មន្ត្រីជាន់ខ្ពស់របស់គណបក្សប្រជាជនកម្ពុជា ទទួលស្គាល់ថា ការតែងតាំងកូនស្នងឪពុក ប្រាកដជារបៀបសន្តតិវង្សមែន។ ការលើកឡើងនេះ ធ្វើឡើងបន្ទាប់ពីអ្នកឃ្លាំមើល និងយុវជនលើកឡើងថា ការតែងតាំងលោក ទៀ សុខា ជាមេបញ្ជាការកងទ័ពជើងទឹក ជំនួសលោក ទៀ វិញ ជាឪពុកថា ជាអំណាចសន្តតិវង្សតពូជរបស់គណបក្សប្រជាជនកម្ពុជា ដែលជាវប្បធម៌ផ្ដាច់ការបំផ្លាញជាតិ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ប្រាប់វិទ្យុអាស៊ីសេរី នៅថ្ងៃទី១៥ ខែកុម្ភៈថា នេះជាសិទ្ធិតែងតាំងរបស់គណបក្សឈ្នះឆ្នោត។ ទោះជាយ៉ាងណាក្ដី លោកទទួលស្គាល់ថា ការតែងតាំងជាបន្តបន្ទាប់មក តាំងពីលោក ហ៊ុន ម៉ាណែត ឡើងជានាយករដ្ឋមន្ត្រី ជំនួសលោក ហ៊ុន សែន ប្រាកដជារបៀបសន្តតិវង្សមែន។
លោក សុខ ឥសាន៖«អ៊ីចឹងវាប្រាកដជាសន្តតិវង្សនឹងហើយ ដូច្នេះមិនបាច់ឆ្ងល់ទេ។ សម្ដេចតេជោ ហ៊ុន សែន លោកឧទ្ទេសនាមសម្ដេច ហ៊ុន ម៉ាណែត ជាបេក្ខជននាយករដ្ឋមន្ត្រី ហើយឥឡូវជាប់សម្ដេចធិបតីជានាយករដ្ឋមន្ត្រីហើយ។ កូនៗ របស់ឥស្សរជនជាន់ខ្ពស់របស់គណបក្សប្រជាជនកម្ពុជា សុទ្ធតែត្រូវបានទទួលការតែងតាំងក្នុងតួនាទីនិងតំណែងជាន់ខ្ពស់ក្នុងរាជរដ្ឋាភិបាល។ ដូច្នេះមិនបាច់ឆ្ងល់អីទេ ពូជទេវតាតែងតាំងយកកូនទេវតា ចៅទេវតាយកមកតែងតាំង។
ការលើកឡើងរបស់លោក សុខ ឥសាន ជាការឆ្លើយតបនឹងការរិះគន់របស់អ្នកឃ្លាំមើល និងយុវជន ដែលថា របបដឹកនាំរបស់រដ្ឋាភិបាលគ្រួសារត្រកូល ហ៊ុន កាន់តែផ្អៀងស្រដៀងនឹងការអនុវត្តដូចនៅប្រទេសកូរ៉េខាងជើងហើយ ខណៈគ្រប់តំណែង និងតួនាទីក្នុងស្ថាប័នរដ្ឋ ត្រូវផ្ទេរតាមត្រកូលគ្រួសារសាច់ញាតិ ដែលជាក់ស្ដែង ចុងក្រោយនេះ គឺការតែងតាំងលោក ទៀ សុខា ជាមេបញ្ជាការកងទ័ពជើងទឹក ជំនួសឪពុក គឺលោក ទៀ វិញ។
ព្រះមហាក្សត្រ សម្ដេចព្រះបរមនាថ នរោត្តម សីហមុនី បានឡាយព្រះហស្តលេខា លើព្រះរាជក្រឹត្យចុះថ្ងៃទី១៣ ខែកុម្ភៈ តែងតាំង លោក ទៀ សុខា ជាមេបញ្ជាការកងទ័ពជើងទឹក ជំនួសឪពុករបស់លោក តាមការស្នើរបស់លោកនាយករដ្ឋមន្ត្រី ហ៊ុន ម៉ាណែត។ ដោយឡែកឪពុករបស់លោក គឺលោក ទៀ វិញ ត្រូវបានលោក ហ៊ុន ម៉ាណែត តែងតាំងជារដ្ឋលេខាធិការក្រសួងការពារជាតិ។
