បក្សកាន់អំណាចគ្រោងធ្វើមហាសន្និបាតចុងខែនេះដើម្បីរកការគាំទ្រពីពលរដ្ឋ
2023.01.25
(រូបឯកសារ) អង្គមហាសន្និបាតគណបក្សប្រជាជនកម្ពុជា (CPP) ទូទាំងប្រទេស កាលពីឆ្នាំ២០១៨។
រូប៖ ហ្វេសប៊ុកគណបក្សប្រជាជនកម្ពុជា
គណបក្សប្រជាជនកម្ពុជា គ្រោងធ្វើមហាសន្និបាតវិសាមញ្ញ នៅចុងខែមករានេះ ដើម្បីរៀបចំយុទ្ធសាស្ត្ររកការគាំទ្រពីពលរដ្ឋក្នុងការបោះឆ្នោតនៅខែកក្កដាខាងមុខ។ មន្ត្រីសង្គមស៊ីវិលលើកឡើងថា យុទ្ធសាស្ត្រគណបក្សកាន់អំណាច ទំនងមិនអាចកែលំអនូវចំណុចខ្វះខាតរបស់ខ្លួនបានឡើយ ស្របពេលដែលការបោះឆ្នោតជាតិ កាន់តែខិតជិតមកដល់ហើយ។
លោកនាយករដ្ឋមន្ត្រី ហ៊ុន សែន និងជាប្រធានគណបក្សប្រជាជនកម្ពុជា ផងនោះ នឹងដាក់ផែនការយុទ្ធសាស្ត្ររកសំឡេងឆ្នោតឱ្យសមាជិកគណបក្សប្រជជនកម្ពុជាអនុវត្ត ប៉ុន្តែ គណបក្សនេះមិនទាន់បញ្ជាក់លម្អិតពីយុទ្ធសាស្ត្ររបស់ខ្លួននៅឡើយទេ។ ផែនការដរបស់លោក ហ៊ុន សែន នឹងប្រកាសក្នុងមហាសន្និបាតវិសាមញ្ញរបស់គណបក្សប្រជាជនកម្ពុជា គ្រោងរៀបចំនៅ ទីស្នាក់ការកណ្ដាលរបស់ខ្លួន ក្នុងរាជធានីភ្នំពេញនាថ្ងៃទី២៨ និងថ្ងៃទី២៩ ខែមករា ខាងមុខ ដោយមានការចូលរួមពីសមាជិកគណៈកម្មាធិការកណ្ដាល ជាង ៨០០នាក់ និងមន្ត្រីគណបក្សនេះ មកពីបណ្ដាខេត្តរាប់ពាន់នាក់ផ្សេងទៀត។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ឱ្យវិទ្យុអាស៊ីសេរីដឹងថ្ងៃទី២៥ ខែមករា ថា មហាសន្និបាតនេះ មានគោលបំណងសំខាន់ៗ ដូចជា ការត្រួតពិនិត្យលទ្ធផលការងារ ពីឆ្នាំ២០១៨ ដល់ឆ្នាំ២០២៣ ការពិនិត្យកម្មវិធីអភិវឌ្ឍន៍ប្រទេសពីឆ្នាំ២០២៤ ដល់ឆ្នាំ២០២៨ និងចំណុចសំខាន់មួយទៀត គឺការណែនាំទៅក្រុមការងារគណបក្សឱ្យពង្រឹងការងារចុះមូលដ្ឋាន ដើម្បីដណ្ដើមជ័យជម្នះក្នុងការបោះឆ្នោតនាពេលខាងមុខ។ លោក សុខ ឥសាន អះអាងថា គណបក្សប្រជាជនកម្ពុជា ជាគណបក្សស្អាតស្អំ ដូច្នេះ គឺមិនរៀបចំយុទ្ធសាស្ត្រណាមួយ ដែលជាការធ្វើទុក្ខបុកម្នេញលើគណបក្សគូប្រកួតប្រជែងរបស់ខ្លួនឡើយ។
លោក សុខ ឥសាន៖ «ដូច្នេះ ហើយបានគណបក្សត្រូវខិតខំយកអស់កម្លាំងកាយកម្លាំងចិត្ត ដើម្បីជំរុញការងារទាំងឡាយដែលជាតួនាទីភារកិច្ចរបស់គណបក្សកាន់អំណាចដើម្បីឱ្យប្រជាជនលោកមើលឃើញស្នាដៃ និងគុណសម្បត្តិទាំងឡាយរបស់គណបក្សហ្នឹងដោយធានាបានដោយគុណភាពនិងបរិមាណនិយាយរួមគឺគ្រប់វិស័យនៅក្នុងការងារដែលគណបក្សប្រជាជនដែលជាគណបក្សកាន់អំណាចនេះបានធ្វើ»។
