សមត្ថកិច្ចឃាត់ខ្លួនជនជាតិចិន ៧នាក់ពាក់ព័ន្ធករណីផ្ទុះអាវុធនៅខេត្តព្រះសីហនុ
2024.09.03
ជនជាតិចិនឈ្មោះ ZHANG TAO អាយុ ៤៣ឆ្នាំ ជនសង្ស័យដែលនគរបាលឃាត់ខ្លួនបាន ក្រោយហេតុការណ៍បាញ់ប្រហារនៅសណ្ឋាគារ និងកាស៊ីណូសមុទ្រខៀវ នៅតាមបណ្ដោយឆ្នេរឯករាជ្យស្ថិតក្នុងក្រុងព្រះសីហនុ បណ្ដាលឱ្យមានអ្នករងរបួស ២នាក់ កាលពីយប់រំលងអធ្រាត្រថ្ងៃទី២ ខែកញ្ញា ឆ្នាំ២០២៤។
រូប៖ ហ្វេសប៊ុកស្នងការដ្ឋាននគរបាលខេត្តព្រះសីហនុ
សមត្ថកិច្ចខេត្តព្រះសីហនុឃាត់ខ្លួនជនសង្ស័យជនជាតិចិនចំនួន ៧នាក់ ពាក់ព័ន្ធករណីប្រើប្រាស់អាវុធបាញ់ប្រហារជនជាតិចិនមួយក្រុមទៀត នៅតំបន់ឆ្នេរឯករាជ្យ កាលពីយប់ថ្ងៃទី២ ខែកញ្ញា។ សង្គមស៊ីវិលរិះគន់ថា សមត្ថកិច្ចហាក់គ្មានវិធានតឹងតែង ចំពោះជនបរទេសមួយចំនួន ដែលនៅតែបន្តប្រើកាំភ្លើងបាញ់បោះសេរី តាមទីសាធារណៈនៅឡើយ ហើយបង្កក្ដីបារម្ភដល់ពលរដ្ឋ និងបន្លាចដល់ភ្ញៀវទេសចរ និងអ្នកជំនួញក្នុងខេត្តព្រះសីហនុ។
ក្នុងហេតុការណ៍បាញ់ប្រហារដោយជនជាតិចិនចំនួន ២ក្រុម កាលពីយប់រំលងអធ្រាត្រថ្ងៃទី២ ខែកញ្ញានៅសណ្ឋាគារ និងកាស៊ីណូសមុទ្រខៀវ នៅតាមបណ្ដោយឆ្នេរឯករាជ្យស្ថិតក្នុងក្រុងព្រះសីហនុ មានមនុស្ស ២នាក់រងរបួសធ្ងន់ ហើយសន្តិសុខជាជនជាតិខ្មែរម្នាក់ទៀតរងរបួសត្រង់ពោះនៅពេលចូលជួយអន្តរាគមន៍។
ជនសង្ស័យជាជនជាតិចិនចំនួន ៧នាក់ ត្រូវបានសមត្ថកិច្ចបង្ហាញអត្តសញ្ញាណ និងឃាត់ខ្លួនចោទប្រកាន់ពួកគេពាក់ព័ន្ធករណីប្រើអំពើហិង្សា និងកាន់កាប់អាវុធខុសច្បាប់។
ស្នងការនគរបាលខេត្តព្រះសីហនុ លោក ស រដ្ឋា ប្រាប់វិទ្យុអាស៊ីសេរី នៅថ្ងៃទី៣ ខែកញ្ញាថា ជនសង្ស័យជនជាតិចិនទាំង ៧នាក់ ត្រូវបានឃុំខ្លួនបណ្ដោះអាសន្ននៅស្នងការដ្ឋាននគរបាលខេត្ត និងគ្រោងបញ្ជូនពួកគេទៅតុលាការនៅថ្ងៃទី៤ ខែកញ្ញា។ លោកអះអាងបន្ថែមថា សមត្ថកិច្ចកំពុងស្រាវជ្រាវបន្តរកអ្នកពាក់ព័ន្ធ និងអ្នកលក់អាវុធទៅឱ្យក្រុមខ្មាន់កាំភ្លើងជនជាតិចិនទាំងនោះ។
លោក ស រដ្ឋា៖«ពាក់ព័ន្ធជាមួយការកាន់កាប់អាវុធជាតិផ្ទុះមិនមែនតែជនជាតិបរទេសទេ ជនជាតិខ្មែរក៏ដោយក៏ខុសច្បាប់ដែរ ពាក់ព័ន្ធបញ្ហាទាំងអស់នោះគាត់ត្រូវអនុវត្តទោស ហើយបើគាត់ជាជនបរទេសអនុវត្តត្រូវបណ្ដេញចេញពីប្រទេសកម្ពុជា។ ករណីនេះ ខ្ញុំកំពុងតែស្រាវជ្រាវ ប៉ុន្តែភាគច្រើនឱ្យតែពាក់ព័ន្ធការផ្ទុះអាវុធអីនេះមានទំនាស់»។
ក្នុងប្រតិបត្តិការបង្ក្រាបនេះ សមត្ថកិច្ចរឹបអូសបានកាំភ្លើងខ្លី និងគ្រាប់កាំភ្លើងជាច្រើនគ្រាប់ពីជនសង្ស័យ។
