សកម្មជន​បក្ស​ប្រឆាំង​នៅ​ខេត្ត​ស្ទឹងត្រែង​​វិល​ទៅ​ផ្ទះ​វិញ​ ក្រោយ​ពី​លោក ហ៊ុន​ សែន​បញ្ជា​ឱ្យ​ដោះ​លែង​អ្នក​ទោស​នយោបាយ​

ដោយ សេក បណ្ឌិត
2019-11-19
អ៊ីម៉ែល
មតិ
Share
បោះពុម្ព
មេ​ឃុំ​ស្រែគរ លោក សៀក មេគង្គ ផ្ដល់​បទសម្ភាសន៍​ដល់​វិទ្យុ​អាស៊ីសេរី កាល​ពី​ថ្ងៃ​ទី​២៦ ខែ​មីនា ឆ្នាំ​២០១៦។
មេ​ឃុំ​ស្រែគរ លោក សៀក មេគង្គ ផ្ដល់​បទសម្ភាសន៍​ដល់​វិទ្យុ​អាស៊ីសេរី កាល​ពី​ថ្ងៃ​ទី​២៦ ខែ​មីនា ឆ្នាំ​២០១៦។
RFA

សកម្មជន​គណបក្ស​សង្គ្រោះ​ជាតិ​មួយ​ចំនួន នៅ​ខេត្ត​ស្ទឹងត្រែង​ដែល​រត់​ភៀស​ខ្លួន​ បាន​វិល​ទៅ​ផ្ទះ​វិញ​រៀងៗ ខ្លួន​ហើយ​ បន្ទាប់​ពី​លោក​ ហ៊ុន​ សែន​ ប្រកាស​ឈប់​ចាប់ចង​ និង​បញ្ជា​ឱ្យ​ដោះលែង​អ្នកទោស​នយោបាយ​។ ពួកគេ​ប្រកាស​ជំហរ​ថា​ នឹង​នៅតែ​បន្ត​បម្រើ​នយោបាយ​ឱ្យ​គណបក្ស​ប្រឆាំង​ដោយ​ស្មារតី​ស្មោះត្រង់​ បើ​ទោះ​បី​ជា​ រង​ការ​គំរាម​គំ​ហែង​ ចាប់​ខ្លួន​ និង​អូសទាញ​ទិញ​ទឹក​ចិត្ត​ ពី​សំណាក់​អាជ្ញាធរ​រដ្ឋាភិបាល​ជាច្រើន​សារ​មក​ហើយ​ក្ដី។

មេឃុំ​ស្រែ​គ​ជាប់​ឆ្នោត​ មក​ពី​គណបក្ស​សង្គ្រោះ​ជាតិ​ លោក​ សៀក​ មេគង្គ​ ឱ្យ​ដឹង​នៅ​ថ្ងៃ​ទី១៨ វិច្ឆិកា​ថា បើ​ទោះ​បី​ជា​ លោក​នាយក​រដ្ឋមន្ត្រី​ ហ៊ុន​ សែន​ ប្រកាស​ឱ្យ​ពួក​លោក​វិល​ចូល​ស្រុកកំណើត​វិញ​យ៉ាង​ណា​ក្ដី​ ក៏​ពួកលោក​​នៅតែ​បារម្ភ​ពី​សុវត្ថិភាព និង​មិន​ស្ងប់​អារម្មណ៍​នៅ​ឡើយ​ទេ​។ លោក​ថា​ សេរីភាព​របស់​លោក​គឺ​ ឋិត​ក្នុង​កណ្ដាប់​ដៃ​លោក​នាយក​រដ្ឋមន្ត្រី​ ហ៊ុន​ សែន​ តែ​ម្នាក់​ បើ​ទោះបីជា​ខ្លឹមសារ​រដ្ឋធម្មនុញ្ញ​បាន​ធានា​ ការពារ​សិទ្ធិ​សេរីភាព​របស់​លោក​យ៉ាងណា​ក្ដី។ លោក​បន្ថែម​ថា លោក​បង្ខំចិត្ត​ភៀស​ខ្លួន​រយៈ​ពេល​ជាង ១ខែ​មក​នេះ គឺ​ដោយ​សារ​តែ​អាជ្ញាធរ​ចាប់ខ្លួន​សកម្មជន​គណបក្ស​ប្រឆាំង​ជា​បន្ត​បន្ទាប់​នៅ​ទូទាំង​ប្រទេស​ ហើយសមត្ថកិច្ច​ខេត្ត​ស្ទឹងត្រែង​ បាន​ព័ទ្ធ​ផ្ទះ​របស់​លោក​ និង​ឃ្លាំមើល​សកម្មភាព​របស់​លោក​ដែរ៖ «យើង​ចេះ​តែ​ភ័យ​ប្រកាស ក៏​យើង​មិន​ទុក​ចិត្ត​គាត់​ដែរ ច្បាប់​ហ្នឹង​យើង​ដឹង​ស្រាប់​ហើយ គាត់​ថា លែងៗ គាត់​ថា ចាប់ៗ អា​ហ្នឹង​យើង​លំបាក​និយាយ​ណាស់។ យើង​គិត​ថា អត់​ធ្វើ​ខុស​ទោះ​បី​ចាប់​ទៅ ក៏​អត់​បាក់​ស្មារតី អត់​តក់​ស្លុត​ទេ»

