ប្រជាពលរដ្ឋមួយចំនួនមិនចាប់អារម្មណ៍នឹងការឃោសនារកសំឡេងឆ្នោតរបស់គណបក្សនយោបាយនានានោះទេ ដោយសារគ្មានគណបក្សដែលពួកគេស្រលាញ់ចូលរួមប្រកួតប្រជែងការបោះឆ្នោត។ ប៉ុន្តែអ្នកនាំពាក្យគ.ជ.ប ឆ្លើយតបថា ដំណើរការឃោសនាបោះឆ្នោតជ្រើសរើសតំណាងរាស្ត្រក្នុងថ្ងៃទី២ ប្រព្រឹត្តទៅដោយរលូន និងមានមនុស្សរាប់ម៉ឺននាក់ចូលរួមហែក្បួនឃោសនា។
ប្រជាពលរដ្ឋមួយចំនួនលើកឡើងថា ការឃោសនារកសំឡេងឆ្នោតរបស់គណបក្សនយោបាយនានាក្នុងអាណត្តិទី៧នេះ មានភាពសោះកក្រោះ ដោយសារគ្មានគណបក្សប្រឆាំងចូលរួមប្រកួតប្រជែង។
ប្រជាពលរដ្ឋម្នាក់នៅខេត្តមណ្ឌលគិរី លោកស្រី ភ្លឹក ភិរម្យ ប្រាប់វិទ្យុអាស៊ីសេរីថា លោកស្រីនិង ពលរដ្ឋនៅខេត្តមណ្ឌលគិរីភាគច្រើនមិនសូវចាប់អារម្មណ៍នឹងការឃោសនារកសំឡេងឆ្នោតរបស់គណបក្សនយោបាយនោះទេ ដោយសារពួកគាត់មើលឃើញថា មានតែគណបក្សកាន់អំណាច និងគ្មានគណបក្សដែលពួកគេស្រលាញ់ចូលរួមប្រកួតប្រជែង។
លោកស្រី ភ្លឹក ភិរម្យ៖ «ខ្ញុំឃើញថាអ្នកដែលគាំទ្រអ្នកដែលទៅឃោសនាបោះឆ្នោតទៅតែខ្លួនទេ វាខួរក្បាលទាំងអស់ហ្នឹង វាគ្មានទៅជាមួយទេ។ រួចអ្នកទាំងអស់ហ្នឹងសុទ្ធតែខ្ញុំស្គាល់សុទ្ធតែអ្នកមានបញ្ហាទំនាស់ដីធ្លី ហើយអ៊ីចឹងបានជួលកាលខ្ញុំគ្មានអារម្មណ៍ទេ។ នៅពេលបោះឆ្នោតធ្វើជានាំគ្នាហ៊ោធ្វើជាឯងដូចថា វាទៅតែខ្លួនវាគ្មានវិញ្ញាណអីទៅជាមួយអ៊ីចឹង»។
ស្រដៀងគ្នានេះដែរ ពលរដ្ឋនៅខេត្តបាត់ដំបង កញ្ញា រឿន ស្រីណយ ថ្លែងថា កញ្ញា មិនចាប់អារម្មណ៍នឹងការឃោសនារកសំឡេងឆ្នោតនោះទេ ព្រោះកញ្ញាមើលឃើញថា ការបោះឆ្នោតនៅពេលខាងមុខនេះនឹងគ្មានតម្លាភាពឡើយ។
កញ្ញា រឿន ស្រីណយ៖ «ណាមួយការឃោសនាបោះឆ្នោតនេះបើមិនបាច់ចាំហែបក្សក៏បានដែរ បើបោះត្រូវតែជាប់ខាងហ្នឹងដដែលនឹង។ ព្រោះមានគណបក្សប្រកួតប្រជែងដូចថា គណបក្សមួយបាត់ភ្លើងទៀនអត់មានចូលរួមប្រកួតប្រជែងនៅសល់តែមួយដែលប្រជាពលរដ្ឋគាំទ្រច្រើននោះ»។
