សមត្ថកិច្ច កោះហៅប្រធានប្រតិបត្តិគណបក្សសង្គ្រោះជាតិខេត្តស្វាយរៀងទៅសួរនាំ
2019.09.24
ស្នងការនគរបាលខេត្តស្វាយរៀង កោះហៅប្រធានប្រតិបត្តិគណបក្សសង្គ្រោះជាតិ ប្រចាំខេត្តស្វាយរៀងទៅសួរនាំ នៅថ្ងៃទី២៣ ខែកញ្ញា ប៉ុន្តែមន្ត្រីបក្សប្រឆាំងរូបនេះ មិនបានចូលបំភ្លឺឡើយ ដោយសារកំពុងភៀសខ្លួននៅប្រទេសថៃ ពីព្រោះបារម្ភការចាប់ខ្លួន។ មន្ត្រីគណបក្សប្រឆាំង និងសង្គមស៊ីវិល ចាត់ទុកការកោះហៅនេះថា ជាចេតនាគំរាមគំហែងផ្នែកនយោបាយ។
ប្រធានប្រតិបត្តិគណបក្សសង្គ្រោះជាតិប្រចាំខេត្តស្វាយរៀង ដែលកំពុងរស់នៅនិរទេសខ្លួននៅឯប្រទេសថៃ លោក ម៉ៅ វិបុល ប្រាប់អាស៊ីសេរីថា លិខិតកោះហៅរបស់ស្នងការនគរបាលខេត្តស្វាយ រៀងនេះ ត្រូវបានសមត្ថកិច្ចមួយក្រុម យកទៅឲ្យម្ដាយរបស់លោកដែលរស់នៅតែម្នាក់ឯងនៅភូមិថ្នា ឃុំគោកព្រីង ស្រុកស្វាយជ្រុំ។
ក្នុងលិខិតកោះហៅនេះ បញ្ជាក់ថា លោក ម៉ៅ វិបុល ត្រូវចូលបំភ្លឺនៅការិយាល័យនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តស្វាយរៀង នៅរសៀលថ្ងៃទី២៣ ខែកញ្ញា ពាក់ព័ន្ធនឹងរឿងផ្ទាល់ខ្លួន។
លោក ម៉ៅ វិបុល ថ្លែងថា លោកមិនអាចចូលបំភ្លឺតាមការកោះហៅនេះទេ ព្រោះលោកដឹងថា អាជ្ញាធរមានបំណងចាប់ខ្លួន ដោយសារតែលោកមិនព្រមចុះចូលជាមួយគណបក្សកាន់អំណាច ហើយនៅតែបន្តសកម្មភាពនយោបាយជាមួយគណបក្សសង្គ្រោះជាតិ៖ «មិនអាចចូលបំភ្លឺបានទេ ព្រោះចូលបំភ្លឺទៅមានតែគេចាប់ខ្លួនហើយ។ នេះគឺជាការគំរាមគំហែងបំបាក់ស្មារតីរបស់មន្ត្រីនិងសកម្មជនបក្សប្រឆាំង»។
លោក ម៉ៅ វិបុល ស្ថិតក្នុងចំណោមមន្ត្រី ១១៨រូបរបស់គណបក្សសង្គ្រោះជាតិ ដែលត្រូវបាន តុលាការរបបក្រុងភ្នំពេញហាមឃាត់សិទ្ធិធ្វើនយោបាយរយៈពេល ៥ឆ្នាំ។ លោកបានបង្ខំចិត្តរត់ ភៀសខ្លួនទៅរស់នៅឯប្រទេសថៃជិត ២ឆ្នាំហើយ ដើម្បីគេចពីការតាមចាប់ខ្លួន។ ទោះបីជារស់នៅ ក្នុងភាពជាជនភៀសខ្លួនក្តី លោក ម៉ៅ វិបុល នៅតែបង្ហោះសារនៅលើហ្វេសប៊ុកគាំទ្រគណបក្ស សង្គ្រោះជាតិ និងតែងតែរិះគន់របបក្រុងភ្នំពេញពីទង្វើបំផ្លាញប្រជាធិបតេយ្យ និងរំលោភសិទ្ធិមនុស្ស។ លោកប្ដេជ្ញាថា នឹងវិលចូលប្រទេសកម្ពុជាវិញជាមួយ លោក សម រង្ស៊ី នៅថ្ងៃទី៩ ខែវិច្ឆិកា ដើម្បីផ្លាស់ប្ដូររបបដឹកនាំសព្វថ្ងៃ៖ «ក្នុងឆន្ទៈនិងបេះដូងរបស់ខ្ញុំគឺស្រឡាញ់យុត្តិធម៌ និងប្រជាធិបតេយ្យ និងប្រជាពលរដ្ឋដែលគាត់រងគ្រោះសព្វបែបយ៉ាងដោយសាររដ្ឋាភិបាលធ្វើទុក្ខ បុកម្នេញនេះ»។
អាស៊ីសេរី មិនអាចសុំការឆ្លើយតបរឿងនេះពីស្នងការនគរបាលខេត្តស្វាយរៀង លោក កឹង ឃន បានទេនៅថ្ងៃទី២៣ កញ្ញា ដោយលោកប្រាប់ថា ជាប់រវល់ប្រជុំ។