សកម្មជន​គណបក្ស​ប្រឆាំង​ម្នាក់​ទៀត នៅ​ខេត្ត​ស្ទឹងត្រែង អ្នកស្រី វ៉ា សុខខេង ដែល​បាន​ភៀសខ្លួន​ទៅ​កន្លែង​សុវត្ថិភាព​មួយ​រយៈ​បង្ហាញ​អារម្មណ៍​ភ័យ​ព្រួយ​ពី​សុវត្ថិភាព​ នៅ​គ្រា​ដែល​លោក​នាយក​រដ្ឋមន្ត្រី ហ៊ុន សែន ព្រមាន​ចាប់ខ្លួន​សកម្មជន​បក្ស​ប្រឆាំង​ឡើង​វិញ។ អ្នកស្រី​ថា ការ​សម្រេច​ចិត្ត​របស់​លោក ហ៊ុន សែន ធ្វើ​ឡើង​តាម​អារម្មណ៍៖ «ការ​បន្ធូរ​បន្ថយ ការ​លែក​លែង​ទោស អត់​ទាន់​មាន​ទំនុក​ចិត្ត ១០០ភាគ​រយ​ទេ ដោយសារ​ថា ពី​មុន​និយាយ​អត់​ទៀង។ មាន​ការ​លើក​លែង​ហើយ ក៏​បាន​មក​ស្រុក​ទេស​មែន តែ​ការ​ធ្វើ​ទុក​បុក​ម្នេញ​មក​លើ​បក្ស​ប្រឆាំង នៅ​តែ​អត់​ទាន់​ទុក​ចិត្ត»

ថ្មីៗ នេះ​ លោក​នាយក​រដ្ឋមន្ត្រី​ ហ៊ុន​ សែន​ បាន​បញ្ជា​ឱ្យ​ដោះលែង​ និង​បញ្ឈប់​ការ​ចាប់​ចង​ ឬ​ធ្វើ​ទុក្ខ​បុក​ម្នេញ​ ដល់​អ្នក​ទោស​នយោបាយ​ ដែល​ត្រូវ​រង​ការ​បង្ក្រាប​ក្នុង​អំឡុង​ពេល​យុទ្ធនាការ​ ធ្វើ​មាតុភូមិ​និវត្តន៍​របស់​លោក​ សម​ រង្ស៊ី​ កន្លង​មក។ តែ​ក្រោយ​មក​លោក​ ហ៊ុន​ សែន​ ព្រមាន​ថា​ លោក​នឹង​ឱ្យ​អាជ្ញាធរ​ចាប់​ខ្លួន​ អ្នក​ទោស​នយោបាយ​ប្រមូល​យក​ទៅ​ដាក់​គុក​វិញ​ បើ​ហ៊ាន​និយាយ​ថា​ ការ​ដោះ​លែង​ពួក​គេ​ កើត​ឡើង​ដោយសារ​សម្ពាធ​អន្តរជាតិ ឬ​ក៏​សកម្មជន​ទាំង​នោះ​នៅ​តែ​ធ្វើ​សកម្មភាព​គាំទ្រ​គណបក្ស​សង្គ្រោះ​ជាតិ​បន្ត​ទៅ​ទៀត។