បើទោះជា មន្ត្រីបក្សកាន់អំណាចអះអាងបែបនេះក្ដី ប៉ុន្តែ គណបក្សភ្លើងទៀន និងមន្ត្រីសង្គមស៊ីវិល រិះគន់ថា គណបក្សប្រជាជនកម្ពុជា បានធ្វើទុក្ខបុកម្នេញលើគណបក្សភ្លើងទៀន ដែលគូប្រកួតប្រជែងរបស់ខ្លួនមុនការបោះឆ្នោតជាបន្តបន្ទាប់។
ទាក់ទងយុទ្ធសាស្ត្ររបស់គណបក្សកាន់អំណាចនេះដែរ ប្រធានអង្គការសម្ព័ន្ធភាពការពារសិទ្ធិមនុស្សកម្ពុជា ហៅកាត់ថា ច្រាក់ (CHRAC) លោក រស់ សុដ្ឋា សង្កេតឃើញថា នៅរយៈពេលចុងក្រោយនេះ គណបក្សប្រជាជនកម្ពុជា បានធ្វើសកម្មភាពរបស់ខ្លួនមួយចំនួន ដើម្បីភ្ជាប់ខ្លួនជាមួយកសិករ កម្មកររោងចក្រ និងពលរដ្ឋនៅក្រៅប្រទេសជាដើម។ លោក រស់ សុដ្ឋា សង្កេតឃើញថា នៅប៉ុន្មានឆ្នាំចុងក្រោយនេះ គណបក្សកាន់អំណាច ហាក់បាត់បង់ប្រជាប្រិយភាពគួរឱ្យព្រួយបារម្ភ ព្រោះគណបក្សនេះមិនបានអនុវត្ត កិច្ចព្រមព្រៀងសន្តិភាពទីក្រុងប៉ារីស ឱ្យបានពេញលេញ មិនបានអនុវត្តការគោរពសិទ្ធិមនុស្ស និងប្រជាធិបតេយ្យ។ មន្ត្រីសិទ្ធិមនុស្សរូបនេះ មិនរំពឹងថា រយៈដ៍ខ្លីខាងមុខនេះ គណបក្សកាន់អំណាចអាចកែលំអចំណុចខ្វះខាតរបស់ខ្លួនបានច្រើននោះឡើយ ដូច្នេះលោកថា បញ្ហាទាំងនេះនឹងឱ្យគណបក្សប្រជាជនកម្ពុជា ប្រឈមនឹងការបាត់បង់សំឡេងរបស់ខ្លួនមួយចំនួនធំនៅក្នុងរដ្ឋសភា។
លោក រស់ សុដ្ឋា៖ «ត្រូវដឹងថា គណបក្សប្រជាជនក៏ប្រើយុទ្ធសាស្ត្រច្រើនដែរ ក្នុងការធានានូវការឈ្នះឆ្នោតខាងមុខ ហ្នឹងអ្វីដែលខ្ញុំបានដឹង តាមវិធីផ្សេងៗ យុទ្ធសាស្ត្រក្នុងការធ្វើម៉េចភ្ជាប់ខ្លួនជាមួយប្រជាពលរដ្ឋជាដើម និងផ្សេងៗ ដែលខ្ញុំមិនអាចនិយាយកើត»។
ចំណែកអ្នកវិភាគនយោបាយលោក គឹម សុខ យល់ថា គណបក្សប្រជាជនកម្ពុជា ហាក់គ្មានចេតនា ចង់កែលំអខ្លួននោះទេ ព្រោះគណបក្សនេះ មិនបានរៀបចំការបោះឆ្នោតមួយ ដែលឱ្យគ្រប់ភាគីអាចចូលរួមការកែទម្រង់ គ.ជ.ប និងការគោរពសិទ្ធិមនុស្ស ឬសិទ្ធិនយោបាយជាដើម។ លោកបន្តទៀតថា មហាសន្និបាតនេះ គ្រាន់តែជាការបង្ហាញកម្លាំងរបស់គណបក្សកាន់អំណាច មុនការបោះឆ្នោត។ លោកបន្តទៀតថា ជាទម្លាប់បក្សនេះតែងតែចូលចិត្តប្រមូលផ្ដុំបង្ហាញកម្លាំង ឱ្យគូប្រកួតប្រជែង និងពលរដ្ឋមើលឃើញថា គណបក្សនេះមានកម្លាំងខ្លាំង និងមានអ្នកគាំទ្រច្រើន ដែលយករូបភាពនេះ ធ្វើជាការបន្លំភ្នែកមហាជន ក្នុងការផែនការលួចចសន្លឹកនាពេលបោះឆ្នោតខាងមុខ។