អត្ថបទដែលទាក់ទង៖
គណៈរដ្ឋមន្ត្រីថ្មីរបស់នាយករដ្ឋមន្ត្រី ហ៊ុន ម៉ាណែត ពោរពេញទៅដោយបណ្តាញបក្ខពួកនិយមចាក់ស្រេះ
អ្នកស្រី ប៊ុន រ៉ានី ពីអតីតប្រពន្ធទាហានខ្មែរក្រហមមកជាស្ត្រីទី១ និងជាម្តាយនាយករដ្ឋមន្ត្រី
ប្រវត្តិសង្ខេបស្ត្រីទី១ អ្នកស្រី ពេជ ចន្ទមុន្នី ភរិយានាយករដ្ឋមន្ត្រី ហ៊ុន ម៉ាណែត
ប្រវត្តិអ្នកមានឥទ្ធិពលមួយចំនួន
ប្រធានអង្គការលទ្ធិប្រជាធិបតេយ្យខ្មែរប្រចាំប្រទេសអូស្ត្រាលីលោក ស៊ឹងសែន ករុណា ប្រាប់វិទ្យុអាស៊ីសេរីនៅថ្ងៃទី១៥ ខែកុម្ភៈ ថា នេះជាចរិតនៃវប្បធម៌ប្រព័ន្ធ ផ្ដាច់ការបន្តពូជ ដែលការពារគ្នា ក្នុងចំណោមក្រុមអ្នកកាន់អំណាច។ លោកថា ប្រព័ន្ធផ្ដាច់ការបែបនេះ ធ្វើបាប គំរាមកំហែង និងបំបាក់ស្មារតីប្រជាពលរដ្ឋ គឺ មិនមែនជានយោបាយបម្រើប្រជាពលរដ្ឋនោះទេ។
លោក ស៊ឹង សែនករុណា៖ «កាលណាប្រទេសដឹកនាំដោយមានបក្ខពួកនិយម គឺច្បាស់លាស់ណាស់ ច្បាស់ជាមានបញ្ហា កើតឡើងដោយសារតែមានអំពើពុករលួយហ្នឹងឯង ព្រោះថា ទន្ទឹមនឹងសែស្រឡាយបក្ខពួកអ៊ីចឹង យោគយល់គ្នាការពារគ្នា មិនព្រមអនុវត្តច្បាប់ឱ្យបានត្រឹមត្រូវទេ។ បញ្ហាប្រទេសជាតិយើងដឹងស្រាប់ហើយ ពួកហ្នឹង នឹងធ្វើការបំផ្លិចបំផ្លាញជាតិយើង ដោយបំផ្លាញនូវធនធានជាតិយើង ធនធានសង្គម ហើយប្រព្រឹត្តនូវល្មើសច្បាប់នានា អំពើអយុត្តិធម៌អីហ្នឹង គឺការពារគ្នាឯង»។
អង្គការតម្លាភាពអន្តរជាតិ (Transparency International) រកឃើញថា ស្ថានភាពអំពើពុករលួយនៅកម្ពុជា ក្នុងឆ្នាំ២០២៤ កាន់តែធ្ងន់ធ្ងរបើធៀបនឹងឆ្នាំ២០២៣ បន្ទាប់ពីគណបក្សប្រជាជនកម្ពុជា ផ្ទេរតំណែងទៅឱ្យអ្នកជំនាន់ថ្មីរបស់ខ្លួន ដោយកម្ពុជាស្ថិតនៅចំណាត់ថ្នាក់លេខ ១៥៨ ក្នុងចំណោម ១៨០ ប្រទេស ហើយកម្ពុជាគ្រាន់បើជាងប្រទេសមីយ៉ាន់ម៉ា (Myanmar) តែមួយប៉ុណ្ណោះ ក្នុងតំបន់អាស៊ាន។
