សាច់ញាតិសកម្មជនបក្សប្រឆាំងតវ៉ានៅមុខតុលាការជាថ្មីទាមទារពន្លឿនការដោះលែងគ្រួសាររបស់ពួកគាត់
2020.10.09
សាច់ញាតិសកម្មជនបក្សប្រឆាំងប្រមាណជាង ១០នាក់ ជួបជុំគ្នាស្រែកតវ៉ា និងលើកបដា នៅមុខសាលាដំបូងរាជធានីភ្នំពេញ ទាមទារឲ្យតុលាការនេះ ពន្លឿនការដោះលែងគ្រួសាររបស់ពួកគាត់ឲ្យមានសេរីភាពវិញ។ មន្ត្រីសិទ្ធិមនុស្សយល់ថា តុលាការគួរពិចារណាក្នុងការទម្លាក់ចោលបទចោទផ្សេងៗ និងដោះលែងពួកគាត់ឲ្យមានសេរីភាពវិញ ដើម្បីសម្រួលស្ថានការណ៍នយោបាយតានតឹងនៅកម្ពុជា។
ប្រពន្ធសមាជិកក្រុមប្រឹក្សាខេត្តកំពង់ធំជាប់ឆ្នោតគណបក្សសង្គ្រោះជាតិ លោក ស៊ុន ធន់ គឺលោកស្រី សេង ចាន់ថន បញ្ជាក់ថា លោកស្រីចង់ឲ្យតុលាការក្រុងភ្នំពេញដោះលែងប្ដីរបស់លោកស្រីឲ្យបានឆាប់ ដោយសារប្ដីលោកស្រី និងសកម្មជនដទៃទៀត មិនបានប្រព្រឹត្តកំហុសអ្វីឡើយ។ លោកស្រីថា ក្រុមសកម្មជនសង្គ្រោះជាតិ ដែលកំពុងជាប់ឃុំ រួមទាំងប្ដីលោកស្រីផង កំពុងប្រឈមនឹងបញ្ហាសើស្បែក និងអាចប្រឈមនឹងជំងឺសួត ដោយសារការរស់នៅលាយឡំគ្នានឹងអ្នកទោសដទៃទៀត ក្នុងបន្ទប់តូចចង្អៀតមួយ ដូចជា អ្នកទោសសម្លាប់មនុស្ស អ្នកទោសជួញដូរគ្រឿង ដែលពួកគេជក់បារីបង្ហុយផ្សែងពេញបន្ទប់ កើតរមាស់ និងពិបាកគេងជាដើម។
ការស្រែកតវ៉ានៅមុខតុលាការក្រុងភ្នំពេញលើកនេះ មានអាជ្ញាធរប្រមាណ ២០នាក់ តាមឃ្លាំមើល ប៉ុន្តែពុំមានការរារាំងក្រុមអ្នកតវ៉ានោះទេ ខុសពីសព្វដងដែលក្រុមសន្តិសុខសាលារាជធានីភ្នំពេញរុញច្រាន ឬប្រើហិង្សាលើក្រុមស្ត្រីទាំងនោះ។
ក្រោយការតវ៉ានៅមុខសាលាដំបូងរាជធានីភ្នំពេញមក ក្រុមអ្នកតវ៉ាបានបន្តទៅ ដាក់ញត្តិនៅក្រសួងកិច្ចការនារី ដើម្បីឲ្យស្ថាប័ននេះ ជួយអន្តរាគមន៍បញ្ឈប់ការប្រើអំពើហិង្សារបស់ក្រុមអាជ្ញាធរលើពួកគាត់ ដែលតែងកើតមានជាប្រចាំរាល់ការតវ៉ាកន្លងទៅ។ មន្ត្រីក្រសួងកិច្ចការនារីបានចេញមកទទួលញត្តិនៅខាងក្រៅ ដោយមិនអនុញ្ញាតឱ្យពួកគាត់បានចូលទៅដាក់ញត្តិដល់ខាងក្នុងដូចស្ថាប័នដទៃនោះទេ។
លោកស្រី សេង ចាន់ថន ថ្លែងថា លោកស្រីសង្ឃឹមថា ក្រសួងកិច្ចការនារី និងតុលាការនឹងអាចរកយុត្តិធម៌ជូនលោកស្រី ដោយប្រើវិជ្ជាជីវៈរបស់ខ្លួន ក្នុងការអនុវត្តច្បាប់ ហើយចាប់យកជនដៃដល់ដែលប្រើហិង្សាលើក្រុមអ្នកតវ៉ា មកផ្ដន្ទាទោសតាមច្បាប់៖ «ខ្ញុំសុំសំណូមពរដល់រាជរដ្ឋាភិបាល សុំឲ្យគាត់រកភាពយុត្តិធម៌ឲ្យពួកខ្ញុំ ហើយសុំឲ្យថ្នាក់ដឹកនាំយកភាពយុត្តិធម៌ មានមេត្តា ករុណាដល់ប្រជាពលរដ្ឋ។ កន្លែងណាដែលប្រជាពលរដ្ឋគាត់គិតថា ជារឿងមួយដែលធ្វើបាបពួកគាត់ អ៊ីចឹងគួរតែរាជរដ្ឋាភិបាលហ្នឹង គាត់ចុះមកមើល ជួយដោះស្រាយនូវទុក្ខលំបាករបស់ពួកខ្ញុំហ្នឹង កុំឲ្យមានអ្នកធំៗ មួយចំនួន អ្នកប្រជាការពារអីមួយចំនួនមកធ្វើបាបពួកខ្ញុំអ៊ីចឹងទៀត សូមឲ្យគាត់ចុះមកមើលផ្ទាល់ផង កុំឲ្យបានតែស្រែកនៅក្នុងទូរទស្សន៍»។