រីឯអ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន វិញ អះអាងថា លោកមិនបានដឹងអំពីសំណុំរឿងនេះទេ ប៉ុន្តែលោកបញ្ជាក់ថា ប្រសិនបើបុគ្គលដែលទទួលបានលិខិតកោះហៅនេះ មិនចូលបំភ្លឺតាមកាលកំណត់ គឺសមត្ថកិច្ច នឹងចេញលិខិតកោះហៅម្ដងហើយម្ដងទៀត។ លោកអះអាងថា ការកោះហៅ និងការចាប់ខ្លួនសកម្មជនមូលដ្ឋានគណបក្សសង្គ្រោះជាតិសព្វថ្ងៃនេះ គឺដោយសារពួកគេធ្វើសកម្មភាពឃុបឃិតគ្នាជាមួយលោក សម រង្ស៊ី ដែលលោកហៅថា ជាមេឧទ្ទាមក្រៅច្បាប់៖ «អ្នកទាំងអស់នោះប្រព្រឹត្តខុសនឹងច្បាប់ មិនមែនដោយសារគេប្រកាសវិលត្រឡប់មករបស់ពួកមេឧទ្ទាមនោះទេ តែពួកនេះបានធ្វើសកម្មភាពឃុបឃិតជាមួយពួកឧទ្ទាម។ មានសង្គមស៊ីវិលមួយចំនួនចោទអ៊ីចេះចោទអ៊ីចុះ។ អារឿងសមត្ថកិច្ច ហៅពលរដ្ឋមកបំភ្លឺនេះ គឺមានរាល់តែថ្ងៃតែគ្រាន់តែថាពួកគាត់អត់ចាប់អារម្មណ៍ ប៉ុន្តែរឿងពួកឧទ្ទាមនេះ គឺគាត់ចាប់អារម្មណ៍តែម្ដង»។
ប្រធានផ្នែកសិទ្ធិមនុស្សនៃសមាគម អាដហុក (ADHOC) លោក នី សុខា លើកឡើងថា ការកោះហៅប្រធានប្រតិបត្តិគណបក្សសង្គ្រោះជាតិប្រចាំខេត្តស្វាយរៀង ក្នុងស្ថានភាពនយោបាយបែបនេះ នឹងនាំឱ្យមហាជនវាយតម្លៃថា ជាការគំរាមគំហែង និងធ្វើទុក្ខបុកម្នេញទៅលើសកម្មជនបក្សប្រឆាំង។ លោកព្រួយបារម្ភថា ចំណាត់ការបែបនេះ នឹងកាន់តែបន្ថែមបន្ទុកឲ្យសហគមន៍អន្តរជាតិ ជាពិសេសសហភាពអឺរ៉ុប វាយតម្លៃមិនល្អពីស្ថានភាពប្រជាធិបតេយ្យ និងសិទ្ធិមនុស្សក្នុងប្រទេសកម្ពុជា។ លើសពីនេះ លោកថា វាក៏ធ្វើឲ្យប្រទេសកម្ពុជាកាន់តែមានភាពប្រេះឆា និងងាយផ្ទុះអំពើហិង្សាសងសឹកគ្នាថែមទៀត៖ «សហគមអឺរ៉ុបគេកំពុងតែស្នើឲ្យយើងកែទម្រង់បញ្ហា សិទ្ធីមនុស្ស និងបញ្ហាប្រជាធិបតេយ្យហើយដល់ពេលយើងអត់មានសញ្ញាណាមួយអំពីការកែប្រែទេ ហើយកាន់តែរឹតបន្តឹងសិទ្ធិសេរីភាពអ្នកនយោបាយ និងប្រជាពលរដ្ឋ ។វាជាការព្រួយបារម្ភរបស់ យើងថា តើប្រទេសកម្ពុជា នឹងអាចមានអ្វីកើតឡើងនៅពេលអនាគត»។
មន្ត្រីសិទ្ធិមនុស្សកត់សម្គាល់ថា អាជ្ញាធរបានបង្កើនការវាយប្រហារកាន់តែខ្លាំងលើក្រុមអ្នកគាំទ្រ និងសកម្មជនបក្សប្រឆាំងតាមមូលដ្ឋាន បន្ទាប់ពីប្រធានស្ដីទីគណបក្សសង្គ្រោះជាតិបានកំណត់ថ្ងៃជាក់លាក់ក្នុងការវិលត្រឡប់មកកម្ពុជាវិញ។ គិតត្រឹមថ្ងៃទី២៣ កញ្ញា អាជ្ញាធររបបក្រុងភ្នំពេញបានចាប់ខ្លួនសកម្មជនបក្សប្រឆាំង នៅតាមមូលដ្ឋានសរុប ២៩នាក់ ដាក់ក្នុងពន្ធនាគារ និងបានកោះហៅសកម្មជនបក្សប្រឆាំងទៅសាកសួរកើនដល់ ១៥៨នាក់ហើយ។ ក្រៅពីនេះ សកម្មជនបក្សប្រឆាំងមួយចំនួនទៀត ក៏កំពុងទទួលរងការគំរាមគំហែង និងរងការវាយដំ តាមរូបភាពផ្សេងៗ ទៀតដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។