លោក រ៉ុង ឈុន នឹងដឹកនាំ​ធ្វើ​ធម្មយាត្រា​លើក​កម្ពស់​សីលធម៌​សង្គម​នៅ​សប្តាហ៍​ក្រោយ

ដោយ ទីន ហ្សាការីយ៉ា
2023.01.23
Share on WhatsApp
Share on WhatsApp
លោក រ៉ុង ឈុន នឹងដឹកនាំ​ធ្វើ​ធម្មយាត្រា​លើក​កម្ពស់​សីលធម៌​សង្គម​នៅ​សប្តាហ៍​ក្រោយ លោក រ៉ុង ឈុន ប្រធាន​សហភាព​សហជីព​កម្ពុជា​។
រូប៖ RFA

ប្រធាន​សហភាពសហជីពកម្ពុជា​លោក រ៉ុង ឈុន ប្រកាសថា ​លោក​នឹងដឹកនាំ​ធ្វើធម្មយាត្រា​នៅសប្តាហ៍ក្រោយ​ដើម្បី​លើកកម្ពស់​សីលធម៌សង្គម។ ទន្ទឹមនឹងនេះ លោក​ក៏​អំពាវនាវ​ដល់​ប្រជាពលរដ្ឋខ្មែរ​ចូលរួម និង​ទទួលស្វាគមន៍​ធម្មយាត្រា​នៅតាម​ដងផ្លូវ​ឱ្យបាន​ច្រើនកុះករ ដើម្បី​លើកមុខមាត់ជាតិ​ឡើងវិញ។ មន្ត្រីសង្គមស៊ីវិល​ជំរុញ​ដល់​អាជ្ញាធរ​ជួយ​សម្របសម្រួល និង​អនុញ្ញាត​ឱ្យ​ហែធម្មយាត្រានោះ​ដោយ​សន្តិវិធី។

សមាគមគ្រូបង្រៀនកម្ពុជាឯករាជ្យ​ប្រកាសថា ​ប្រធានសហភាពសហជីពកម្ពុជា​ លោក រ៉ុង ឈុន នឹង​ដឹងនាំធ្វើ​ធម្មយាត្រា​ក្នុងគោលបំណង​លើកកម្ពស់​សីលធម៌សង្គម​នៅថ្ងៃ​ទី០១ ខែកុម្ភៈ ខាងមុខនេះ។ សេចក្តីជូនដំណឹង​របស់សមាគមគ្រូបង្រៀនកម្ពុជាឯករាជ្យ​ចុះថ្ងៃទី២០ ខែមករា បានណែនាំ​ដល់​អ្នកចូលរួម​ធម្មយាត្រា​ត្រូវជួបជុំ​នៅម៉ោង​៨ព្រឹក ​ស្ថិតនៅទីតាំង​រូបសំណាក​លោកយាយពេញ​នៅ​រាជធានីភ្នំពេញ។ លិខិតដដែល​ឱ្យដឹងថា ​ធម្មយាត្រាថ្មើរជើងនេះ​ នឹង​ហែតាមបណ្តោយ​ផ្លូវជាតិ​លេខ៥ ឆ្ពោះទៅ​បូជនីយដ្ឋាន​ប្រវត្តិសាស្រ្ត​លោកឧញ៉ា ឃ្លាំង មឿង នៅខេត្តពោធិ៍សាត់ ដោយឆ្លងកាត់​ភូមិសាស្រ្ត​រាជធានីភ្នំពេញ ខេត្តកណ្តាល កំពង់ស្ពឺ និង​ចុងក្រោយ​ខេត្តពោធិ៍សាត់។ កម្មវិធីនោះ ​សមាគម​នឹង​ថ្លែងសារ​សំខាន់ៗ និង​រៀបចំ​ពិធី​បែបសាសនាដែរ។

ប្រធានសហភាពសហជីពកម្ពុជា​ លោក រ៉ុង ឈុន ប្រាប់វិទ្យុអាស៊ីសេរី​នៅថ្ងៃទី២៣ ខែមករាថា ​សព្វថ្ងៃសីលធម៌​ក្នុងសង្គមខ្មែរ​កំពុងធ្លាក់ចុះខ្លាំង ជាពិសេស​កើតចេញ​ពី​ការថ្លែងសារ​អសុរោះ​របស់ថ្នាក់ដឹកនាំប្រទេស​ទៅកាន់ស្រទាប់​មហាជនទូទៅ​ដែលបញ្ហានេះ​កំពុង​ជះឥទ្ធពលរអាក្រក់​ដល់​ប្រជាពលរដ្ឋ និង​យុវជនខ្មែរ។ លោករំពឹងថា​ ធម្មយាត្រានេះ​នឹង​ក្លាយជា​មធ្យោបាយ​មួយ​ជួយជំរុញឱ្យ​មេដឹកនាំ និងពលរដ្ឋខ្មែរ​ទាំងអស់​មានសីលធម៌ និង​ចេះគោរពគ្នា​ទៅវិញទៅមក​ឡើងវិញ។