អនុប្រធាននាយកដ្ឋានព័ត៌មាននៃក្រសួងកិច្ចការនារី លោកស្រី ប៉ែន គន្ធា ឱ្យដឹងថា ក្រសួងកិច្ចការនារីបានទទួលញត្តិពីក្រុមស្ត្រីតវ៉ារួចហើយ ហើយនឹងបញ្ជូនសំណុំរឿងនេះទៅឲ្យអ្នកជំនាញផ្លូវច្បាប់ដោះស្រាយបន្ត ដោយមិនទុកចោលនោះទេ៖ «ខាងរដ្ឋបាល គាត់បានចុះមកទទួលហើយតើបង។ ធម្មតា យើងយកញត្តិហើយ យើងផ្តល់ទៅឲ្យអ្នកជំនាញគាត់អ្នកដោះស្រាយបន្តទៀតហើយ។ យើងមាននាយកផ្លូវច្បាប់ យើងមានអីបន្តទៀត យើងនឹងធ្វើការបន្តទៀតតាមហ្នឹងអ៊ីចឹង មិនមែនគ្រាន់តែសួរហើយយកមកទុកទេ»។
ចំណែក ប្រធានផ្នែកសិទ្ធិមនុស្សនៃសមាគមការពារសិទ្ធិមនុស្សអាដហុក (Adhoc) លោក នី សុខា មានប្រសាសន៍ថា ការតវ៉ារបស់ក្រុមស្ត្រី ដែលជាប្រពន្ធ ឬសាច់ញាតិសកម្មជនបក្សប្រឆាំងនេះ គឺជាការប្រើប្រាស់សិទ្ធិក្នុងការបញ្ចេញមតិ និងការតវ៉ាដោយសន្តិវិធី។ លោកបន្តថា រដ្ឋាភិបាល និងស្ថាប័នតុលាការ គួរពិចារណាក្នុងការទម្លាក់ចោលបទចោទប្រកាន់ ដោយសារការចាប់ឃុំខ្លួនសកម្មជនបក្សប្រឆាំងកន្លងមក មិនមែនជាការអនុវត្តទៅតាមគោលការច្បាប់ជាធំនោះទេ តែពាក់ព័ន្ធនឹងស្ថានភាពចម្រូងចម្រាសខាងនយោបាយ៖ «យើងមានតែទទូចស្នើឲ្យតុលាការហ្នឹងលោកពិចារណាក្នុងស្ថានភាពបែបនេះ បើថា យើងមិនអាចដោះលែងឲ្យគាត់មានសេរីភាព ទម្លាក់ចោលការចោទប្រកាន់ ក៏គួរយើងពិចារណានៅក្នុងការឲ្យគាត់នៅក្រៅឃុំបណ្ដោះអាសន្នអីក៏យើងអាចសម្រួលស្ថានការណ៍នយោបាយតានតឹងហ្នឹងបានមួយចំណែកដែរ។ ប្រសិនបើយើងអាចមានមធ្យោបាយក្នុងការធ្វើម៉េចឲ្យគាត់រស់នៅក្រៅឃុំបណ្ដោះអាសន្ន ហើយរឿងមួយគឺរឿងដែលចំណេញហ្នឹងគឺថា វាមានការណ៍ចំណេញទៅដល់ទី១ អាចសម្រួលស្ថានការណ៍នយោបាយឲ្យវាមានភាពធូរស្រាលមកវិញ ទី២ វាអាចចំណេញទៅដល់ខាងរដ្ឋដែរ គឺថាមិនសូវខ្វល់ខ្វាយអំពីការដោះស្រាយបញ្ហាជីវភាពរបស់ពួកគាត់នៅក្នុងពន្ធនាគារ ហើយដែលពន្ធនាគារយើងសព្វថ្ងៃកំពុងតែណែនណាន់តាន់តាប់ទៅដោយអ្នកជាប់ឃុំនៅក្នុងហ្នឹង»។
ចាប់តាំងពីខែមករាឆ្នាំ២០២០ មក មានសកម្មជននយោបាយ ព្រះសង្ឃ យុវជន និង សកម្មជនសង្គម ជាង ៣០នាក់ហើយ ដែលអាជ្ញាធរចាប់ខ្លួនដាក់ពន្ធនាគារ។ តុលាការបានចោទប្រកាន់អ្នកទាំងនោះ ពីបទរួមគំនិតក្បត់ ញុះញង់ឲ្យយោធាមិនស្ដាប់បង្គាប់ ញុះញង់ឲ្យប្រព្រឹត្តបទឧក្រិដ្ឋជាអាទិ៍ ញុះញង់បង្កឱ្យមានភាពវឹកវរនៅក្នុងសង្គម និងពីបទប្រមាថថ្នាក់ដឹកនាំរដ្ឋាភិបាលជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។