មេឃុំ​ស្រែគរ​ជាប់​ឆ្នោត​ លោក​ សៀក​ មេគង្គ​ ចាត់​ទុក​ការ​លើក​ឡើង​នេះ​ ជា​សារ​គំរាម​កំហែង​ និង​បំបិទ​សិទ្ធិ​សេរីភាព​របស់​លោក​ និង​សកម្មជន​បក្ស​ប្រឆាំង​ដទៃ​ទៀត។ លោក​ថា​ សិទ្ធិ​សេរីភាព​សកម្មជន​បក្ស​ប្រឆាំង​ កំពុង​ឋិត​ក្នុង​ភាព​ផុយ​ស្រួយ​ និង​រង​ការ​ធ្វើ​ទុក្ខ​បុក​ម្នេញ​គ្រប់​រូប​ភាព។ លោក​បញ្ជាក់​បន្ថែម​ថា លោក​​បាន​បង្ខំចិត្ត​ភៀស​ខ្លួន​មួយ​រយៈ​នេះ​ ដោយសារ​តែ​ខ្លាច​អាជ្ញាធរ​ចាប់​ដាក់​គុក​ គ្មាន​ឱកាស​រក​ប្រាក់​សង​បំណុល​ធនាគារ​វិញ៖ «ប្រឈម និង​ជីវភាព​ចេះ​តែ​ប្រឈម តែ​ធ្វើ​ម៉េច​យើង​ស្រឡាញ់​យុត្តិធម៌។ ទិសដៅ​របស់​យើង ដែល​តស៊ូ ២៤​ឆ្នាំ​ហើយ​ជាង ចង់​បាន​យុត្តិធម៌ សេរីភាព​ ជូន​ពលរដ្ឋ មិន​ថា និន្នាការ​បក្ស​ណា​ទេ ឱ្យ​មាន​សេរីភាព​គ្រប់​គ្នា​មាន​សិទ្ធិ​ចំពោះ​មុខ​ច្បាប់ ពីព្រោះ​យើង​ដើរ​មាន​រដ្ឋធម្មនុញ្ញ»

អ្នក​នាំ​ពាក្យ​សមា​គម អាដហុក (ADHOC) លោក​ ស៊ឹង​ សែន​ ករុណា​ សង្កេត​ឃើញ​ថា ប្រទេស​កម្ពុជា​ នៅ​មិន​ទាន់​គោរព​នីតិរដ្ឋ​ឱ្យ​ល្អ​ប្រសើរ​នៅ​ឡើយ​ទេ ហើយ​ការ​អនុវត្ត​ច្បាប់​ធ្វើឡើង​តាមតែ​បញ្ជា​ថ្នាក់​ដឹក​នាំ​អំណាច​នីតិប្រតិបត្តិ​ប៉ុណ្ណោះ​។ លោក​ពន្យល់​ថា មនុស្ស​គ្រប់​រូប​មាន​សិទ្ធិ​សេរីភាព​ ការពារ​ខ្លួន​តាម​ប្រព័ន្ធ​តុលាការ​ ហើយ​ការ​ឃាត់ខ្លួន​ និង​ការ​ចាប់​ខ្លួន​អាច​ធ្វើ​ទៅ​បាន​ ត្រូវ​អនុវត្ត​តាម​នីតិវិធី​ច្បាប់៖ «នា​ពេល​ថ្មីៗ គ្រាន់​តែ​ប្រមុខ​រដ្ឋាភិបាល លោក​មាន​ប្រសាសន៍​ពី​ការ​ដោះ​លែង មាន​ការ​ចាត់​ចែង​នីតិវិធី​ព្រោងព្រាត​អ៊ីចឹង​ទៅ មាន​ការ​ដោះ​លែង​មនុស្ស​អ៊ីចឹង​ទៅ។ លេច​ព័ត៌មាន​ថ្មីៗ នឹង​ចាប់​ខ្លួន​បញ្ជូន​នៅ​វិញ។ អ៊ីចឹង​ការ​លើក​ឡើង​របស់​នេះ ជា​ការ​រំលោភ​សេចក្តី​សម្រេច​ចិត្ត​របស់​តុលាការ​ហើយ»

មន្ត្រី​សិទ្ធិមនុស្ស​រូប​នេះ​ បន្ថែម​ថា​ ការ​ចាប់ខ្លួន​ ការ​ដោះលែង​ និង​ការ​គំរាម​ចាប់ខ្លួន​សកម្មជន​បក្ស​ប្រឆាំង​ គឺជា​ជម្លោះ​នយោបាយ​ ហើយ​ស្ថាប័ន​តុលាការ​ពិបាក​ក្នុង​ការ​ប្រើ​ឆន្ទានុសិទ្ធិ​របស់​ខ្លួនដោយ​សារ​រង​សម្ពាធ​ពី​ប្រមុខ​រដ្ឋាភិបាល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល