ក្រសួង​មហាផ្ទៃ​៖ ​កូន​ប្រុស​របស់​​មន្ត្រី​បក្ស​សង្គ្រោះ​ជាតិ​ ​ដែល​ស្លាប់​​​ក្នុង​ពន្ធនាគារ​ខេត្ត​កំពង់ចាម ដោយសារ​បញ្ហា​សុខភាព​ផ្ទាល់​ខ្លួន

ដោយ សេក បណ្ឌិត
2019-06-14
អ៊ីម៉ែល
មតិ
Share
បោះពុម្ព
(រូប​ខាង​ឆ្វេង) ប្រធាន​ប្រតិបត្តិ​គណបក្ស​សង្គ្រោះ​ជាតិ​ឃុំ​ទួល​ព្រះ​ឃ្លាំង ស្រុក​ស្ទឹងត្រង់ ខេត្ត​កំពង់ចាម លោក អ៊ាម ទិត្យ និង​ជា​ឪពុក​របស់​លោក ទិត្យ រ៉ន (ស្ដាំ) ដែល​ស្លាប់​នៅ​ក្នុង​ពន្ធនាគារ​ខេត្ត​កំពង់ចាម នៅ​ពី​ថ្ងៃ​ទី១៨ ខែ​មេសា ឆ្នាំ២០១៩។
(រូប​ខាង​ឆ្វេង) ប្រធាន​ប្រតិបត្តិ​គណបក្ស​សង្គ្រោះ​ជាតិ​ឃុំ​ទួល​ព្រះ​ឃ្លាំង ស្រុក​ស្ទឹងត្រង់ ខេត្ត​កំពង់ចាម លោក អ៊ាម ទិត្យ និង​ជា​ឪពុក​របស់​លោក ទិត្យ រ៉ន (ស្ដាំ) ដែល​ស្លាប់​នៅ​ក្នុង​ពន្ធនាគារ​ខេត្ត​កំពង់ចាម នៅ​ពី​ថ្ងៃ​ទី១៨ ខែ​មេសា ឆ្នាំ២០១៩។
រូប៖ ពី​វីឌីអូ​ក្នុង​ហ្វេសប៊ុក Sam Rainsy

គណៈ​កម្មាធិការ​ជាតិ​ប្រឆាំង​ទារុណ​កម្ម ក្រសួង​មហាផ្ទៃ​អះអាង​ថា ​ការ​ស្លាប់​កូន​ប្រុស​របស់​ប្រធាន​ប្រតិបត្តិ​គណបក្ស​សង្គ្រោះ​ជាតិ​ឃុំ​ទួល​ព្រះ​ឃ្លាំង ស្រុក​ស្ទឹងត្រង់​ ​នៅ​ក្នុង​ពន្ធនាគារ​ខេត្ត​កំពង់ចាម កាល​ពី​ថ្ងៃ​ទី​១៨ មេសា ដោយសារ​បញ្ហា​សុខភាព​ផ្ទាល់​ខ្លួន និង​​ខ្វះខាត​សមត្ថភាព​បច្ចេកទេស​ជំនាញ​របស់​សមត្ថកិច្ច​ជួយ​អ្នក​ទោស​ក្នុង​ពេល​ឃុំ​ឃាំង។ ទោះ​បី​យ៉ាង​ណា​សង្គមស៊ីវិល​នៅ​តែ​សង្ស័យ​ថា ការ​ស្លាប់​របស់​កូន​សកម្មជន​បក្ស​ប្រឆាំង​នេះ​ អាច​ជាប់​ពាក់ព័ន្ធ​ទៅ​នឹង​ការ​ធ្វើ​ទារុណ​កម្ម។

