសាច់ប្រាក់សរុបជាច្រើនលានដុល្លារ ដើម្បីជួយលោក ហ៊ុន សែន ដែលអ្នកសង្កេតការណ៍យល់ឃើញថា ជាកត្តាជំរុញនាំឱ្យមានអំពើពុករលួយកាន់តែច្រើនឡើង។ អានព័ត៌មានពិស្តារ ...
២ . លោក អាឡិកថា ក្រុមមនុស្សដែលស្ថិតក្នុងបញ្ជីចូលរួមបរិច្ចាគថវិកាជួយហ៊ុន សែន ថតកុន នោះ អាចជាចំណុចស៊ើបអង្កេតអំពីករណីពុករលួយលួចទ្រព្យសម្បត្តិជាតិ
ស្ថាបនិកអង្គការមាតាធម្មជាតិ លោក អាឡិកហាន់ដ្រូ ហ្គន់ហ្សាឡេស ដេវិតសឹន (Alejandro Gonzalez Davidson) គាំទ្រសង្គមស៊ីវិលដែលលើកឡើងថា ការបរិច្ចាគប្រាក់របស់ក្រុមឧកញ៉ា និងមន្រ្តីរដ្ឋាភិបាល លើការផលិតខ្សែភាពយន្ត អំពីជីវប្រវត្តិរបស់លោកនាយករដ្ឋមន្ត្រី ហ៊ុន សែន នោះ អ្នកខ្លះធ្វើឡើងដោយមានសំពាធ និងអ្នកខ្លះទៀត ឆ្លៀតឱកាសកេងចំណេញដើម្បីប្រយោជន៍ផ្ទាល់ខ្លួន។ ទោះយ៉ាងណា លោកថា គេអាចសម្គាល់លើក្រុមមនុស្សដែលស្ថិតក្នុងបញ្ជីចូលរួមបរិច្ចាគនោះ មួយចំនួនអាចជាចំណុចស៊ើបអង្កេតអំពីករណីពុករលួយលួចទ្រព្យសម្បត្តិជាតិ។
[ ទស្សនាបទសម្ភាសន៍ជាមួយលោក អាឡិក Opens in new window ]
៣ . លោក ហ៊ុន សែន អំពាវនាវឲ្យរួមគ្នាប្រឆាំងការរំលោភបំពានផ្លូវភេទលើក្មេងស្រី
ប្រមុខរដ្ឋាភិបាលកម្ពុជាអំពាវនាវឲ្យរួមគ្នាប្រឆាំងការរំលោភបំពាននិងការជួញដូរផ្លូវភេទលើក្មេងស្រី។ មន្ត្រីសង្គមស៊ីវិល ជំរុញឲ្យរដ្ឋាភិបាលត្រូវតែពង្រឹងការអនុវត្តច្បាប់ដែលមានស្រាប់ឱ្យមានប្រសិទ្ធភាពនិងលុបបំបាត់គ្រឿងញៀន រឿងអាសអាភាសឈប់ផ្សព្វផ្សាយគ្រឿងស្រវឹងនិងរកវិធានការទប់ស្កាត់ដើមហេតុផ្សេងៗទៀតដែលនាំឱ្យមានអំពើរំលោភសេពសន្ថវៈលើកុមារី។
៤ . ក្រុមកូដករណាហ្គាវើលដ៍រំពឹងថា ឆ្នាំ២០២៣ នឹងមានដំណោះស្រាយការងារ
ក្រុមកូដករនៃក្រុមហ៊ុនបនល្បែងកាស៊ីណូណាហ្គាវើលដ៍ (NagaWorld) រំពឹងថា ក្នុងឆ្នាំ២០២៣ រដ្ឋាភិបាលនឹងចេញមុខដោះស្រាយបញ្ចប់វិវាទការងារ មុននឹងមានការបោះឆ្នោតជ្រើសរើសតំណាងរាស្ត្រ។ មន្ត្រីសិទ្ធិមនុស្សយល់ថា បើរដ្ឋាភិបាល ដោះស្រាយវិវាទការងារនេះប្រកបយុត្ដិធម៌ វាក៏ជាចំណុចវិជ្ជមានមួយសម្រាប់កម្ពុជា។ អានព័ត៌មានពិស្តារ ...
៥ . ព្រះសង្ឃ និងសិស្សានុសិស្សប្រឡងថ្នាក់ពុទ្ធិកសិក្សាដើម្បីរក្សាអក្សរសាស្ត្រជាតិនៅកម្ពុជាក្រោម
ព្រះសង្ឃ និងសិស្សានុសិស្ស ដែលសិក្សាតាំងពីខែឧសភា ឆ្នាំ២០២២ ប្រឡងបញ្ចប់ថ្នាក់ពុទ្ធិកសិក្សាផ្នែកភាសាបាលី នៅដើមឆ្នាំ២០២៣នេះហើយ។ ការប្រឡងបិទវគ្គសិក្សានេះ គឺធ្វើឡើងគ្រប់វត្តអារាម នៅកម្ពុជាក្រោម ដែលបានបើកបង្រៀនភាសាបាលី ដល់សិស្សានុសិស្ស ដើម្បីថែរក្សាអក្សរសាស្ត្រខ្មែរឲ្យគង់វង្ស។ អានព័ត៌មានពិស្តារ ...
