លោក សម រង្ស៊ី អំពាវនាវដល់តំណាងកម្លាំងប្រជាធិបតេយ្យទាំងអស់នៅប្រទេសកម្ពុជាឱ្យរួបរួម និងសហការគ្នាកុំឱ្យមានការវាយប្រហារគ្នាទៅវិញទៅមកហើយ ត្រូវតែចែកតួនាទីគ្នា ដើម្បីលើកកម្ពស់លទ្ធិប្រជាធិបតេយ្យ និងទទួលបានជ័យជំនះរួម។ អ្នកឃ្លាំមើលការបោះឆ្នោត លើកឡើងថា គណបក្សទាំងពីរគួរតែចែកមណ្ឌលគ្នាដើម្បីកុំឱ្យបាត់សំឡេង។
ក្នុងសារលិខិតផ្ញើទៅតំណាងកម្លាំងប្រជាធិបតេយ្យចុះថ្ងៃទី១១ មករា ឆ្នាំ២០២៤ បង្ហោះលើគេហទំព័រហ្វេសប៊ុក (Facebook) លោក សម រង្ស៊ី ថា ទោះបីនៅពេលនេះ មានគណបក្សនយោបាយ៣ ដែលតំណាងឱ្យកម្លាំងប្រជាធិបតេយ្យ ហើយដែល មានអ្នកគាំទ្រចេញមកពីប្រភពដើមតែមួយ គឺគណបក្សភ្លើងទៀន គណបក្សកម្លាំងជាតិ និងគណបក្សឆន្ទៈខ្មែរក្ដី តែលោកឱ្យអ្នកគាំទ្រនិងសកម្មជន ត្រូវរក្សាភាព ស្មោះត្រង់ចំពោះប្រទេសជាតិ និងប្រជារាស្ត្រ រក្សាឧត្តមគតិដើម ឈរលើសីលធម៌ សច្ចធម៌ និងយុត្តិធម៌។
លោកបញ្ជាក់ថា ឈ្មោះគណបក្សមិនសំខាន់ប៉ុន្មានទេ ពីព្រោះអាចប្ដូរឈ្មោះ គណបក្ស ឬប្តូរគណបក្សតែម្តងទៅតាមអ្វី ដែលកាលៈទេសៈតម្រូវ តែអ្វីដែលសំខាន់បំផុត គឺឧត្តមគតិដើម ព្រលឹងដែលនៅរស់រវើក ដូច្នេះ លោកថា គណបក្សគ្រាន់តែជាសម្បកក្រៅដែលអាចមានការប្រែប្រួល តែព្រលឹងមានតែមួយហើយនៅដដែល។
លោក សម រង្ស៊ី ថា ការបោះឆ្នោតជ្រើសរើសសមាជិកព្រឹទ្ធសភា ខាងមុខនេះគណបក្សកម្លាំងជាតិនិងគណបក្សឆន្ទៈខ្មែរត្រូវតែមានការសហការគ្នា ដោយចៀសវាងការប្រកួតប្រជែងគ្នានៅតាមភូមិភាគនីមួយៗ បើមិនដូច្នេះទេ លោកថា គឺគណបក្សទាំងពីរច្បាស់ជាបរាជ័យទាំងពីរ។
ចំពោះអង្គបោះឆ្នោតវិញ លោកឱ្យសមាជិកគណបក្សភ្លើងទៀន ត្រូវប្រកាន់វិន័យ បោះឆ្នោតដោយសម្ងាត់ ឱ្យគណបក្សប្រជាធិបតេយ្យតែមួយនៅក្នុងភូមិភាគនីមួយៗ ដើម្បីធានាជោគជ័យរួមនៃកម្លាំងប្រជាធិបតេយ្យ ហើយការជ្រើសរើសគណបក្សណាមួយ រវាងគណបក្សកម្លាំងជាតិ និងគណបក្សឆន្ទៈខ្មែរ នៅក្នុងភូមិភាគនីមួយៗ នឹងត្រូវសម្រេចក្នុងពេលឆាប់ៗខាងមុខនេះ តាមការចាំបាច់។
លើសពីនេះ អង្គបោះឆ្នោតមិនចាំបាច់បង្ហាញជំហររបស់ខ្លួនជាសាធារណៈក៏បានដែរ ដោយមិនចាំបាច់ឱ្យអ្នកក្រៅដឹងពីជំហររបស់ខ្លួនក៏បានដែរ ដើម្បីធានាសន្តិសុខ និងលំនឹងនៃការងារទៅថ្ងៃមុខ សម្រាប់អង្គបោះឆ្នោតម្នាក់ៗ។
លោក សម រង្ស៊ី ទទូចឱ្យអង្គបោះឆ្នោតត្រូវបោះឆ្នោតដោយសម្ងាត់ តាមសម្បជញ្ញៈ របស់ខ្លួនម្នាក់ៗ ហើយតាមវិន័យដូចបានរៀបរាប់ពីខាងលើ ហើយដែលនឹងត្រូវបញ្ជាក់ ក្នុងពេលឆាប់ៗខាងមុខនេះ។
មេបក្សប្រឆាំងដែលកំពុងនិរទេសខ្លួនក្នុងប្រទេសបារាំង លោក សម រង្ស៊ី ផ្ញើសារដូច្នេះ ធ្វើឡើងស្របពេលគណបក្សកម្លាំងជាតិ ប្រកាសស្វែងរកដំណោះស្រាយនិងផ្ដល់ជម្រើសទៅគណបក្សភ្លើងទៀន គួរចែកភូមិភាគគ្នាឈរឈ្មោះសម្រាប់ការបោះឆ្នោតព្រឹទ្ធសភាក្នុងខែកុម្ភៈខាងមុខ ។ លើសពីនេះ ការចេញសាររបស់លោក សម រង្ស៊ី ត្រូវបានសកម្មជន និងគាំទ្របានចែករំលែកតៗគ្នា ដោយបង្ហាញគាំទ្រផងដែរ។
