លោក សម រង្ស៊ី ប្រធានស្តីទីគណបក្សសង្គ្រោះជាតិ បានចាប់ផ្តើមប្រើបណ្ដាញសង្គមថ្មីមួយឈ្មោះទីកតុក (Tik Tok) ដែលកំពុងពេញនិយមបំផុតក្នុងចំណោមយុវជន នៅជុំវិញពិភពលោក។
លោក សម រង្ស៊ី មានប្រសាសន៍ប្រាប់វិទ្យុអាស៊ីសេរី កាលពីយប់ថ្ងៃទី១៤ ខែមេសាថា ប្រការដែលលោកសម្រេចបង្កើតទំព័រ Tik Tok ថ្មីនេះ ដើម្បីផ្សព្វផ្សាយពីសកម្មភាពនានារបស់លោក ឲ្យយុវជនអាចងាយតាមដានពីប្រទេសកម្ពុជា តាមរយៈហ្វេសប៊ុក និងទីកតុក។ បន្ថែមពីនេះ លោកអះអាងថា ទំព័រហ្វេសប៊ុករបស់លោក ដែលមានអ្នកចុចLike ជាង៥លាននាក់នោះ ត្រូវបានអាជ្ញាធរកម្ពុជារឹតត្បិត និងពិបាកចូលមើល៖ «ដើម្បីឲ្យទាន់ចរន្ត ខ្ញុំមានទំព័រហ្វេសប៊ុក ជាង១០ឆ្នាំហើយ ដែលមានអ្នកចូលមើលនិងអ្នកតាមដានជាង ៥លាននាក់។ ដូច្នេះ ប្រជាពលរដ្ឋខ្មែរទាំងនៅក្នុងនិងក្រៅប្រទេស ច្រើនតែតាមដានសកម្មភាពការងារ និងជំហររបស់ខ្ញុំ និងការងារផ្សេងៗ។ តែខ្ញុំដឹងថា ចរន្តថ្មីនេះ យុវជនគេនិយមទីកតុក ដូចនេះ អត់មានបំណងអ្វីពិសេសណាមួយទេ នេះជាជំហររបស់ខ្ញុំជាទូទៅ ដើម្បីចង់ឲ្យមានតម្លាភាព ដើម្បីអាចឲ្យពលរដ្ឋមើលឃើញសកម្មភាពខ្ញុំ តាមរយៈហ្វេសប៊ុក និងទីកតុក»។
ក្នុងគេហទំព័រទីកតុក ដែលទើបបង្កើតថ្មីនោះ លោក សម រង្ស៊ី បានផ្សព្វផ្សាយវីដេអូចាស់ៗឡើងវិញ អំពីសកម្មភាពរបស់លោកជាមួយនឹងអតីតគណបក្ស សម រង្ស៊ី ដែលក្រោយមកបានប្តូរឈ្មោះមកជាគណបក្សភ្លើងទៀនវិញ។ គណបក្សភ្លើងទៀននេះ ត្រូវបានគេមើលឃើញថា ជាគណបក្សជំទាស់ថ្មីមួយ ដែលលេចធ្លោបន្ទាប់ពីការរំលាយគណបក្សសង្គ្រោះជាតិ។ ក្រុមអ្នកឃ្លាំមើលសង្កេតឃើញថា ក្នុងចំណោមគណបក្សនយោបាយទាំង១៧ ដែលចូលរួមការបោះឆ្នោតក្រុមប្រឹក្សាឃុំសង្កាត់ នៅដើមខែមិថុនាខាងមុខនេះ គណបក្សភ្លើងទៀន គឺជាគូប្រកួតប្រជែង ដែលអាចមានកម្លាំងប្រហាក់ប្រហែលនឹងគណបក្សប្រជាជនកម្ពុជា។
វិទ្យុអាស៊ីសេរី នៅមិនទាន់អាចទាក់ទងសុំការបំភ្លឺបន្ថែមជុំវិញរឿងនេះ ពីអ្នកនាំពាក្យរដ្ឋាភិបាល លោក ផៃ ស៊ីផាន និងអ្នកនាំពាក្យគណបក្សកាន់អំណាច លោក សុខ ឥសាន បានទេ កាលពីថ្ងៃទី ១៤ ខែមេសា។ ចំណែកលោកនាយករដ្ឋមន្ត្រីហ៊ុន សែន វិញ នៅមិនទាន់បានបង្កើត ឬប្រើប្រាស់បណ្ដាញសង្គមថ្មីទីកតុកនេះ នៅឡើយទេ។
បណ្ដាញសង្គមទិកតុករបស់ចិន ត្រូវបានគេមើលឃើញថា ជាប្រព័ន្ធបណ្ដាញសង្គមថ្មីមួយ ដែលកំពុងប្រកួតប្រជែង ជាមួយបណ្ដាញសង្គមហ្វេសប៊ុករបស់សហរដ្ឋអាមេរិក។ អ្នកប្រើប្រាស់ TikTok ភាគច្រើនបង្កើតវីដេអូខ្លីៗ បង្ហាញពីសកម្មភាពគ្រប់រូបភាពរបស់ពួកគេ ដូចជារាំរែក ច្រៀង និងរឿងកំប្លែងជាដើម។ ចំណែក បណ្ដាញសង្គមហ្វេសប៊ុកវិញ គឺអ្នកប្រើប្រាស់អាចមានជម្រើសច្រើនយ៉ាង ដូចជាការបង្កើតគេហទំព័របុគ្គលម្នាក់ៗ សំរាប់ទាក់ទងគ្នាទៅវិញទៅមក រួមមាន ការដាក់បង្ហាញរូបភាព វីដេអូ ការផ្ញើសារ និងការនិយាយឆ្លងឆ្លើយគ្នា តាមប្រព័ន្ធ Messengers ដោយមិនអស់ប្រាក់ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។