ប្រធានាធិបតីអាមេរិកស្វាគមន៍មេដឹកនាំអាស៊ានជាលើកដំបូងនៅសេតវិមាន
ប្រធានាធិបតីអាមេរិកលោក ចូ បៃឌិន (Joe Biden) បានស្វាគមន៍មេដឹកនាំអាស៊ានជាលើកដំបូង និងជាប្រវត្តិសាស្ត្រនៅក្នុងសេតវិមាន កាលពីល្ងាចថ្ងៃទី១២ ខែឧសភា។
លោក ចូ បៃឌិន (Joe Biden) បានសរសេរនៅលើទំព័រហ្វេសប៊ុករបស់លោកថា ការស្វាគមន៍មេដឹកនាំអាស៊ាននៅសេតវិមាន (White House) ជាលើកដំបូងនៅក្នុងប្រវត្តិសាស្ត្រនេះ គឺដើម្បីបញ្ជាក់ថា សហរដ្ឋអាមេរិកមានការប្តេជ្ញាចិត្តខ្ពស់ចំពោះបណ្តាប្រទេសនៅតំបន់អាស៊ីអាគ្នេយ៍នេះ។ លោកថា នៅក្នុងជំនួបនេះ ភាគីទាំងពីរបានជជែកអំពីសារសំខាន់នៃការធ្វើការរួមគ្នាដើម្បីធានានូវសន្តិសុខ ការរីកចំរើន និងការគោរពសិទ្ធិមនុស្សសម្រាប់ប្រជាជនអាស៊ាននិងអាមេរិកជាង១ពាន់លាននាក់។
ជំនួបនេះបានធ្វើឡើង បន្ទាប់ពីមេដឹកនាំអាស៊ាន និងអគ្គលេខាធិការអាស៊ាន បានជួបពិភាក្សាជាមួយប្រធានរដ្ឋសភាអាមេរិកអ្នកស្រី ណាន់ស៊ី ប៉េឡូស៊ី (Nancy Pelosi) កាលពីល្ងាចថ្ងៃទី១១ ខែឧសភា។
នៅក្នុងជំនួបនោះប្រធានរដ្ឋសភាអាមេរិកអ្នកស្រី ណាន់ស៊ី ប៉េឡូស៊ី (Nancy Pelosi) បានស្វែងរកការគាំទ្រឋានៈរបស់សភាសហរដ្ឋអាមេរិកជាអ្នកសង្កេតការណ៍សភាអន្តរសភាអាស៊ាន។
នៅក្នុងសុន្ទរកថារបស់អ្នកស្រី បានលើកឡើងពីចំណុចសំខាន់ៗចំនួន៣ រួមមាន បញ្ហាឥណ្ឌូ- ប៉ាស៊ីហ្វិក បញ្ហាសេដ្ឋកិច្ច និងការប្តេជ្ញាចិត្តរបស់សហរដ្ឋអាមេរិកក្នុងការលើកដំកើងលទ្ធិប្រជាធិបតេយ្យ។
ក្រៅពីនេះ អ្នកស្រីក៏បានលើកឡើងពីបញ្ហាការឈ្លានពានរបស់រុស្ស៊ីទៅលើប្រទេសអ៊ុយក្រែន បញ្ហាសមុទ្រចិនខាងត្បូង បញ្ហាជំងឺកូវីដ-១៩ ការជំរុញឱ្យមានការប្រើប្រាស់ថាមពលបៃតងសម្រាប់អនាគត និងការលុបបំបាត់បញ្ហាអាកាសធាតុជាដើម។
នៅក្នុងជំនួបបិទទ្វារជិត៤ម៉ោងនេះ អ្នកស្រីក៏លើកឡើងពីក្តីកង្វល់លើការគំរាមកំហែងទៅលើបញ្ហាលទ្ធិប្រជាធិបតេយ្យ សិទ្ធិមនុស្ស សេរីភាពសារព័ត៌មាន ការបញ្ចេញមតិ សាសនា នីតិរដ្ឋ ការគោរពសិទ្ធិស្ត្រី និងក្មេងស្រី និងបញ្ហាសហគមន៍អ្នកស្រលាញ់ភេទដូចគ្នាផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។