លោក រ៉ុង ឈុន នឹង​យក​លុយ​១/៣​ដែល​បាន​ពី​គ.ជ.ប​ទៅ​ទ្រទ្រង់​សមាគម​និង​សហជីព

ដោយ ម៉ម មុនីរតន៍
2015-04-21
អ៊ីម៉ែល
មតិ
Share
បោះពុម្ព
សមាជិក​គណៈកម្មាធិការ​ជាតិ​រៀបចំ​ការ​បោះ​ឆ្នោត (គ.ជ.ប) លោក រ៉ុង ឈុន ផ្ដល់​បទសម្ភាសន៍​ដល់​វិទ្យុ​អាស៊ីសេរី កាល​ពី​ថ្ងៃ​ទី​២០ មេសា ឆ្នាំ​២០១៥។
សមាជិក​គណៈកម្មាធិការ​ជាតិ​រៀបចំ​ការ​បោះ​ឆ្នោត (គ.ជ.ប) លោក រ៉ុង ឈុន ផ្ដល់​បទសម្ភាសន៍​ដល់​វិទ្យុ​អាស៊ីសេរី កាល​ពី​ថ្ងៃ​ទី​២០ មេសា ឆ្នាំ​២០១៥។
RFA/Morm Moniroth

អតីត​ប្រធាន​សមាគម​គ្រូបង្រៀន​កម្ពុជា​ឯករាជ្យ និង​ជា​អតីត​ប្រធាន​សហភាព​សហជីព​កម្ពុជា ផង បាន​សន្យា​ថា លោក​នឹង​បរិច្ចាគ​ប្រាក់​បៀវត្ស​ផ្ទាល់​ខ្លួន​សម្រាប់​ជម្រក​ដែល​លោក​ធ្លាប់​រស់​នៅ​អស់​ពេល​ជា​ច្រើន​ណាស់​មក​ហើយ។ ថវិកា​ដែល​លោក រ៉ុង ឈុន សន្យា​ថា នឹង​ផ្ដល់​នេះ គឺ​ជា​លុយ​ដែល​លោក​ទទួល​បាន​ពី​ប្រាក់​ប្រចាំ​ខែ​នៃ​ស្ថាប័ន គ.ជ.ប។

សមាជិក​គណៈកម្មការ​ជាតិ​រៀបចំ​ការ​​បោះឆ្នោត​ថ្មី (គ.ជ.ប) ដែល​មក​ពី​កូតា​គណបក្ស​សង្គ្រោះ​ជាតិ បាន​ប្រកាស​ថា ខ្លួន​នឹង​បរិច្ចាគ​ប្រាក់​បៀវត្ស​ផ្ទាល់​ខ្លួន​មួយ​ភាគ​បី​នៃ​ប្រាក់​ខែ​ដែល​ទទួល​បាន​ពី គ.ជ.ប ដើម្បី​ទ្រទ្រង់​សមាគម​គ្រូបង្រៀន​កម្ពុជា​ឯករាជ្យ និង​សហភាព​សហជីព​កម្ពុជា ឲ្យ​ដំណើរការ។

លោក រ៉ុង ឈុន ដែល​នៅ​ពេល​នេះ គឺ​ជា​សមាជិក​គណៈកម្មាធិការ​ជាតិ​រៀបចំ​បោះឆ្នោត​ថ្មី​ឲ្យ​ដឹង​កាល​ថ្ងៃ​ទី​២០ មេសា ថា មូលហេតុ​ដែល​រូប​លោក​សម្រេច​ចិត្ត​លះបង់​ថវិកា​ផ្ទាល់​ខ្លួន ​នេះ ព្រោះ​យល់​ឃើញ​ថា លោក​ធ្លាប់​កម្សត់​កម្រ​អស់​ពេល​ជា​ច្រើន​ឆ្នាំ​ណាស់​មក​ហើយ​ជាមួយ​ជម្រក​ចាស់​មួយ​នេះ ហើយ​ដល់​ពេល​នេះ​ល្មម​លោក​អាច​ចែក​រំលែក​ចំពោះ​អ្វី​ដែល​លោក​មាន​ម្ដង​វិញ​ហើយ​ដែរ។

ធ្លាប់​ជា​អតីត​ប្រធាន​សមាគម​គ្រូបង្រៀន​កម្ពុជា​ឯករាជ្យ និង​ជា​អតីត​ប្រធាន​សហភាព​សហជីព​កម្ពុជា​ផង ថ្លែង​បន្ត​ថា លុយ​ដែល​លោក​នឹង​ផ្ដល់​វិភាគ​ទាន​នេះ ប្រមាណ ១ ភាគ ៣ នៃ​ប្រាក់​ខែ​ដែល​លោក​ទទួល​បាន​ពី​ស្ថាប័ន​ដែល​លោក​កំពុង​បម្រើការ​នេះ។