ចំណែកពលរដ្ឋនៅខេត្តតាកែវឯណោះវិញ លោកថ្លែងសុំមិនបញ្ចេញឈ្មោះថា ការបោះឆ្នោតនៅពេលខាងមុខនេះជាការបោះឆ្នោតក្លែងក្លាយ ដូច្នេះលោកថា ការឃោសនារកសំឡេងឆ្នោតក៏ក្លែងក្លាយដែរ។ ពលរដ្ឋរូបនេះអះអាងថា ប្រជាពលរដ្ឋភាគច្រើននៅតំបន់គាត់រស់នៅក៏មិនសូវចាប់អារម្មណ៍នឹងការបោះឆ្នោតនេះដែរ។
«លទ្ធិប្រជាធិបតេយ្យវាអត់មាន អត់មានគណបក្សយើងចាប់អារម្មណ៍។ ចាប់អារម្មណ៍បំផុតគឺគណបក្សភ្លើងទៀន ដល់ពេលអត់មានគណបក្សភ្លើងទៀនយើងមានទៅចាប់អារម្មណ៍ស្អី។ បើនិយាយពីរឿងគោលការណ៍ចេញមកសុទ្ធតែដដែល ការពាររដ្ឋធម្មនុញ្ញ អីគេនោះ វាអត់មានគោលការណ៍ដែលធ្វើឱ្យចាប់អារម្មណ៍។ វាសុទ្ធតែគោលការណ៍ចេញបីមាត់វាទៅហើយ ពេលបោះឆ្នោតហើយគេធ្វើបាបប្រជាពលរដ្ឋដដែលនឹង»។
យុទ្ធនាការឃោសនាបោះឆ្នោតជាតិអាណត្តិទី៧នេះ មានរយៈពេល ២១ថ្ងៃ គឺចាប់ពីថ្ងៃទី១ កក្កដា ដល់ថ្ងៃទី២១ កក្កដា។ ការបោះឆ្នោតនេះមានគណបក្សនយោបាយសរុប ១៨គណបក្សចូលរួមប្រកួតប្រជែង ប៉ុន្តែពុំមានគណបក្សភ្លើងទៀនដែលជាគណបក្សប្រឆាំងធំជាងគេចូលរួមនោះទេ ដោយគ.ជ.បដែលស្ថិតក្រោមឥទ្ធិពលបក្សកាន់អំណាច មិនឱ្យចូលរួម។
ទាក់ទងនឹងបញ្ហានេះអ្នកនាំពាក្យគណៈកម្មការជាតិរៀបចំការបោះឆ្នោត លោក ហង្ស ពុទ្ធា ប្រាប់វិទ្យុអាស៊ីសេរីថា ដំណើរការឃោសនារកសំឡេងឆ្នោតរបស់គណបក្សនយោបាយនានា ចាប់ពីថ្ងៃដំបូង ដល់ថ្ងៃទី២ គឺប្រព្រឹត្តទៅដោយរលូន។ លោកបញ្ជាក់ថា ក្នុងនោះគណបក្សនយោបាយខ្លះមានអ្នកចូលរួមឃោសនារាប់ម៉ឺននាក់ ហែតាមដងផ្លូវក្នុងរាជធានីភ្នំពេញ និងនៅតាមបណ្ដាខេត្ត។
លោក ហង្ស ពុទ្ធា៖ «ចំណុចនេះគ្រាន់តែជាការលើកឡើងដើម្បីជំទាស់ជាមួយហ្នឹងដំណើរការប្រព្រឹត្តទៅនៃការឃោសនារបស់គណបក្សនោះទេ។ ផ្ទុយទៅវិញគឺ ប្រជាពលរដ្ឋបានសំឡឹងមើលដោយយកចិត្តទុកដាក់ និងបានតាមដាននូវខ្លឹមសារដែលផ្សាយជាកម្មវិធីរបស់គណបក្សនយោបាយ ទាំងការផ្សាយតាមទូរទស្សន៍ហើយនឹងវិទ្យុជាតិផងដែរ»។
