១ . គណបក្សភ្លើងទៀន ប្រជុំថ្នាក់ដឹកនាំតាមរាជធានី - ខេត្ត ក្រោយការធ្វើទុក្ខបុកម្នេញពីគណបក្សកាន់អំណាច
គណៈកម្មាធិការអចិន្ត្រៃយ៍នៃគណបក្សភ្លើងទៀនបានបន្តជួបប្រជុំជាមួយថ្នាក់ដឹកនាំតាមរាជធានី-ខេត្ត ដើម្បីពិភាក្សាលើស្ថានភាពនយោបាយបច្ចុប្បន្ន ក្រោយថ្នាក់ដឹកនាំសំខាន់ៗ ក្នុងបក្សប្រឆាំងមួយនេះទទួលរងពាក្យបណ្ដឹងបន្តបន្ទាប់ពីគណបក្សកាន់អំណាច។ អ្នកតាមដានសង្គម មើលឃើញថាគណបក្សភ្លើងទៀននឹងប្រឈមជាមួយព្យុះនយោបាយមួយនេះកាន់តែខ្លាំង ប្រសិនបើក្បាលម៉ាស៊ីនដឹកនាំនិងសមាជិក អ្នកគាំទ្រគ្មានយុទ្ធសាស្ត្ររឹងមាំទេនោះ។ អានព័ត៌មានពិស្តារ ...
២ . លោក រ៉ុង ឈុន នឹងដឹកនាំធ្វើធម្មយាត្រាលើកកម្ពស់សីលធម៌សង្គមនៅសប្តាហ៍ក្រោយ
ប្រធានសហភាពសហជីពកម្ពុជាលោក រ៉ុង ឈុន ប្រកាសថា លោកនឹងដឹកនាំធ្វើធម្មយាត្រានៅសប្តាហ៍ក្រោយដើម្បីលើកកម្ពស់សីលធម៌សង្គម។ ទន្ទឹមនឹងនេះ លោកក៏អំពាវនាវដល់ប្រជាពលរដ្ឋខ្មែរចូលរួម និងទទួលស្វាគមន៍ធម្មយាត្រានៅតាមដងផ្លូវឱ្យបានច្រើនកុះករ ដើម្បីលើកមុខមាត់ជាតិឡើងវិញ។ មន្ត្រីសង្គមស៊ីវិលជំរុញដល់អាជ្ញាធរជួយសម្របសម្រួល និងអនុញ្ញាតឱ្យហែធម្មយាត្រានោះដោយសន្តិវិធី។ អានព័ត៌មានពិស្តារ ...
៣ . យុវជនបរិស្ថានបារម្ភពីសុវត្ថិភាពក្រោយពីអាជ្ញាធរតាមឃ្លាំមើលពួកគេគ្រប់ទីកន្លែង
ក្រុមយុវជនបរិស្ថានបារម្ភពីសុវត្ថិភាពក្រោយពីអាជ្ញាធរមួយចំនួនតាមឃ្លាំមើលពួកគេគ្រប់ទីកន្លែងដោយសារតែធ្វើសកម្មភាពផ្សព្វផ្សាយពីកោះកុងក្រៅកាលពីថ្មីៗនេះ។ អ្នកតស៊ូមតិបញ្ហាបរិស្ថានថាការតាមដានរបស់អាជ្ញាធរនេះជាទង្វើអាក្រក់មួយនៅក្នុងសង្គមដែលធ្វើឱ្យប៉ះពាល់ដល់សិទ្ធិសេរីភាពបញ្ចេញមតិរបស់យុវជន។
៤ . នគរបាលម្នាក់ និងជាម្ចាស់ហាងពន្លឺជាប់ចិត្តនៅក្រុងតាខ្មៅរងការចោទថាប្រើកាំភ្លើងភ្ជង់ក្បាលលើយុវជនម្នាក់
ពលរដ្ឋចោទមេប៉ូលិសសក្តិបួនម្នាក់នៅក្រុងតាខ្មៅ ខេត្តកណ្តាល ថា បានយកកាំភ្លើងខ្លីភ្ជង់ក្បាលគំរាមបាញ់សម្លាប់និងប្រើហិង្សាលើខ្លួន។ មន្ត្រីឃ្លាំមើលសិទ្ធិមនុស្សចាត់ទុកករណីនេះថាជាទង្វើល្មើសច្បាប់និងស្នើឱ្យអាជ្ញាធរមានសមត្ថកិច្ចចាត់វិធានការលើបញ្ហានេះជាបន្ទាន់។