លោក រ៉ុង ឈុន៖ «សូមឱ្យបងប្អូនជនរួមជាតិ​ទាំងអស់​មកចូលរួម​ឱ្យបាន​ច្រើនកុះករ ជាពិសេស​បងប្អូន​ជនរួមជាតិ​ដែល​រស់នៅ​តាមដង​ផ្លូវជាតិ​លេខ៥ សូមចូលរួម​ទទួលស្វាគមន៍​ពេលឃើញ​ក្បួនធម្មយាត្រា​របស់យើង​ដង្ហែរឆ្លងកាត់​នៅតាម​តំបន់នីមួយៗ​ហ្នឹង»

សមាគមគ្រូបង្រៀនកម្ពុជាឯករាជ្យ​បានរំឮកថា​ ការធ្វើធម្មយាត្រានេះ​ធ្វើឡើង​ក្នុងគោលបំណង​លើកកម្ពស់ “សីលធម៌សង្គម” ដោយសារ​បច្ចុប្បន្ន​សីលធម៌សង្គម​បានធ្លាក់ចុះ​ខ្លាំង ស្របពេល​មេដឹកនាំ​ថ្លែងសន្ទរកថាម្តងៗ ប្រើពាក្យ​អសុរោះ ធ្វើទុក្ខបុកម្នេញ ចាប់ចង​សកម្មជន​នយោបាយ សង្គម មេសហជីព និងអ្នកនយោបាយ​ដាក់គុក​តាមទំនើងចិត្ត។

កាលពីថ្ងៃទី១៦ ខែមករា សមាគមគ្រូបង្រៀនកម្ពុជាឯករាជ្យ បានដាក់​លិខិត​ជូនដំណឹង​ទៅ​ក្រសួងមហាផ្ទៃ ដើម្បី​រៀបចំ​ការហែធម្មយាត្រា​ពីរាជធានីភ្នំពេញ​ទៅ​ខេត្តពោធិ៍សាត់ តែរហូតមកដល់​ពេលនេះ​ក្រសួងមហាផ្ទៃ​មិនទាន់ឆ្លើយតប​លិខិតនោះ​នៅឡើយ។

ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី ថ្លែងថា​ សមាគម​នឹងជួបជុំ​តាមការគ្រោងទុក បើទោះបី​អាជ្ញាធរ​មិនឆ្លើយតប​ក៏ដោយ។ អ្នកស្រីមើលឃើញថា ​សីលធម៌សង្គម​បានធ្លាក់ចុះ តាមរយៈ​ការជេរប្រមាថ និង​គំរាមកំហែង​បែបហិង្សា​ជាសាធារណៈ​ដែលបង្កផល​ប៉ះពាល់​ដល់​សង្គម​គួរឱ្យព្រួយបារម្ភ។ អ្នកស្រីសង្ឃឹមថា ​ធម្មយាត្រាខាងមុខនេះ​នឹងចូលរួម​ទប់ស្កាត់​ការប្រតិបត្តិប្រាចាក​ពីសីលធម៌​ដ៏ល្អផូរផង់​ក្នុងសង្គម​កាលពី​អតីតកាល។ អ្នកស្រីអំពាវនាវ​ដល់ពលរដ្ឋ គ្រូបង្រៀន យុវជន​ចូលរួម​និង​ទទួលស្វាគមន៍​ដំណើរធម្មយាត្រា​ឱ្យបាន​កុះករ ដើម្បីមុខមាត់​និង​ផលប្រយោជន៍​កម្ពុជា។

អ្នកស្រី អ៊ុក ឆាយ៉ាវី៖ «សមាគមរបស់យើង​គ្រាន់តែ​អំពាវនាវ​ហើយ​ពួកគាត់​បរិច្ចាគ លះបង់​ខ្លួនឯង​ដើម្បី​ធ្វើយ៉ាងណា​ឱ្យមាន​សីលធម៌សង្គម ពីព្រោះ​ពួកយើង​អត់បានគ្រោងឱ្យ​ថ្លៃហូបចុកទេ គឺ​ការលះបង់​របស់បងប្អូន​ប្រជាពលរដ្ឋ យើងសង្ឃឹមថា​មានប្រជាពលរដ្ឋ​ជាច្រើន​ដូចជា​លោកគ្រូ អ្នកគ្រូ យុវជន លះបង់​ដើរធម្មយាត្រា​ជាមួយ​សមគមគ្រូបបង្រៀនកម្ពុជាឯករាជ្យ​នៅថ្ងៃទី១ កុម្ភៈ​ខាងមុខនេះ»

វិទ្យុអាស៊ីសេរី​ពុំអាចទាក់ទង​អ្នកនាំពាក្យក្រសួងមហាផ្ទៃ​លោក ខៀវ សុភ័ក ដើម្បី​សុំអត្ថាធិប្បាយ​ជុំវិញបញ្ហានេះ​បានទេ​នៅថ្ងៃទី២៣ ខែមករា។