ប្រធាន​ផ្នែក​នីតិកម្ម និង​ជំនួយ​ផ្នែក​ច្បាប់​នៃ​គណៈ​កម្មាធិការជាតិ​ប្រឆាំង​ទារុណ​កម្ម លោក តុប សំភី ប្រាប់​អាស៊ី​សេរី​ថា អង្គភាព​នេះ ក្រោយ​ពេល​ចុះ​ស្រាវជ្រាវ​ផ្ទាល់ និង​ពិនិត្យ​តាម​កាម៉េរ៉ា​សុវត្ថិភាព​ដែល​បំពាក់​ក្នុង​ស្នងការដ្ឋាន​ខេត្ត​កំពង់ចាម បង្ហាញ​ថា ឈ្មោះ ទិត រ៉ន មិន​មាន​រង​អំពើ​ទារុណ​កម្ម​ឡើយ។ លោក​ប្រាប់​ថា លោក​នឹង​ស្នើ​សុំ​គោលការណ៍​ពី​ប្រធាន​ស្ថាប័ន​ដើម្បី​បង្ហាញ​ឃ្លីប​វីដេអូ​ បង្ហាញ​ពី​អាការៈ​របស់ លោក ទិត រ៉ន មុន​ពេល​ដួល​​ក្នុង​បន្ទប់​ទឹក នៅ​កន្លែង​ឃុំ​ខ្លួន​បណ្ដោះ​អាសន្ន គឺ​ស្នងការដ្ឋាន​នគរបាល​ខេត្ត​កំពង់ចាម៖ «សុំ​បញ្ជាក់​បន្តិច កាមេរ៉ា​សុវត្ថិភាព​ហ្នឹង​បាន​បំពាក់​នៅ​​ក្នុង​បន្ទប់​ឃុំ​បណ្ដោះ​អាសន្ន​របស់​ស្នងការដ្ឋាន​នគរបាល​ ដែល​កាមេរ៉ា​សុវត្ថិភាព​ហ្នឹង​មិន​បាន​បញ្ជាក់​ពី​ការ​ស្លាប់​តែ​បាន​បញ្ជាក់​​ពី​ស្ថានភាព​នៃ​​សភាព​របស់​ឈ្មោះ ទិត រ៉ន​ ហ្នឹង​ ដែល​គាត់​មាន​អាការៈ​រញី​រញ័រ​ ដើរ​មិន​ចង់​រួច ដើរ​ទប់​ជាមួយ​ជើង​គ្រែ​​របស់​បន្ទប់​ឃុំ​ ហើយ​គាត់​ចូល​ទៅ​ក្នុង​បន្ទប់​ទឹក​របស់​បន្ទប់​ឃុំ​បណ្ដោះ​អាសន្ន​របស់​ស្នងការដ្ឋាន​ហ្នឹង គាត់​ដួល​បោក​ផ្កាប់​មុខ​ជាមួយ​​នឹង​បង្គន់។ ​អា​ហ្នឹង​តាម​រយៈ​សាក្សី​នៅ​ក្នុង​ហេតុការណ៍​២នាក់ ​ជួយ​លើក​ឈ្មោះ​ទិត រ៉ន ហ្នឹង​ចេញ​មក​។ តែ​កាមេរ៉ា​សុវត្ថិភាព​ខ្ញុំ​អាច​បញ្ជូន​បាន សកម្មភាព​របស់​ទិត រ៉ន ហ្នឹង ចាំ​ខ្ញុំ​ស្នើ​សុំ​​គោលការណ៍​ពី​ឯក​ឧត្ដម​ប្រធាន​គណៈកម្មាធិការ។ ខ្ញុំ​គិត​ថា វា​មិន​មាន​អ្វី​ជា​ការ​លាក់​បាំង​ដែរ ឬ​មួយ​បង្ហាញ​ពី​ស្ថានភាព​ជាក់​ស្ដែង​ យើង​គួរ​តែ​បង្ហាញ»