ទីប្រឹក្សាគណបក្សកម្លាំងជាតិលោក រ៉ុង ឈុន ប្រាប់វិទ្យុអាស៊ីសេរីនៅថ្ងៃទី១២ មករា ដោយចាត់ទុកសាររបស់លោក សម រង្ស៊ី ថា ជាសារដ៏ល្អ។ លោកបន្ថែមថា បើអ្នកប្រជាធិបតេយ្យដើរផ្លូវបែកគ្នា នឹងធ្វើឱ្យបរាជ័យ ដូច្នេះមានតែវិធីរួបរួម និងអង្គុយជជែកគ្នា បើទោះបីជាការបោះឆ្នោតព្រឹទ្ធសភា ខាងមុខមាន គណបក្សពីរដែលទទួលពីគណបក្សភ្លើងទៀនតែមួយក៏ដោយ។
លោក រ៉ុង ឈុន៖«យើង គិតថា មានរូបមន្តចែកភូមិភាគគ្នាទេ ដែលជារូបមន្តឈ្នះៗទាំងអស់គ្នា ហើយគណបក្សកម្លាំងជាតិមើលឃើញច្បាស់ណាស់បើយើង នឹងចាញ់ទាំងអស់គ្នាហើយអ្នកដែលឈ្នះគឺគណបក្សកាន់អំណាច។ អ៊ីចឹងអ្វីដែលគាត់លើកឡើងជារឿងមួយត្រឹមត្រូវ»។
អនុប្រធានគណបក្សភ្លើងទៀន លោក សុន ឆ័យ បានសម្ដែងការគាំទ្រចំពោះសារ របស់លោក សម រង្ស៊ី ដោយថា ទោះបីជាគណបក្សទាំងនោះ ចេញពីណាក៏ដោយ ត្រូវរក្សាភាពថ្លៃថ្នូរ ឱ្យមានសច្ចធម៌ និងភាពយុត្តិធម៌។ លោកអះអាងថា គណបក្សភ្លើងទៀន មានតួនាទី ក្នុងការរក្សាអង្គបោះឆ្នោតជាង ២ពាន់ ១រយរូបឱ្យនៅរួមគ្នា ក្នុងការយកសមាសភាពរបស់ខ្លួនទៅបោះឆ្នោតឱ្យបេក្ខជនដែលឈរ ឈ្មោះព្រឹទ្ធសភាខាងមុខ។
លោក សុន ឆ័យ៖ «គណបក្សភ្លើងទៀនបានធ្វើការសម្រេចរួចទៅហើយ ជាអង្គនយោបាយ ដែលគ្រប់គ្រងអង្គបោះឆ្នោត ទាំងជាង ២ ពាន់ ១ រយ(២.១៩៨)រូប ហើយគណបក្សភ្លើងទៀនបានសម្រេចតាមរយៈការដាក់បេក្ខជនទៅគ្រប់មណ្ឌលទាំង ៨ នៅប្រទេស ដូច្នេះរឿងដទៃទៀតគណបក្សដទៃអាចពិភាក្សាគ្នានៅពេលក្រោយទៀត ដើម្បីទៅរឿងអនាគត មិនត្រូវច្របូកច្របល់ទាមទារផលប្រយោជន៍ ដែលមិនហេតុសមផលនៅគ្រាបច្ចុប្បន្ន»។
ជុំវិញរឿងនេះ នាយកប្រតិបត្តិអង្គការឃ្លាំមើលការបោះឆ្នោតនៅកម្ពុជាហៅកាត់ ថា និចហ្វិច (Nicfec) លោក សំ គន្ធាមី លើកឡើងថា គណបក្សទាំងពីរចូលរួមបោះឆ្នោត គួរតែចែកមណ្ឌលគ្នា ពីព្រោះអង្គបោះឆ្នោតមានតែក្រុមប្រឹក្សាឃុំ-សង្កាត់ របស់គណបក្សភ្លើងទៀន។
លោក សំ គន្ធាមី៖ «យើងបែងចែកមណ្ឌលឈរទៅមណ្ឌលបោះឆ្នោតទៅ ដើម្បីកុំឱ្យបាត់បង់សំឡេងឆ្នោតស៊ីសងការឯកភាពគ្នា រវាងគណបក្សទាំងពីរ ពីព្រោះអង្គបោះឆ្នោតចេញពីគណបក្សភ្លើងទៀនអតីតក្រុមប្រឹក្សាឃុំ-សង្កាត់»។
ការបោះឆ្នោតព្រឹទ្ធសភានេះ ជាការបោះឆ្នោតអសកល ហើយអង្គបោះឆ្នោត គឺជាសមាជិកក្រុមប្រឹក្សាឃុំសង្កាត់ទូទាំងប្រទេស។ សព្វថ្ងៃគណបក្សនយោបាយ ដែលមានអង្គបោះឆ្នោតនេះគឺគណបក្សប្រជាជនកម្ពុជា គណបក្សភ្លើងទៀន និងមួយចំនួនតួចទៀតគឺគណបក្សប្រជាធិបតេយ្យមូលដ្ឋាន។
ការបោះឆ្នោតព្រឹទ្ធសភា នឹងប្រព្រឹត្តទៅនៅថ្ងៃទី២៥ ខែកុម្ភៈខាងមុខ ដោយមានគណបក្សចំនួន៤ចូលរួម គឺគណបក្សប្រជាជនកម្ពុជា គណបក្សឆន្ទៈខ្មែរ គណបក្សកម្លាំងជាតិ និងគណបក្សហ៊្វុនស៊ិនប៉ិច៕