លោក គឹម សុខ៖ «មហាសន្និបាតនោះបំភាន់មហាជនថា គេ (គណបក្សប្រជាជនកម្ពុជា) មានកម្លាំងខ្លាំង គេមានបណ្ដាញខ្លាំង ដែលគេសមនឹងឈ្នះការបោះឆ្នោតឆ្នាំ២០២៣ ក៏ប៉ុន្តែយើងដឹងហើយ ការបោះឆ្នោតនោះ គេអាចឈ្នះដោយវិធីគាបសង្កត់គូប្រជែងប្លន់លទ្ធផលបោះឆ្នោតមិនមែនដោយសារគណបក្សប្រជាជនកម្ពុជាខ្លាំងដូចដែលគេបង្ហាញនៅឯមហាសន្និបាតនោះទេ»។
ការប្រកាសធ្វើមហាសន្និបាតរបស់គណបក្សកាន់អំណាចពេលនេះ ស្របពេលដែលប្រធានគណបក្សនេះគឺ លោក ហ៊ុន សែន បានប្រកាសជាចំហថា លោកប្រើទាំងអំណាចតុលាការ និងប្រើហិង្សា លើគណបក្សភ្លើងទៀន។ ក្រុមអ្នកឃ្លាំមើលស្ថានការណ៍នយោបាយ ចង់ឃើញគណបក្សកាន់អំណាច គួរធ្វើខ្លួនជាគណបក្សចាស់ទុំ និងបង្កបរិយាកាសនយោបាយល្អ គ្មានការគាបសង្កត់ ដើម្បីឱ្យការបោះឆ្នោត នៅថ្ងៃទី២៣ ខែកក្កដា ដំណើរការដោយសេរី ត្រឹមត្រូវ និងយុត្តិធម៌៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រឿងដែលគេអានច្រើនបំផុត
RFA
- លោក គា សុគន្ធ អ្នកនិពន្ធគំរូក្នុងការឆ្លុះបញ្ចាំងការពិត និងបណ្ដុះស្មារតីស្នេហាជាតិ
- ថៃយល់ព្រមឱ្យកម្ពុជាប្រើពាក្យ «គុនខ្មែរ» ក្នុងព្រឹត្តិការណ៍ស៊ីហ្គេម២០២៣
- «ករណីឧកញ៉ា សៀង ចាន់ហេង ប្រគល់ដីឲ្យប្អូនស្រីនាយករដ្ឋមន្ត្រីបង្ហាញថា អ្នកធំតែងឈ្នះ»
- លោកខាងលិចចង់ឃើញការបោះឆ្នោតជាតិប្រព្រឹត្តទៅដោយសេរី និងយុត្តិធម៌ ក្រោយការចាប់ខ្លួនលោក ថាច់ សេដ្ឋា
- ក្រុមមន្ត្រីជាន់ខ្ពស់គណបក្សកាន់អំណាចប្រតិកម្មនឹងពលរដ្ឋខ្មែររស់នៅក្រៅប្រទេស ជេរប្រមាថលោក ហ៊ុន ម៉ាណែត តាមបណ្ដាញសង្គម
រឿងដែលគេអានច្រើនបំផុត
នយោបាយ
- លោក ហ៊ុន សែន បន្តប្រកាសថា នឹងការពារមិនឱ្យមានរដ្ឋប្រហារ ដើម្បីអភិវឌ្ឍប្រទេសឱ្យរីកចំរើន
- គណបក្សចំនួន៣ ចូលរួមប្រកួតដណ្ដើមកៅអីក្រុមប្រឹក្សាស្រុកក្រុងទើបបំបែកថ្មី
- លោក រ៉ុង ឈុន នឹងដឹកនាំធ្វើធម្មយាត្រាលើកកម្ពស់សីលធម៌សង្គមនៅសប្តាហ៍ក្រោយ
- មន្ត្រីបក្សប្រឆាំង និងអ្នកវិភាគឈឺចិត្តជួសលោក គង់ គាំ ដែលត្រូវរើអីវ៉ាន់ចេញពីដីផ្ទះទាំងបង្ខំ
- គណបក្សភ្លើងទៀនប្រជុំថ្នាក់ដឹកនាំតាមរាជធានីខេត្ត ក្រោយបក្សកាន់អំណាចធ្វើទុក្ខបុកម្នេញ