ទោះជាយ៉ាងណា មន្ត្រីសង្គមស៊ីវិលលើកឡើងថា ការស៊ើបអង្កេតរបស់សមត្ថកិច្ចស្វែងរកមេខ្លោង និងអ្នកជួញដូរអាវុធទៅឱ្យជនជាតិចិនមួយចំនួននាពេលកន្លងមក ហាក់គ្មានលទ្ធផលអ្វីឡើយ បើទោះជាអាវុធ និងគ្រាប់កាំភ្លើងជាច្រើន ត្រូវបានសមត្ថកិច្ចរឹបអូសបាន មានលេខសម្គាល់យ៉ាងណាក៏ដោយ។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ប្រចាំខេត្តព្រះសីហនុ អ្នកស្រី ជៀប សុធារី មានប្រសាសន៍ថា ជនបរទេស និងជនស៊ីវិលអាចមានអាវុធប្រើប្រាស់បាញ់បោះសេរីជាបន្តបន្ទាប់បានបង្កការភ័យខ្លាចដល់ពលរដ្ឋ និងបន្លាចដល់ក្រុមភ្ញៀវទេសចរ និងអ្នកជំនួញល្អៗក្នុងខេត្តព្រះសីហនុ។ អ្នកស្រីផ្ដល់ទស្សនៈថា ដើម្បីទប់ស្កាត់បញ្ហាជនបរទេសកាន់កាប់អាវុធខុសច្បាប់មានប្រសិទ្ធភាព អាជ្ញាធរត្រូវមានឆន្ទៈស្វែងរកមេខ្លោងដែលជួញដូរអាវុធទៅឱ្យជនបរទេសទាំងនោះ និងត្រូវចុះត្រួតពិនិត្យជាប្រចាំនៅទីតាំងបនល្បែងកាស៊ីណូ និងទីតាំងដែលជនបរទេសប្រមូលផ្ដុំគ្នារស់នៅច្រើន។
អ្នកស្រី ជៀប សុធារី៖ «វិធានការនៃការគ្រប់គ្រងអាវុធនៅស្រុកខ្មែរ គឺមានសមត្ថកិច្ច។ សមត្ថកិច្ចហ្នឹងមិនមែនថា ឱ្យតែសមត្ថកិច្ចគ្រប់គ្នាមានសិទ្ធកាន់កាប់អាវុធទេ។ អ៊ីចឹង អាវុធមានឋានៈ និងមានតួនាទីទៀតបានអាចប្រើប្រាស់អាវុធហ្នឹងបាន ហើយអាវុធមានការចុះលេខ ចុះមានថា អ្នកណាជាអ្នកកាន់កាប់ប្រើប្រាស់អាវុធហ្នឹង ហើយនៅពេលចុះបំពេញបេសកកម្មបានអាវុធយកទៅប្រើ បើមិនប្រើទេ ត្រូវមានឃ្លាំងដាក់។ ចុះហេតុអីអាវុធហ្នឹងបានទៅដល់ដៃជនស៊ីវិល ហើយជនស៊ីវិលមិនមែនខ្មែរ ជាជនបរទេសទៀត វាមកតាមណា? អ៊ីចឹង នៅពេលសមត្ថកិច្ចចាប់ជនពាក់ព័ន្ធនឹងរឿងហ្នឹង ជនសង្ស័យប្រើប្រាស់ហ្នឹងសុំឱ្យលោកជួយស្រាវជ្រាវឱ្យបានម៉ត់ចត់ជាទីបំផុត តើអាវុធចូលតាមច្រកណា ឬអ្នកណាជាម្ចាស់? ប្រសិនជាអាវុធហ្នឹងមានការចុះលេខអីត្រឹមត្រូវ គឺយើងដឹងហើយថា អ្នកណាជាម្ចាស់អាវុធ អ៊ីចឹងត្រូវស្រាវជ្រាវយកអ្នកទាំងអស់ហ្នឹងមកធ្វើការផ្ដន្ទាទោស»។
ថ្វីត្បិតកម្ពុជាពុំមានច្បាប់អនុញ្ញាតឱ្យជនស៊ីវិល និងជនបរទេសប្រើប្រាស់អាវុធក្ដី ប៉ុន្តែជនជាតិចិនមួយចំនួននៅកម្ពុជា នៅតែអាចប្រើប្រាស់អាវុធបាញ់បោះដោយសេរី។ លើសពីនេះ កាលពីពេលកន្លងមក មានករណីខ្លះ ពួកគេថែមទាំងប្រើប្រាស់កាំភ្លើងបាញ់តទល់នឹងសមត្ថកិច្ច ពេលដែលចុះបង្ក្រាប ដូចជា ករណីចាប់ជំរិត និងជួញដូរគ្រឿងញៀនជាដើម។ មន្ត្រីសង្គមស៊ីវិលតែងតែជំរុញដល់សមត្ថកិច្ចឱ្យស៊ើបអង្កេតស្វែងរកមេខ្លោងធំៗ ដែលនៅពីក្រោយការជួញដូរអាវុធទៅឱ្យជនល្មើស ព្រោះពួកគេចាត់ទុកប្រើប្រាស់អាវុធ ដោយជនបរទេស និងបាញ់បោះអនាធិបតេយ្យបែបនេះថា ជាការបង្កផលប៉ះពាល់ដល់សន្តិសុខសង្គម សេដ្ឋកិច្ច និងមាត់មុខប្រទេសជាតិធ្ងន់ធ្ងរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
អត្ថបទពេញនិយម
សង្គម
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ពលរដ្ឋ និងអ្នកឃ្លាំមើលថា ឧកញ៉ា លី យ៉ុងផាត់ ស័ក្តិសមទទួលទណ្ឌកម្មពីសហរដ្ឋអាមេរិក
- កម្ពុជា និងចិន «មិនអាចទប់ស្កាត់បញ្ហាឆបោកតាមអនឡាញ និងជួញដូរមនុស្សនៅកម្ពុជាបាន»