របាយការណ៍របស់អង្គការតម្លាភាពអន្តរជាតិ កាលពីថ្ងៃទី១១ ខែកុម្ភៈ ឱ្យដឹងថា កម្ពុជាបន្តបោះជំហានយឺតយ៉ាវ ក្នុងការប្រឆាំងនឹងអំពើពុករលួយ ដែលបង្ហាញ ឱ្យឃើញនូវចំណុចខ្សោយបន្តកើតមាន ដោយសារអភិបាលកិច្ច ខ្វះសុចរិតភាពស្ថាប័ន។
យុវជនសង្គម លោក ម៉ា ចិត្រា ប្រាប់វិទ្យុអាស៊ីសេរីនៅថ្ងៃទី១៥ ខែកុម្ភៈថា តំណែង ស្នងពីឪពុកទៅកូននេះ មិនមែនជាគំរូល្អ នៃការដឹកនាំ ក្នុងសង្គមប្រជាធិបតេយ្យ នោះទេ ពីព្រោះគឺជាទម្លាប់គ្រួសារនិយម ។
លោក ម៉ា ចិត្រា៖ «ខ្ញុំគិតថា មន្ត្រីច្រើនណាស់ដែលគាត់ខិតខំប្រឹងប្រែងធ្វើការ តាំងពីជំនាន់សង្គ្រាមមក ហេតុអីបានអ្នកទាំងអស់នោះ គាត់មិនអាចត្រូវបានឡើងតំណែងធ្វើជាមេគេ ខណៈកូនរបស់អតីតមេដឹកនាំខាងការពារកងទ័ពជើងទឹកហ្នឹង បែរជា ត្រូវឡើងស្នងតំណែងពីឪពុក។ អាហ្នឹងខ្ញុំគិតថា វាមិនមែនជាគំរូល្អ សម្រាប់ប្រទេសកម្ពុជាយើង ដែលកាន់នូវលទ្ធិប្រជាធិបតេយ្យ»។
ឪពុករបស់លោក ទៀ សុខា គឺលោក ទៀ វិញ ស្ថិតក្នុងចំណោមឈ្មោះមន្ត្រីជាន់ខ្ពស់ នៃរដ្ឋាភិបាល និងយោធា ព្រមទាំងឈ្មួញគ្រាក់ៗសរុបចំនួន ៥នាក់ ដែលសហរដ្ឋ អាមេរិក ដាក់ទណ្ឌកម្មបង្កកទ្រព្យសម្បត្តិ និងរឹតត្បិតទិដ្ឋាការពីសហរដ្ឋអាមេរិក ដែលរួមមានមេកងអង្គរក្សលោក ហ៊ុន សែន គឺលោក ហ៊ីង ប៊ុនហៀង អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយលោក គន់ គីម អគ្គនាយកនៃនាយកដ្ឋានសម្ភារៈបច្ចេកទេស នៃក្រសួងការពារជាតិ លោក ចៅ ភិរុណ និងឈ្មួញបំផ្លាញព្រៃឈើឧកញ៉ា ទ្រី ភាព។
អ្នកឃ្លាំមើល លើកឡើងថា ក្នុងស្ថានភាពសង្គមកម្ពុជាបច្ចុប្បន្ន ដើម្បីអាចទប់ស្កាត់ វប្បធម៌ប្រព័ន្ធផ្ទេរតំណែងបក្ខពួកនិយមនេះ តម្រូវឱ្យប្រជាពលរដ្ឋ ហ៊ានប្រើសិទ្ធិ តាមរដ្ឋធម្មនុញ្ញ ប្រមូលផ្ដុំគ្នាទាមទារឱ្យមានកំណែទម្រង់ប្រព័ន្ធដឹកនាំរដ្ឋជារួម ដោយដាក់លក្ខខណ្ឌជាក់លាក់ថា ប្រសិនបើមេដឹកនាំមិនធ្វើការកែទម្រង់ទេ នោះ ប្រជាពលរដ្ឋនឹងបន្តតវ៉ាឱ្យមានការផ្លាស់ប្ដូរមេដឹកនាំរដ្ឋាភិបាលតែម្ដង៕