ទោះយ៉ាងណា​ប្រជាពលរដ្ឋខ្មែរ​មានសិទ្ធិ​ក្នុងការតវ៉ាសម្ដែងមតិ​ចំពោះអ្វីដែលមិនពេញចិត្ត និង​សុំឲ្យ​មានដំណោះស្រាយ។ រដ្ឋធម្មនុញ្ញកម្ពុជា មាត្រា ២ នៃច្បាប់​ស្ដីពី​បាតុកម្ម​ដោយសន្តិវិធី​ចែងថា ច្បាប់នេះ​មានគោលបំណង​ធានាការពារសេរីភាព​ខាងការបញ្ចេញមតិ​របស់ប្រជាពលរដ្ឋខ្មែរ តាមរយៈ​ការធ្វើបាតុកម្ម​ដោយសន្តិវិធី។ មាត្រា ៤ នៃច្បាប់ស្ដីពីបាតុកម្មដោយសន្តិវិធីដដែល​ចែងថា បាតុកម្ម​ដោយសន្តិវិធី សំដៅលើ​ការប្រមូលផ្ដុំ​គ្នា ឬ​ការដង្ហែក្បួន ដោយ​មនុស្ស​មួយក្រុម ដើម្បី​ទាមទារ តវ៉ា សម្ដែង​ជា​សាធារណៈ​នូវ​មនោសញ្ចេតនា គំនិត ឬឆន្ទៈ​របស់ខ្លួន​តាមរូបភាព ឬមធ្យោបាយផ្សេងៗ​ដោយសន្តិវិធី។

ជុំវិញរឿងនេះ នាយកទទួលបន្ទុកកិច្ចការទូទៅ​នៃអង្គការសិទ្ធិមនុស្ស​លីកាដូ(Licahdo) លោក អំ សំអាត​ មានប្រសាសន៍ថា​ ធម្មយាត្រា​លើកសីលធម៌សង្គមនេះ គឺជា​ការអនុវត្តសិទ្ធិសេរីភាព​ជាមូលដ្ឋាន​ធានាដោយ​រដ្ឋធម្មនុញ្ញ និង​ច្បាប់អន្តរជាតិ​ដែលកម្ពុជា​ទទួយកមក​អនុវត្ត។ លោកយល់ថា​ កម្មវត្ថុដែល អប់រំ​ការយល់ដឹង​របស់ប្រជាពលរដ្ឋឱ្យជៀសវាង​អំពើហិង្សា​ផ្លូវកាយផ្លូវចិត្តបែបនេះ​ជារឿងល្អ​ក្នុងសង្គម​ដែលអាជ្ញាធរ​មានសមត្ថកិច្ច​គួរជួយសម្របសម្រួល និង​អនុញ្ញាតឱ្យ​សមាគមនគ្រូបង្រៀនកម្ពុជាឯករាជ្យ​ធ្វើធម្មយាត្រា​ដោយសន្តិវិធី។

លោក អំ សំអាត​៖ «គោលបំណង​នៃការធ្វើធម្មយាត្រ​នេះ វា​មិនមានអ្វីខុស​ច្បាប់ ឬ​បង្កអ្វីទេ តែផ្ទុយទៅវិញ​វា​ជាការលើកកម្ពស់​សេរីភាព​ជា​មូលដ្ឋាន ឬជាការអប់រំ​ឱ្យ​បងប្អូនប្រជាពលរដ្ឋខ្មែរ​បាន​យល់ដឹង ហើយ​ងាកមក​ទម្រង់នៃអហិង្សា​ដោយ​មិនជ្រើសរើស​នូវ​អំពើហិង្សា​ណាមួយ​នោះទេ​បាទ»

កន្លងមក​សង្គ្រាមក្បាលមេក្រូ​របស់អ្នកនយោបាយ ដែលឈាន​ទៅដល់​ការប្រើប្រាស់​ពាក្យសម្ដី​មិនសមរម្យ ដូចជា​ការជេរប្រមាថ ការគំរាមកំហែង​បង្កប់ទៅ​ដោយអំពើហិង្សា ជាទូទៅ​គឺផ្ដើមចេញពី​លោកនាយករដ្ឋមន្រ្តី ហ៊ុន សែន។ ជាឧទាហរណ៍ ក្នុងជម្លោះនយោបាយ​រវាង​មេដឹកនាំ​បក្សកាន់អំណាច​លោក ហ៊ុន សែន ជាមួយនឹងអតីត​ប្រធានគណបក្សសង្គ្រោះជាតិ​លោក សម រង្ស៊ី កន្លងមក ដែល​លោក ហ៊ុន សែន បានប្រើ​ភាសាជេរប្រមាថ​ទៅលើ​លោក សម រង្ស៊ី ថា ជាជនក្បត់ជាតិ​៣ជំនាន់ជាដើម។ បើទោះបី លោកហ៊ុន សែន និយាយពាក្យ​អសុរោះ​ជេរប្រមាថ​អ្នកដទៃ​យ៉ាងនេះក្ដី ក៏មន្ត្រីហែហម​ដែល​អង្គុយនៅពីក្រោយ​លោក បែរជានាំគ្នា​ទះដៃសាទរ​សកម្មភាពគ្មានសីលធម៌​របស់មេដឹកនាំរូបនេះ​ទៅវិញ៕

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។