គណៈកម្មាធិការ​ជាតិ​ប្រឆាំង​ទារុណ​កម្ម កាល​ពី​ថ្ងៃ​ទី​១២ មិថុនា ចេញ​សេចក្ដី​ថ្លែងការណ៍​ ថា​បាន​​ចុះ​ទៅ​ស្រាវជ្រាវ ករណី​ការ​ស្លាប់​របស់ លោក ទិត រ៉ន ឡើង​វិញ។ លោក តុប សំភី ប្រាប់​ថា ការ​ស៊ើប​អង្កេត​នេះ គឺ​ធ្វើ​ឡើង​ដោយសារ​ ឃើញ​ការ​ផ្សាយ​ព័ត៌មាន និង​គ្មាន​ការ​ស្នើ​សុំ​ពី​ស្ថាប័ន​ណា​ទេ។ ប៉ុន្តែ​​មុន​មាន​ការ​ស៊ើប​អង្កេត​ឡើង​វិញ​នេះ ​ក្រសួង​ការ​​បរទេស​សហរដ្ឋ​អាមេរិក បាន​អំពាវនាវ​ឱ្យ​ របប​លោក ហ៊ុន សែន ​ស៊ើប​អង្កេត​ឡើងវិញ ​ដោយ​ឯករាជ្យ និង​ជា​បន្ទាន់​ ដើម្បី​រក​ឱ្យ​ឃើញ មូលហេតុ​ពិត​ នៅ​ពី​ក្រោយ​ការ​ចាប់​ខ្លួន និង​ការ​ស្លាប់​របស់​កូន​ប្រុស​មន្ត្រី​បក្ស​ប្រឆាំង​នៅ​មូលដ្ឋាន។ ចំណែក​គណៈកម្មការ​ចម្រុះ​ដឹកនាំ​ដោយ​ក្រសួង​មហាផ្ទៃ​ ក៏​បាន​ចុះ​ទៅ​ស្រាវជ្រាវ​ឡើង​វិញ ក្រោយ​មាន​ការ​អំពាវនាវ​របស់​ក្រសួង​ការបរទេស​សហរដ្ឋ​អាមេរិក​ដែរ។

ក្នុង​សេចក្ដី​ថ្លែងការណ៍​របស់​គណៈកម្មាធិការ​​ជាតិ​ប្រឆាំង​ទារុណ​កម្ម បង្ហាញ​ថា ​មូលហេតុ​​នៃ​ការ​ចាប់​ខ្លួន លោក ទិត រ៉ន គឺ​ពាក់ព័ន្ធ​នឹង​បទ​បង្ករបួស​ស្នាម​ដោយ​ចេតនា តាម​ដីកា​កំបាំង​មុខ ដែល​ប្រកាស​កាល​ពី ៩ឆ្នាំ​មុន គឺ​កាល​ពី​ឆ្នាំ២០១០។ ឯ​មូលហេតុ​នៃ​ការ​ស្លាប់​ផ្ដើម​ដំបូង​ពី​ការ​ ដួល បោក​ក្បាល​នឹង​គែម​បង្គន់ នៅ​ពេល​លោក​ ទិត រ៉ន ត្រូវ​បាន​ឃុំ​ខ្លួន​បណ្ដោះ​អាសន្ន​នៅ​ស្នងការដ្ឋាន​ខេត្ត​កំពង់ចាម នៅ​​ព្រឹក​ថ្ងៃ​ទី១៧ មេសា។ នៅ​ល្ងាច​ថ្ងៃ​ទី១៧ មេសា​ដដែល​ សមត្ថកិច្ច​បាន​បញ្ជូន​លោក ទិន រ៉ន ទៅ​ឃុំ​ខ្លួន​បន្ត​នៅ​ពន្ធនាគារ​ខេត្ត​កំពង់ចាម។ មន្ត្រី​ពន្ធនាគារ បញ្ជាក់​ថា ពេល​ធ្វើ​កំណត់​ហេតុ​ទទួល​ លោក ​ទិត រ៉ន ពី​សមត្ថកិច្ច​ មន្ត្រី​ពន្ធនាគារ​បាន​ឃើញ បាន​ឃើញ​ស្នាម​របួស​លើ​ចិញ្ចើម​ខាង​ស្ដាំ​របស់ លោក ទិត​ រ៉ន និង​បាន​បញ្ជូន​ទៅ​ប៉ុស្តិ៍​សុខភាព​ក្នុង​ពន្ធនាគារ។

គណៈកម្មាធិការ​នេះ​ ក៏​បាន​ជួប​សម្ភាសន៍ ​អ្នក​ជាប់​ឃុំ ១០នាក់ ក្នុង​ចំណោម​អ្នក​ជាប់​ឃុំ​​សរុប ​៤៨នាក់ ស្នាក់​នៅ​បន្ទប់​ឃុំ​ឃាំង​ក្នុង​ពន្ធនាគារ​ ជាមួយ​លោក ទិត​ រ៉ន អះអាង​ថា នៅ​ម៉ោង​ជាង ៧យប់​ ថ្ងៃ​ទី១៨ មេសា លោក ទិត រ៉ន មាន​សភាព​ឆ្លេឆ្លា រត់​បុក​ទ្វារ​ បុក​ជញ្ជាំង​ ហើយ​អ្នក​ទាំង​នោះ​ឮ​សំឡេង​ដួល និង​ស្ទុះ​ទៅ​មើល​ឃើញ​សភាព​ដួល​ផ្ងារ​ក្រោយ។ ក្រុម​អ្នក​ជាប់​ឃុំ​ឃាំង​ជាមួយ​គ្នា បាន​លើក​លោក​ ទិត រ៉ន ក្នុង​សភាព​ប្រឡាក់​លាមក និង​ទឹកនោម ហើយ​បាន​ស្រែក​ហៅ​មន្ត្រី​ពន្ធនាគារ​ឲ្យ​មក​ជួយ ខណៈ​លោក ទិត រ៉ន បាន​ដាច់​ខ្យល់​ស្លាប់​ទៅ​ហើយ។

គណៈកម្មាធិការ​នេះ ក៏​យោង​តាម​​កំណត់​ហេតុ​របស់​មន្ត្រី​នគរបាល​ មន្ត្រី​ពន្ធនាគារ​ និង​ព្រះរាជអាជ្ញា​ខេត្ត​កំពង់ចាម បង្ហាញ​ថា លោក ទិត រ៉ន ស្លាប់​ដោយសារ​ដួល​បោក​ទង្គិច​ចំ​ក្បាល​ធ្ងន់ធ្ងរ។ គណៈកម្មាធិការ​ជាតិ​ប្រឆាំង​​ទារុណ​កម្ម ​បាន​សម្ភាសន៍​អ្នក​ជិត​ខាង មេ​ភូមិ​ និង​ម្ដាយ លោក ទិត រ៉ន ហើយ​ពួកគេ​បញ្ជាក់​ថា លោក​ ទិត រ៉ន ជា​មនុស្ស​​ញៀន​ស្រា ​ដែល​តម្រូវ​ឲ្យ​គាត់​ត្រូវ​ហូប​ស្រា​ជា​ប្រចាំ​ថ្ងៃ ទើប​បាត់​​ភាព​ម្ចាស់​ការ​លើ​ខ្លួន​ឯង។ ស្ថាប័ន​រដ្ឋ​មួយ​នេះ​សន្និដ្ឋាន​ថា លោក ទិត រ៉ន គ្មាន​រង​ការ​ធ្វើ​ទារុណ​កម្ម​មុន​ពេល​ស្លាប់​ទេ គឺ​មូលហេតុ​ដោយសារ​បញ្ហា​សុខភាព​ផ្ទាល់​ខ្លួន និង​ខ្វះខាត​សមត្ថភាព​បច្ចេកទេស​ជំនាញ​របស់​សមត្ថកិច្ច​ជួយ​អ្នក​ទោស​ក្នុង​ពេល​ឃុំ​ឃាំង។

ទោះ​មាន​ការ​អះអាង​បែប​នេះ ប៉ុន្តែ​តាម​រយៈ​រូប​ថត​ បង្ហាញ​ថា លោក ទិត រ៉ន អាយុ ៣៦ឆ្នាំ បាន​ស្លាប់​ ក្នុង​ពន្ធនាគារ​ខេត្ត​កំពង់ចាម ក្រោម​ស្ថានភាព​ ជាំ​មុខ​មាត់ និង​ខ្លួន​ច្រើន​កន្លែង។ អាស៊ី​សេរី​មិន​អាច​សុំ​ការ​បញ្ជាក់​ពី​ខាង​សាច់​ញាតិ​របស់​សព​លោក ទិត រ៉ន បាន​ទេ ដោយ​សារ​ឪពុក​លោក ទិត រ៉ន គឺ​លោក អៀម ទិត ជា​ប្រធាន​ប្រតិបត្តិ​គណបក្ស​សង្គ្រោះ​ជាតិ​ឃុំ​ទួល​ព្រះ​ឃ្លាំង បាន​រត់​ភៀស​ខ្លួន​ ចេញ​ពី​ប្រទេស​កម្ពុជា ក្រោយ​ពេល​កូន​ប្រុស​ស្លាប់​ក្នុង​ពន្ធនាគារ។