ទោះជាយ៉ាងណានាយកប្រតិបត្តិអង្គការនិចហ្វិក (NICFEC) លោក សំ គន្ធាមី មានប្រសាសន៍ថា បើទោះបីជាមានគណបក្សនយោបាយចំនួន ១៨ចូលរួមប្រកួតប្រជែងការបោះឆ្នោតក្ដី ក៏យុទ្ធនាការឃោសនារកសំឡេងឆ្នោត រយៈពេល២ថ្ងៃមកនេះ ហាក់មានភាពស្ងប់ស្ងាត់ជាងការបោះឆ្នោតមុនៗ។ លោកបញ្ជាក់ថា រយៈពេល២ថ្ងៃមកនេះ មានគណបក្សប្រមាណ៤ប៉ុណ្ណោះដែលហែឃោសនាធំនៅរាជធានីភ្នំពេញ ក្នុងនោះគណបក្សប្រជាជនកម្ពុជារបស់លោក ហ៊ុន សែន មានមនុស្សច្រើនជាងគេ គណបក្សក្រៅពីនោះមានអ្នកចូលរួមតិចតួច។
លោក សំ គន្ធាមី៖ «ប្រជាពលរដ្ឋដូចមិនសូវចាប់អារម្មណ៍អបអរសាទរអ៊ីចឹង។ មូលហេតុដែលមិនសូវចាប់អារម្មណ៍ ជួនកាលគាត់គិតថា គណបក្សដដែលនឹងមានប៉ុន្មាននឹងគាត់គិតថា មានដដែលនឹងវាអត់មានអីប្រែប្រួលទេ។ ដូចថា មានតែគណបក្សប្រជាជនមួយទេ ដែលទៅច្រើនហែក្បួនក្រៅពីហ្នឹងដូចអត់មានគណបក្សណាច្រើនទេ ដូចថាមានតិចតួចហ្នឹងឯង»។
ការបោះឆ្នោតជ្រើសរើសតំណាងរាស្ត្រនីតិកាលពី៧ខាងមុននេះ នឹងប្រព្រឹត្តទៅនៅថ្ងៃទី២៣ ខែកក្កដា។
ការឃោសនារកសំឡេងឆ្នោតក្នុងថ្ងៃទី២ មកនេះ គណបក្សប្រជាជនកម្ពុជាដង្ហែក្បូនឃោសនាទ្រង់ទ្រាយធំនៅទូទាំងប្រទេស ដោយមានឡានទំនើបៗ និងមានមន្ត្រីរាជការរាប់ម៉ឺននាក់ចូលរួម។ ចំណែកគណបក្សខ្មែររួបរួមជាតិវិញ ដឹកនាំដោយប្រធានគណបក្សគឺលោក ញឹក ប៊ុន ឆៃ និងមន្ត្រីជាន់ខ្ពស់គណបក្សនេះគឺលោក យ៉ែម បុញ្ញឫទ្ធិ ហែក្បួនធំ នៅខេត្តបន្ទាយមានជ័យ។ រីឯគណបក្សហ៊្វុនស៊នប៉ិច ដឹកនាំដោយព្រះអង្គម្ចាស់ នរោត្តម ចក្រាវុធ ហែក្បួនឃោសនាធំនៅរាជធានីភ្នំពេញ។
ទោះជាយ៉ាងណាការបោះឆ្នោតជ្រើសតាំងតំណាងរាស្ត្រនីតិកាលទី៧នេះ ត្រូវបានសហគមន៍ជាតិនិងអន្តរជាតិចាត់ទុកថា ជាការបោះឆ្នោតក្លែងក្លាយ និងមិនស្របតាមគន្លងលទ្ធិប្រជាធិបតេយ្យ ដោយសារតែលោក ហ៊ុន សែន បានរារាំងមិនឱ្យគណបក្សភ្លើងទៀន ដែលមានពលរដ្ឋគាំទ្រជិតពីរលាននាក់ ចូលរួមការបោះឆ្នោត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។