លោក រ៉ុង ឈុន៖ «ថវិកា​នេះ ជា​ថវិកា​ខ្ញុំ​ទទួល​មក​ជា​កម្មសិទ្ធិ​របស់​ខ្ញុំ។ អ៊ីចឹង​ខ្ញុំ​អាច​ចែក​រំលែក ឬ​មួយ​ខ្ញុំ​ថា ខ្ញុំ​ជា​លក្ខណៈ​មនុស្សធម៌ ដើម្បី​ខ្ញុំ​ជួយ​ស្ថាប័ន​មួយ​ដែល​មិន​មាន​ប្រាក់​គ្រប់គ្រាន់​សម្រាប់​ទ្រទ្រង់​សកម្មភាព​របស់​ខ្លួន។ ខ្ញុំ​ចង់​ឲ្យ​ស្ថាប័ន​នោះ​មាន​ដំណើរការ​ទៅ​មុខ​ទៀត ក្នុង​ការ​ការពារ​គ្រូបង្រៀន ការពារ​ដល់​ផលប្រយោជន៍​កម្មករ»

បើ​ដូច​អ្វី​ដែល​​លោក រ៉ុង ឈុន លើក​ឡើង គឺ​ថវិកា​ដែល​ផ្ដល់ ១ ភាគ ៣ នោះ​អាច​ស្មើ​ប្រមាណ​ជាង ១.៦​លាន​រៀល ដែល​ប្រាក់​ខែ​គោល​នៃ​សមាជិក គ.ជ.ប ចាស់​ធ្លាប់​ទទួល​បាន​ប្រមាណ ៥​លាន​រៀល​ក្នុង​មួយ​ខែ។

ក្រុម​អង្គការ​មិន​មែន​រដ្ឋាភិបាល​យល់​ឃើញ​ថា នេះ​ជា​ទម្លាប់​ល្អ​នៅ​ក្នុង​សង្គម ហើយ​ក៏​ជា​សប្បុរស​ធម៌​មួយ​ផ្នែក​ទៀត​សម្រាប់​ទ្រទ្រង់​សកម្មភាព​ដល់​អ្នក​ដទៃ​ឲ្យ​រស់​ដូច​គ្នា។

លោក អំ សំអាត មន្ត្រី​ជាន់ខ្ពស់​នៃ​អង្គការ​លីកាដូ (Licadho) ចាត់​ទុក​ថា ការ​លះបង់​របស់​លោក រ៉ុង ឈុន នៅ​ពេល​នេះ គឺ​ជា​គំរូ​មួយ​ដ៏​ល្អ ដែល​អ្នក​មាន​លទ្ធភាព​ផ្សេង​ទៀត​គប្បី​មាន​សមានចិត្ត​ដូច​នេះ។

លោក អំ សំអាត បន្ត​ថា៖ «ខ្ញុំ​គិត​ថា នេះ​វា​ជា​គំរូ ឬ​ក៏​វីរភាព​ដ៏​ល្អ ពីព្រោះ​ការ​ចែក​រំលែក ការ​ចេះ​ជួយ​ទុក្ខធុរៈ​គ្នា​ទៅ​វិញ​ទៅ​មក នេះ​ជា​វប្បធម៌ និង​ប្រពៃណី​របស់​ខ្មែរ។ ការ​ជួយ​រំលែក​ទាំង​ទុក្ខ ការ​ជួយ​រំលែក​ទាំង​ការ​មាន​សម្រាប់​ការ​រស់រាន និង​ដំណើរការ​នៃ​ការងារ​របស់​ខ្លួន​គ្រប់ៗ​គ្នា។ នេះ​ជា​វប្បធម៌​មួយ​ដ៏​ល្អ។ វា​បញ្ច្រាស​អំពី​បញ្ហា​សង្គម​បច្ចុប្បន្ន អ្នក​ដែល​មាន​កប់​ពពក អ្នក​ដែល​ក្រីក្រ​មែន​ទែន។ យើង​មើល​ទៅ​ឃើញ​គម្លាត​មេឃ​និង​ដី»