៦ . រដ្ឋាភិបាលមិនទាន់ឆ្លើយតប ការដាក់ញត្តិរបស់សមាគមគ្រូបង្រៀនកម្ពុជាឯករាជ្យ ស្នើសុំឱ្យដោះលែងអ្នកទោសមនសិការទាំងអស់
រដ្ឋាភិបាលមិនទាន់ឆ្លើយតប សំណើរបស់សមាគមគ្រូបង្រៀនកម្ពុជាឯករាជ្យ ដែលស្នើសុំឱ្យរដ្ឋាភិបាលដោះលែងអ្នកទោសមនសិការឡើយទេ។ កាលពីថ្ងៃទី៣០ ខែធ្នូ សមាគមគ្រូបង្រៀនកម្ពុជាឯករាជ្យ អតីតអ្នកទោសមនសិការ ក្រុមស្ត្រីថ្ងៃសុក្រ និងបុគ្គលិកក្រុមហ៊ុនណាហ្គាវើលដ៍ (Naga World) ប្រមាណ១០០នាក់ បានដើរហែក្បួន ពីទីលានប្រជាធិបតេយ្យ ទៅសាលាដំបូងរាជធានីភ្នំពេញ និងទៅខុទ្ទកាល័យនាយករដ្ឋមន្ត្រី ហ៊ុន សែន ដើម្បីដាក់ញត្តិទាមទារដោះលែងគ្រូបង្រៀន និងអ្នកទោសមនសិការដែលកំពុងជាប់ឃុំនៅក្នុងពន្ធនាគារ។ អានព័ត៌មានពិស្តារ ...
៧ . យុវជននិងពលរដ្ឋរិះគន់ចំពោះការផ្សព្វផ្សាយគ្រឿងស្រវឹងគគ្រឹកគ្រេងនៅខេត្តសៀមរាប
យុវជននិងពលរដ្ឋមួយចំនួនរិះគន់ខ្លាំងៗចំពោះអាជ្ញាធរដែលបណ្តោយឱ្យផ្សព្វផ្សាយគ្រឿងស្រវឹងគគ្រឹកគ្រេងនៅខេត្តសៀមរាប។ ការលើកឡើងនេះ ធ្វើឡើងក្រោយពីគេឃើញក្រុមហ៊ុនផ្សព្វផ្សាយគ្រឿងស្រវឹងព្រោងព្រាតនៅតាមដងផ្លូវសួនច្បារនិងទីសាធារណៈនានានៅក្នុងក្រុងសៀមរាបដែលជាតំបន់ទេសចរណ៍វប្បធម៌របស់ជាតិ។
៨ . អាជ្ញាធរខេត្តបាត់ដំបងជូនដំណឹងដល់ពលរដ្ឋនៅតាមដងស្ទឹងសង្កែឱ្យបង្កើនការប្រុងប្រយ័ត្ន
ប្រជាពលរដ្ឋនៅឃុំព្រែកនរិន្ទ ឃុំព្រែកខ្ពប ឃុំព្រែកហ្លួង ឃុំព្រៃចាស់ និងឃុំកោះជីវាំង ខេត្តបាត់ដំបង ព្រួយបារម្ភ ពីការណ៍ដែលអាជ្ញាធរបើកទ្វារបង្ហូរទឹកធ្វើឱ្យមានផលប៉ះពាល់ដល់ការរស់នៅរបស់ពួកគាត់។ ក្ដីបារម្ភនេះធ្វើឡើងក្រោយពីអាជ្ញាធរស្រុកឯកភ្នំបានជូនដំណឹងពីការបើកទំនប់ទឹកសាលាតាអន នៅដងស្ទឹងសង្កែ ស្រុកឯកភ្នំ
ចាប់ពីថ្ងៃទី០១ ខែមករា ដើម្បីរៀបចំស្ថាបនាផ្លូវបេតុងតាមជម្រាលស្ទឹងសង្កែ។
៩ . ពលរដ្ឋមួយចំនួននាំកូនៗមកស៊ីឈ្នួលដកដំឡូងនៅតាមព្រំដែនដើម្បីរកប្រាក់ដោះស្រាយជីវភាពគ្រួសារ
ពលរដ្ឋមួយចំនួននាំកូនៗធ្វើចំណាកស្រុកមកស៊ីឈ្នួលដកដំឡូងនៅតាមព្រំដែនដើម្បីរកប្រាក់ដោះស្រាយជីវភាពគ្រួសារខណៈកូនៗពួកគេមិនបានចូលសាលារៀន។ មន្ត្រីសង្គមស៊ីវិលយល់ថា រដ្ឋាភិបាល និងស្ថាប័នពាក់ព័ន្ធគួររកមូលហេតុដែលពលរដ្ឋចំណាកស្រុកនិងរកដំណោះស្រាយច្បាស់លាស់ដើម្បីទប់ស្កាត់ការធ្វើចំណាកស្រុកនិងកាត់បន្ថយសិស្សបោះបង់ការសិក្សា៕ ទស្សនាវីដេអូ
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។