៥ . ពលរដ្ឋនៅតំបន់ព្រំដែន នៅខេត្តបន្ទាយមានជ័យ ទទូចដល់អាជ្ញាធរធ្វើកាតព្រំដែនដល់កម្មករនិងអាជីវកដើម្បីងាយស្រួលចេញចូលប្រកបមុខរបរនៅផ្សារ
កម្មករអូសរទេះដឹកទំនិញនៅច្រកប៉ោយប៉ែតស្នើដល់អាជ្ញាធរពាក់ព័ន្ធធ្វើកាតព្រំដែនដើម្បីសម្រួលដល់ពួកគាត់ប្រកបរបរដោះស្រាយជីវភាពរស់នៅប្រចាំថ្ងៃ។ សង្គមស៊ីវិលយល់ឃើញថាអាជ្ញាធរគួរគិតគូរដល់កម្មករអាជីវកប្រចាំនៅច្រកទ្វារព្រំដែនដើម្បីសម្រួលការឆ្លងដែនរបស់ប្រជាពលរដ្ឋនៅតំបន់ព្រំដែនងាយស្រួលប្រកបមុខរបររកប្រាក់ចំណូលដោះស្រាយជីវភាព។
៦ . មន្ត្រីសង្គមស៊ីវិលជំរុញឱ្យពលរដ្ឋចេះគិតស៊ីជម្រៅ
មន្ត្រីអង្កការសង្គមស៊ីវិលនិងអ្នកពង្រឹងសិទ្ធិអំណាចយុវជនលើកឡើងថាប្រជាពលរដ្ឋជាច្រើននៅមិនទាន់ចេះគិតពិចារណាឱ្យបានស៊ីជម្រៅនៅឡើយទេដែលងាយក្លាយជាជនរងគ្រោះដោយអំពើបោកប្រាស់ផ្សេងៗ។ពួកគាត់ជុំរុញឱ្យពលរដ្ឋត្រូវចេះគិតពិចារណាស៊ីជម្រៅដោយមានហេតុផលនិងភស្តុតាងដើម្បីការពារខ្លួនពីការបោកប្រាស់ផ្សេងៗជាពិសេសពីអ្នកនយោបាយប្រជាភិថុតិ។ ដើម្បីគិតឱ្យបានស៊ីជម្រៅតើប្រជាពលរដ្ឋត្រូវមានទម្លាប់និងការគិតបែបណាខ្លះ?
៧ . កម្ពុជាប្រកាន់ជំហរប្រើប្រាស់ពាក្យ គុនខ្មែរ លើវិញ្ញាសាប្រដាល់ក្នុងការប្រកួតកីឡាស៊ីហ្គេម លើកទី៣២ ដែលកម្ពុជាធ្វើជាម្ចាស់ផ្ទះ
អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ (CAMSOC) លោក វ៉ាត់ ចំរើន អះអាងថា កម្ពុជាប្រកាន់ជំហរប្រើពាក្យ គុនខ្មែរ (Kun Khmer) ជំនួសឱ្យពាក្យថា មួយថៃ (Muay Thai) សម្រាប់វិញ្ញាសាប្រកួតប្រដាល់បើទោះបីភាគីថៃពហិការ។ បើទោះជាយ៉ាងណា លោក វ៉ាត់ ចំរើន បានបញ្ជាក់ថា ការប្រកាសមិនចូលរួមបែបនេះ ជាសិទ្ធិ សម្រេច របស់ប្រទេសថៃ ហើយកម្ពុជាក៏នឹងមិនចូលរួមការប្រកួតព្រឹត្តិការណ៍ ដែលធ្វើឡើងក្រោម ឈ្មោះ «Muay Thai» ដូចគ្នាដែរ។ លោកថា ពេលនេះមានប្រទេសចំនួន៦ហើយដែលនឹងចូលរួម ប្រកួតក្រោមវិញ្ញាសារគុនខ្មែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។