បើ​ទោះ​ជា​បែប​ណា សម្រាប់​ប្រទេស​កម្ពុជា បច្ចុប្បន្ន​នេះ អ្នក​ដែល​មាន​ទ្រព្យសម្បត្តិ​ជា​ឧកញ៉ា មន្ត្រី​ជាន់​ខ្ពស់ និង​អ្នក​ជំនួញ​ជាដើម មាន​ច្រើន​ណាស់​ដែរ ក៏ប៉ុន្តែ​កម្រ​ឃើញ​មាន​ការ​បរិច្ចាគ​ទ្រព្យសម្បត្តិ​ផ្ទាល់​ខ្លួន​នៃ​ចំណែក​ណា​មួយ​ដើម្បី​ជួយ​អង្គការ​សហជីព ឬ​អង្គការ​មិនមែន​រដ្ឋាភិបាល​ណាស់។ លើស​ពី​នេះ​ទៀត ក្រៅ​ពី​ពុំ​បាន​ផ្ដល់​អ្វី​សម្រាប់​មនុស្ស​ធម៌​ហើយ ប៉ុន្តែ​ថែម​ទាំង​ប្រើប្រាស់​អំណាច​រំលោភ​សិទ្ធិ​រស់​នៅ​ប្រឆាំង​ពលរដ្ឋ ឈូស​ឆាយ​ដី និង​លំនៅឋាន​ថែម​ទៀត​ផង។

អ្នក​មាន​ខ្លះ​អាច​មាន​លទ្ធភាព​ប្រើប្រាស់​រថយន្ត រហូត​ដល់​តម្លៃ​រាប់​សែន​ដុល្លារ និង​រស់​នៅ​ក្នុង​វិឡា​ដ៏​ស្កឹមស្កៃ ហើយ​អាច​សល់​ដី​រាប់​ឡូត៍​ថែម​ទៀត​ក៏​មាន។ ទន្ទឹម​នឹង​នេះ មាន​ពលរដ្ឋ​រាប់​ម៉ឺន​គ្រួសារ​កំពុង​រស់​នៅ​ដោយ​លំបាក ខ្វះ​មុខ​ខ្វះ​ក្រោយ និង​មាន​ពេល​ខ្លះ ស្ទើរ​រក​អង្ករ​ច្រក​ឆ្នាំង​ពុំ​បាន​ផង។ បើ​ទោះ​ជា​បែប​ណា មាន​ការ​ផ្ដល់​វិភាគទាន​ខ្លះ​ដែរ ក៏ប៉ុន្តែ​បើ​ជ្រុល​ថា បរិច្ចាគ​វិញ គឺ​ធ្វើ​តាម​រយៈ​ខ្សែ​បក្ស ធ្វើ​ដើម្បី​មុខមាត់ ឬ​សម្រាប់​មុខ​តំណែង និង​តួនាទី​អ្វី​មួយ​ទៅ​វិញ។

លោក រ៉ុង ឈុន ដែល​ធ្លាប់​ត្រូវ​បាន​រង​ការ​គំរាម​ប្រមាថ​អាយុ​ជីវិត និង​ជីវិត​រស់​ក្នុង​ពន្ធនាគារ ជាពិសេស មាន​សំណុំរឿង​ជា​ច្រើន​ជាប់​បណ្ដឹង​នៅ​តុលាការ​ខ្លះ​ផង សន្យា​ថា លោក​នឹង​នៅ​តែ​បន្ត​ផ្ដល់​ថវិកា​ដែល​រក​បាន​ពី​ការងារ​ថ្មី​នេះ​ទ្រទ្រង់​សកម្មភាព​ដើម្បី​ឲ្យ​សមាគម និង​សហភាព​សហជីព​កម្ពុជា អាច​ដំណើរ​ការ​បាន​ទៅ​មុខ ដរាប​ណា​អង្គភាព​ទាំង​ពីរ​នេះ អាច​មាន​លទ្ធភាព​រស់​ដោយ​ខ្លួន​ឯង​បាន។

អ្នកស្រី យ៉ាង សុភ័ណ្ឌ ប្រធាន​សម្ព័ន្ធ​សហជីព​កម្ពុជា និង​ជា​ប្រធាន​ស្ដីទី​នៃ​សហភាព​សហជីព​កម្ពុជា ដែល​ទទួល​បន្ទុក​បន្ត​ពី​លោក រ៉ុង ឈុន ថ្លែង​ថា ការងារ​ថ្មី​មួយ​ទៀត​នេះ វា​ពិត​ជា​អម្រែក​ដ៏​ធ្ងន់​បន្ថែម​ទៀត​សម្រាប់​អ្នកស្រី ក៏ប៉ុន្តែ ដើម្បី​អាច​ឲ្យ​ការងារ​ថ្មី​នេះ​ដំណើរការ​ទៅ​បាន អ្នកស្រី​ត្រូវ​អត់ធ្មត់៖ «នេះ​ជា​បន្ទុក​មួយ​ហើយ ប៉ុន្តែ​គ្រាន់​តែ​យើង​មិន​ដឹង​ថា​ធ្វើ​ម៉េច​ទេ ក្នុង​នាម​យើង​ជា​អ្នក​ធ្វើ​ការ​ជួយ​សង្គម។ យើង​ត្រូវ​តែ​ធ្វើ​ការ​តស៊ូ​មតិ​តទៅ​ទៀត ក្នុង​ការ​ជួយ​កម្មករ ក៏​ដូច​ជា​ជួយ​លោក​គ្រូ អ្នក​គ្រូ​ដែល​ជា​សមាជិក​របស់​សហភាព»