អ្នក​នាំ​ពាក្យ​សមាគម​ការពារ​សិទ្ធិ​មនុស្ស អាដហុក លោក ស៊ឹង សែន​ករុណា យល់​ថា តាម​ការ​​​អង្កេត និង​រួប​ភាព​ នៃ​ការ​ស្លាប់​របស់​​ លោក ទិត រ៉ន ក្នុង​ពន្ធនាគារ​មាន​ចំណុច​គួរ​ឲ្យ​សង្ស័យ​ថា រង​ទារុណ​កម្ម​ច្រើន​កន្លែង។ តំណាង​សង្គម​ស៊ីវិល​រូប​នេះ សង្កេត​ឃើញ​​ថា ជា​ទូទៅ​សមត្ថកិច្ច​ ច្រើន​ធ្វើ​របាយការណ៍​ធ្វេស​ប្រហែស​ខ្ជីខ្ជា ដើម្បី​យក​រួច​ខ្លួន​ ទើប​ធ្វើ​ឲ្យ​រង​ការ​រិះគន់ និង​គ្មាន​ភាព​ជឿ់​ជាក់​លើ​របាយការណ៍​របស់​សមត្ថកិច្ច៖ «គឺ​នៅ​ពេល​ដែល​ស្លាប់ តែង​តែ​អះអាង​ដោយ​សមត្ថកិច្ច​សាមី​ទេ បាន​ន័យ​ថា ជា​សមត្ថកិច្ច​នៅ​តំបន់​ហ្នឹង​ធ្វើការ​ទេ។ អ៊ីចឹង​អ្នក​ផ្សេង​ទៀត អត់​បាន​ដឹង​ទេ។ ដូចគ្នា​អ៊ីចឹង គឺ​ថ្នាក់​ជាតិ​ទៅ​ពី​ក្រោយ ខ្ញុំ​ជឿជាក់​ថា មិន​អាច​រក​ឃើញ​​ភស្តុតាង​អ្វី​ឲ្យ​ច្បាស់​លើស​ពី​អ្នក​ខាង​មុន​ទេ»

ប៉ុន្តែ​សម្រាប់​គណបក្ស​សង្គ្រោះ​ជាតិ​វិញ ​​បាន​ចាត់​ទុក​ការ​ស្លាប់​របស់​ លោក ទិត រ៉ន កូន​ប្រុស​សកម្មជន​គណបក្ស​ នៅ​ក្នុង​ពន្ធនាគារ​ខេត្ត​កំពង់ចាម​ថា ជា​ឃាតកម្ម​នយោបាយ​ តាម​រូបភាព​ថ្មី​មួយ ដែល​ធ្វើឡើង​ដោយ​របប​ក្រុង​ភ្នំពេញ។ សេចក្ដី​ថ្លែងការណ៍ ចេញ​ផ្សាយ​​កាល​ពី​ថ្ងៃ​ទី៦ ឧសភា បក្ស​ប្រឆាំង​ចោទ​ថា របប​ក្រុង​ភ្នំពេញ​ ព្យាយាម​គេច​ចេញ​ពី​ការ​ទទួល​ខុស​ត្រូវ ក្នុង​គោល​បំណង​បិទ​បាំង​ការ​ពិត​នូវ​ទង្វើ​ដ៏​ឃោរឃៅ​ទៅ​លើ​ជន​រង​គ្រោះ ជា​កូន​ប្រុស​របស់​សកម្មជន​បក្ស​ប្រឆាំង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល