អតីតកម្មការិនីរោងចក្រលោកស្រី សំ សុខា មិនទុកចិត្តមន្រ្តីតុលាការ ដែលមិនព្រមចេញបង្កាន់ដៃ ថ្លៃលោកស្រីបង់ប្រាក់ពិន័យ ១០លានរៀល (ឬ ២.៥០០ ដុល្លារ) ជូនតុលាការ ដើម្បីកុំឲ្យជាប់ពន្ធនាគារថែម ៦ខែទៀត។ ថ្លែងប្រាប់វិទ្យុអាស៊ីសេរី ក្រោយការបង់ប្រាក់គ្រប់ចំនួន កាលពីថ្ងៃទី១០ ខែកុម្ភៈ លោកស្រី សំ សុខា ថាជារឿងចម្លែក និងមិនប្រក្រតីមួយទៀត ដែលមន្រ្តីតុលាការ បានទទួលប្រាក់គ្រប់ចំនួនពីលោកស្រីហើយ ប៉ុន្តែមិនចេញលិខិតបញ្ជាក់អ្វីទាំងអស់បែបនេះ។
រឿងមិនប្រក្រតីដំបូងកើតឡើងចំពោះលោកស្រី សំ សុខា ពាក់ព័ន្ធនឹងការណ៍ដែលមន្រ្តីតុលាការចាប់បង្ខំ និងគម្រាមលោកស្រី ឲ្យរកប្រាក់មកបង់តុលាការជាបន្ទាន់ ដោយគ្មានការអនុគ្រោះ ឬលើកលែងអ្វីទាំងអស់ បើមិនដូច្នេះទេលោកស្រីនឹងត្រូវជាប់គុក៦ខែបន្ថែមទៀត ទៅលើការជាប់ពន្ធនាគារគ្រប់ចំនួនកំណត់បួនឆ្នាំពេញរួចមកហើយនោះ។
លោកស្រី សំ សុខា វ័យ ៤៣ឆ្នាំ ដែលទើបចេញពីពន្ធនាគារ កាលពីថ្ងៃទី៩ ខែកុម្ភៈ ក្រោយបំពេញគ្រប់លក្ខខណ្ឌកំណត់នៃទោសរយៈពេលបួនឆ្នាំពេញនោះ ត្រូវបង្ខំចិត្តរកប្រាក់ឲ្យគ្រប់ចំនួន ដើម្បីបង់តុលាការភ្លាមៗ កាលពីថ្ងៃទី១០ ខែកុម្ភៈនោះ។ ប៉ុន្តែ អ្វីដែលជាបញ្ហាមិនប្រក្រតីមួយទៀត ដែលកើតឡើងចំពោះលោកស្រី គឺមន្រ្តីតុលាការយកលេសមិនចេញក្រដាសបញ្ជាក់ថ្លៃបង់ប្រាក់នេះ ដោយលោកស្រីអះអាងថា មន្រ្តីតុលាការថានោះ ជាក្រឹត្យក្រម និងនីតិវិធីតុលាការ ដែលគេធ្វើតែអ៊ីចឹង៖ «គេថា អំណាចនៃប្រព័ន្ធតុលាការរបស់គេ គេនឹងមិនមានចេញជាក្រដាសបញ្ជាក់ថាយើងហ្នឹងបានបង់លុយចំនួន ១០លានហ្នឹងបានទេ។ គេមិនអាចចេញឲ្យបានទេ។ គេប្រាប់តែប៉ុណ្ណឹង» ។
លោកស្រីហួសចិត្ត និងមិនយល់អំពីនីតិវិធីតុលាការបែបនេះនោះទេ។ លោកស្រីចោទជាសំណួរថា តើឲ្យលោកស្រីទុកចិត្តតុលាការយ៉ាងដូចម្តេចបាន បើគ្មានលិខិតបញ្ជាក់អ្វីមួយសន្លឹកសោះបែបនេះ។ លោកស្រីថា ប្រាក់ដែលបង់តុលាការនោះទៀតសោត មិនមែនជាប្រាក់លោកស្រីទេ ព្រោះជីវភាពលោកស្រីខ្វះខាត មិនមានលទ្ធភាពរកប្រាក់ឯណាបានសន្ធឹកក្នុងរយៈពេលដ៏ខ្លីបែបនេះនោះឡើយ។ ក្នុងពេលជាមួយគ្នានោះ លោកស្រីក៏គ្មានសមត្ថភាព ដើម្បីខ្ចីលុយគេដែរ ព្រោះអ្នករកស៊ីចងការប្រាក់ឯកជន គេយកការប្រាក់ខ្ពស់រហូតដល់ក្នុងលុយ ១.០០០ដុល្លារ គេយកការប្រាក់ ១០០ដុល្លារ ក្នុងមួយខែ។
ប៉ុន្តែលោកស្រីបន្តថា នៅទីបំផុតម្តាយមីងលោកស្រី បានបេះបោចប្រាក់សន្សំ សម្រាប់ទុកព្យាបាលរបួសភ្នែករបស់ប្តីម្តាយមីងនោះ យកមកឲ្យលោកស្រីខ្ចី ដើម្បីបង់តុលាការ ព្រោះមិនចង់ឃើញលោកស្រីរងភាពអយុត្តិធម៌ ដោយត្រូវជាប់គុកច្រើនខែទៀតនោះទេ៖ «ដោយសារគាត់មិនចង់ឃើញខ្លាចលោគេចាប់ក្មួយទៀត។ ខ្លាចលោគេដាក់ក្មួយ ៦ខែទៀត។ លុយនោះគាត់សាកួទុកព្យាបាលភ្នែកប្ដីគាត់។ មិនមែនធម្មតាទេ។ ភ្នែកប្តីគាត់ហ្នឹងក៏ខូចដែរ»។
លោកស្រី សំ សុខា ត្រូវតុលាការកាត់ទោសពីរដង ម្តងកាត់ទោសដោយកំបាំងមុខ កាលពីឆ្នាំ២០១៧ ឲ្យជាប់គុក ២ឆ្នាំ ពីបទញុះញង់ឲ្យមានការរើសអើង និងពិន័យជាប្រាក់ ៥លានរៀល។ លោកស្រីបានភៀសខ្លួនទៅប្រទេសថៃ។ ប៉ុន្តែត្រូវបានអាជ្ញាធរថៃ ចាប់បញ្ជូនមកកម្ពុជាវិញ តាមការស្នើរបស់រដ្ឋាភិបាលលោក ហ៊ុន សែន នៅឆ្នាំ២០១៨។ ក្រោយត្រូវបានបញ្ជូនមកដល់កម្ពុជា លោកស្រីត្រូវតុលាការកាត់ទោសថែមពីរឆ្នាំទៀត ពីជេរប្រមាថ និងពិន័យ ៥លានរៀលទៀត។
បទចោទទាំងនេះ កើតមានឡើងក្រោយលោកស្រី កាលពីឆ្នាំ២០១៧ បានដោះស្បែកជើងគប់លើស្លាកគណបក្សប្រជាជនកម្ពុជា ដែលមានរូបលោកនាយករដ្ឋមន្រ្តី ហ៊ុន សែន និងលោក ហេង សំរិន ដែលជាប្រធានរដ្ឋសភា និងជាប្រធានកិត្តិយសគណបក្សកាន់អំណាច និងក្រោយមក កាលនៅថៃលោកស្រីបានបង្ហោះសារលើហ្វេសប៊ុក រិះគន់ថ្នាក់ដឹកនាំរដ្ឋាភិបាលលោក ហ៊ុន សែន។
នៅថ្ងៃចេញពីពន្ធនាគារ កាលពីថ្ងៃទី៩ ខែកុម្ភៈនោះ លោកស្រីថា មន្រ្តីតុលាការមិនព្រមទទួលយកសំណូមពររបស់លោកស្រី ដែលសុំទុកពេលឲ្យលោកស្រីរកប្រាក់ និងផ្តល់លទ្ធភាពឲ្យលោកស្រីបង់រម្លស់នោះទេ។
មន្រ្តីសិទ្ធិមនុស្សហួសចិត្ត ចំពោះការបង្ខិតបង្ខំ និងគម្រាមឲ្យបង់ប្រាក់ពិន័យភ្លាមៗ ដោយគ្មានការយោគយល់ ឬការអនុគ្រោះបែបនេះ។ ជាងនេះទៅទៀត មន្រ្តីច្បាប់ក៏ភ្ញាក់ផ្អើលដែរ ដែលក្រោយលោកស្រី សំ សុខា រកប្រាក់បង់គ្រប់ចំនួនទៅហើយ ប៉ុន្តែមន្រ្តីតុលាការមិនព្រមចេញវិក្កយបត្រជូនលោកស្រីបែបនេះ។
វិទ្យុអាស៊ីសេរី មិនទាន់អាចសុំការបំភ្លឺពីមន្រ្តីតុលាការ ជុំវិញរឿងនេះបាននៅឡើយទេ។
ទោះជាយ៉ាងនេះក្ដី ក្រមនីតិវិធីព្រហ្មទណ្ឌ មិនមានចែងអំពីការចាប់បង្ខំឲ្យជនណាម្នាក់ ដែលជាប់ទោសគ្រប់កាលកំណត់ បង់ប្រាក់ពិន័យភ្លាមៗ នោះដែរ។ ច្បាប់នេះក៏មានចែងអំពីគោលការណ៍មនុស្សធម៌ និងការលើកលែងខ្លះផង។ ម្យ៉ាងទៀតតាមក្រឹត្យក្រមរដ្ឋបាលសាធារណៈ រាល់ការបង់ប្រាក់ ត្រូវមានចេញជាបង្កាន់ដៃជូនអ្នកបង់ប្រាក់នោះ។
លោកស្រី សំ សុខា ថា អ្វីដែលកើតឡើងចំពោះលោកស្រី គឺជារឿងអយុត្តិធម៌ និងមិនប្រក្រតីផ្ទួនៗ ដែលឆ្លុះបញ្ចាំងអំពីតថភាពនៃសង្គមបច្ចុប្បន្ន ដែលពោរពេញដោយអំពើអយុត្តិធម៌និងការរំលោភបំពានទាំងក្នុងប្រព័ន្ធតុលាការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។