សព្វថ្ងៃ​នេះ ទាំង​សមាគម​គ្រូបង្រៀន​កម្ពុជា​ឯករាជ្យ និង​សហភាព​សហជីព​កម្ពុជា មាន​សមាជិក​ប្រមាណ​ជាង ៣​ម៉ឺន​នាក់​នៅ​ទូទាំង​ប្រទេស​កម្ពុជា។ លោក រ៉ុង ឈុន ថ្លែង​ថា សម្រាប់​ស្ថាប័ន​ទាំង​ពីរ​នេះ គឺ​ពិត​ជា​មាន​គម្រោង​ថវិកា​ដ៏​តិចតួច​ស្ដួចស្ដើង​ណាស់​ដើម្បី​ទ្រទ្រង់​ឲ្យ​មាន​សកម្មភាព​ប្រចាំ​ថ្ងៃ​នោះ។ ដោយ​ឡែក ចំពោះ​សមាគម​គ្រូបង្រៀន​កម្ពុជា​ឯករាជ្យ​មួយ ម្ចាស់​ជំនួយ​បាន​បញ្ចប់​គម្រោង​របស់​ខ្លួន​រួច​ទៅ​ហើយ ចាប់​ពី​តាំង​ពី​ខែ​កុម្ភៈ មក​ម្ល៉េះ ដែល​ទទួល​បាន​មូលនិធិ​ពី​អង្គការ Action aid។ ក្រៅ​ពី​នេះ សហភាព​សហជីព​កម្ពុជា វិញ ក៏​នឹង​ត្រូវ​បញ្ចប់​គម្រោង​ថវិកា​របស់​ខ្លួន​ដែរ ដែល​ទទួល​បាន​មូលនិធិ​ពី Unison របស់​ចក្រភព​អង់គ្លេស។ គម្រោង​ថវិកា​នេះ នឹង​បញ្ចប់​នៅ​ខែ​តុលា ខាង​មុខ​នេះ​ហើយ។

បន្ទាប់​ពី​គម្រោង​ថវិកា​ដែល​នឹង​បញ្ចប់​ក្នុង​ពេល​ដ៏​ខ្លី​ខាង​មុខ​នេះ​ទៀត លោក រ៉ុង ឈុន និយាយ​​ថា ដើម្បី​អាច​ដំណើរការ​ទៅ​បាន គឺ​មាន​តែ​ថវិកា​បដិភាគ​ពី​សមាជិក​ដែល​ក្នុង​ម្នាក់ៗ​អាច​បង់ ១ពាន់​រៀល​ជា​រៀងរាល់​ខែ​ប៉ុណ្ណោះ។

ចំណែក​អ្នកស្រី អ៊ុក ឆាយាវី ពី​មុន​គឺ​ជា​អនុ​ប្រធាន​សមាគម​គ្រូបង្រៀន​កម្ពុជា​ឯករាជ្យ ដែល​នៅ​ពេល​នេះ អ្នកស្រី​ជា​ប្រធាន​ស្ដីទី​នៃ​សមាគម​នេះ យល់​ឃើញ​ថា តួនាទី​ថ្មី​នេះ គឺ​ពិត​ជា​បន្ទុក​សម្រាប់​អ្នកស្រី​សម្បើម​ណាស់។

អ្នកស្រី អ៊ុក ឆាយាវី ថ្លែង​បន្ត​ថា អ្នកស្រី​នឹង​ត្រូវ​ប្រឈម​មុខ​ជា​ច្រើន​សំណុំ​រឿង​បន្ត​ពី​លោក រ៉ុង ឈុន ដើម្បី​ដោះស្រាយ​វិវាទ​ដែល​លោកគ្រូ អ្នកគ្រូ ត្រូវ​ជួប​បញ្ហា ជាពិសេស​វិវាទ​ពាក់ព័ន្ធ​នឹង​ការ​បង្កក​ប្រាក់​បៀវត្ស​នៅ​ថ្នាក់​មូលដ្ឋាន៖ «តាម​ពិត​ទៅ​ការ​ដោះស្រាយ​ចំពោះ​បញ្ហា​គ្រូ​បង្រៀន​កន្លង​មក គឺ​ការ​រំលោភ​សិទ្ធិ​របស់​គាត់។ ការ​បង្កក​ប្រាក់​បៀវត្ស  ការ​ពង្រាយ​គាត់​ទៅ​តំបន់​ដាច់​ស្រយាល​ដែល​ឆ្ងាយ​ពី​ផ្ទះ​គាត់​រស់​នៅ​សព្វថ្ងៃ»។

លោក អំ សំអាត មន្ត្រី​ជាន់​ខ្ពស់​នៃ​អង្គការ​លីកាដូ យល់​ឃើញ​​ថា ប្រសិន​បើ​ប្រទេស​កម្ពុជា មាន​មនុស្ស​ជា​ច្រើន ចេះ​ចែក​រំលែក​នូវ​អ្វី​ដែល​ខ្លួន​មាន​ដល់​សង្គម​ជាតិ នឹង​ជំរុញ​ឲ្យ​ប្រទេស​កំពុង​អភិវឌ្ឍន៍​មួយ​នេះ អាច​វិវត្ត​ទៅ​បាន​លឿន ដូច​បណ្ដា​ប្រទេស​អភិវឌ្ឍន៍​មួយ​ចំនួន​ដែរ។

ដោយ​ឡែក លោក រ៉ុង ឈុន បន្ត​អំពាវនាវ​ដល់​សមាជិក​នៃ​សមាគម និង​សហជីព​ទាំង​អស់​ជួយ​ផ្ដល់​ថវិកា​ក្នុង​ចំណែក​ណា​មួយ​ដែល​ខ្លួន​មាន ដើម្បី​ទ្រទ្រង់​ឲ្យ​ស្ថាប័ន​ទាំង​ពីរ​នេះ អាច​បន្ត​សកម្មភាព​ទៅ​មុខ​បាន។ ក្រៅ​ពី​នេះ លោក​អះអាង​ថា ប្រសិន​បើ​សមាគម និង​សហភាព​សហជីព​កម្ពុជា ទាំង​នេះ​នៅ​តែ​ពុំ​មាន​ថវិកា​គម្រោង​គ្រប់គ្រាន់​ទេ លោក​នឹង​នៅ​តែ​បន្ត​ផ្ដល់​វិភាគ​ទាន​រហូត​កិច្ចការ​នៅ គ.ជ.ប ដែល​លោក​កំពុង​បម្រើការ​ត្រូវ​បញ្ចប់៕

ព័ត៌មាន (5)
Share

ប្អូនសុខ

ពី ភ្មំពេញ

ជូនពរ លោកពូ និងសមាគមន៍​លោកពូ ទទួលបានជោគជ័យ

Apr 26, 2015 12:20 AM

អ្នក​អាន​អនាមិក

នេះជា គំរូល្អ សំរាប់ក្មេង ជំនាន់ក្រោយ !

Apr 22, 2015 05:16 AM

Kone Khmer

Mr. Rong Chhun has done the right thing. This attitude is set as a model for the rest all the leader in the Khmer government ranges. Mr. Rong Chhun has contributed his own will for his own country. We are all Khmer people supporting him. This kind of man should be the leader for Khmer in the future.

Apr 21, 2015 02:33 PM

អ្នក​អាន​អនាមិក

ជឿអត់ថាអាមួយនេះវាធ្វើការងករាជ្យ?។ ពេលមុនវាអួតថាមិនចង់បានអំណាចទេ ចុះឥឡូវវាយ៉ាងមុិចហើយ?

Apr 21, 2015 08:53 AM

អ្នក​អាន​អនាមិក

នេះហើយហៅថាគតិបណ្ឌឹតហ៊ានចំណាយជូនជាតិតែគតិខាង
លួចនិងលក់ជាតិគេហៅប្រែតជញ្ជក់ឈាមជាតិបើនិយាយចំៗ
គឺគ្រួសារសម្តេចយើងតែម្តងតើថ្ងៃណាលោកស្កប់ស្កល់?លោក
ចេះធ្វើបុណ្យជូនជាតិប្រហែលវិចទៅផងហើយមើលទៅគួរបរិ
ចាកខ្លះហើយខ្មែរក្រច្រើនណាស់!១ឬ២ពាន់លានតាមសាធា
ណាសម្តេចជាទីគោរព!!!

Apr 21, 2015 05:52 AM

មើល​មតិ​ទាំង​អស់.

គេហទំព័រ​ទាំងមូល